Ziangruangah, Mihrek Khat ih Nun Daan hi a Siava?

Vei khat ah mi pakhat cu a kawhhran a hruainak ah mihrek khat pawl ih ziaza um daan kha a mang a bang ih theithiam lo in reipi a um. A theihthiam lomi pawl cu midang parah siakha tuk ih um pawl an si. Cutikah, vei khat ah a mangah hitin Pathian in thu a sim. 

April 29, 2015 zaan cu a it that ih mangsia a nei ciamco nan, a hung thang tikah lungawinak le thufiangfel theihnak thawn a khat. A mang ahcun, amah te a feh rero lai ah midang in a lamzin an kham ih an hnaihnok ciamco. A kian rero nan, a kian thei nawn lo. Cutikah, a thin-ai a thok tuk ih netabik ih a khamtu pa kha a thongthluk. Cuih tlun ah, lungto a laak ih cip seksek in a sut bet. Cule veten, a kiangah mi pakhat a ra ih, "Ka fa nangmah le mah defend na duh tikah, hitin si lo maw na thin a hen ih a thah tiang hman na ngam!" tiah a ti. "Cuvek in midang khal in anmah le mah defend an duh awk tikah, khavek kha na parah tuah an ngam ding ti thei aw. Curuangah, nangmah hman in cutluk ih na thin a hen ih defend na ngam awk cun, midang Pathian theituk lo tu sinsin cun, an luar sin thei ti hngilh hlah" tiah thu a cah. 

Cuvetein, cupa cu a thang ih, mi  ih um daan ziaza sia hi ziangruangah ti a fiangte in a theifiang ngah pan lo maw. 

"Bawipa tihzah awla, na theih lomi thu khal zaan na itthah lai hman ah a lo simfiang ding." 

Na Lamah A Tangtu an Tamtuk

March 13, 2013 Zaan

Mang ka man lala! 

Tulai hi cazoh khal huam cuca lo in, thanau zet ih ka um laifang a si. Ka Ph.D zirmi hi teh a tikcu khel in ka theh thei ding maw ti thinphang in ka um. Cumi ruangah si pei maw ka thei lo. Ka mang hmang in Pathian in thazaang a tanglam bang in I pek.

Mizaan cu ca ka zoh ka zoh ih zinglam nazii pathum ah ka it. Mang lamdang zet pakhat ka man ih zing 6:30 am hrawngah ka tthang. Ka it tum rero nan ka it thei nawn lo. Ihhmu khal khawp zet in ka um fawn ih ka mang bang zet. Nidang cu nazii 8 sung hrawng ka ih lo cun ka thazee vek in ka um ciamco. Mizaan cu nazii pathum le hrek hrawng lawng ka it nan ka lung a fim zet.

Ka manmi cu thazang ii pe zettu a si. Ka mang ahcun, “Ka rual Alian te in thaithih in hlaan ih, cuih thaithih cu pakhat pa in ka lo hlaangta ding tiah I ti ih, I pe duh nawn lo. A tlan hlo. Kan tong aw sal ih I pe aw, midang ta si ka ti khal le a duh lo. Ka thin a heng tuk ih, ka thong ciamco. Padinpauh kiangah ka thong ruangah, ka thong phah in padinpauh cun amah tein tlan duh ah dung ngalh in a ngal ter aw ih in tangah a vung tla. A thi ter aw ih, inn tang ka vung tum tikah, a ruang cu ka nu ih unau pawl in an rak kai ih, a thi aw ter ti an theih ruangah a thih le thih lo a hnar ah ar-ek maan uhla a thih le thih lo kan thei ding tiah an ti ih ar-ek a hnar ah an maan ciamco. Rei lo te ah, cupa cun, tawk zo I maan nawn hlah uh tiah a hung au.

A hnar ar-ek ih a maantu cu Rev. Thawng Mawi a si. Cupa an kaih ih ar-ek an maannak hmun tla khi ekinn khur tlun ah a si. Ekinn khur hman a cim zik te rori nan, Nu Mawi cu ttih lo in, a fapa ka hrangah misual pa cu a kai ih ar-ek a man ciamco.

Cucu ka mang a si. Ziang si a sullam tiah ka hung thang tikah, thla ka cam ih Pathian ka sut ciamco. Ka thinlung ih a fiang zetmi cu: “Ka fa, nangmaih lamih a ttangtu an tam tuk. Tih hlah! Alian teih thaithih timi cu fimthiamnak a si. Cumi na neihmi nei lo ding ih a lo longtu cu do aw. An lo neh lo ding. Na lam ah minung tampi an ttang tuk ti hngilh hlah” ti in ka thinlung hnathlam ah fiang zet in ka thei. 

A Tullomipawl Taan Theh Aw

May 31, 2013

Mang ka man lala. 

Himi zing cu zingpit in ka tho asinan, ka ih a hmu sal ih ka it. Ka mang ka man lala.

Khual kan tlawng vek a si. Kan khual tlawnnak cu tlaang tang lampi khua a si. Kan tlunnak ding cu tlaang zim ah a si. Kan tlung zik ih, cunah thil tuahnak ah a  tha ding tiah ka timi pawl thing sau zet pathum ka pu, ka thilri pawl thawn hmunso ah ka feh ciamco. Rualpi pawl ka man thei lo. Vei khat cu khuate pakhat kan thleng ih ka cawl ta. Ka pok sal ih ka thil zaang zet le cak zet in ka feh thei. Ziangah ka va cak ve tiah ka ti tikah, ka thing tluan pathum ka rak taan ruangah tik ka hmu. Cucun, ka cak tuk thlang ih rualpi pawl hmuahhmuah ka man theh.

Ka hung thang ih ziang I sim duh Bawipa tiah thla ka cam tikah, Bawipa in, “Ka fa, na tumtahnak thleng thei dingah a tul lomi pawl hi taansan theh aw” tiah I sim. Si rori, ka nunnak ah a tul lomi pawl ka ken khawm ciamcomi an tam tuk ngai, “Bawipa, I ngaithiam awla, ka taansan a tulmi pawl khal I simfiang aw. Taansan thei ding khal in I bawm hram aw.” 

Nunnak Lamzin Hmuhtu: Bible

Jan 15, 2013

San No Thuan

Mizaan cu mang ka man lala. Innpi pakhat sungah kan leeng ciamco vek in ka thei. Cun, tawkfang kan leen hnu ah innlam pan in kan tlung. A thok ahcun, pathum kan si nan kan feh vingvo ih pahnih ah kan cang. Kei le Ma Mikyi, Ko Ni nupi. Ma Mikyi in mawtaw cu a mawng ciamco ih thu ruah aw phah in kan feh. A rei deuhdeuh tikah kan lamzin a fiang nawn lo. Zin hman um cuca lomi ah kan thleng. Ma Mikyi cu a thin a phangtuk. Khua le a thim zo. Zin le a lang nawn lo. Kei khal ka thin a phang ih, ka iphone ka suah ih GPS in inn lam fehnak ka hawl ciamco. Cuve tein ka tthang dukdi.

Bawipa ziangsi I sim duhmi tiah ka sut lohli. Cuvetein, fiangte ih I simmi cu, “Ka fa, na nunnak ah lamzin a lo hmuhtu bik tu ka tongkam Bible a si. Hi Bible hi na GPS a si. Himi GPS hmang lo in na um ahcun, na lamzin na hlo ding” timi cu ka thinlung sungah fiangtein ka thei.

Tulai cu ka ca tamtuk ka ti ih, Bible simfiangnak ka nganmi khal ngan man lo in ka ca ah ka buai hi Pathian in a duh lo si hi ti ka ruat ih, ka thawh vetein Bible ka siar. Thazang ka ngah nasa. Nun daan khal Paul hmang in I zirh ti ka hmu fiang. 

Mang Ka Man (November 8, 2012)

Pathian in I duhdawt ngaingai ti fiang zet ih ka theihnak cu ka nunnak ih ka tulmi pawl hmuahhmuah ka mang sung in I zirh theu ruangah a si.

1.     November 8, 2012 zaan cu ka it thei lo ciamco. Ka ihthah taktak tik cun, mang ka man ciamco. Ka mangah cun, Saya pakhat a um ih cumi kha a nun daan a tha lomi a um. Curuangah, nubu pawl in in sim sak aw tiah in timi a um. Cumi sim ding in ka feh. Ka mawtaw par ahcun, nu le hrek khat an to. Cun, cuih saya pa khal a to. Lam zin tha zet par ih ka feh lai ah cawl tahrat in, cuih thu sim dingmi cu sim lo in ka um ka um ih ziin thar an tuahnak lamzin, feh khal har ngaingai, a suk le suk zetmi lo zin, khuarang zin vek ah ka suk pi ciamco. Ka ruahnak ahcun, a reihlan colh hmun kan thleng ding ih cutawk ah ka colhpi ding ih ka sim ding tiah ka ruat. Lamzin cu a sia tuk ih, ciarbek le a sah tuk. A caancaan tla cu zin um lonak, lo lak in ka feh pi ciamco. A hung kir sal ding tla cu ti ngaihnak um lo rori si ko. Cuih zin ah ka feh pi ciamco.

a.     Pathian in himi hmang in zinglam ah ka hung thang tikah thu I simmi cu: ka fa na thil tuah dingmi cak zet ih na tuah thei lo nak cu thil dang si lo. A tul lo tuk in ziin harnak na zawh ih tuah na tum. Ziin dangah pial lo in, na tuah dingmi le na sim dingmi kha hmaisa bik ah tuah aw la sim aw. Lamzin pi le tha ih na um lai ah sim aw la, tuah aw tiah I sim. Cuih zin sia zet cu ziang a si pei tiah ka suh tikah, ka tuah dingmi bawmtu a si lomi nun daan le thil tuahmi hmuahhmuah an si ti khal I fiang ter.

2.     A pahnihnak ka man lala. Vei khat cu ka uu le, U Siang teih sung kha rawl ei sawm ding in an inn ah ka mawtaw thawn ka va hmuak. A inn tangah ka ret. Khua ih ka pu ih inn vek a si. Kan feh thlang ding tiah kan ti tikah, mihrek cu ke in kan feh sung ding tiah in ti. Kei cu mawtaw start in feh ding ah ka mawtaw sungah ka lut. Ka start ih ka kel lohli thei lo ruangah, inn tang thotho sinan, inn dunglam ah her aw ding in ka va feh. Ka mawtaw cu ziang a cang ka thei lo. Back Gear a um lo riai. Curuangah, Liver ka pal le ziang gear ih ka ret khal ah ka hmailam ah a feh ciamco. Dungsip ti a nei lo. Ka her aw thiam lo ih, ka buai ngaingai. Rei tuk ka buai pan lo maw. Ka fehnak inn tang le, thilri pawl a khat theh. Break tiah ka ruahmi pakhat ka pal ih, gear dang ka thleng le, ka mawtaw cu ringpi in a awn ciamco. Gear dang ka thleng sinsin le ring deuh in a awn sinsin.

a.     Pathian in ka nunnak ah hitin I sim. Ka fa na mawnmi mawtaw ih thuhla na thei lo. Back gear cu hitin a si tiah I hmuh ih, hmet dingmi te a um. Cumi I hmet sak. Cule, dungah ka duh vek in a sip thei. I timi cu, “Ka faa dungkir salnak hman thiam nawn lo, na nunnak mawtaw cu na mawng ciamco theu. Khati cun, na thlen duhnak na thleng thei lo ding. Dunglam sipsal daan thiam lo in, na nunnak mawtaw (life car) mawng nawn hlah tiah I sim. Culocun, khuihman na thleng thei lo ding tiah I sim. 

Mang ka man lala! (March 13 Zaan)

Tulai hi cazoh khal huam cuca lo in, thanau zet ih ka um laifang a si. Ka Ph.D zirmi hi teh a tikcu khel in ka theh thei ding maw ti thinphang in ka um. Cumi ruangah si pei maw ka thei lo. Ka mang hmang in Pathian in thazaang a tanglam bang in I pek.

Mizaan cu ca ka zoh ka zoh ih zinglam nazii pathum ah ka it. Mang lamdang zet pakhat ka man ih zing 6:30 am hrawngah ka tthang. Ka it tum rero nan ka it thei nawn lo. Ihhmu khal khawp zet in ka um fawn ih ka mang bang zet. Nidang cu nazii 8 sung hrawng ka ih lo cun ka thazee vek in ka um ciamco. Mizaan cu nazii pathum le hrek hrawng lawng ka it nan ka lung a fim zet.

Ka manmi cu thazang ii pe zettu a si. Ka mang ahcun, “Ka rual Alian te in thaithih in hlaan ih, cuih thaithih cu pakhat pa in ka lo hlaangta ding tiah I ti ih, I pe duh nawn lo. A tlan hlo. Kan tong aw sal ih I pe aw, midang ta si ka ti khal le a duh lo. Ka thin a heng tuk ih, ka thong ciamco. Padinpauh kiangah ka thong ruangah, ka thong phah in padinpauh cun amah tein tlan duh ah dung ngalh in a ngal ter aw ih in tangah a vung tla. A thi ter aw ih, inn tang ka vung tum tikah, a ruang cu ka nu ih unau pawl in an rak kai ih, a thi ter aw ti an theih ruangah a thih le thih lo a hnar ah ar-ek maan uhla a thih le thih lo kan thei ding tiah an ti ih ar-ek a hnar ah an maan ciamco. Rei lo te ah, cupa cun, tawk zo I maan nawn hlah uh tiah a hung au.

A hnar ar-ek ih a maantu cu Sayama T. Mawi a si. Cupa an kaih ih ar-ek an maannak hmun tla khi ekinn khur tlun ah a si betbet. Ekinn khur hman a cim zik te rori nan, Nu Mawi cu ttih lo in, a fapa ka hrangah misual pa cu a kai ih ar-ek a man ciamco.

Cucu ka mang a si. Ziang si a sullam tiah ka hung thang tikah, thla ka cam ih Pathian ka sut ciamco. Ka thinlung ih a fiang zetmi cu: “Ka fa, nangmaih lamih a ttangtu an tam tuk. Tih hlah! Alian teih thaithih timi cu fimthiamnak a si. Cumi na neihmi nei lo ding ih a lo longtu cu do aw. An lo neh lo ding. Na lam ah minung tampi an ttang tuk ti hngilh hlah” ti in ka thinlung hnathlam ah fiang zet in ka thei.

My Dream: No Two Masters!

Tuizing 11/14/09 naizi pathum tiang thil dangdang ka tuah ih, culawngah ka it lai. Ka thawh zik ah mang ka man ciamco. Ka mang sung ahcun, mipi tampi khawmnak ah an ra. Thu ka sim hlan ahcun, minung tampi an rak to. Caan rei nawn khawm a si thlan. Asinan, kei in thu ka sim thlang ding ka ti tikah, khawm caan a rei tuk aw an ti ih, mipi cu a burbur in an suak an suak ih, minung a thawng lai tomi sung ahcun, hlei nga kuam lawng an taang. Ka mang a bang zet. Ka thusim ding khal fiang cuca lo in ka um. Cule, mimal te kan si pam ka ti ih, cabuai kan kil ih, thusim ka thok. Thu ka vun sim ngaingai cun, hramlak vekah ka thleng lala. Asinan, ka thusim cu a thaw zet. Thu ka sim lai ah, mipa pakhat in tahthimnak ii hun sim. A timi cu, Cycle khi a ke par ah a rimmi um sehla, a slip ciamco ding tiah ii ti. Asinan, cycle kha hmailam ih a feh theinak ding hrangah, a ke a hermi khan leilung fekzet a kai ngah a sile, hmaiah a feh ding tiah ii sim. Leilung fekzet ih kaih ngah cu cycle hrang ahcun, hmailam ih feh caknak a si i ti.

Cumi tahthimnak in ka sermon cu a hun thawt ter ciamco. Thucu ka sim peh bet. Ka simmi cu “Bawi pahnih nan nei thei lo. Bawi pakhat kha na duh ding ih, a dang Bawi pakhat kha na hua ding. Culo ahcun, a dang Bawi pakhat in hmailam na feh theinak ding hrangah, tang hnget ding in a lo tuah lai ah, a dang Bawi pakhat cun, nal ding in na boot leeng ah sirim a lo hnuh sak. Cui siriim cu hnawt fai aw la, hmai ah na ke kar zaangzaang aw tiah thu ka sim ciamco ih ka kaa a thaw tuk.

Cun, ka sermon ka vun theh hrawngah, ka sermon cu ka kaa a thaw tuk, ka vun ngankhum ta ding ka ti ih, ka vun ngan khum zik tikah, ka mang ahcun, ruahnak tha pakhat a ra suak lala. Cycle kha hmailam ih a feh theinak hrangah, a ke kha a tawkfang hnak in na tuk ih nan ciat a sile, tong dang in a ke a ciat tuk a sile, a feh thei nawn lo ding. Hmailam ih na feh theinak ding ah hnaihnoktu tam tuk an um pang maw? ti in ka thinlung sungah thu ii vun ruah ter.

Ka hung thang ih ka vun ruahsal tikah, ka nunnak ah, ttantha khuar thei lo ko ii naal tertu thil hi ziang an si ti ka vun ruat ciamco. Cun, ka nunnak ah feh cak thei lo ko, ii rektu, ciat tuk ii um ter tu, a um pang maw ti pawl khua ii vun ruah ter ciamco. NO TWO MASTERS!