Rev. David Lah cu Australia ramah Pathian Thuthangtha sim
in a fehsuak. Cutawk ah can tawkfang a hman hnu ahcun an inn lam pan cun a
tlung. Inn a thlen tikah, a fanu te cun a tawka ah ek um phah in a rak hmuak. A
Pa cun, a fanu te ih taw ih retmi diaper ahcun, milai zokhal ih kan ten zetmi
ek a um ti cu a theifiang nan, A thisen ihsin suak a fanu te cu pom phah in a
cawi. Cumi ihsin Pathian duhdawtnak cu tahthimnak ah la in ( Pathian duhdawtnak
cu tahthim theih a si lo nan ) thazang la uhsi.
1. Fanu
Ih Thinlung. A fanu te cun, ka taw ah ek a um nan, ka pa cun in ten lo
ding timi a theihfiang ih, amah duhdawttu a pa a si ti a theihfiang ruangah a
pan ih a pom. A hrangah ziangkim tuahsak duhtu a pa cu, a ek um cing in,
ningzak lo in le a pa cu hmaisong lo ten a pan a si.
Minung tamzet cun, piangthar ding in Pathian pan an tum nan,
anmah lam ah that an tum hmaisa ih, fel an tum hmaisa ih, miding si an tum
hmaisa. Cupawl an nunnak ih um hnu lawngah Pathian pan an tum theu tikah,
Pathian thawn an hmu aw ngaingai thei lo a si. Kan sinak vek cekci ih Pathian
kan pan tikah, Pathian cun in cohlang duh. A Fapa Jesuh Khrih ah cohlan kan si
zonak sawn ( 1 Korin 1:30 )kan rinsan ih, kan sinak vek cekci ih Pathian kan
pan a si ahcun, Pathian thawn kan hmu aw ngah ding.
Zumtu pawl kan nunnak ah sual kan tuah pang thei. Sual kan
tuah tikah, Pathian pan ngam lo in can tamzet cu kan um theu. Pathian cun kan
sualnak thawn Amah pan ding hi a duhmi sawn a rak si. Kan sualnak ruangah
balzetin um khal sehla, Pathian kan pan a si ahcun duhdawtnak thawn Pathian cun
in pom hngal ding. Pathian cu duhdawtnak Pathian a si ih, ziangvek sual khal
ngaidam theitu Pathian a sinak kha theifiang in, kan sinak vek cekci in Pathian
pantu kan si kei uh. That tum hmaisa aw hlah, na sinak vek cekci in Pathian pan
awla Amah in a lo buaipi ve ding. Amah pantu zohman a hnong dah lo.
2. Pa
Ih Lungput. A Pa cun a fanu ih taksa parah a rimsia zetmi ek a um ti
cu a theihfiang nan, amai’ thisen a fanu cu duat tak in a cawi thei. Pai’
thinlung cu fanu tlun ih duhdawtnak thawn a khatliam ih, a taksa par ih ummi ek
cu thianfai sak in, diaper tharte thawn a tuamsal.
Zumlotu in Pathian a pan tikah, a sinak vek cekci ih a
pannak hmun ah Pathian cun vanlam nunthar a simi Jesuh Khrih in a thuam mawi a
si. Cumi hmun ahcun Sersiam Thar ( 2 Korin 5:17 ) dinhmun khal a co hngal.
Sinak vek cekci ih Pathian pantu pawl hnenah Pathian cun an balhnak pawl
thianfai sak in, hnipuan thar thawn a thuammawi sawn a si.
Zumtu pawl kan nunnak ah, Pathian hmai ih sual kan tuah
tikah kan thup theimi zianghman a um lo. Thup lo in, kan sualnak vek cekci ih
Pathian kan pan tikah, Pathian cun lungawinak thawn in khatter a si. David
siangpahrang cun, Pathian hmai ih a sual tikah, lungawinak a rak nei nawn lo (
Sam 55:12 ). Sual kan tuah tikah, kan lungawinak pawl tla an hlo thei. Asinan,
kan sualnak thawn Pathian kan pansal tikah, Pathian cun in tuammawi ih, kan
balhnak pawl in khawlhsak hnu ah lungawinak thawn in khatter sal theu.
“Sinak vek cekci ih Pathian pantu pawl parah Pathian in
Asinak a langter”
( Indianapolis, USA ih iLife Ministry hohanak ih tuahmi,
“Christ Culture Conference” ih a simmi sungta ngansalmi a si)
No comments:
Post a Comment