Fale Kilkhawi Daan

By  San No Thuan

Fale kilkhawi daan phun li:

Fale kilkhawi tikah, asilole nun kan sim tikah, a tlaangpi thu ah phun li in simzirh daan a um tiah leitlun mifim pawl cun an hmu:

1.    Duhdawt zet ih, nun sim dah lo.

Hi pawl cu an fale an duhdawt tuk nakah nun an sim siang lo. An sual khal le an fale an ttan. A caan a rei tikah, hi vek fale pawl cu nun can ziaza tha lo neitu ah an hung cang.

2.    Duhdawt lo ih, nun sim tuk pawl.

Duhdawt lo in nun simh tikah, ttong a hrang ih, kut le ke khal an sup lo. Cu tikah, a rei hlan ah fale pawl in nun a simtu pawl kha an do sal.

3.    Duhdawt khal duhdawt lo ih, nun khal sim lo.

Hi pawl cu an fale kha siatralnak pit tawp ah an thlen ter.

4.    Duhdawt zet ih, nun khal sim thotho.

Hivek inn sungsaang ahcun, fale pawl an fim ih, fimvar zet in an thangso. An mahte khal ramri nei in nunthiamnak an nei.

Bible in fale pawl nun sim daan hi ziang ti in in zirh (Heb 12:5-11).

Pathian in a fale pawl ziang tin a kilkhawi?  Pathian in a duhdawtmi fa cu nun a sim a ti (Heb 12: 5-11). Pathian in nun a sim ti tikah, nun daan in sim in zirh ih, ralrinnak thupi zetzet pawl in pek tinak a si. In vuak in thawi tinak a si lo. Ramri nei dingah nun in sim in zirh tinak a si.

⁵Pathian in a faate pawl nan hnenah thapeknak thu a lo simmi kha nan hngilh zo maw si? “Ka fapa, Bawipa in nun a lo sim tikah ziang siar loin um hlah aw. A lo kawk tikah na tha nau hlah. ⁶Ziangah tile Bawipa in a duhdawtmi cu nun a sim ih, fa ih a cohlanmi cu a hrem ṭheu a si. ⁷Harsatnak cu nan pa ih pekmi nunsimnak a si tiin tuar hram uh; ziangah tile harsatnak nan tonmi hin Pathian in a faate ah a lo ruat a si ti a langter. A pa ih nun a sim lomi fa a um dah keel maw? ⁸A faate pawl a hrem ih nannih bul a lo hrem lo ahcun faate ngaingai nan si lo, fasawn nan si ti a sawh ding. ⁹Leilung tlunih kan pale pawl ruathnik uh; in hrem nain kannih in kan upat. Nunnak kan ngah theinak dingah Thlarau lam kan Pa ih thu cu ziangtluk in so thlun sinsin ding kan si? ¹⁰Kan pale pawl cun a ṭha tiin an ruat ruangah caan tawite sung in hrem; sikhalsehla Pathian cun kanmah ih ṭhatnak hrangah le amah ih thianhlimnak kan ṭawm theinak dingah in hrem a si. ¹¹Hremnak kan tuar tikah kan tuar laiah cun kan lung in awitertu si loin kan riah in siattertu a si. Sikhalsehla a hnuah cun cubangtuk hremnak in nunsimnak a tongtu pawl cu an nunnak ah daihnak le dingnak laksawng an ngah ding.

Pathian cu kan sualnak hawltu a si lo.

Mihrek khat in Pahtian in nun a sim tiah kan ti tikah, Pathian in a thawi/a vuak tiah kan ruat. Culole, Pathian cu kawlram Palik (police) vek in kan ruat ih kan sualnak pawl cazin ah a ngan ih, kan sual man in hremtu vek ah kan ruat. Cumi ruahnak cun, Pathian cu mi duhdawttu hnak in mihremtu vek ah kan mitthlam ah a cuan ter. A taktak ahcun, Pathian cu in duhdawt biktu kan nulepa vek in in duhdawt ih lam in hruaitu a ti. Kan sual pang hman ah duhdawtnak thawn in cohlangtu a si. Kan sualnak in ngaithiamtu a si.  Baibol sung ih, fapa tlanhlo pai’ thuanthu kha kan zoh tikah, a sual zet nan, a pa ih a duhdawtnak cu fate khal a zor hlei lo. Himi thuanthu hi fapa tlanhlo pa ih thuanthu hnak in a pa ih duhdawtnak a thuk zia Bawi Jesuh in in sim duhmi a si. Cumi thuanthu hmang in Pathian in kan sual tikah, kan sualnak hmuahhmuah in ngaithiam thei daan fiangte in in sim.

Billy Graham in a fanu nun a sim daan

Billy Graham in a fanu nun a sim daan TV sungah hi ti in a sim. Ka fanu in tlangval a nei. A tlangval neihmi kha zuu in ringringmi a si ih, ziaza tha a si lo ti kan thei. Curuangah, ka fanu kha a nu thawn himi pa thawn tthi aw lo ding in nun kan sim, kan zirh. Kan leem. Asinan, a duh lo ih ka tthi thotho ding tiah in ti. Cu tikah, kan nih in kan timi cu, Kan duhdawt bikmi kan fanu, na va umpi duh tattak ahcun feh ko aw. Asinan, na nunnak ah harsatnak tumpi na tong ding. Harsatnak na ton tikah, hngilh hlah, na nulepa in kutza pharh in kan lo hmuak ringring a si timi hngilh hlah tiah kan sim ta. Kum 2 an umawk hnu ah, kan sim vek ciahcun, kan fanu cu a thin a har ih, beidong in tikcu caan a hmang. Vei khat cu “ka pa ka ra kirsal ding” tiah  phone ii set tikah, ka fanu, “Ra kir aw. Ka lo hmuak tiah ka ti ih lungawi le raltha zet in a ra kir” tiah a sim. Himi vek duhdawtnak le cohlannak hi Pathian ih in duhdawtnak le cohlannak cu a si tiah a ti. Billy Graham in a fanu nun a sim daan a tawi zawng in kan zoh a si le, a fanu kha thil thami le tha lomi a sim ih, a cang theimi thu pawl khal a sim ralrinnak a pe theh ta. Cu thehhnu ah, a tha lomi hril lo ding ah, a leem. Asinan, a funu in a duh lo tikah, a duhmi a hril ter ih duhdawtnak thawn a tlun sal ding a rak hngak hlap thotho.

Pathian ih nun in sim daan

Pathian in nun in sim tikah, dimte’n awka neemte in kan thinlung sungah nun in sim thok. Kan duh lo tikah, ka fa himi cu tuah hlah aw, siatralnak na tong ding tiah a leemte’n in leem thotho. Kan duh lo tikah, kan nunnak ah harsatnak in tuar ter. Himi hi si, Paul in nan sung ih thlarau thianghlim mei alh kha mit ter hlah uh tiah in sim (1 Thess 5:19). “Thlarau Thianghlim mei alh mit” timi cu Pathian thlarau in nun in simmi kha kan el (hmit: quench) ta hrat ih kan mai duhmi lawng kan tuah/thlun timi hi a sim duhmi a si. Cu tikah, harsatnak kan tong ih, cui harnak cu a mai in pekmi a si lo. A thu kan ngai lo ruangah, sualnak kan tuah ih cui sualnak ih a rah a si theu. Cu ti ih ka ti tikah, harsatnak hmuahhmuah hi kan mai sualnak ih rah a si tiah ka tinak a si lo. Thuthimnak ah Job tla khi zoh hnik uh la, a sual ruangah a si lo. Satan ih hniksaknak a si. Tu ih ka simmi harnak cu Pathian ih nun sim kan duh lo tik ih kan tonmi harsatnak a si. Cu ti ih harsatnak kan ton tikah, Pathian in ka fa ka lo simcia kha. Ka ttongmi cu pelh kel hlah khaw maw tiah thu in sim. Cu ti in, ka palh ngai tiah, ngaithiam kan dil ih kan kirsal tikah, kan thinlung, taksa le kan ningzahnak ding thu pawl hmuahhmuah khal a tha bik in a rem theh ih, in dam ter sal a si (1John 1:8,9). Curuangah, Pathian ih nun sim daan cu, sualnak kan tuah zik tikah, himi cu tuah hlah aw tiah ralrinnak in pek. Kan ton dingmi khal in sim theh. Cu theh in, sualsir in kan kirsal tikah, lungawi te in in cohlang. A dingfelnak le a thianhlimnak cu duhdawtnak in a thlun ringring  a si. T’ong dang in kan tile, Pathian cu a daan (disciplines) khal in sim. Cui a daan kan thlun duh lo lai caan khal ah a duhdawtnak  (love) in kan nunnak in cawi in pom ringring thotho ti khal in sim a si.

Thunetnak

Fale nun sim tikah, a tel ringring dingmi thu pahnih cu: daan (disciplines) le duhdawtnak (love) a si. A pakhatnak ah, na fale na duhdawt taktak a si le, a nun daan ding (disciplines) zirh aw. Nun na sim tikah, cumi cu na tuah le cu vek na thleng ding tiah a ton dingmi pawl tiang na theih zat sim zirh aw. A sual tikah, mi hmai ah si lo in, a mah lawng a tuahmi a sual zia thu sim aw. Mihmai ih na sim a sile, a ning a zak ding ih, na par ah a thin a heng ding. Mirang ttong cun, “put some boundary” tiah an ti. Asullam cu, a nunnak hrangah ramri neih ter aw. Ramri nei lo in a nun pang a si le, luantuk in a nung pang ding. Cui ramri cu ziang tin kan tuah sak ding? Pathian ih duhmi cu ziang a si timi Bible sung ih thuanthu pawl hmang in sim aw. Cun, ziangkim ah Pathian thu a ron thiamtu si ding in an nauhak lai in thlacam pi aw. Thlacam cu Pathian thawn thu ruahrel khawmnak a si. Pathian tihzah le thungai cu a nunnak ih tahfung re ding in sim aw. Cutik ah Pathian ttongkam thlun in amah te ramri nei ih nung thiamtu ah a hung cang ding.

A pahnihnak cu na duhdawtnak langh ter aw. Pathian ih duhdawtnak cu hi vek a si timi na nunnak in langh ter aw. Na simmi pawl lakah, a thupi bik ih na sim dingmi cu Pathian cu kan sual hawltu si lo in, sualnak thangsung in kan luat theinak ding ah, in bawmtu, in cohlangtu le kan sual in ngaithiamtu le in duhdawt biktu (love) a sinak khal nan nunnak in langh ter aw la simfiang aw. Minung tisa ih um kan si lai tikah, tisa duhnak caan khatkhat cu na fa a feh pang caan a um pang thei. Cutikah, ka sual ngaithiam in in ttanpi duhtu Pathian le ka nulepa, rualpi pawl an um timi thinlung a neih ahcun, a ruahsannk hlo lo in, nunnak lamzin ah a kir sal ding. 

Cu ti in an nun daan ding ah Pathian ih daan thatha thawn rii na khiah sak ih, an sual tikah, duhdawtnak thawn an sualnak sung in luat ding in  na bom tikah, a thok ahcun, na fale in an lo hua men ding. Asinan, a rei hlan ah, “Ramri nei ding in nun in rak sim ruangah kan lungawi tiah an lo ti leh ding.” Mirang cun, short time pain but long time joy timi huatnak le harnak cu caan tawite sungah na tuar ko ding nan, na lungawi caan cu caan saupi a si leh ding.