Thursday, November 27, 2014

Hmailam Kekarnak Hrang Tihphannak Ziangtin Kan Neh Thei Ding?



Text: Mark 4:35-43; Job 1:21

Thuhmaihruai

Lei tlun ah zumtu tampi harsatnak, natnak, le thihnak tiang kan tuar ve. Hivek lai caan ah hmailam ah anih tel lo in ziangtin kan feh ding ti in kan thin a phang, kan lung a leeng theu. Cumi minung daan a si ko. Asinan, zum lo tuk bang tuk ih kan thinphang le lungleeng in kan um lonak ding Bible in ziangtin sunralnak thu thawn in sim timi lo ruah ka duh.

1.     Pathian ih faale pawl harsatnak tong lo ding in Pathian in thu in kam lo (Mark 4: 37)

Minung tampi in Pathian ih thu kan ngai lo tik ah, harsatnak kan tong tiah kan ti theu. Jonah tla Pathian thu a ngai lo tikah, Pathian in thlitu le tilik a hran ter ih netabik ah ngapi pum sungah a thleng ter tiah kan ti. Asinan, Mark 4:35t sung ih thuanthu vek a si ahcun, Jesuh in tipi ral khat lam ah kan feh pei tiah thu a pekmi an ngai ruangah an feh. Asinan, ti suar le tilet an tong thotho.
                                                                                        
Pathian tihzah zettu Josseph thawng a tla, Job khal a neihmi a hlo theh; Paul khal harnak le hremnak tangmpi a tong. Jesuh ih dungthluntu pawl khal thah an tong theh.

2.     Jesuh in a fa le pawl hnen ih thu in kammi cu
a.     Ka lo umpi ding (Matt. 28:20).
b.     Tuar theinak le luatnak lamzin ka lo pe ding (1 Kor 10:12)
c.     Kan hrangah ziangkim a thabik in rem in ruahsaktu a si (Rom 8:29).
                                               i.     Mark 4:38 – Jesuh in feh uh ti ih a fial tikah, anmah lawng a feh ter men lo ih, an lawng sungah a um pi ringring. Hnangam tein a it that men. Jesuh thu in kammi kan zum lo tikah, kanmaih thazaang kan rinsan awk tikah, hmailam feh ding hi tihnak thawn kan khat theu. Rinnak tel lo cun tihnak thawn kan thinlung a khat ding.
d.     Kan thlacam in ngai ringring (Jer. 33:3). Jesuh an kawh ih an thang tikah an kawhnak aw a theih sak ih a tho ti khal ka thei. Cuvek in, kan buai lai caan ah Jesuh kan kawh ahcun, kan au aw Pathian in in theihsak ringring a si.
e.     Kan kiangkap thleng theitu cu Amah a si (Matt. 28:18). Jesuh in thu a pek tikah, ti suar le thlitu khal in a thu an ngai. Jesuh Khrih kan biakmi cun kan kiangkap thil cangmi hi a thleng thei a si. Amaih thusung sawn ah kan nunnak kan ciah aw sawn ding ih, a dang cu Amah in a thleng sawn ding. Na kiangkap thleng tum hlah, cucu, Jesuh ih hnatuan a si. Nang le kei ih tuanvo cu Jesuh thawn nai zet ih um le a thu vek ih nun lawng khi kan tuanvo a si.

3.     Ziangkim hi Pathian ih hnen in an ra ih, a tu ah Pathian a laksal timi ruahnak kan nei pei uh.
a.     Job 1:21 - “Lawngfangkheh in ka suak ih lawngfangkheh in ka thi ding. Bawipa in i pek ih atu-ah a lak sal. A hmin thanghat si ko seh,” tiah a ti.
b.     Job khal Satan in a neihnak le telefa pawl um hlah sehla Pathian ih a duhdawt lo ding ti in a ruat. Asinan, zumtu pacang tha Job cun, a tlaksiat zet lai caan khal ah a timi cu, “Ka neihmi pawl hmuahhmuah cu Pathian hnen in an ra ih, a tu ah Pathian in a lak sal, Pathian cu ka thangthat” a ti thotho.




____________________
Rev. San No Thuan
Nov. 21, 2014

Pu Sui Luai teih inn, Frederick, Maryland ah Pho Kyaw Pa (Pu Ngun Thawng) a thih lai ih ka simmi thu a sim. 



 

No comments: