Ziangruangah Christmas Kan Tuah?

San No Thuan

Thuthangtha sim theinak caan in pek ruangah ka lungawi zet. Nan zate in nan kut ka lo kai. Christmas thla kan thleng thlang ih, curuangah, Christmas thu lam thusim ka duh. Minung tampi in Christmas kan thlen tikah, kan thinlung khal a danglam. A hleice in Laitlang ahcun, Cherry par tete a hung mum, an hung par ih, zilthli dai te in mi an seem, Carol veeng tin in an vak ih, a phun dang ngaingai. Asinan, Christmas ih puai um daan le nikhua um daan pawl in, in nom ter ih, puai a cem cun, kan lungawinak khal a cem viar theh theu. Cucu ziangruangah tile, Christmas kan tuah duhsannak ngaingai kan theih lo theu ruangah a si. Asilole, kan sunloih thangthatmi kha puai neitu hnak in, a puai ah kan ret ruangah a si. Ziangruangah, Jesuh Khrih hrangah puai kan tuah?

Luke 2:10 “Tih hlah uh! Nan hrangah thuthangtha ka run keng; cui thuthangtha cu mi hmuahhmuah hrangah lungawinak ngaingai a si. Tuih zaan rori ah David khuasungah nanmah Runtu Bawi Khrih a suak zo.”

“Nan hrangah thuthangtha” a ti. Cui thuthangtha lungawinak ngaingai a si a ti. Cui thuthangtha cu Runtu Bawi Khrih a suak zo timi a si a run ti. Runtu Bawi Khrih suah cu ziangah saw kan hrang ih lungawinak ngaingai, puaipi tuah ih, kan lom a tulnak a um? ti in minung tampi in an sut. Tui ka sermon ah hin, Khrih a suahnak hi kan hrang ah thuthangtha lungawi taktak a sinak thu pathum in sim ka duh. Cui thu pathum cu si Christmas caan ih kan lommi cu!

1. Christmas cu Pathian duhdawtnak kha kan sunlawihmi a si.

 (Christmas is a celebration of God’s love to us).  

Jesuh Khrih a rung suahnak hi kan hrangah thuthangtha a si ziangruangahtile Pathian ih duhdawtnak a rung langh caan a si. Pathian ih a fapa in peknak san cu ka lo duhdawt bik timi in theih ter duh ruangah a si. Ka lo duhdawt in ti men lo. A tuahsernak in a langh ter. John 3:16 sungah kan zoh tikah, Pathian in leilungmi a duhdawt tuk ruangah a fapa neihsun a pek ti kan hmu. Fapa neihsun peknak in in duhdawtnak a langh ter.

Jesuh Khrih cu naute vek in um ringring men sehla, Pathian ih duhdawtnak kan thei lo men ding. Asinan, Bible ca in, Khrih cu mi sual kan si lai rori ah kan sual ngaithiamnak ding hrangah a nunnak pek in a thi (Rom 5:8) tiah a sim. Khrih in thinglamtah par ihsin kan hnen ah a thlen termi pahnih a um: Pathian ih sual ngaithiamnak le misual kanmah pawl kha mi dingfel ih cohlanmi sinak a thlen ter. Cucu kan felnak le thil tha kan tuah tam ruangah a si lo. Khrih Jesuh in kan aiawh ih a tuarnak ruangah a si. Cui duhdawtnak cu Bethlehem caw rawl kuang sung in a rung phuang aw. Curuangah, Khrih suahni kan tuah tikah, Pathian ih duhdawtnak hi kan thangthatnak a si sawn.

Ziangtin Pathian ih duhdawtnak hi kan thangthat ding? Nuamnak tuah menmen ih cem ding a si lo. Christmas kan tuah ding daan cu: Pakhatnak, Pathian hnen ah fapa neih sun, a thabikmi tiang I peksiang ruangah ka lungawi tiah lungawithu kan sim ding. Pahnihnak, ziangkim ka hrangah thil dang khal I pe ding ti ka zum tiah Pathian kha kan rinsan sin ding (Rom 8:32). Pathumnak, na duhdawtnak leitlun ah langh tertu I si ter aw tiah pumap aw in pakhat le khat duhdawt aw ding. Ziangtin kan duhdawt le duhdawt aw lo kan thei thei ding? Cumi thei thei ding ah, pakhat le khat kan bawm aw maw? (1 John 3:18). Cun, pakhat le khat ih sualnak kan ngaithiam aw maw? (1 Cor. 13:5). “Duhdawtnak cun, mi sualnak a cing lo” tiah a sim.

2.  Pathian in in umpi ti kan theihnak le kan lomnak a si.

(Christmas is a celebration of God’s presence with us)

Caan tampi ah Pathian in kei cu I umpi nawn lo tiah kan ti. Ziangah ti a si le, “Ka khaansa (feel) thei lo. Ka mithlam khal in ka hmu lo” tiah kan ti. Asinan, Pathian in in umpinak cu kan nih in kan taksa le thinlung ih kan khansa thei/hmuh theihmi thawn a seng aw lo.

Na thinlung ih Pathian a um le um lo na feel/feel lo ah, Pathian cun a lo taansan dah lo. A lo umpi ringring. Kan Pathian ih hmin cu Immanuel a si. Immaneul timi cu Pathian kan hnen ah a um timi a si. Isai 7:14  “Atu ah Bawipa amah rori in khihmuhhnak a lo pe ding. Nunau no pakhat in fa a vun ih fapa a hring dingih a hminah Immanuel * tiah an sak ding.” Kan hnen ih in umpitu Pathian cun, in taansan dah lo. Nu in a sung suak fa a taansanta thei hman ah khuitik hman ah ka lo taansan thei dah lo ding tiah in titu a si (Isai 49:15, Heb 13:5).

Ziangtin Pathian ih umpinak cu kan lawm ding? A thluasuah siar sal in, lungawi thusimnak, sual ngaithiam dilnak, thangthatnak hla saknak le, thlacamnak pawl in kan lawm ding. Cumi pawl kan tuah tikah, mit in kan hmu thei lo nan, inn umpi ringringtu kan mikhual Jesuh hrangah a si timi ruat in kan tuah dingmi a si. A tawi zawng cun thinlung tak ih biakpeknak (worship) nei ding hi a si.

3. Pathian cu kan lam ah a tang ti kan lomhnak asi.

(Christmas is a celebration that God is for us)

Minung tampi ih kan buaipi bikmi cu, Pathian cu police (palik le ralkap) vek ah kan ruat. Asinan, Jesuh Khrih sung ih a langmi Pathian cu kan sual hawltu a si lo. Kan lam ttangtu, in bawmtu a si sawn.

Naute khi a feh thei zuakzo tikah, nu le pa in, ziangtin an tuah? An kawk ciamco maw? Kawk hlah ee. A feh theinak dingah, an bawm ih an feh ter. Cuvek in, kannih Pathian faale pawl khal, thlarau lam ah naute le upa kan um. Naute a simi pawl cu a tu le tu an bah. An bah tikah, anmah te an tho thei theu lo. Asinan, thlarau lam ih pitling pawl cu an bah ve theu ko. Asinan, an tho ih, Pathian hnen ah an kir lohli. Pathian hnen ih an kir lo ahcun, Pathian in a phunphun in a ko thotho. Pathian in, thlarau lam ih nauhak lai pawl siseh, upa pawl khal siseh a hnen kan kir ih Amaih duhnak hi a pakhatnak ih retu kan si theinak dingah in bawm ih thazaang in pe sawn a si. Curuangah, Paul in hiti in a ngan:

Rom 8: 31, 32 ….

31Hi hmuahhmuah kan theih hnuah ziangso kan sim hrih ding? Pathian kan lamih a ṭan ahcun zoso in dodal thei ding? 32In dodaltu cu Pathian a si lo, a Fapa neihsun hman zuah loin kan zate hrangah in pe zo! Amah ih Fapa rori hman in pek a si ahcun thil dangdang khal a lakin in pe lo ding maw?

Pathian cu kan lam ah a ttang timi ziangti in kan lawm ding? Zo cio Pathian ih ttanpimi an si timi thei ih, nautat lo ding. Hmuhsuam lo ding. Midang hmuhsuam cu Pathian hmuh suam a si timi kha theih ringring ding. Jesuh in, a mi le fa an hrem tikah, keimah in hrem a si tiah a ti.

Isai 9:3-5

Saul cu Damaskas khua a thlen zikah hmakhatte ah van ihsin tleunak in a kimvelin a run tlet. 4Saul cu a tlu ih, “Saul, Saul, ziangah so i hrem?” tiah aw pakhat a thei. 5Saul in, “Bawipa, zoso na si?” tiah a sut. Cuih aw cun, “Na hrem reromi Jesuh ka si.

Cuvek thiamthiam in, Jesuh ih a ttanmi a fa le pawl kan duhdawt tikah, “Keimah in duhdawt a si” tiah a ti thiamthiam.

Mathew 25:40

Siangpahrang in, ‘Thungai in ka lo sim: hi ka unau pawl lakah nauta bik parih nan tuahmi cu ka parah nan tuah a si,’ a ti ding.

Thunetnak:

Minung tampi cu Christmas puai a cem cun, an lungawinak a cem cih theu. Ziangruangah tile, puai neitu Khrih hnak in, a puai ah kan buaipi sawn ruangah a si. Chrismas kan ttheh hnu khal ah kan lungawinak a hmun caamcin theinak dingah Christmas kan tuah duh sannak bik kan theih tengteng a tul. Cumi pawl cu: 

1.    Pathian ih in duhdawtnak kan sunloihnak a si. Cui duhdawtnak cu ziangti in kan sunloih ding tile, Amai in duhdawt bang in pakhat le pakhat kan duhdawt aw ding.

2.    Pathian ih in umpinak kan sunloihnak a si. In umpinak kan sunloih thei daan cu, kan thinlung takte in Pathian hnen ah lungawi thu, thangthatnak le thlacamnak kan nei ding.

3.    Pathian ih in ttanpinak kan sunloihnak a si. In ttanpinak the ziangtin kan sunloih ding? Midang pawl kha Pathian ih a ttanpi a si ti thei in, ttanpi thiam ve dingah Christmas puai kan tuahnak a si.

"TIH HLAH"

    Salai Phun Lo.  

Thu hmaihruai:  Lei tlun caan zimlepah kan umih kan leilungpi cem netlam a pan vingvo. Tv, Internet, Radio, Thuthang ca,kan mit rori ih kan hmuhmi le kan hna rori ih kan theihmi thu le thawngah tih nungza, tuksumza lawnglawng an si. Daihnak a um nawn lo, hnangamnak a cem, duhdawtnak a hlo, Fimnak a karh vingvo ih hight-tech ruangah natnak le buainak a phunphun a suak.Accident a tam, thih cu lo in kan thi, do awknak a karh vingvo. Ram tinin Nuclear ral hriam hrei puah dingah tiar ciain an um.Tihnungza…Tihnungza!!! Mi hmuahhmuah in kan leilungpi ziang tikah a cem pei tiah tih le khur in an thlir cuahco. Culai fangah Vancung ih Au Aw Christmas thuthangtha cu "TIH HLAH" ti a si.

Tih hlah!!!Tih hlah!!!Tih hlah!!!, Ziang ruangah???

I.  PATHIAN KAN HNENAH A UM(Mt.1:20)

         "Josef, Mari hi na nupi ih thit dingah tih hlah. Ziangah ti le fa a vun dingih…fapa a hring ding, A hminah Immanuel tiah an ko ding      ( Immanuel timi cu 'Pathian kan hnenah a um' tinak a si)."

          Kan Bible ca thianghlim sungah Emmanuel cafang hi hmun thumah kan hmu thei( Isai.7:14; 8:8; Mt.1:23 ). Pathian ih umpi mi kan si. Pathian ih thu lo in kan parah ziang hman a thleng thei lo. Cu ruangah zianghman tih ding a um lo.

II.      PATHIAN ZANGFAHNAK KAN TLUNAH A UM( Lk.1:30)

          "Cule Vancungmi in Mari, tih hlah! Pathian cu na parah zangfahnak a nei a si."  Pathian zangfahnak cu zumtu kan zate tlunah a famkim( IIKor.12:9 )"Ka Zangfah, lainatnak cu na hrangah a kim a si, ziangah ti le na tawntaih caanah kei ka huham a cak bik a si". Tih ding a um lo Pathian zangfahnak kan tlunah a um.

III.               RUNTU BAWI KHRIH A SUAK ZO(Lk.2:10-11)

         "Vancungmi cun, Tih hlah uh! Nan hrangah thuthangtha ka run keng; mi hmuahhmuah hrangah lungawinak tumpi a si. Tui zan rori ah hin David khua sungah nan mah runtu Bawi Khrih a suak zo". Tuu khal pawlin cui aw an theih tikah tihnak ihsin lungawinakah an khat, Vancungmi ih sim vekin naute an va hnu, an hmuh mi thu cu mi dang hnenah an sim.An hmuh mi le an theih mi pawl ruangah Pathian thangthatnak hla sak phah in lungawi ten an tlung. Lei tlun run damtu a hmu ngah tu cun lungawi le hnangamnak in an khat.

IV.    THLACAMNAK THEITU PATHIAN KAN NEI( Lk.1:13)

         "Zekhariah, tih hlah! Pathian in na thlacamnak cu a thei zo".

          Leitlun ih biaknak dang pawl cu tawlingsenpawt in thla an camih an pathian an kawh khal le an pathian in a theih lo( Musalim, Buddah, tvp...). Kan nih cu Ka Pa ti ih kan kawh veten vuan thuah thum ih um Pathian in ka Au Au in thei, Kan thlacamnak a phi pe dingin tiarcia in a um.

           Zianghman tih ding a um lo kan thlacamnak theitu Pathian vancungah kan nei. Na natnak, harsatnak, tihnak le thlaphannak pawl Pathian hnenah thlacamnakin theih ter aw, Thlacam theitu Pathian kan nei.

Thu tlangkhawm:       :Kan Bible ah TIH HLAH timi tawngkam vei 366 kan hmu.Kum khat ah ni 366 a um ih cumi in a simduh mi cu kan kiang kapah tih ding a tamtuk ruangah nitin Pathian in TIH HLAH tin tha in pek nak a si. 

                                                                                

Christmas Thuthangtha

Christmas ih lungawinak thuthangtha cu Jesuh in, a sinak mawi le duhnung, a thianghlimmi cu misual kan mah kha in hruk ter ih, Amah in kan sualnak pawl hmuahhmuah kha a mah in a lak ih, cross par ah a nunnak liam in a kholhfai theh. Cu ti ih, sinak thleng aw ding ih a rungtumnak cu kan hrangah lungawi thuthangtha a si. Curuangah, tuisun ni ah zo ka si ti na thei awk duh ahcun, Jesuh ih thisen man le nunnak na man a si. Ziangah tile, Jesuh in a man in a lo lei zo. Nangmai ta na si nawn lo.

Christmas Card for all