"Zo in a sim?" timi hnak in "a simmi a dik maw?" timi a thupi deuh

Zatein,

"Saya Cumi in a ti …" timi hi a sualnak a um ding ka zum lo. Zo in a sim timi hnak in a simmi hi a dik maw timi hi kan zoh thiam a thupi sawn.  "Zo si dik sawn?" "Who is right?" timi hnak in "Ziang a dik?" "what is right?" timi hi kan zoh ding a thupi sawn tiah ka ruat. 

Nauhak maw, upa maw, nunau maw, mipa maw zo ih ttong a si khal le zo in a ttong tihnak in ziang hi a ttong ih a dik maw timi hi ruat sawn uh si. Zo ih simmi a si khal le Pathian ih duhnak (Bible) thawn a mil awmi asiahcun, thlun mei ding a si tiah ka ruat. Thlarau lam ih nu/pa dinhmun ih a ding pawl ih tongmi sinsin tla cu zumtu tampi hrangah lamzin tha le mawi hmuhtu sawn an si thei. Pathian thu thawn a kalh awmi an si ahcun, zo ih ttongmi an si khal le thlun lo mei sehla. 

"Zo a dik" timi hnak in "ziang a dik" timi a thupi sawn lo maw? Minung ah buai lo in, a simmi thu ah buai sawn sehla a thupi sawn lo maw? 

Ka lungawi,

SAN NO THUAN

DODALNAK LE SAWISELNAK THUNGRULHDAN

Rev. Dr. Timothy Sui Lian Mang

Mi sawisel le mi va relsiat hi a awl zet. Asinan mi ih sawisel le relsiat tuartu si hi cu a har zet ṭheu. Mipitling zet ti khal hi mi ih sawisel le relsiatnak tuar thei loin a si lo lo, an ti dingih mawi lo le a ṭawng dingih mawi lo lo an ṭawng ṭheu. Cangantu khal hin miih sawisel le relsiat hi har a ti zet ṭheu. Mi zokhal hna a ṭuan le thil ziang si maw tisuak a tum phawt cun mi ih sawiselnak, dodalnak, relsiatnak cu a tawng tengteng ding. Cutikah ziangtin kan thungrul ding:

1.    Pathian thawn dikaw: ( Be right with God).

Na thilti, na hnaṭuan, na umdan mi in an lo do, an lo sawisel ih an lo relsiat tikah thinnau le beidawng asilole thinheng le thinling in um hlah. A rang theibik in, “A si ngai maw?” tiin Pathian hmaiah cekaw lohli aw. An lo sawisel le relsiatnak hi a dik asile remaw lohli in Pathian thawn dikaw. An lo relsiatnak le sawiselnak cu thu dik lo a si ah cun thil pawi a si lo. Mi in ziang tluk ih an lo do, an lo sawisel ih an lo relsiat hmanah Pathian ah na dik phawt cun a tawk. Mi in an lo fak, an lo lawm na cingi, Pathian lam ih na dik lo cun a pawimawh sawn.

2.    Daitem um aw: ( Keep Silent )

Min ih dodalnak, sawiselnak, thangsiat le relsiatnak tawn laifang ah hin ti lo ding mi ti pang, ṭawng lo ding mi ṭawng pang a awl zet. Thinling le thin heng tukah mah le mah siatsuahawk a awl te. Curuangah daiten um men aw. Daitei um hi nehnak a si. Thu cu amah tein a liam mai ding. Pathian lam ih na dik phawt cun daiten um men aw. Khuanu in lai a rel mai ding. Daitei kan um lo ruangah thil kan ti sual pang ṭheu hi a si. Daitei kan um hin kan nehnak a si sawn.

3.    Na thiam thu rel tum hlah: ( Don’t try to justify yourself ) 

Hivek laifangah na mawh lo zia, na dikzia rel ciamco tum hlah. Pathian lamih na dik phawt cun daiten um men awla, tikcucan in lai a rem leh mai ding. Khuanu in boruak a haikiang leh mai ding. Mai thiam thu rel ciamco hin mi a neh kher lo. Mi in kan dikzia, kan mawh lo zia cu an run thei leh mai.

4.    Na hna sunzawm vivo mai aw: ( Continue your work) 

Dodalnak, sawiselnak, thangsiatnak le relsiatnak nasa zet na tawn laiah na thiam thu na rel, na va do in na va relsiat ve a sile anmah vek na si tinak a si. Cun, cu tiih an lo ti ruangih na thilti, na hnaṭuan na cawlh a si ah cun mipitling na si lo. Na hna cu sunzawm vivo mai aw. Na dik lonak, na mawh lonak um cuang si lo ih na hna na cawlhsan ah cun ziang hna khal na hlawhtling dah lo ding.

A tlun ih thu li hi dodalnak, sawiselnak, relsiatnak pawl thungrulhdan ṭha bik a si.

Midang in Na Thu An lo Relsiat Tikah (Criticism)!

1. Ziang tivek ih na um khal le na thu cu an lo relsia thotho ding. Curuangah, na tuah dingmi kha tuah mei aw.
2. An lo relmi kha a dik maw ti sut aw awla, a dik ahcun, rem aw. A dikmi parah rem aw thiamtu cu mifim a si. A dik lo ahcun, taan san men aw. President Abraham Lincoln kha mihrek in a siatnak an rel ciamco. Cutikah, a rualpi pawl in ziangah na let hngai lo tiah an sut. Cutikah, a timi cu, “Ka thuhla a dik lo ih an simmi hmuahhmuah ka leh ahcun, thil thupi dangdang tuahnak caan ka nei nawn lo ding” tiah a ti.
3. Veikhat ah minung 10 innsangpi kai an zuam aw. Mipi in tha an pe ih an kai. Sinan, a hrek hrawng an thlen tikah, a hrek mipi in rungtum men aw tiah an auh. Mihrek in na tla lak ding, na kai thei nawn lo le tum aw tiah an ti ih, an kai dingmi le tthat 100 a si fawn. Midang pawl an ttum theh lai ah, pakhat cu a kai sinsin ih tthat 100 cu a kai suak. Ziangruangah si pei tiah interview an tuah tikah, cupa cu a hna a rak set ti a si. Thanaunak aw pawl kha hnaset tun mei aw la, na tuah dingmi kha ka thleng tengteng ding timi ruahsannak thawn kai vingvo aw.
4. Tlaangleeng mawngtu si aw la, na tlaang lengah mi zapi tein an khah hlan lo ka feh lo ding tiah na ti ahcun, khui tik hman ah na tlaangleeng a feh thei dah lo ding. Cuhnak in, mi pakhat te an si khal le, feh aw, mihrek cu hmat deng pahnih thumnak in an ra kai leh ding. Feh rero mei aw.
• Hna na tuan tikah, hmakhat te ah hlawhtlinnak ruat hlah. Na tuah dingm lawng tuah mei aw la, nuam tete in thil fate pawl kha na theh suak vingvo ding. Thil fate tampi theh suaknak in tampi na theh suak thei ding.
• Mizapi in an lungkim le lawng ka tuah ding tivek ih na ruah ahcun thil na tuah suak thei dah lo ding. Mihrek cun, na tuah hnu tawkfang in an lo pawk leh ding.