Online Zuk in Kan Mipi Pawlih Lungput A Siatsuah Thei Maw?

Tuizingah, mi pakhat in group mail ah nunau pakhat ih ruangpi kha pacang pawl in an aat tan ih, an suan mi zuk pawl a rak thlahmi kha a tanglam ah hitin ka let. 

Na zuk thlahmi hi tulai technology san ah ol tuk ih tuah theihmi a si. Ka rualpa tla cun, vate lu ah vuilu a ben ih a leeng ih zoh men cun, benmi a si ti theih a theih lo. 

Curuangah, hivek thu le zuk hi santhar mino pakhat a simi cun, mipi hnen ah thungai thu vek ih thlah ding kan si lo tiah ka ruat. Thungai a si pang hman ah, hivek zuk hi online ah thlah ding a si lo tiah ka ruat. Ziangruangah?

Kan mipi thinlungah cawn duhnak a suah ter thei. Group mail sungah, upa nauhak, thuruat thei, thei lo kan tel theh ti kan hngilh lo a tul. Kan thlahmi thu in midang thinlung hi a tthat ter thei vek in, a siatsuah ter thei. Thuthimnak ah, kan dung US ah nauhak pa te in, a pai pistol a lak ih a upa a kap that. Police pawl in an kaih ih thawngthlak dingah le kum 7 lawng a si lai. A ngah lo. "Ziangah na upa cu na kap?" tiah thu an suh tikah, "TV game ah, khatin kan kap aw ringring ih, cunah ka kap men. Ka upa cu a thicih dingah ka ruat lo" tiah a ti. A zohmi in le hmuhmi in a thinlung a ciah tuk ti a fiang. Mifim ram ih tulai an buai bikmi cu kan TV games pawl, sun zaan nauhak kan leh termi pawl hi ziangtin violence (misiatsuahnak) a si lomi in kan thleng thei pei tihi a si. Cu lo ahcun, kan fale pawl hi an thisen sungah, mi siatsuah duhnak lungput thawn kan tthan ter cih ding ti hi a si. 

Kan dung nai ah, mi pakhat in accident a tongmi pakhat ih zuk a rak thlah. A sungril pawl tiang a suak thehmi a si. Ka rak ti dahmi cu, "himi zuk hi na unau sisehla, midang in hiti vek in, an zuk lo thlah sak sehla, na lungawi pei maw?" tiah ruahnak ka pe dah. 

Curuangah, ka sim duhmi cu online zuk kan thlahmi pawl hi kan mipi pawl in an zoh tikah, an hmuhmi zuk vek in tuah duhnak lungput a neih ter thei timi hi hngilh lo sehla tihi a si.

Kan zuk le thu kan thlahmi hi kan thlah hlan ah, "Mipi pawl in an cawn pang asile, a tha pei maw?" tihi ruat cio uhsi ti ka lo sawm. 

Mipi tthatnak a duhtu, 

Sanno 

Na Thin A Tawi Maw? Thluasuah Mit Meng Aw!

by Sanno

Caan tampi ah ka duh vek in thil a feh lo tikah, ka thin a tawi ciamco ih, midang tla cam ciamco ka duh pang theu. Asinan, atu cu thinsau daan ka zir ngah. Ka thin a sau tikah, ka tong a neem ih, a thlum. Ka thin a nuam ih, midang thawn pawlkom awk daan khal a tluang zet. 

Ziangtin ka thinsau ko ka tuah? 

Ka thin a tawi zik pang a si le, Pathian ih thluasuah a si zia lam mit in ka zoh ih, thluasuah ka siar sawn. Cucu thluasuah mit tiah ka ko.  Thuthimnak ah, kan sung le thawn phone kan bia aw ding ih, duhvek in phone sungah kan bia aw remcang lo tla si thei. Cuvek caan ah kan thin a vung tawi lohli thei. Asinan, thluasuah mit in zoh sal hnik aw la, "Ee, mi tampi biak ding unau nei lo, nulepa nei lo, rualpi nei lo tampi an um lai ah kei cu unau tla Pathian in i pek, rualpi tla i pek hi" tiah Pathian hnen ah lungawi thu sim hnik aw, na thin a vung sau mei ding. 

Na duh vek in, thil na fialmi tla tuah lo pang hngai sehla na thusim tla ngai lo pang hngai sehla, cuvek caan ah, na thin a tawi ko ding. Asinan, thluasuah mit in zoh aw, "Aw, minung tampi hruai ding nei lo in, nun sim ding khal nei lo in, an um lai ah, kei cu hruai dingmi i pek lai. Nun zirh tulmi tla i pek. Kei ka tuanvo cu ka ti thei tawk duhdawtnak thawn sawm ding hruai ding a si. An nun thleng tertu ding cu Bawipa a si" ti lam mit in zoh aw la, na thin a dam mei ding. Nun sim ding lam cu, Pathian ih tuanvo a si thei in, Pathian kha tuanvo pe mei aw.

Curuangah, kan thin a tawi pang theu maw? Ziangah kan thin a tawi? Kan maih duh daan vek lawnglawng ih thil feh ter kan duh ruangah a si. Kan maih duh daan lawnglawng in thil hi cang theh sehla, kan hrangah thil tha a suak lo tla si thei. Thuthimnak ah, vei khat cu Siangpahrang pa pakhat in a biakmi khuavang pakhat hnen ah thla a cam ih, khuavang cun, "ziang ka lo tuah sak ding" tiah a ti. "Ka thammi pawl hi sui lawnglawng ah cang theh hngai sehla ka lian zet dingih, milian si ka duh" tiah a ti. Khuavang cun, "Na tivek cun siseh" tiah a ti. Siangpahrang pa cu cuvetein, a lungawi tuk ih an tokheng pawl kha a kut in a kai ih, sui tokheng ah an cang. An cabuai, an pakan, an inn pawl kha sui pakan le inn ah an cang theh riai. A lungawi daan cu mak. A fanu a duhdawt zetmi te kha ihnak khan in a ra suak ih, "Papa, papa" tiah a hnen ah a ra tlaan tikah, a rak pom ih a nih khal sui ah a cang pan lo maw. Cu tikah, a riah a sia tuk ih, khuavang hnen ahcun, thla a cam sal ih, "ka duh sal lo, ka thammi hmuahhmuah hi sui ah can ter sal hlah aw" tiah a au ciamco. Curuangah, kawl pawl in, "Luh a kyaih, nat ma laih naing," minung duhnak cu khuavang hman in an thlun thei lo tiah an ti. 

Curuangah, na thin a tawi zik pang tikah, ka duh daan lawnglawng in thil feh ter ka tum tuk thlang a si hi ti khal ruat aw sal aw. Cuih tlunah, thluasuah mit lam kha meng aw la, Pathian ih thluasuah a sinak lam thu kha ruat sawn aw. Cu lawng si lo in, Pathian lawng hi midang nunnak rem ter theitu a si. Kei cu, duhdawtnak thawn simtu ding le lam hmuhtu ding ka si timi thei ringring maw.