Canaan Nunau nu ih Zumnak

Matthai 14:21-28

Thuhmaihruai

            Lei tlun ah harnak le buainak tampi ka tong cio. Kan ngah duhmi ngah ding ih ke kan kar rero lai ah donkhawmtu tampi kan tong ding. Kan Pathian in zo pawl hi hlawhtlinnak a pek ih an saduhthah a kim ter? Ziangruangah Jesuh in “Naute pekmi rawl uico pek cu a dik lo a si” ti tiang in Canaan nunau nu kha a ti si pei? Jesuh in ziangah si pei, “Na zumnak cu a nasa a si” tiah Canaan nu kha a ti? Hi pawl hi kan zoh dingmi thu a si.

                       

Canaan nunau nu hrang ih donkhamtu pawl:

1.     A miphun sinak: Canaan mi a si (Gentile: Syro-phonesian)

2.     Nunau a si. Nunau zianghman siar lonak ram ih hmun ih um a si. Culak ih kamaang ding a si.

3.     Satan: a fanu ih sungah an luhhawh ih a fanu an siatsuah.

4.     Dungthlun pawl: Jesuh hnaihnok lo dingah dawi hlo ding in Jesuh an fial.

5.     Jesuh ih tongkam: nauhak rawl la tahrat in uico pek cu a dik lo a si.

Beidong ding le tih ding hlir a si. Asinan, ral tha zet in hmai ih a feh tikah, Jesuh in “na zumnak cu a maksak a si” tiah a ti. Ziangah a zumnak a fek a ti?

Zumnak fek timi ih ziaza cu:

·      Duhdawtnak:

22Cuih ramih a ummi Kanaan nunau pakhat in Jesuh hnenah a ra ih, “Maw David fapa, i zaangfah aw. Ka fanu cu khawsia in a polh ih vansaanglam in a um,” tiah a ra ṭahhnawh.

·      Beidong mei lo:  ziangvek harsatnak a um khal le baansan lo in ka hngah lai hlan lo timi lungput thawn hmai ah nor sin ruangah a si.  

·      Tangdornak:

27Nunau nu in, “Asi, bawipa, na timi cu a dikmi a si. Sikhalsehla bawi pawlih cabuai ihsin a tlami rawl ṭilfuan cu uico tla in an ei ṭheu ko a sisi!” tiah a let.

Midang Parih Na Lungput Thleng aw

Ziangruangah si pei Jesuh in Canaan nunau nu kha kha ti ih a biak? Ziangtin Jesuh in a rak biak?

1.     A veikhatnak tla cu a bia duh lo.

2.     Israel hrang ah ka ra tiah a ti.

3.     Naute rawl uico pek cu a dik lo ding.

Ziangah hivek pawl hi Jesuh in a ti si pei?

A phi cu kha lai san ih Judahmi pawl in midang miphun pawl parih an ruah daan le an um daan kha Jesuh in a lang termi a si. Cuvek daan sia zet in Judahmi pawl ih thlunmi daan in Jesuh in Canaan nu khal a bia aw ter. Asinan, a lang ter duhmi cu zianghman nan siar lomi nunau, Canaanmi, Pathian ih taansanmi tiah nan timi cu hi tluk in a zumnak a fek timi kha a lang ter duhnak a si. Curuangah Jesuh in hi thuanthu in in zirh duhmi cu:

1.     Midang cu kanmah hnak in Pathian an thei lo sawn.

2.     An piangthar lo sawn.

3.     An niam sawn tivek pawl

Cuvek lungput thawn midang va hmu lo ding in in zirhnak a si. Midang hnen ihsin zir ding tampi ka nei timi thei in midang hnen ah ziang ka zir pei timi lungput thawn mi va pawlkom ding hi Jesuh ih in zirh duhmi a si.

Thunetnak:

1.     Jesuh in Canaan nu kha na zumnak a fek tuk ual tiah a tinak cu:

a.     A fanu duhdawtnak thawn a khat. Midang duhdawtnak, zawnruahnak na nei maw?

b.     Ziangtluk in midang pawl in beidong ding in an tuah khal le Jesuh in a dam ter ko ding timi thawn Jesuh a pan.

c.     Tangdor te in Pathian hmaika le minung hmaika ah a um ringring.

2.     Hi thuanthu hmang in Jesuh ih in zirh duhmi a dang pakhat cu midang kha nangmah hnak ih niam sawn in va zoh hlah. Nanmah hnak in zumnak cak zetzet an rak si thei timi kha thei in an hnen in zir ding hawl ringring aw.

___________________

San No Thuan

Friday Zaan khawm (Nu Than Par) teih inn

May 16, 2014

Khrih ka zum taktak/lo ti ziangtin kan check aw thei ding?

By San No Thuan

1 Kor 6:9ff

1.     Knowing sin: Khrih sisehla ziangtin a tuah ding timi sut aw aw. Khrih in a tuah lomi a si ahcun, ka palh timi kha thei aw.

2.     Repent: Ka palh ti na theih ngah vetein, sorry ti in na sual sir aw.

3.     Follow Christ: Ka sual ti ih theih lawng a tawk lo. Cun, sualsir awk lawng khal a tawk lo. Jesuh Khrih ih dung thlun sal aw. Cuti ih na ke na kar lo ahcun, Khrih zumtu taktak na si lo tinak a si.

Zumnak/Rinnak(Faith)

Matt 17:20 “Cule Jesu in an hnen ah , ‘Nan zumlonak ruangah a si.Thungai thu ka lo sim, antam ci vek zumnak nan neih a sile hi tlang hnen ah, ‘hitawk ih sin thawn aw’. nan ti ding ih a thawn mei ding. Cule nan hrangah thil cang tehi lomi a um lo.”

Zumtupawl cu zumnak ih nung le kekartu kan si. Rinnak ziangtlukin a thupi tile Heb 11:6 “Sihmansehla, zumnak tel loin Pathian cu lungawiter theih a si lo.” Cuiruangah, Khawhhran siseh kanmah bulpak nun ah siseh Pathian lung kan tong thei dan umsum cu “Zumnak/Rinnak” liolio in a si.

Tulai Kawhhran tamtak vun zohsal sehla, Pathian thu par ih zumnak, hngatawnak kan nei nawn lo, milai thluak ruahnak sawn kha kan tlaihsan thlang. Cuvek thotho in, zumtu tiaw bulpaw kan nun cio khal ah zumnak kan tlansan ih mah le rem ti dan, khawkhan dan in kan nung thluh thlang. 

Cutiih, Kawhhran in zumnak a thlahthlam tikah ziang a cang ti a sile, Liberal zirhnak sual ah a hung suak famteh! Sim zo bangin, milai ruahnak ring in an kaihruaiaw tikah Bible par ih thumaw nawn lo in, Lei dan pawlkawmawknak an uar caimco thlang. Anmah cun, milai kan si sung ah tisa dan thawn thenaw a thei lo tiin sirhsen ding tongkam an nei. Asinan Bible cun ‘thlarau in khat uh’Efs 5:18 tiah thu in pek fawn? Bible cun tisa dan ih nung ding in veikhat te hman in zirh pang lo. Cun, zumtu pakhat in zumnak a tlansan tikah a nun a ro a cau ih ka tluksia sihi ti hman theiaw nawnlo khawpin a tluk. Curuangah, zumnak hi Kawhhran  in siseh, mah le bulpak cio khal in siseh thlahthlam lo in hnget takin ka pawk fefe kei uh ti ka sawmaw duh fawn.

Zumnak cu ziang a si?

Zumnak kan timi hi mi thenkhat thlarau mit pit memmen pawl cun Doctrine ah an ruat. Zumnak cu doctrine(thurin/thupawm) a si lo.Cun, a fiang lo deuh tupawl cun kan zumnak cu Khrih a si an ti. Asinan, Khrih cu kan zumnak a si lo, Khrih cu in rundamtu le kan zumdingmi a rak si sawn. Cule zumnak cu pekmi a si lo ti kha kan theih dingah ka duh. Evangilist thenkhat pawl cun zumnak hi a pek ih pek cop ah an ruat sual. 

Thungai te cun, Pathian ih in pekmi cu zumnak a si lo, zum dingmi fapa Jesu sawn in pek a si. Zumnak/rinnak cu zum hmang thu, thu fiangfai lo kan simmi khi a si fawn lo. Asilen, Zumnak cu ziang a si? Zumnak timi cu Pathian thu parih thumaw pumhlum, hangtaw pumhlum, a si (Amen) ka timi kha zumnak a si. 

Tahthimnak:Noah hnen ah Pathian in “Lawng tuah aw” (Sem 6:14 ) tiah veikhat lawng thu a pek. Cucu, Noah cun Pathian thupek cu a zum ih a ring pumhlum tikah, a sut nawnsal nawn lo, a sim vek in  Lawng cu a tuah cih. Zumnak cu kan theimi Pathian thu parih thumaw , ring pumhlum ding a si.

Curuangah, kan zumnak tlun ah thusuhnak tuahaw fingfing hnik sehla kan dinhmun, kan Khawhhran dinhmun hi ziang a bang ti kan fiang vivo ding. 

Bible cun antam ci vek zumnak kan neih mi in thil a ti thei zia in sim fiang zo. Unau, zumnak ziang a si ti kan fiang a sile, cucu a tak in kan nunpi thlang pei!

Christian apuihLouisville KY

USA


Critique: 

Dr. D. Laisum le Christian Apuih, 

Christian Apuih ih nganmi hi siar a nuam zet nan, a tuih na fakselnak zawn te kha cu kei khal in siar nuam ka ti lomi zawnte a si. A dang cu thazaang ka ngah zet. 

Ziangah tile, Laimi le kawlram ih kan zum daan cu Liberal zirhnak sual tiah ko aw ding kan si lo. 

Liberalism ahcun: 

1. Bible ca hi Pathian ih thawkhummi (hmanmi) a si tiah an zum lo. Zumtu kan hrangah thuneitu bik a si ti khal an pom lo. Science hi a thupi sawn tiah an ruat. 

2. Jesuh Khrih cu thlarau ih hrinmi fa a si ti khal an pom lo. 

3. Jesuh Khrih thisen ih sual ngaithiamnak khal an zum lo. 

4. Jesuh cu a taksa rori in thihnak in a thosal ti khal an zum lo. 

5. Jesuh Khrih a rat salnak ding khal an zum lo. 

6. Jesuh cu Pathian fapa a si ti khal an zum lo. Nun daan zirhtu mak pakhat a si tiah an pom. 

Ref: http://www.gotquestions.org/liberal-Christian-theology.html

http://www.theopedia.com/Theological_liberalism

Cun, "Lei daan pawlkomawknak an uar" timii khal hi ruah tul deuh in ka hmu. Laimi cu Ecumenism timi Pathian ih innsang khat kan si timi hi kan kaa cun kan zum zet nan, kan nunnak in kan zum lo. Pawl (denomination) kan dan awk tikah, zumtu pawl lo (field) hman kan feh tlaang thei nawn lo. "Annih" (they) le "Kannih" (We) timi lungput kan nei ciamco ih, pawlkkom awk kan tum nawn lo. Cumi ih a rah cu soiselawknak, zuamawknak, doawknak, le huatawknak a suak. Cuti in, zum lo tu pawl in zumtu pawl in zoh tikah, Khristian si an duh nawn lo. 

Curuangah, John 17:21 ah Jesuh in i zumtu pawl cu pumkhat an si theinak dingah thla ka cam tiah a ti bang in, Pathian sunlawinak hrangah pawlkom aw sinsin ding kan si. Sualnak tuahnak ih pawlkom aw kan si lo ding lawng a thupi. Curuangah, zumtu ka si ti aw ih, zumtu dang thawn pawlkom aw thei lo pawl sawn hi an zumnak ruah ding a um. 

Christian Apuih, na canganmi kan lo fakselnak hi thanaunak ah hmang lo in, thansonak lam ah na hman ding beiseinak thawn thazaang ka lo pe duh. 

Ka lungawi, 

Sanno

www.sannothuan.com

__._,_.___