Tuilai leitlun ih an uar zet mi le kan Chin khawvel khal ih kan theih lar zet mi asi ih mipi hrangah thil thar tuk cu a si ka zum lo. Kan theihnak a rei, kan hman thok nak a rei zet zo nan tui ni tiang kawhhran tin ah mipi le Praise & Worship teams karlak ih buainak hi hmuh ding a um rero. A hram a rak thok daan le mirang pawl ih rak hman daaan pawl ngan ka tum mi si sawn lo in kan Chin mi dinhmun thawn ziangtin kan hmang ding, ziangsi kan din hmun thawn a kaih aw in kan hruai ding tihi ka hmui tin mi sawn asi.
Praise & Worship Teams ih tumtah mi(Engage)
Praise & Worship teams cu Pathain thlarau thianghlim le mipi pehtlaih ter tu (Engage) a si. Tong dang kan hmang asilen, Restaurant dawr ih rawl zem tu (Waiter/Waitress) vek a si. Curuangah rawl zem tu cun thianghlim le felfai ten, a ei tu pawlih order/duh daan vek ih a tuah le a zem suak a si len puar zet in an ei ngah ding. Rawl ei tu customer a lung kim ah cun cuih rawl zem tu khal a hmin tha in laksawng tampi a boss hnen ihsin a co ding. Curuangah timlaam nak nasa ten a neih a tul. Hitluk cun kan theihthiam ka zum. ( Note: Hill Song timi le Praise & Worship timi hi a bang aw lo. Praise & Worship tuah tik ah hill song hla siseh, hla dang, ziangvek thangthatnak hla khal sak a theih. Hill song hla lawng sak dingih ruat ding a si lo.)
1) Hla hruaitu ih theih tul mi
A tlun ih sim zo bangin pehtlaih tertu kan si ruangah mipi kha upat thiam in zianghman tuah fial ciamco lo ding. Mipi duhdan thlir thiam/zoihthiam phah in hruai thiam a tha. Hill song hla lawnglawng sak lo in hla dang thawn rawi thiam asi len mipi hrang ah a tha zet. Cui hleiah, hla hruaitu cun zoih a mawi mi hnipuan hruk a tha. ( Note: Hill Song timi le Praise & Worship timi hi a bang aw lo. Praise & Worship tuah tik ah hill song hla siseh, hla dang, ziangvek thangthatnak hla khal sak a theih. Hill song hla lawng sak dingih ruat ding a si lo.)
2) Music player ih theih tul mi
Pathian hla le love song hla tum daan a bang aw lo. Aw hman mi effect pedal khal a bang aw lo. Cang thei len effect Distortion hrimhrim tla cun hmang lo ding asi. Mipi hrangah a pin tuk. Eco (delay pedal- Clean tones) tete thawn tum len fiangfai zet in a suak ih a mawi zet fawn. A tul daan in Over Drive malten hmang phahphah ding. Ral ring dingmi cu Drum player hnen ah Setan in hna a tuan hmai sa bik duh zet. Mipi thawn hlasak tlang kan si tikah a karlak ah guitar solo tampi tum lo a tha. Mipi an vaivuan thei. Music player khalin zoih a mawi zet mi hnipuan hruk a tha.
3) Koihhran upa ih theih tul mi
Mipi lamih compliance tambik hi Music a ring tuk ti asi theu. Curuangah ah koihhran mino sungih rinsan mi hril in Music sound control daan thiam ding ko in mirang pawl hnen ah zir ter lawlaw a tha. Cuihhlei ah, piano, guitar khal zir ter cih thei sela a tha sinsin. Praise & Worship teams hi mino tete an si theu ruangah tha pek thiam a poi mawh zet fawn. Hla ciin can ah tel pi thei zuam in thazang pek nak thu tawite sim phah in thlacam nak neih sak thei theu sela a tha zet mi a si.
4) Mipi ih theih tul mi
Tui lai leitlun santiluan thei thiam dingin zuam a tha. Khua lam ih ti daan kel te lawng a tha bik ih ruat lo in santiluan ih zir in ziangvek hla khal ei thei zuam a tha. Praise & Worship duh lo ruangah biak inn feh paih lo/khawm paih lo ih na um ah cun thlarau lam ah na cek awk a tul. Hynm hla lawng na sak thei / Nun thar hla mawi lawng a tha bik ah ruat tu / Hill song lawng thlarau hla deuh cuangih kan ruat sung cu kan biak mi kan thei fiang lo tinak a si. Pathian thangthat nak hla a si ah cun ziangvek khal rak ei thei thluh zuam uh si.
Tui lai US mino 80/100( Zaa ah sawm riat) tluk cun biak inn an pal paih nawn lo ti a si. Cuimi lai ah kan nih Chin mino pawl biakinn lam Praise & Worship ah hlasak le music play phah, thatho zet ih an um paih hi lom le tha pek sinsin thiam kan tul.
(Note; Engage timi Praise & Worship tranning kan FBCI Pastor ( Rev.Ci LianKap) thawn kan kai mi sung ihsin ka lak mi le keimah hmuhton mi sung ihsin koihhran tin hrangah thathnem nak mal lai a um beisei nak thawn ka ngan mi a si.)
Salai Lai Lung Lian
Falam Baptist Church Of Indianapolis
