Na Uknak Thleng Hram Seh

Matt. 6:10, John 2:1-10,

Matt 6:10 sungah, Jesuh in “Na uknak thleng hram seh” tiah thlacam uh in ti tikah, ziangtin Pathian ih uknak cu a thleng thei ding? Hriamhrei thawn din theih a si lo. Pathian uknak cu Pathian in zo pawl hmang in a din tile, “Bawipaih duhnak nun kim ter ding lawng a duhtu pawl hnen in a phuang aw a si.”

Pathian uknak timi cu Jesuh in hi leitlun a rat lai ihsin a thok zo ih an ṭamci bang in a tum vingvo leh ding. Nang le kei ih kan tuanvo cu a kim theinak dingah, rak telvetu kan si ding hi Bawipa in in sawmmi a si.

Jesuh hmaisabik mangbangza a tuahnak hi Kana khua ih nupi thitpuai ahhin a si. Himi nupi thitpuai kan zoh tikah, Pathian ih sunlawinak ziang ruangah a lang ih, zo pawl thawng in a lang timi fiangte in kan hmu thei.

1. Jesuh khal an sawm ve (cc. 1-2)

·       1Ni hnih hnuah Galilee peng Kana khua ah nupi ṭhit puai a um. Jesuh ih nu khal cunah a um ih, 2Jesuh le a dungthluntu pawl kha an sawm ve.

·      Saya Luai Hre ih tong, “Jesuh nan sawm lo pi, ziangtin buai lo in nan um ding?” a ti.

·      Midang hmuahhmuah cu kan sawm theu nan, Jesuh na sawm lo ih na tuahmi pohpoh ah thluasuah a um lo. Ningzahnak le mualphonak lawng an si.

·      Ziangtin kan sawm ding?

·      Thufim 3:5-6

·      5Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah.

·      6Na tuah mi kipah Pathian cu thei ringring awla, Amah in lamzin dik a lo hmuh ding a si.

·      Tuahmi kipah Pathian cu thei ringring timi cu – Kanmaih duhnak hnak Pathian ih duhnak thupi sawn ah re aw.

·      Pathian kha sawm lo ih na tuahmi an um pang maw? Pathian kha sawm aw.

·      Matt. 6:33 sung khal ah, Jesuh khal in – Pathian ih duhnak kha hawl hmaisa sawn uh. Cule, a dang pawl kha pekbet nan si ding in ti.

·      Pathian ih sunlawinak lang dingah Jesuh a sawmtu kan si a tul.

2. Mary ih lungput (cc. 3-5)

·      Midang ih harsatnak le mualpho ding a duh lotu a si.

o   3An Sabitti a cem tikah a nu in Jesuh hnenah, “Sabitti an nei nawn lo,” tiah a ra sim.

o   Midang ih harsatnak parih zawnruahnak neih hi Jesuh ih a duh bikmi nun daan a si.

§  Samariah mitha pa.

·      Mary in Jesuh kha a duhmi tuah ding in a force lo. A duhmi a sim men.

o   4Cutikah Jesuh in, “Ka nu, i sim duh hlah; ka tikcu a kim hrih lo,” tiah a ti.

·      Mary in Jesuh a ring mei.

o   5A nu cun hnen-um pawl hnenah, “A lo simmi poh tuah uh,” tiah a ti.

o   Matt 11:28 sungah:

§  28“Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding.

§  Jesuh hnen ih na ap zo hnu ah thinhar in um duh nawn hlah. Na um ahcun, na thilrit kha na ap theh hnu ah na laksal ih nangmah in na phur sal thawn a bang aw.

§  E.g. Mawtaw par ih bawm phur vek na si ding.

o   Pathian in a thil tuah duh daan le a tuah tum caan hi nangmaih duh daan vek a si lo thei. Asinan, a tha sawnmi a thei sawn. Amaih hnen ah na buainak kha ap mei awla Pathian ih duhmi lawng hril in tuah mei aw.

·      Mary bang in midang zawnruat ih an ningzah le mualpho khamtu ding pawl hmang in Pathian in a sunlawinak a lang ter.  

3. Hnen-um pawl ih lungput: Zumnak cu a thupekmi thlun khi a si (cc. 6-8)

o   6Cutawkah Judah daanih a um vekin an kut kholhnak hrangah tidai ralca beel tumpi beel ruk an ret. Beel khat in galan * kul ihsin sawmthum tiang a dawl thei. 7Jesuh in hnen-um pawl hnenah cun, “Hi beel pawl hi tidai khat tein than uh,” a ti. Liam thluahthlo in an than ih, 8an hnenah cun, “Beel sung tidai cu vun suak uhla puaituahnak a tawlreltu pa hnenah hei pek uh,” tiah a ti. Tidai cu an hei pek.

o   Ralcabel timi cu ziangah an rak hmang? Tidai galan 20-30 tiang tlemmi a si.

o   Rawl an ei hlan ah an kut le ke an kholhnak a si.

a.     Zumnak cu tuahnak in a thlun ringring a tul.

o   Tidai khat tein than uh a ti ih an than. Beel sung tidai cu vun suak uhla puai tuahnak a tawlreltu pahnen ah hei pek uh a ti ih an va pek.

o   Kutke kholhnak tidai rori Jesuh ih fialmi vek in an tuah.

b.     Pathian ih huham cu zo pawlin an hmu ngah? Pathian ih hnatuannak ah a telve tu lawng in an hmu thei.

o   Beel sung tidai hmuahhmuah in cabit ah a cang lo.

o   An hei pekmi lawng sabit ah a cang.

o   9Cuih tidai cu Sabitti ah a cang ih cumi cu a tep. Khuitawkin cuih Sabitti cu a ra ti a thei lo; tidai a suaktu hnen-um pawl cun an thei ko. Curuangah nupi ṭhitu pa cu a ko ih, 10a hnenah cun, “Zozo khal in Sabitti thaw bik kha a hmaisa bikah an pe ṭheu ih mi tampi an khawh deuh hnuah Sabitti menmen kha an pe ṭheu; a sinain nang cun Sabitti thaw bik kha a netnak tiang na pe thei,” tiah a ti.

o   Hmun dang khal ah kan hmu:

o   Mithawng nga rawl a do (John 6)

o   Mitcaw pa (John 9)

o   Lazarus (John 11)

§  Kanneihmi sanghlom te kan hei pek ve ih,

§  Kan mit ih ummi ciarbek kan hei kholh ve ih,

§  Thlan khar lung kan tthawn ve tikah, Pathian in thilti theinak sungah kan tel ve ih kan bawm ve a si.

o   Hnen-um pawl bang in zumnak thawn amah kan rinsan ih a thu kan thlun tikah, Pathian ih sunlawinak a lang suak a si.

Thunetnak:

Pathian ih uknak cu kan nunnak le kan kawhhran le kan khua le ram ih a thlen theinak dingah:

1.     Na nunnak ziangkim na tuah tikah, Jesuh sawm in Jesuh thawn tuah tlaang ringring aw. Jesuh duh lomi le Jesuh tel lo in zianghman tuah hlah.

2.     Mary bang in midang zaangfah zawnruahnak nei in Bawipaih hnen ah thlacam aw. Na thlacam na hlawhtling ding.

3.     Hnen-umpawl bang in Jesuh thupekmi kha tuah aw. Amah rinsan in a fialmi tuah aw. Thlacamnak a thupi zet asinan kan thlacammi kha Pathian ih bomnak ring in kanmah khal in kan tuah a tul.

4.     Arah parah cu:

o   Leenglam lawng a thianhlim ter theimi tidai kha a thawbikmi sabitti ah a can ter.  

o   Tidai vek men, na nunnak zianghman si lomi te khal Jesuh in thil maksak ah a thleng thei.

o   Bawipaih duhnak hi leitlun ah kimter dingih a teltu pawl cu Pathian in an nunnak, tidai vek men a simi kha, sabit thaw bik vek in, nun thawbik neitu an an nunnak a thleng sak a si. 

_____________________

San No Thuan

Sept 13, 2014

Grand Rapid

3.4. Pathian Uknak ih lamdannak: Misual pawl an sinak bang in a cohlang ih an sualnak a ngaithiam

Prepared by San No Thuan

Text:  Matt. 21:31-32

Thuhmai hruai:

Pathian uknak cu Jesuh in leitlun a tlanleen lai ah a rak dinsuak zo. Asinan, an ttamci bang in a karh zai vingvo leh ding tiah a rak sim. A din suak zo nan, a famkim hrih lo. Cumi karh zainak ding hrangah Jesuh in nang le kei hi midang Pathian uknak sungah hruai lut dingah in sawm. Asinan, Pathian uknak cu ziangvek a si timi kan sim thei lo ahcun zo so ra lut duh ding? Pathian uknak ih a pekmi pawl cu ziangvek an si tile:

1.     Mitcaw, farah, hremmi pawl luatnak pe dingah a si. Cumi pawl luat ter ding, dam ter ding hi Pathian uknak ih a tuah reromi a si.

2.     Pathian uknak cun kan man a khunzia in theihter. A nunnak pek tiang in a duhdawtmi kan si, a innsang ah in cohlang ih, in umpi/ttanpi ringringmi kan si ti in theih ter. Lei lungmii pawl in, na man an lo rel sakmi parah tthum aw hlah.

3.     Pathian uknak cun Pathian in misual pawl an lung an thleng ih Amai lam ih an hoikir sal ding khi a duhmi a si.

4.     Pathian uknak sungah Pathian in misual pawl ih sinak bang in a cohlang ih an sualnak a ngaithiam.

3.4.1. Misual pawl ih sinak bang in a cohlang.

Bawi Jesuh hi misual pawl tiah an timi pawl thawn vei tampi an pawlkom aw tlaang. An tthat hnu lawngah Pathian a pawl ih a cohlang a si lo. An sual lai hrimhrim ah Jesuh in a cohlanmi a si.

·      Siahkhong pawl thawn rawl an ei tlaang (Mark 2:15-17).

·      Nun sual ih a nungmi nunau nu khal in a ra tham thei (Luke 7:36-50).

o   Sualnak tam deuhdeuh a neitu pawl cu Pathian in kan sualnak in ngaithiam ti an theih tikah, Pathian hnenah an lungawinak a tam deuh a si.

·      Siahkhong tu Zacchaeus hnen a cam (Luke 19:1-10)

·      Pasal pa 5 a neitu Samaria nu khal thu tha te a ruah (John 4:7-42).

Himi pawl Jesuh in Pathian uknak sungah cun misual pawl kha an sinak bang tuk in cohlan an si ih, Pathian in a pawlkom duh timi a lang ternak a si. An ra kir sal tikah Pathian ziangtluk in a cohlang, a rak pom duh tikmi kha fapa tlaan hlo ih thuanthu khal ah Jesuh in a lang ter (Luke 15:11-32). A ti bet hrihmi cu, “Miding pawl hawl dingah ka ra lo, misual pawl hawltu dingah le an sual sir ter dingah ka ra” tiah a ti (Matt. 9:11-13; Luke 5:31).

            Pathian cun kan sinak vek in in cohlang timi thu thei na cing ih a zum lotu tampi an um. Culai ah, mi depde, mi hrokhrawl an timi siahkhongtu pawl, hlaawhhlangtu pawl, le nunau tha lo tiah an ruahmi pawl kha Pathian in nan sinak bang in a lo cohlang, nan sual sir uhla a hnen ah ra kir sal uh tiah a ti tikah lungawi tein an cohlang. Curuangah, Jesuh in hitin a sim:

Fiangte in ka lo sim: siahkhongtu le hlawhhlang pawl hi nan hlanah Pathian uknak sungah an lut ding. Ziangahtile baptitma petu Johan cu a dikmi lamzin hmuh dingah nan hnenah a ra nan nan zum lo; sikhalsehla ngunkhuai khongtu le hlawhhlang pawl cun an zum. Cumi nan hmuh hnu hman ah nan thinlung nan tleng cuang lo, zum khal nan zum cuang lo,” tiah a ti (Matt. 21:31-32).

           

Ziangruangah Siahkhong pawl le hlawhhlang pawl cu miding tiah a ti aw pawl hnak in van ah an kai hmaisa ding ti ahcun, Pathian nan sualnak a lo ngaithiam thei ih, ra kir sal uh tiah a ti tikah lungawi te in an ra kir sal ruangah a si. Pathian ih sual ngaithiamnak le duhdawtnak thei cing zum lo tu pawl cu ziangtluk miding an si ah siseh, misual an si khal ah vanram cu an co thei lo ding. 

3.4.2. An sualnak a ngaithiam

            Jesuh in na sualnak cu ngaithiam na si zo tiah a tinak veihnih ah a lang:

1.     Inn par ihsin an vun thlakmi kezeng pa kha, “Ka fapa, na sualnak cu ngaithiam a si zo” tiah a ti (Mark 2:10).

2.     Hlawhhlang nu, Jesuh ke a mitthli thawn a kholh saktu nu khal cutin a ti thotho (Luke 7:48).

Jesuh in midang ih sualnak a ngaithiamnak in a langh termi cu Pathian uknak sungah cun, Pathian cun “Sual man Cawh kuan daan” hmang lo in, “Zaangfahnak daan” a hmang sawn a si timi a lang ter.

            Jesuh in Pathian uknak thu a sim tikah le “na sualnak ngaithiam a si zo” tiah a timi hi ziangruangah midang hrangah thinhennak a suah ter? Israel pawl ih zum daan ahcun, sual ngaithiam theitu cu Pathian lawng a si. Prophet pawl, puithiam pawl le tlaang bawi pawl cu Pathian hnen ih sual ngaithiam dil saktu lawng an si tiah an zum. Asinan, Jesuh cun, “Ka fapa/nu, na sualnak cu ngaithiam a si zo” tiah amah in a ngaithiam cih tikah, Pathian lawng ih tuah theimi ziangah hi tin midang sual tla a ngaithiam thei men tiah an ti. Pathian ah maw a ruah awk tiah an thin a heng. Cuih tlun ah, Biaknak le duun le daan pawl hnak in “Keimah I zum uh, ka simmi zum” tiah a ti tikah an thin a heng ngaingai.

Thunetnak:

Pathian uknak ih a lamdannak cu:

1.     Lei tlun ukawknak ahcun, miding le mitha pawl lawng cohlan an si. Asinan, Pathian cun, misual le mi tha lo an timi pawl kha a cohlang, a duhdawt ih a pawlkom.

2.     Lei tlun ukawknak ahcun, a sualmi cu a sual vek in cawh kuan an kuan ter. Pthian uknak sungah cun, cawhkuan daan si lo in, zaangfahnak daan a hmang. An hnen ih rakir tu pawl cu zokhal an sual ngaithiamnak a pek. 

________________________

Oct 27, 2013

Falam Baptist Church, Maryland

Pathian Uknak sungah Sualsirnak le Lungthlengnak a tul maw?

San No Thuan

Luke 13:1-9

Nan Nun Daan Ṭhin Uh

1Culai ahcun mi ṭhenkhat in Jesuh hnenah, Galilee mi pawl in Pathian hnenih thawinak an pek laifangah Pilat ih a thahmi pawl thu kha an sim. 2Jesuh in an hnenah, “Cuih Galilee mi pawl cutiih thah an si ruangah midang Galilee mi hnakin an sual sawn, tiah nan ruat maw si? 3An sual deuh cuang lo! Fiangtein ka lo sim: Nan sual nan sir ih nan nun daan nan ṭhin lo ahcun anmah vekin nan thi ṭheh ve ko ding. 4Siloam hmunih donhleisang a tluuk tikah minung hleiriat a nenthatmi pawl thu kha teh ziangtinso nan ruat? Cutiih an thih ruangah Jerusalem ih a ummi midang pawl hnakin an sual cuang a si ti a langter tiah nan ruat maw si? 5A si hrimhrim lo! Fiangtein ka lo sim: Nan sual nan sir ih nan nun daan nan thleng lo ahcun anmah vekin nan thi ṭheh ve ding,” tiah a ti.

A Rah Lomi Theipi Kung Tahṭhimnak

6Jesuh in an hnenah hiti in tahṭhimnak a sim: “Hlanlaiah mi pakhat in a hmuan sungah theipi kung pakhat a cing. A rah le rah lo a va zoh ṭheu ih a rah a hmu dah lo. 7Curuangah hmuan kiltu hnenah, ‘Zohhnik, hi theipi hi! Kum thum tiang rori a rah maw rah lo, tiah ka ra veh ṭheu nain a rah zianghman ka hmu lo. Hau mai aw! Ziangah so leiram ṭha a ei rero ding?’ a ti. 8Sikhalsehla hmuan kiltu in ‘Bawipa, kum khatte cu zuah hrih ko aw! A kimvel in leilung ka lai ding ih dawm ka burh hrih ding. 9Cule a hnakum ah rah a rah asile lungawiza a si ding; a rah thotho lo a sile hauter leh siseh,’ a ti,” tiah a sim.

Thuhmaihruai

Thusuhnak pahnih lo tuah ka duh: pakhatnak ah, Pathian in kan sual kan sir hmaisa hnu lawngah kan sual in ngaithiam a si maw? Culole, pahnihnak ah, sual kan sir awk hlan hrimhrim ah Pathian in kan sualnak in ngaithiam cia? Himi thu pahnih ruat in Pathian uknak daan ih fehpi sualsirnak hi ziangvek a si timi lo ruah ka duh.

Pakhatnak: Pathian in kan sual kan sir hmaisa hnu lawngah kan sual in ngaithiam. Himi hi mi hrek khat in an pom. Thuthimnak ah, Job le a rualpi pawl khal in Job a nat lai ih an va hnem lai khal ah, hihi a va simmi Pathian thu a si. Laimi khal in, mi pakhat khat thil tha lo an ton tikah, a nu/pa/pi/pu cu khavek an si si. An cituh rahseng an tong si ko ding timi ruahnak kan nei. Israelmi pawl khal in cuvek in an ruat (Mark 1:2-3).

Jesuh in Pathian uknak thu a sim tikah, cutin a sim lo. Jesuh cun, Pathian ih zaangfahnak le duhdawtnak nan parah a tumtuk ih nan sualnak khal a lo ngaithiam a si timi hi a simmi a si.

1. Jesuh in lungthleng hrih lomi pawl a duhdawt

Luke 5:27-31

27Cuih hnuah Jesuh cu a feh ih siahkhongtu Levi an timi pa a zung sungih a to kha a hmu. Jesuh in a hnenah, “I thlun aw,” tiah a ti. 28Levi cu a tho ih ziang hmuahhmuah taanta in Jesuh cu a thlun.

29Cule Levi in a inn ah rawl einak puai tumpi Jesuh hrangah a tuah ih a sawmmi pawl lakah cun siahkhongtu pawl le midang tampi an tel. 30Farasi mi ṭhenkhat le Daanthiam ṭhenkhat anmah ih bu sungtel pawl cu Jesuh dungthluntu pawl hnenah an phunzai. “Ziangah so siahkhongtu le misual tla thawn rawl nan ei ih ti nan in tlang?” tiah an sut.

31Jesuh in, “A harhdammi pawl in sibawi an ṭul lo, a nami pawl lawngin an ṭul. 32Miding pawl ko dingah ka ra lo; misual pawl an sual sir ter dingah ka ra a si,” tiah a ti.

Luke 15 sungih tahthimnak a simmi pawl khal kan zoh tikah, sualsirnak kan neih hlan ah Pathian in in duhdawt, in zaangfah, ih kan sualnak in ngaithiam cia timi a fiang tuk. Tangka hlo, tuu hlo, fapa hlo thu an si. An hlo theh ih, a neitu in an hawl. Fapa tlaan hlo pa khal hi a pa in a cuan ringring ti kan hmu. A va kir tikah, a paih hnen ah sual ngaithiamnak a dil man hlan ah, a pa in a pom ih ka fa thihnak ihsin a ra kir sal zo tiah a ti ih, a lungawi ngaingai ti  kan hmu.

2. Jesuh in kan sual sir aw in thinlung thleng ding in fial

Pathian in kan sual lai le kan dingfel lo lai khal ah Pathian ih zaangfahmi le duhdawtmi kan si. A ngaithiammi kan si ti a fiang. Curuangah, kan sual kan sir ih kan lungput kan thleng awk lawngah Pathian in kan sualnak in ngaithiam timi cu a si deuh lo. Asinan, Jesuh in sual sir ding le kan lungput thleng in fial hrimhrim lo timi khal cu a dikmi a si lo.

Luke 13:1-5

Nan Nun Daan Ṭhin Uh

1Culai ahcun mi ṭhenkhat in Jesuh hnenah, Galilee mi pawl in Pathian hnenih thawinak an pek laifangah Pilat ih a thahmi pawl thu kha an sim. 2Jesuh in an hnenah, “Cuih Galilee mi pawl cutiih thah an si ruangah midang Galilee mi hnakin an sual sawn, tiah nan ruat maw si? 3An sual deuh cuang lo! Fiangtein ka lo sim: Nan sual nan sir ih nan nun daan nan ṭhin lo ahcun anmah vekin nan thi ṭheh ve ko ding. 4Siloam hmunih donhleisang a tluuk tikah minung hleiriat a nenthatmi pawl thu kha teh ziangtinso nan ruat? Cutiih an thih ruangah Jerusalem ih a ummi midang pawl hnakin an sual cuang a si ti a langter tiah nan ruat maw si? 5A si hrimhrim lo! Fiangtein ka lo sim: Nan sual nan sir ih nan nun daan nan thleng lo ahcun anmah vekin nan thi ṭheh ve ding,” tiah a ti.

Sual sirnak (repentance, metanoia) timi ih sullam cu lungthlengnak tikhi a si. Lungthlengnak dikmi le dik lo mi a um.

1.     Lungthlengnak dik lo cu Judas Iscariot ih nunnak ah kan hmu thei. A thil tuah sualmi parah a sir aw tuk. Asinan, a sir awknak cu amah le mah a siatsuah aw. Cucu Pathian ih duhmi lungthlengnak dik a si lo.

2.     Lungthlengnak dik timi cu Fapa tlaan hlo pa ih thu ah kan hmu thei. Maih duhmi tuahnak, ruahnak, mah le mah rinsan awknak ihsin Pathian kha kan thinlung zatein, kan ruahnak zate le kan thazaang zate thawn duhdawt sal in a hnen ih kir ding khi a si (Daan. 6:4).

Lungthlengnak ah mihrek khat cu kan sual kan sir aw nan, kan thinlung kan thleng aw ngaingai lo. Lungthlennak diktak ih a tuahmi cu:

1.     Thinlung zate thawn duhdawt a tul. Kan thinlung a hrek te thawn lawng Pathian kan duhdawt ih, a hrek cu Pathian hnak in mi dang/thil dang pawl kan duhdawt sawn. Pathian thinnat ter khal ziang kan poi lo.

2.     Ruahnak zate thawn duhdawt a tul. Kan ruahnak cu Pathian ih duhmi ziang a si timi hnak in, kanmaih tuah duhmi lawng kan ruat.

3.     Thazaang zate thawn duhdawt ding. Bawipaih sunlawinak hrang ih thil tuahnak ah kan thazaang hmang lo in, Bawipaih thangsiatnak hrang ih thil tuahnak ah kan thazaang kan hmang sawn theumi hi Pathian kan duhdawt lonak a si.

Kan thinlung zate thawn kanmah le mah rinsanawknak le kanmaih duh zawng fehnak in Jesuh Khrih kha rinsan in, a duhzawng ih feh khi a si. Kanmaih ttha ti zawng lamzin ih kan feh ahcun kan ton dingmi cu Pathian ih a faale pawl ei ter in duh lomi vok rawl ei in  vok dinhmun ah kan cang ding a si. Cuvek kan can zik a si ahcun, fapa tlaan hlo pa bang in kan Pa Pathian hnenah a rang thei tawk in kir lohli uhsi. Anih cu misual kan si lai hrimhrim ah in duhdawt ih, in zaangfah ih, kan sual mawhnak in ngaithiam zotu a si. Cucu Pathian ih sinak a si timi na theihmi thuthangtha kha zum mei  aw, nangmai duhnak lamzin na fehnak hmun ihsin kir aw la, Pathian hnen ah feh sal mei aw. Na nung ding.

3. Pathian in a hrangah rahpar tha nei ding in duh.

            Pathian ziangruangah kan sualnak hi cutluk in in ngaithiam, in duhdawt ih thluasuah in pek thiam thiam si pei? Ziangruangah, kan thinlung thleng in a hnen ih kir ter sal in duh si pei? Cutivek ih in duhnak cu a hrangah rahpar tha rah dingah a si.

Luke 13:6-9

A Rah Lomi Theipi Kung Tahṭhimnak

6Jesuh in an hnenah hiti in tahṭhimnak a sim: “Hlanlaiah mi pakhat in a hmuan sungah theipi kung pakhat a cing. A rah le rah lo a va zoh ṭheu ih a rah a hmu dah lo. 7Curuangah hmuan kiltu hnenah, ‘Zohhnik, hi theipi hi! Kum thum tiang rori a rah maw rah lo, tiah ka ra veh ṭheu nain a rah zianghman ka hmu lo. Hau mai aw! Ziangah so leiram ṭha a ei rero ding?’ a ti. 8Sikhalsehla hmuan kiltu in ‘Bawipa, kum khatte cu zuah hrih ko aw! A kimvel in leilung ka lai ding ih dawm ka burh hrih ding. 9Cule a hnakum ah rah a rah asile lungawiza a si ding; a rah thotho lo a sile hauter leh siseh,’ a ti,” tiah a sim.

Pathian in tuih sunni tiang cutluk ih in duhdawtnak le kan sualnak tampi khal sehla in ngaithiam ih thluasuahnak thawn in cawm reronak hi duhsannak a nei: amaih hrangah rahpar tha rah dingah a si. Cuih rahpar tha cu ziangvek a si? Thlarau rah pawl an si:

Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, 23nunnem tangdornak le suup theinak tla an si (Gal 5:22-23).

Himi rahsuak thei ding in Bawipa thawn nitin, caantin pawlkom aw ringringtu kan si a tul. Ziangtin kan pawlkom aw ding tile thlacamnak le Biblesiarnak kha na pumpak te in nei aw. Cuih tlun ah, zumtu dang pawl thawn pawlkom awnak le Pathian thangthatnak pawl ah feh aw, tel ve aw.

Thunetnak:

Pathian uknak ih simmi thuthangtha cu Pathian in a zor thei lomi a duhdawtnak thawn a lo duhdawt ringring ih na sualnak a lo ngaithiam lai. Curuangah, sualnak lamzin kha taansan awla a hnen ah ra kir aw. Amah lawng na thinlung, na ruahnak le na thazaang ziangkim thawn duhdawt bik aw. Cumi cu lungthlengnak diktak a si. Cuti ih Pathian na duhdawt theinak dingah, thlacamnak, Bible siarnak le Pathian Biaknak hmun ah feh ringring aw. Cuti in Pathian thawn nan pawlkom aw tam ding ih na sungih sin Thlarau rah pawl a rah suak ding a si.