Pathian ih Aw Na Theidah Maw?

by San No Thuan

Pathian in a lo bia dah maw? A lo biak asile ziangtin himi  hi Pathian ih aw tiah na thei?

Pathian cun zokhal in bia ringring. Ziangtin in bia tile a ruangpum in Pathian cu kan hmu lo nan, kan thinlung sungah fiangte in thu in sim ringring. Thla na cam theh in ngai aw la, na thinlung sungah fiangte in a awkam na thei ding. Ka fa cumi cu tuah hlah, cumi cu tuah aw. Ka fa ka lo duhdawt bikmi na si ti pawl le a dangdang khal a lo simmi na thei ding. Na nunnak ih na tul bikmi thazaang peknak hlir thawn a lo bia ringring ding. Cumi hi a si ngaingai maw ti theihfiang na duh ahcun, cuvek tongkam hi Pathian in a ttong dah maw ti Bible sungah zoh aw. Bible ah Pathian in a hmanmi hruaitu le a fapa Jesuh hnen ah a rak tong dah zo ti na hmu tengteng ding. Cuih tlun ah a dungthluntu pawl ih hmurkaa khal in a rak ttong dah ti na hmu ding. Bible sung ih na hmuh lo mi tongkam a si ahcun, na pastor le zumtu dang pawl khal na tuah hlan ah sutta aw. Pathian tongkam ngai le theih cu kan thinlung le thlarau hrangah a tul bikmi siivai tha bik a si.

Khui tikah Pathian aw cu na thei ding? A caan cu Bible na siar lai ah, a caan ahcun, thla na cam lai le thlacam hnu khal ah, a caan ahcun, na ihthah lai ah na mang khal in a lo sim ding. Kei hi mang man pa ka si ih, Pathian ka mangah thu I sim ringring.

Pathian in in bia theu, kan thinlung sungah a aw khal fiangte in kan thei theu nan, ziangah zumtu pawl kan thinlung a lungawi thei lo? Ziangruangah zumtu pawl beidong le ralhrut in kan um?

Himi theih ter duh ah mizaan 10 May 2012  zinglam 4:00 a.m. ah ka it ih, ka mang ah Pathian thu I sim nasa. I simmi cu drama vek in I piah. Mi pakhat in pangpar kha ukkhe le belatmi thawn tuahmi kalbak par ah kua fate a lai ih a phun. Cumi cu a reihlan ah a rung thi ding, a ro a car ding ti a fiang. Cun, midang inn ah kan valeeng ih kan leennak inn ahcun, pangpar pawl kha a hram tel in pangpar bel sungah an rak cing ih a mawi zet. Asinan, hih mawinak khal cu a rei hlan ah an car ding ti a fiang fawn. A pathumnak cu biakinn vek nawn ah kan feh ih, cuih biakinn sung ahcun, mi pakhat in zuk a suai ciamco ih, a zuk suaimi cu zuk asinan, tidai luangmi vek tla a suai ih, tidai a luang taktak. Meisa a suai ih misa a alh taktak. Ziangtin a tuah ti kan mang a bang tuk lawmlam. Asinan, nun ter theinak sii pakhat a nei ih cumi a hmang tiah in sim. Cumi siivut tleu supso tete pawl cu a suaimi zuk sungah a burh tikah, thil nung ah an cang.

Himi pawl ka mang ih ka man theh hnu ah Bawipa ziang I sim duh tiah ka sut sal. Ka thinlung sungah fiang zet in a hung langmi cu, “Ka fa, na thinlung sungah ka lo bia ringring nan ka tongkam ih a lo ciah thei lo nak, na nunnak ah hram a bun thei lo nak cu keimah ka si lo, nangmah ka tongkam a rak la tu in, na thinlung kha lungto bang in na hak ter theu ruangah a si. Ka tongkam kha na nunnak ih nung dingah cawmtu ding cu nangmah na si, kilhimtu ding nangmah na si. Cucu kei ih tuanvo a si lo. Ka tongkam hi na nunnak ah nung ding in nangmah in na cawm ih, na hman ahcun, anih cu thilnungmi a si ih, amah te in na tuahmi pawl kha a nun ter ding. Na tuahmi pawl kha thaw a pe ding, thluasuah a pe ding, paci (artist) pa in, a hmanmi a vut te kha a hman tikah, a zuk suaimi pawl an cangvai bang in, ka tongkam khal na hman ahcun, na tuahmi pawl cu an nung ding ih a lamdang ding” tiah I ti. 

THLARAU IH KHAT HI THILMAK TUAH A SI CUANG LO {John.10:41-42}

by Evan. David ceu

"Mi tampi a hnenah an ra ih"John in hminsinnak{thilmak}zianghman a tuah lo. Asinan John in hi pai thuhla a sim mi hmuahhmuah cu a dik asi" tiah an ti. Cule cu tawkah mi tampi in amah cu an zum.{John.10:41-42}.

"Ziangahtile, anih cu Bawipai mithmuh ah a ropi ding. sabitzu siseh,zu siseh a in hrimhrim lo ding. A nui pumsung ihsin Thlarau thianghlim in a khat ding"{Lk.1:15}.

Ka rawngbawl pek lam ahcun Thlarau ih khat ti hi thilmak{hminsinnak}tuah vutvo, Thimnakah, mi na tidam, mangbangza tuah dupdo tvp. pawlah ka rak ruat dah. Cuvek neilo cu Thlarau huham ih khat lo si hmang tiah ka rak ruatsual dah.{mi na tidam, thilmak tuah tvp. hi a sual cu ka tilo Bawipai tul a ti ahcun a sunglawi ko ee}. Cuvek cu can reitak ka rak hawl ve dah. Asinan hi Bible cang hmang in Pathian ka ruahdan in thlengsak. John hi a nui pumsung ihsi Thlarau thianghlim ih khat a sinan thilmak{hminsinnak} pakhat hman a tuah cuanglo. asinan Pathian thutak a phuan mi in mi tampi Khrih hnenah a hruai a si {John.10:41-42}.

1. John cu Thlarau ih a khah tik ah Bawipa lawng a sunlawih {Matt.3:11,John.1:21-27}.

John cu mipi in a uar tuk ih Khrih ah an ruat. Asinan anih cun ka dungah a ra dingmi a um "A kedam hri phelhsak tu hmanah ka tlak lo" tiah Khrih a cawisang. Mipi in a uar zet nan amah cun Khrih lawng a cawisang asi.

2. Bawipa ah mi a hruai thleng {John.1:35-42}.

Amah an uar ding le a lar theinak ding men a hawl lo. amai nun ramah mi hruai lo in Khrih hnen rori ah mi a hruai thleng asi.

3. Tangdor zet in Bawipa a cawisang {John.3:30}.

" Anih cu{Khrih cu} a ropi deuhdeuh ding ih kei cu ka ttumsuk deuhdeuh ding"tiah a ti.{John.3:30}....John Wesley le George whitefield cun "Kannih ih hmin hi tawihral thluh aw sehla Khrih hminlawng langseh"an ti.

4. Bawipai hrangah thiarfihlim awknak nun nei in bawipai lamzin a sialsak {Matt.3:1-4,Lk.1:80}.

Ramcar te ah mi umlo nak ah,amah te in thiarfihlim awknak nun nei in Bawipai lamzin a sialsak.Thlarau ih khat ding in le khattu pawl nun ahcun suallak ihsi thiarfihlim awknak hi a um tengteng asi. Culawng silo in an mai hrangah silo in Bawipai hranagh lamzin sial tu an si theu.

5. Thimlak ih meifar thleu vek asi {John.5:35}.

Zisu in John cu meifar thleu vek asi ati. Thlarau ih khat zumtu cu thimlak ah Khrih thleunak langter tu an si.

6. Thihtiang rinum ten a um {Matt.14:1-12}.

Sual do in thihtiang rinum ten Bawipai hrangah a nunnak a hmang asi.

Curuangah John cu Thlarau in a khat nan thilmak tuah ciamco lam a silo ih anun in Bawipa a sunlawih taktak hlei ah Mi tampi in a thilmak tuah ruangah silo in a thusim mi ruangah Khrih an zum a si. Khrih hnen ih mi hruai thlengtu a si.

Siartu zate pathian in malza in sawm sak sehlaw.

Thianhlimnak Nun Nei Dingah

by San No Thuan

Heb 12:14

Mi hmuahhmuah thawn rualremte in um zuam uhla nunnak thiangin nun tum uh, ziangah tile nunnak thiang neih locun zohman in Pathian an hmu thei lo ding.

1Cor. 6:19-20

Nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathian ta nan si. 20Man pek ih leimi nan si. Curuangah nan taksa cu Pathian sunlawinak ah hmang uh.

Mark 12:29

29Jesuh in, “A thupi bikmi thukham cu ‘Maw Israel mi pawl ngai uh! Bawipa kan Pathian lawng hi Bawipa a si. 30Bawipa nan Pathian cu nan thinlung zate, nan nunnak zate, nan ruahnak zate le nan thazaang zate thawn nan duhdaw pei,’ tihi a si.

Thuhmaihruai:

Thianhlimnak neih timi cu Pathian ih ziaza sung ih pum pek awknak a si. Ziangruangah thianhlimnak a thupi tile, thinlung thiang a neitu pawl cu Pathian an hmu ding (Mtt 5:8, Ps 24:3,4, Heb 12:14). Pathian ih sunlawinak le thluasuah an co ding tinak a si.

Nun thianghlim nei dingah ziang kan tuah ding?

Mitampi in, thianhlimnak nei dingah, sualnak hi kan nih ih do a tul lo, Pathian in a lo do sak ding tiah an ti. Cumi cu, Bible ih in zirh daan a si Lo. A tang ih Bible caang pawl ah kan mah rori in kan do a tul zia a fiang.

Heb 12:1

1Kannih khal hitlukin a tammi thutheitu pawl in mero bangin in kiil ruangah kan fehnak lamzinah in dawnkhamtu thil pawl kha hlonin in ṭawnhremtu kan sualnak thilrit cu tlansan tahratin kan hmaiih a ummi tlanzuamnak ah taimak suah in tlan uhsi.

Fili 2:12-13

Rundamnak famkim nan ngahnak dingah ṭihzah le ṭhia phah in ṭuan (work- out: ka betmi) rero uh. 13Ziangah tile amah ih tumtahmi duh dingah le nan tuahsuak dingah Pathian cu nan sungah hna a ṭuan a si.

James 4:7

7Curuangah Pathian duhnak a thluntu si uh. Satan kha do uhla a tlan mai ding.

2 Pet 3:14

14Curuangah ka duhdawtmi tla, cuih Ni nan hngah rero laiah hin Pathian hmaiah mawh nei lo le a thiangmi si dingah zuam uhla amah thawn a rem-awmi si uh.

Curuangah, Pathian ih sunlawinak famkim, le a rundamnak famkim kan nunnak ih kan co theinak dingah, kan mah zumtu pawl lam khal in napi ih kan zuam a tul timi hi a fiang.

Kan sual ngaithiamnak hrang ih kan pek tulmi sualman cawhkuan hrangah cun, Jesuh in ka pe theh zo tiah fiangte in in sim (John 19:30). Curuangah, Pa Pathian in, Jesuh tuahciami parah zoh in, a lo duhdawt tuk ruangah, na sualnak a lo ngaithiam ih, na sinak bang in, a lo cohlang zo (Rom 1:17). Cumi a zumtu cu kum khua nunnak an nei zo a ti lai hrih (1 John 5:13).

Asinan, cui a run damnak famkim: taksa, thinlung, thlarau ttahgnso ding ahcun, kan mah khal in Satan kan ralpa cu ih thlemnak pawl hi Pathian ih pekmi thazaang thawn kan do a tul (Fili 2:12-13 ih sim duhmi a si).

Curuangah, thianhlimnak nun nei thei dingah, thu pahnih a tul. Pathian in ziang in tuah sak timi theih a tul. Culawngah, na sinak na thei aw ding ih, hmai ah ral tha zet in na feh thei ding. A pahnihnak ahcun, nangmah khal in na tuah dingmi na theih a tul. Cumi pahnih kan kom tikah, thianhlimnak le Pathian ih sunlawinak pawl kan congah sinsin ding a si.

1. Pathian ih in tuahsakmi

1. Pathian in kan sualnakman in kuan sak theh zo (John 19:30). Na felnak le thatnak ruangah na sual ngaithiam na si lo. Pathian ih duhdawt zaangfahnak ruangah, ka sualman kuantu dingah, Jesuh I pek. Bawi Jesuh in, cross parah ka sual man I kuan sak theh zo a si timi na zum hlan lo cu, vanram ka kai pei maw, hell ah ka feh ding na fiang dah lo ding.

2. A thisen in in lei zo. Satan ih sal kan si nawn lo. Pathian ih ta kan si (1 Cor 6:20).

3. Curuangah, sualnak huham in luat termi kan si (John 8:33). Sualnak in na parah, nangmah ih duhnak tel lo in, thu a nei thei nawn lo.

4. Thlarau thianghlim in pek, kan thinlung cu a biakinn ah a tuah (1 Cor 6:19).

5. Cui Thlarau cun, thianhlimnak duh ding le tuah dingah thazaang in pek (Fili 2:13).

2. Kan mailam hnatuan dingmi:

1. Sualnak huham ih a duhduh ih uk theimi ka si nawn lo ti thei aw. Ziangruangah? Jesuh in a lo luat ter zo (John 8:36).

2. Na nunnak cu Pathian ih biakinn a si ti thei aw la (1 Cor 6:19), Pathian ih sunlawinak pawl (a mi duhdawtnak, thiannhlimnak, dingfelnak le tangdornak pawl) langhternak lawngah na ruahnak, thinlung, thazaang, le tikcu pawl A ZATE IN hmang aw. Cucu Bawi Jesuh ih in fialmi a si (Luke 10:27).

3. Satan kha na ta ka si lo, Jesuh ih ta ka si. Ka lo thlun thei lo tiah ti aw. A fate khal Satan ih thu thlun tum hlah. Na pumhlum in Pathian hnen ah pe aw (Rom 12:1,2).

4. Zumtu tampi ih tukfornak sung ih kan tlaknak cu, sualnak fate le a tum tin kan tthen ih, a fate tuah duak cu a poi lo tiah kan ti ruangah a si. Cumi in, sualnak tumpi sungah pil dingah, sualnak tilian cun, in hruai cih theu a si.

a. Tahthimnak ah: ralkap pawl ral an do tikah, kah tuar tuk lo ding in an feh lo. Kah tuar lo ding in a feh. Cuhman ah kah an tuar ngah thotho theu.

b. Sual lo rori ding in na pum na pek lo ahcun, thlemnak na tuar ciamco ding. Maltete sualnak tuah phahphah ding ih feh cu, ral pawl ih napi ih kah tuar tuk lo ding ih feh thawn kan bang aw ding ih ral kan do thei lo ding.

c. Mawtaw thawn khual ka tlawng ding ih, maltete, mi thawn kan taih awk khal le a poi lo ti thawn khal a bang aw. Cuvek cun, khui hman na thleng thei lo ding.

5. Kan tisa harhdam dingah, rawl kan ei a tul. Lehpannak kan neih a tul. Kan kholh awk a tul. Cuvek thiamthiam in, kan thlarau nunnak harhdam dingah ziang kan tuah a tul?

a. Satan in kan thinlung a bat bik. Curuangah, cumi na thinlung kha Pathian ih duhmi thu in ciah aw.

b. Cumi dingah Bible ca byheard aw (Ps 119:9,11).

c. Thufim 24:16 … na bah khal le tho aw la, Pathian hnen ah ngaidamnak dil aw la, hmai ah feh aw (1 John 1:9).

d. Ni khat ah, a mal bik, rawl vei hnih na ei bang in, caan khat te khi Bible siarnak le thlacamnak caan ah khiak aw la, Pathian thawn pawlkom awknak thlacamnak nei aw. Cun, midang zumtu thawn khal pawlkom awk ding zuam ringring aw.

i. Thla na cam tikah: ACTS hi theih tha:

1. Adoration: Pathian kha tihzah upat zet in na thinlung, le pumsa um daan pawl timtuah aw.

2. Confession: na sual phuang aw.

3. Thanksgiving: lungawi thu sim aw.

4. Supplication: na hrang le midang hrangah thlacam aw.

ii. Bible na siar tikah, himi pathum hi thusuhnak tuah aw:

1. Ziangsi a sim duhmi?

2. Khui tawk zawn te hi kan tlin lonak a si?

3. Ziangmi hi ka zir ngahmi le ka thlun dingmi a si?

Thunetnak

1. Thianhlimmak neih cu hmailam nor theinak a si. Pathian ih sunlawinak pawl hmuhnak le tonnak a si.

2. Thianhlimnak nei dingah Pathian nangmah in na duh can ah I thianhlim ter aw ti in um men hlah. Cuvek minung pawl cu, an sual tikah, Pathian in ziangah I kham lo nak tiah Pathian kha tavuan ci lo bang in an ruat theu. Nangmah ih na tuah tulmi a um ve. Pathian ih a lo tuahsakmi na theih ih, nangmah khal in na tuah dingmi na tuah ahcun, thianhlimnak nun na nei thei ding.

3. Pathian lam: Pathian na sualnak a lo ngaithiam ih tlunah, Satan pa, Sual ih kut sung in, a lo luat ter zo. A thisen in a lo tlen zo (1 Cor 6:20) ih, Thlarau Thianghlim in na nunnak cu Amai sunlawinak langtertu ah hman a duh.

4. Nangmah lam: Satan ih duhduh ih fial theimi na si nawn lonak thu, miluat na sinak thei aw. Cun, na nunnak hi Pathian Thlarau Thianghlim umnak Biak a sinak khal cing ringring aw (1 Cor 6:19). Curuangah, na nunnak cu Pathian ih sunlawinak pawl langternak ding hrang lawngah na thinlung khuaruahnak, na thazaangcahnak zate le, na tik cu pawl hmang aw (Luke 10:27).

5. Cuti ih kekar thei dingah, na thlarau tha a cah a tul. Na thlarau thacak dingah, thlacamnak le Bible siarnak caan nitin caan hlirte khiak in nei aw. Cule, zumtu dang pawl thawn pawlkom awknak nei aw. Cu lole, na zumnak meisa a mit ding. Ziangtluk a alh laimi thingthu khal a mah lawng na ret ahcun, a rei hlan ah a mit ding. A dang thing alh reromi pawl thawn re aw la, a cem tiang a alh taal zet ding. Cuti ih na tuah ahcun, cucu thianhlimnak lam zin le Pathian sunlawinak phunkim kan hmuh tonnak lamzin a si.