Bible Thu Harsa (2)

1. Khuimi a ol sawn? (Matt. 9:1-7). 

“Na sualnak ka lo ngaithiam,” ti maw ol sawn “tho awla feh aw” ti? 

Judahmi pawl ih lungput ahcun, “tho awla feh aw” timi hi a ol sawn ziangahtile sual ngaithiam hi cu Pathian lawng in a tuah theimi a si ruangah a har tiah an ruat. Curuangah, Jesuh in keimah cu rundamtu, Messiah Pathian ka si ih sual ngaithiam theitu ka si timi lang ter duh ah, a har sawnmi in a tuah hmaisa: “Na sualnak cu ngaithian a si zo” tiah a ti. Cumi cu Pathian thangsiattu a si tiah an ti. Jesuh in Pathiang thangsiattu ka si lo, Pathian ih duhnak tuahtu ka si ih ka tongkam khal Pathian in I ngai timi kha lang ter duh ah, taksa damnak khal a pek bet: “Tho aw, na ihphah la awla inn ah va tin aw,” tiah a ti. John 9:31 - “Pathian in misual pawlih ṭongkam a ngai dah lo ti kan thei; a sinain amah a upattu le a duhnak a tuahtu pawlih ṭongkam cu a ngai a si.”

2. New Wine in New Wineskin (Matt. 9:16-17)

 16“Zohman in angki hlun tlek parah puan thar an belh dah keel lo, ziangah tile belhmi thil thar kha a com ding ih angki a tlekmi kha a kau sinsin ding. 17Cuvek thotho in zohman in savun thawl hlun sungah Sabitti thar an thun dah lo; an thun asile savun thawl cu a kuai ding ih Sabitti kha a zun hlo ṭheh ding ih savun thawl cu a siatralta ding a si. Cu hnakin savun thawl thar sungih Sabitti thar thun a si ahcun siatnak ziang hman um loin an pahnih in an him ding,” tiah a ti.

Himi tahthimnak in a simmi cu Jesuh ih a dintummi Pathian uknak cu Judah biaknak sung men ah thun a theih lo. Cuih Jesuh ih dinmi Pathian uknak cu thuthangtha (sabit thar) cu tu a thok rero zo ih, Judah biaknak sungah um tahrat in lakluh a theih lo ding. Judah biaknak (sabit thawl hlun) kha a siat dingih Jesuh ih zirhmi Pathian uknak (sabit thar) khal a siat ding tiah a simnak a si. Cuih Jesuh ih zirhmi Pathian uknak sabit thar cu Kawhhran a simi (sabit thawl thar) ah Jesuh in than a duhmi cu a si. Curuangah, Matthai in Kawhhran thu a simmi pawl hi mangbang ding a um lo (16:18; 18:17). 

Luan tuk ih simfiangnak phun hnih: 

1.     Judah biaknak (thawl hlun) le Pathian uknak (sabit thar) hi kilhim ding Jesuh in a zirh timi hi a dik lomi a si. Thawl thar (Kawhhran) le sabit thar  (Pathian Uknak) thu hi kilhim dingih in zirhmi a si. 

2.     Dispensationalist pawl ih zumnak ahcun, thawl hlun timi cu “Moses ih pekmi daan” pawl an si ih, sabit thar cu “zaangfahnak” an si. Curuangah, zianghman an pehtlai aw nawn lo tiah an ti (Walvood: p. 70, Ironside). Ziangah a sual ti ahcun, (1). Pathian ih zaangfahnak le Moses ih Daan pawl pehtlaih awknak a um lo tiih simmi hi luan tuk in an sim; (2). Mathai cun, OT le NT an pehtlaih awk daan tam zet a  ngan. A tuih a kimmi  pawl hi Profet pawl ih rak  sim ciami pawl an si ti in a ngan.