Natnak khal hi Pathian Sunlawinak Hrangah a Si

San No Thuan

Text: John 11:4

Cumi cu Jesuh in a theih tikah, “Hi natnak cu Lazaras ih thihnak ding natnak a si lo. Hi natnak cu Pathian sunlawinak langter dingah le Pathian Fapa in sunlawinak a ngahnak ding khalah a si,” tiah a ti.

Mi tampi in kan dam lo kan nat tikah, kan tha a nau ih midang pawl thawn khal pawlkom awknak kan paih nawn lo. Curuangah Pathian sunlawinak cu a si thei pei maw tiah an ti. Asinan, Mercy Nu (Thawnga ih nupi) in a timi cu, “Kan natnak hi Pathian sunlawinak a si theinak zawn te cu minung hi kan dam lo tikah, Pathian hnen kan pan sal ih, kan nunnak khal kan check aw sal, kan sual khal kan sir aw sal. Kan dam tuk caan ah Pathian le thian lo khal kan thei lo ih kan daithlang a si” a ti.

Asi rori, kan dam lo tikah Pathian kan naih sal ih Amaih thluasuah siar sal in a hnen ih kan kir ahcun kan pumpak nunnak in a hmin thianghlim kan thangthat zo a si. Curuangah, a thupimi cu na dam lo le na nat tikah, Pathian hnen kir in Amah na naih sinsin ding hi a thpi bikmi a si. Cuti ih na tuah ahcun, Pathian a lungawi ding ih na hnen ihsin sunlawinak a ngah thei ding a si.