Friday, November 13, 2015

Thlaraulam Thanso Daan Lamzin: Beidong Lo Tein


By San No Thuan

Thuhmaihruai

Leilung tlun nuntu khawsak daan ih kan zirhawk bikmi cu zaamrang thei tawk ih thil tuah thei ding khi a si. Thuthimnak ah, mawtaw kan mawn tikah kan duhbikmi cu mi lan vuahvo in cak zet in feh vurvo thei sehla tihi kan duh bik. Traffic jam ih thlen duhnak thleng thei lo ih lamlak ah kan taang theu. Thlen duhnak ah zamrang teih thlen thei lo khi har kan ti cio. Cucu lei tisa ih kan feh daan a si. Thlaraulam teh ziangtin kan thangso ding? Ziangruangah, ka ziaza tha lo pawl ziangah vei khat te ah kan hlon thei lo? Ziangtin ka hlon thei ding?

Bible ih in zirh daan: beidong lo tein

1. Abraham
Pathian ih in zirhmi cu thinsau te ih hngah thei hi Pathian ih in zirh duhmi a si.
Abraham kha Pathian in a kawh tikah kum 75 a ti zo. Fa ka lo pe ding a tinak cu kum 75 ah a ti zo nan, kum 100 a kim lawngah fapa te Isaac a pe lai. Thinsau te ih hngah ding a zirh.  

2. Suahlannak
Israel pawl Igypt ram sung in a rak hruai suak tikah, thla khat hnih sung ih thleng thei dingmi kum 40 a rei pi. Kum reipi an thinlung le an ruahnak pawl kha Amah Pathian pakhat lawng duhdawt rinsan dingah a taat rero ta. Tipi sen kap ah an taang lo, hmai ah an nor rero ih netabik ah Canaan ram an thleng.

3. Cana Mopuai
Cana khua ih mopuai thu khal ah cu thotho. Anu Mary in ka fapa an cabit ti a cem thleng sokhaw tiah a va sim tikah, Jesuh in, “Ka caan a kim hrih lo” a ti men. An bei a dong hnu lawngah Pathian thu an ngai ding ti a thei. Pathian thu an ngai lawngah a sunlawinak a lang thei. Curuangah, an beidong a hngakta a si kha. Amah rinsan kan thiam tikih caangvaitu a si. 

4. Lazarus
Jesuh san lai khal ah, amaih khual tlun ringringnak Marhtha, Mary, le Lazarus thu khal ah cu thotho a si. Lazarus a dam lo zet ti ih an va kawh tikah, a thihhnu nili ti hnu ah a ra a si. Asinan, Pathian hrangah tlai ti a um lo. Sullam nei lo in a tlai dah lo. Pathian sunlawinak mangbangza in mipi in an hmuh ih Pathian hnen ih an pan theinak dingah a si sawn ti kan hmu.

Curuangah, Isaiah 40:31 sungah,

30Mino pawl hman an baang dingih
                        Tlangval khal an tha cem in an sawn ding.                 
31Sikhalsehla Bawipa a rinsan tu cu
                        An tha a tlung saal ding.
                        Muvanlai vekin thlapharh in an zam ding.
                        An tlan khal le an tha a baang lo ding;
                        An feh rero khal le thacem in an sawn dah lo ding.

Pathian ih daan cu Amah kha thinsau te ih beidong lo te ih hngah thei hi a si. Cumi a thei lotu pawl cu an bei a dong lohli.

James 5:7-8
7Cuti a si ruangah u le nau pawl, kan Bawipa a ra kir sal hlan tiang thinsaute in um uh. Lothlo pa khi ruathnik uh! A lo in thlairawl man nei a suah hlanlo thinsaute in a hngak a si. oruah le fur ruah rat ding khi thinsau in a hngak. 8Cubangtuk in nannih khal thinsau in um uh. Nan ruahsannak cu khohter uh. Ziangah tile Bawipa a ra thlennak ni a nai zo.

A hngak thei lo pawl ih kekar sual daan

·      Dungthluntu pawl khal an rak kai ih an that
·      Bible lettu pawl khal an rak that: William Tyndale
·      Ram hruaitu tha zetzet pawl khal an rak that: Aung San,
·      Martin Luther King Jr. an that.

Ziangah ziaza thiang ka nei thei lo

Francis de Sales, 17th Century ih thlaraulam pa cun, thianhlimnak nun ih kekar thei dingah, “thinsaunak, tangdornak, le daite (nuamte)” ih feh a tul. Cumi kan thiam lo ahcun, thlarau lam ah beidong le riahsia in lamlak ah kan taang ding. Kan thlarau lam dam lonak kha dam thei lo, luat thei nawn lomi vek ah kan ruat aw thei.

Christian ziaza, nun daan lam ah thanso kan tum tikah a har zetmi cu daan in kan neih zomi kan ziaza tha lo pawl an si. Cumi pawl hlon lo thei dingah, vei khat te ih hlon hlo a ngah lo. Pathian ih thu kha ngai sawn in, satan thu kan el kha kan tuah rero dingmi thu a si. A har zet ding. Tuih sun na neh khal le thaisunah tukforhnak a ra sal ding. Cu khal ah, Pathian thu ngai sawn in kekar kha thlacamnak thawn le rawlulhnak thawn tlaansan sinsin aw.

Nehnak a cotu pawl ih kekar daan cu an bah pang caan a um ding. An beidong lo in an ding sal thotho ih, an sungih nun tha lo nehnak Petu Pathian in nehnak i pe ding timi thawn hmai ah an feh.

Thintawinak cu thlaraulam thansonak ralpi
Thinsau te ih in tho in ding sal ih hmai kan feh lo cu, thlaraumi sinak lamzin ih a ralpi bik a si. A kumkum ih na sungih hram a tozomi pawl kha vei khat te in na hlon thei lo men ding. Mihrek khat nunnak ah vei khat te ih hlon thei khal an um ko. Asinan, mi tam sawn ih nunnak ahcun, nuam tete ih hlon le taansan khi a si sawn theu.

Pathian kha hramhram in kan hnek
Kan thin a sau lo tikah, Pathian in ka nunnak a tu rori ah thianhlim ter theh aw; zuu duh nawn lo nak i neih ter aw, khaini le kuak tu rori ah i lak sak aw tiah kan ti ciamco ih kan duh sal thotho tikah, Pathian in ziang hman a tuah thei vual lo tiah kan ti ciamco sal. Pathian kha hranhram in mangbangza tuah aw tiah thinsau lo zet in kan hnek ciamco theu. Kanmah in kum reipi kan nuncilhmi kha zaan khat ah thianfai ter kan duhmi cu a dikmi thlarau lam thansonak lamzin a si lo.

Nunau favon le thlarau lam thansonak
Thlarau lam thansonak taktak cu nunau fapawivek khi a si. Thinsau tein a naute thangso ding in a hngak ih a cawm a si. Zumtu cu Thlarau Thianglim naute a paitu kan si (Eph 1:13). Cuih, naute cun, kan thinlung, kan ruahnak, kan nunnak in luah khat tikah, lungawinak thawn kan khat. Ziangtin cuih naute cu kan thanso ter ding? Jesuh thawn kan pawlkom awk tam deuhdeuh ih, a lungput kha kan nunpi cihnak tikah, kanmah kah kan fate deuhdeuh dingih Jesuh sawn kha a tum deuhdeuh ding.

Thunetnak
Lei tisa daan ahcun ziang hmuahhmuah hi khulfung kan duh lo. Rang zet ih tuah le ti kan duh theh. Asinan, Pathian ih feh daan ahcun, nuam tete ih feh ih kan nunnak rem that hi a tumtahmi a si. Nun thianhlimnak le thlaraulam hlawhtlinnak na duh tikah, naupai vek in thinsau te in le beidong lo te in Pathian thu thawn cawm aw aw. Vei khat el men in, na tisa duhnak kha a hlo men lo ding. Pathian ih bomnak dil in na tluknak hmun ihsin tho awla, hmai ah feh aw. Pathian in i taansan dah lo ding. Ka tlaksamnak hmun ihsin Amah in i runhim ding. A kutcak a taanglai timi ruahsannak thawn a fehtu pawl cu Pathian in thazaang thar le nehnak a pek a si.

Isaiah 40:31 sungah,

30Mino pawl hman an baang dingih
                        Tlangval khal an tha cem in an sawn ding.                 
31Sikhalsehla Bawipa a rinsan tu cu
                        An tha a tlung saal ding.
                        Muvanlai vekin thlapharh in an zam ding.
                        An tlan khal le an tha a baang lo ding;
                        An feh rero khal le thacem in an sawn dah lo ding.


_____________________
San No Thuan
Nov. 13, 2015
Sermon at Pu Biak Kim Lian's residence
Frederick, MD 


If you have Mac Mail problem!

If you have Mac Maill problem like this: 

"We are unable to deliver the message from <sann.othuan@gmail.com>
to <globallaizo@yahoogroups.com>.

The email address used to send your message is not subscribed to this 
group. If you are a member of this group, please be aware that you may 
only send messages to this group using the email address(es) you have 
registered with Yahoo Groups."

Do the following steps: 

  • Open Mail and choose Preferences from the Mail menu.
  • Click Accounts in the Preferences window.
  • Select (highlight) your account on the left side of the window
  • Click the Account Information pane.
  • From the "Outgoing Mail Server (SMTP)" pop-up menu, choose Edit SMTP Server list.
  • Click on Advanced tab.
  • Change the password to your Application Specific Password (same one you entered on the account information page)