John 10:10
"The thief comes only to steal and kill and destroy. I came that they may have life, and have it abundantly."
Thuhmai hruai:
Ziang ruangah Khrihfa na cang tiah mi pakhat in in sut sehla, nang ziangti’n na phi ding? Douglas John Hall timi Toronto University, Canada ih Pathian thu thiam zet cun, hi tin a ti. “Jesuh Khrih cu ka nunnak hrangah sullam nei bik nunnak neitu a si.” “Jesus is the bearer of the ultimate significance of my life.” Tempe University, Philadelphia, US ih Professor Leonard Swidler khal in “Khrihfa ka sinak cu Jesuh Khrih in minung dik/hman ah ii can tu bik a si ruangah” a ti. “Christ makes me most to become truly human being.” Kei ka hrang ahcun, “Jesuh cu nun daan ii thiam ter biktu le, ii cawisaang tu bik, man ii neih ter tu bik a si.” Jesuh ih thu ka theih deuhdeuh tikah, nun daan ka thiam deuhdeuh. Ka hna a ngam deuhdeuh.
Pathian kan zum tu vancung ram kainak ding hrangah a si. Cu lawng a tawk lo. Jesuh Khrih zum cu “One way ticket to heaven” lawng cu a pam tuk. Mawtaw in pek hlan le pekhnu in ka tahthim ta ding. Maw ka neih hlan ah, Philadephia in ka rat duh le, ticket ka lei ih, ka ra ih ka tlung sal. Ka tomi Bus kha ka poi hainak dang ah ka hmang thei lo. Mawtaw ka neih hnu cun, Philadephia ka duh caan ah ka feh thei. Dawr ka feh thei. Library ah ka feh thei. Cuvek thiamthiam in Jesuh kan zum hi cu One way ticket lawng a sile, a pam hmai tuk. Nitin kan nunnak khal ah nun daan in thiam ter biktu a si. Na nunnak khal a lo cawisang biktu, a lo bawmtu bik a si zia khal ka theih fiang a tul.
Ziang ruangah Jesuh Khrih ka theih deuhdeuh tikah, nun daan ka thiam deuhdeuh, ka hna a ngam deuhdeuh ka tinak cu Jesuh ih hnatuan le, ii tuahsakmi pawl ka theih deuhdeuh ruangah a si. Pathian thu theih deuhdeuh cu mai sinak le feh daan ding hmuh awk deuhdeuh hi a si.
Jesuh ih a hnatuan
Jesuh ih a hnatuan tampi kha phun thum te ka vun khaikhawm ding: Profet, Puithiam le Siangpahrang a sinak thu lo sim ka duh.
1. Profet
Profet pawl ih an hnatuan cu a tlaangpi thu in phun hnih in a um. Mirang in forth telling le fore telling tiah an ti. Forth telling timi cu a tu lai fang minung pawl ih nun daan ah Pathian duhmi le duh lomi an si. Fore telling timi cu hmailam a ra lai dingmi thu khal an sim cia.
Jesuh cu profet bang in, Pathian uknak timi cu ziang a si timi hi he tiah a sim. A nun pi. Jesuh ih simmi le nun daan pawl khi Pathian uknak timi cu ziangvek a si timi a sim duh ruangah khi a nung timi mit in vun zoh uh la, a nun daan ih sullam nan thei fiang sin ding. Thuthimnak ah, mi sualral an timi siahkhong Zakia hnen ah feh. Ziangruangah a feh, Pathian uknak sungah cun, Pathian in misual khal a welcome .. a cohlaang ti a sim duhnak a si. Midam lo pawl a dam ter. Mithi khal a thawh ter. Ziang ruangah, Pathian uknak sungah natnak le thihnak ti a um nawn lo ding ti a sim. Biak inn khal ah sum dawnnak ih an hmang ruangah, Pathian biak inn cu hi ti hman ding a si lo a ti ih, a dawi hlo theh. Biak inn cu thlacamnak inn ih hman ding a si ti tiah a sim fiang. Profet bang in Pathian ukmi nun ah hi vek hi a tha/a tha lo timi hi ral tha zet in a zirh a sim. Curuangah, an hua tuk ih thihnak tiang a tuar.
Jesuh ih profet bang ih a nun daan ka zoh tikah, zumtu kan nun daan ding pakhat cu hi kan feh daan le canghvaih daan hi Pathian lam hruaimi a si maw? Amai thu in kan feh maw, kan mai thu in so kan feh? tihi kan ruah dingmi a si. Pathian ih uknak sungah hi ti vek ih nautat awk, thu el awknak le rem lo awknak hi a um pei maw tihi kan zoh ringring dingmi a si.
2. Puithiam (priest)
Puithiam pawl ih hnatuan cu mi dang pawl ih sualnak kha Pathian hnen ah zaangfah dil sak in Pathian ngaithiamnak co ter khi a si. Pui thiam pawl cu tuu/lai leeng le me thisen pawl keng ta hrat in Pathian hnen ah sual ngaithiam an dil sak. Asinan, thinglam tah par ah, kan sualnak hrang ih cawhkuan cu a taksa in in tuarsak, a mai thisen rori in sual ngaithiam in dil sak. Jesuh Khrih cun thinglamtah hmang in Pathian ih ngaidamnak kan par ah a thlen ter a si.
Heb 9:12 “Khrih cu cuih puanthlam sungah a lut ih Hmun Thianghlim Bik ah kumkhua daihin a thlen tikah me thisen le cawcang thisen pawl kha raithawinak hrangah a keng lo; amah ih thisen sawn a keng ih kan hrangah kumkhua rundamnak a tuahsuak a si.” Jesuh ih thinglam tah ah kan aiawh ih in tuar saknak le a thihnak ih ruangah, Pathian in kan sualnak in ngaithiam.
Rom 4:7-8 (7An ṭhatlonak ngaithiam a si mi le an sualnak thlahsak a si mi pawl cu milungawi an si. 8Bawipa in an mawhnak a siarsak lomi le an sualnak cazin ih a khumsak lomi pawl cu milungawi an si,” a ti.)
Eph 2:8,9 … Zaangfahnak ruangah ah rundam kan si.
Curuangah, Jesuh ih puithiam a sinak kan zoh tikah, zumtu pawl ih kan hnatuan a lang. Jesuh in a nunnak liam tiang ih in rundamnak thu phuansuahnak hi zumtu hi puithiam hnatuan pehzom ih kan tuannak cu a si. Jesuh in Pathian le minung kar lak ah sual ngaithiamnak um thei ding in a tuah bang in, khat le khat rualremnak le sual ngaithiamnak um thei ding ih kan tuahmi hi puithiam hnatuan thiamthiam a si.
3. Singpahrang (King)
Siangpahrang pawl ih an hnatuan cu ziang a si tile, a ramsung minung pawl kha ral pawl ih kut sung in an kil him. An mipi lam ah ttang tahrat in an mipi thatnak ding hrangah thu an rel. Khua an khaang.
Jesuh khal cun, Siangpahrang bang in a minung pawl in ziangthu khal ah donhar le thlaphang ih kan um lo nak ding hrangah mi sual kan mai lam ah ttang in thihnak tiang a tuar. Amah cu in ttantu a si (Rom 8:31). A taksa ih a um nawn lo hnu khal ah ni hra hnu ah thlarau thianghlim cu a run thlah ih, in um pi. In hnem. Thla kan cam thiam lo lai khal ah kan ai ah thla in cam sak (Rom 8:27). Nunnak tlaamtlin kan neih theinak dingah in umpi lam in hruai. A sinan, Jesuh cu siangpahrang a si nan, nan Bawi si ding ah ka ra lo, nan mah ih sal (riantu) si dingah ka ra a si tiah in ti (Mark 10:45).
Jesuh ih siangpahrang a sinak zoh in, zumtu pawl ih kan hnatuan cu kan mipi pawl humhim ding le, mi farah zonzai pawl hrang ah ttongsak ding hi a si. Midang pawl kha Pathian in na hrang kei ii retmi ka si. Nangmah bawm ding ah Pathian in ii retmi a si tiah kan ti tikah, Siangpahrang hnatuan pehtu kan si.
