Friday, June 18, 2010

Pa Raltha Ka Pa


Ralthatnak taktak timi hi ziang a si? Ralthatnak taktak cu mi va sual ngam vutvo mei, zokhal tihmi nei lo khi a si lo. Mah le mah khal that aw ngam khal a si lo. Ral thatnak taktak cu kan nulepa pawl ih duhdawtnak nun ah kan hmu thei. In duhdawtnak cun, tangdor a tul caan ah sal vek in tang a dor. Thin sau a tul caan ah, rilrawn a tul caan le, ningzah a tul caan khal ah kan hrangah ziangkhal an tuar ngam. Cucu ral thatnak a si. Himi ka hla te ah rak ngai ve aw.



Thursday, June 17, 2010

Harsatnak Ih In Zirhmi Fimnak Panga (Matt 5:3)


Harsatnak pawl in in zirhmi thu panga pawl:

1. Runhim tulmi ka si ti thei aw ding in in zirh.
2. Pathian par ah hngat awk ka tul ti in simfiang.
3. Midang ih bom tulmi ka si ve hi teh ti in theih ter.
4. Ka tulmi taktak (need) le ka duhmi (want) khal thleidan thiamnak in zirh.
5. Pathian hnen pan ding in in hruai.

A tawizawng cun, harsatnak in thlarau lam ah, ttongdang in Pathian hmai ah mi farah kan si ti in thei ter. Thlarau lam ih mifarah timi cu "Pathian lo cun" timi a thei aw tu pawl an si. Pathian tihzah lo le rinsan lo in kan um tikah, kan minung sinak a simi, hngalnak le porh awknak pawl a suak. Asinan, harsatnak kan ton tikah, Bawipa lo cun zianghman ka cang thei lo ti in theih ter. Cutikah, Bawipaih lamhruainak dil lole, a ttongkam thuthup siar le nun cih lo in kan um thei lo. Bawipa nangmah in i uk aw, i hruai aw ti lo in kan um thei lo.

Curuangah, kan thazaang a mal caan, Bawipa lo cun ka hlawhtling thei lo (lack of self sufficiency) ti ih kan feh caan ah Pathian kan rinsannak le hngauhsannak a tam sin. Cutikah, Pathian cu kan nunnak ih thuneitu uktu ah a cang ih a cangvai tikah, kan thamal caan cu kan cah bik caan ah a cang. Curuangah, "thlarau lam ih ka farah ti a thei awtu pawl cu mithluasuak an si. Ziangah tile, Pathian uknak cu an maita a si" tiah a tinak a si. (Matt 5:3).

Tuesday, June 15, 2010

Online Guitar Tuner


Guitar tum pawl hrangah, Master key vek in nan Guitar nan ret ringring a tha zet. Master key hi hmun tin ih neih a har. Curuangah, online ah Master key tuner a um ih, a tanglam vek ah hmet aw.



Monday, June 14, 2010

Nehtu kan si theinak dingah, ziangti in thu kan ruat ding?


Zumtu cu nitin raldo kan si. Kan domi cu Pathian fanu le pa pawl lampeng ih in hruaitu Satan ral kan do ringring. Cui kan ral Satan cun, a do tum bikmi hmun cu kan thinlung le thuruahnak (thoughs) a si. A theihmi cu kan thinlung ruahnak hi a control thei ahcun, kan nunnak hi a control thei ti a thei. Ziangah tile, minung ih thuruahnak in kan lungput le kan cangvaih daan khal a hruai a si.

Thuthimnak ah, thil tha lo lawnglawng na ruah ahcun, cumi in a lo hruai ding ih cui hmun ah na thleng leh ding. Kan thinlung cu taanlight vek a si. Thil tha kan ruah le thil tha ah in hruai.

Minung ih thinlung cu ziang vek a si ti tahthimnak thawn ka sim ding.

Simduhmi: Na thinlung sungah thil tha lo kha seem ter hlah.

Thinlung le hmuandum

Kan taksa khal a fai lo le, kan kholh aw. Inn khal kan phiat. Hmuan dum ih cii tha lo hrampi pawl kan phawt. Asinan, kan nunnak ih a thupi bikmi ah hmun: kan thinlung, sungah cii tha lo a tlak tikah, kan zoh men ih, ti tla kan toih ciamco ih, kan than ter. Satan in cii a tuh thei. Asinan, a phawi hlo theitu le a thanso ter theitu cu nangmah inn neitu na si.

Thinlung le hnawmpung

Na thinlung cu Satan pa kha thlaicii tuh ding in khuanh na pek ih na zoh men a si le, na thinlung cu hnawmpung ah a can ter ding ih, na nunnak a lo thut tertu beidongnak, riahsiatnak, le depression pawl kha a run hlon ciamco ding. “Trash Goes Here” a lo ti sak men ding.

Thinlung le Boxing ring

Caan khatkhat ah kan ralpa cun in thong tluk pang ih kan bah pang khal le, kan rilhnak hmun ah um ringring a tul lo. Pathian, a sangbik Siangpahrang ih fanu/pa duh bik ka si ti thei ih, fapa tlanhlo bang in Pai duhdawtnak le thilti theinak ring in thosal mei aw.

Curuangah, na ruahnak kha tha te in ruat sal aw. It’s time to think about what you are thinking about.

Nehtu kan si theinak dingah, kan lungput hi ziangvek in kan re ding?

1. Na problems kha ziangtluk a tum ti hnak in Pathian maksaknak le cahnak ah na thinlung re aw.

John 16:33

33Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral ha uh; Leilung cu ka neh zo!” tiah a ti.

Na dam lo a sile, ka dam lo ti mei aw. Asinan, dam ter theitu Jesuh ka hnen ah a um ih, Amah in tuanvo I lak ih ka dam ding ti thei zum awla, lungawi thu sim aw.

2. Ruahnak hlun pawl kha phuak aw, ruahnak thar kha hru aw.

Eph 4:22-24

2A hlan nan nun keel vekih a lo nuntertu nan nunhlun cu hlon thlang uh; cuih nan nun hlun cu mi bumtu titsa hiarnak in a thihter cuahco mi kha a si. 23Nan thinlung le nan ruahnak a zatein siamtharmi si heh uhla, 24Pathian ih hmuihmel kengih tuahmi, a ding le a thianghlim in a langmi nunnak dik, nan nun thar kha hruh-aw uh

Phil 4:8

8Thunetnak ah, ka u le ka nau pawl, a hami, porhtlak a si mi, a taktak a si mi, upat tlak a si mi, a dikmi, a thianghlimmi, duhnungza a si mi le hminhatnak a petu thil pawl thawn nan thinlung cu khatter uh.

3. Pathian in na tuah thei ding ti a lo zum.

E.g. Moses Suahlannak 3:12ff

Pathian in Moses terh a fial tikah, nangmah te in na tuah thei ding tiah a ti lo. Ka lo umpi ding tiah a ti. Pathian in a umpi tikah, ziangkim tuah theitu ah Pathian in a can ter a si.

Pathian in umpinak cu kan cahnak le huham a si.


Online Ih World Cup Zoh Duh Pawl Hrangah

TV zoh man lo nan, computer in world cup a zoh duh pawl hrangah a tanglam website ah feh aw.




Friday, June 11, 2010

Ziangruangah, ka piangthar nan ka nun ka tthin thei lo?


Piantharnak, ttong dang in, Pathian ih duhdawtnak le in rundamnak theihfiangnak le zumnak, kan neih hnu ah ziang ruangah kan tisa sinak a suak ringring si pei timi thu hi kan ruat theu ding ka zum. Piangthar hnu ah nun thar ih kan nun theinak dingah:

1. Khrih ih lungput le nun zia kha nitin nun cih a tul (1 Tim 4:15, 16).
Jesuh ih nunnak le thisen ih leimi ka si zo ti kan theih hnu ah mipiangthar kan si. Asinan, thlarau lam ahcun, hrem hrih lomi rang (horse) vek kan si. Hrem lomi rang tla khi zoih hrem lo in, a rak um rei tuk tik ah, a par ih thuneitu dang a um ding cu a duh in a duh lo. Cuvek in, zumtu khal hi, kan mai thuthu in kan rak umnak a rei tuk ahcun, Pathian in, in control tum tikah, har kan ti tuk theu. Har ti cing in, Pathian thlarau ih a lo simmi le zirhnak kha ngai aw, tuah aw. Cu tikah, hman tlak minung ah a lo can ding a si. Minung tampi in ka nun ka tthin thei hrimhrim lo an si. Jesuh ih leizomi ka si ti na theih a si ahcun, na buainak ih a cahnak hnak in Pathian ih cahnak hi a tum sawn timi thei in, Khrih nun zia kha ral tha zet in hru ko aw. Pathian in a lo umpi ringring ih a lo bawm ding a si (1 Kor 10:13, Suahlannak 3:12ff)

2. Khrih banghnak cu nuam tete in a si (2 Kor 3:18)
Vei khat te ih nun thar le lungput thar neih cih tihi a um thei lo. Thansonak cu nuam tete in a si. Vei khat thlacamnak in nun thar ververnak ti a um thei lo. Nun hlun rehnak sii ti khal a um lo. Khrih bangnak nun, ttong dang in, Khrih ih ukmi nun cu nuam tete in a tthangsomi a si. Pastor Rick Warren in hitin a ngan: "There is no growth without change; there is no change without fear or loss; and there is no loss without pain." Thleng awknak um lo in, tthansonak a um thei lo. Sunnak pakhatkhat nei lo in, thleng awknak khal a um thei lo. Tuarnak um lo in, sun ralnak khal a um thei lo tiah a ti. Thu dik a si. Mi tampi cun, kan nun hlun taansan ding kan siang lo. Nun hlun khal nun pi cih ih Khrih dung thlun kan tum. Nun hlun le thar cu dung lam le hmai lam ah an feh veve. An direction a dang. A pahnih ih ceem na tum le na tthangso thei lo ding. Satan cun, na cem thei ko a lo ti ding ziangah tile, a tthangso pang ding ti a phang tuk. Ka party a si nawn lo pang ding ti a phang tuk. Curuangah, Khrih nun daan le lungput cu hnipuan thar kan hruk bang in hru ding kan si. Cucu, na mawinak bik a si (Rom 13:13-14; Ephesa 4:22-25; Kolose 3:7-10,14).

3. Nitin thlarau rawl ei aw (1 Pet 2:2).
Nitin Jesuh Khrih ih ziaza le lungput lam ih kan thanso theinak dingah, thlarau rawl asimi Bible kan siar a tul. Bible na siar tam le, na thinlung cu Bible ih lungput na nei ve ding. Thlacam aw, Pathian ih a lo umpi zia na thei sin ding ih huham cahnak na nei ding. Asinan, zumtu in nitin kan umnak hi kan ralrin a tul. Satan in khui tawk ih na um ah a lo ngam bik. Cutawk hmun kha tlaansan aw. Zumtu pawl thawn pawlkomawknak le thlacamnak hmun ah feh aw. Siang Bawi Dr. Hre Kio in a simmi ka lungkim zetmi cu "Meisa alh lai thingthu khi la uh a mah lawng hmun dangah re hnik uh. A rei hlan ah, a mit ding." Zumtu cu na mikommi ralring aw. Zumtu kom aw.

Thursday, June 10, 2010

Thlapi Khi Ee

ka thinlung i nuam ter bik tu nau awih hla te! So calm! Himi hla a tuahtu par ah lungawinak tampi ka nei.


Awmawi (music) cu lei tlun zapi ih theih theimi tong a si. Minung lawng hman si lo in, sersiammi pawl tiang in an duh. Music cun, tongka ih kan sim thei lomi kan lungawinak, riahsiatnak, le thinnemnak pawl kan lang ter thei ti aw.

Sinan, himi hla cu a neem tuk ih maw, nan fale pawl kha an rawl ei lai tla nan sak sak pang ahcun, an rawl ei lai ah an sing theh pang ding maw ... ralring ... he he

Wednesday, June 9, 2010

World Cup Calendar of 2010

Cape Town Stadium
World cup zoh hi zokhal kan duh cio ding ka zum. A tanglam link par ah na hmet le 2010 world Cup Calendar fiang te in na hmu thei ding.