Daihnak Siangpahrang

by Khun Siang Mawi

Bible sirhsan: Isai 9:6

Tuzaan ah Pathian cu ziangruangah Bible ca in daihnak Siangpahrang tiah a ti timi hi ruat khawm tlaang ding ka duh. Pathian cu ziangruangah kan hrangah daihnak Siangpahrang a si tile:

1.     Pathian cu kan ruah banmi leeng in in duhdawttu a si ruangah a si (John 3:16). Himi John 3:16 cu kan zaten kan nau hngak te lai ih siin kan theihciami Bible caang a si. Pathian in in duhdawt tuk ruang ah a fapa neih sun in pek ih cu mi a fapa zum tu hmuah hmuh cu kumkhua nun nak an co ding a si a ti. Kan tuanman le felman ruangah, Pathian in in duhdawt tiah in sim lo. “Ka phu lo na cing in i duhdawt timi hi ZUM IH RINGTU si ding hi kan tuanvo a si. Pathian in a nunnak pektiang duhdawtmi ka si ti kan zum ve te in, nun tharnak kan sungah a thok a si.”

2.     Pathian cu kan hrangah daihnak Siangpahrang a sinak cu: Pathian cu misual kan si ko nan, rundamnak cu laksawng in in petu a si (Efesa 2:8-9). Pathian t’ongkam in ziang a ti, “Ziangah ti le nannih cu pathian ih zangfah nak ruangah zumnak in rundam nansi. hi rundamnak cu tuannak ih nan ngah mi a si lo  ih laksawng a si. Curuangah zo hman porhawk ding nan si lo.” Kan mai’ thatnak ruangah si lo in, Jesuh kan ai ih a thihnak ruangah, sual ngaidamnak Pathian in in pek ti kan zum vete’n kan sungah lungawi hnangamnak a thok a si.

3.     A pathumnak ah, ziang ruangah, kan hrangah Pathian cu daihnak le hnangamnak a si tile zumtu kan si hnu kan sual pang tikah, sualsir in thla kan cam tikah kan sual ngaidamtu a si (Siar aw: 1John 1:9). Kan nih zum tu tam sawn cu kan piangthar pek ah a si lo le crusade theh ah thizik ten Pathian kan zum . Cun a rei a rei in sual kan tuah ti ih kan ruat aw veten Pathian in in duh nawn lo tin kan mah te kan ruat. Cun, ka thih le hell ah ka tla ding tiah kan ti aw mei. Cuvek Pathian thu ruah daan cu, “ka that le vanram ka kai ding, ka sual le hell ah ka tla ding timi ruahnak ih sin a rami a si. Pathian ih duhdawtnak zumnak in vanram kai tum lo in, mai thatnak ih vanram kai kan tum ruangah a si. Mi nung cu tisa ih um lai kan si ruangah, sualnak kan tuah pang thei. Cu ti ih sualnak kan tuah pang caan ah, Pathian hmai ah kan sual kan phuang ih ngaithiam kan dil ahcun, kan sualnak in ngaithiam ding a si (1 John 1:8,9). Cun, Saam 145:8 khal ah, “bawipa cu mi duhdawttu le mi zangfah tu asi; athinheng a har ih a hmunmi duhdawtnak in a khat” Ati. Curuangah, duhdawtnak thawn a khatmi kan Pa Pathian hnen ah kan sual pang a si le, sual phuang in ngaithiam dil ding kan si.

4.     Thunetnak: Pathian cu kan hrangah daihnak le hnangamnak Siangpahrang a si. Ziangruangah tile,

a.     Pathian cu kan ruah banmi ih leeng tiang in duhdawttu a si. (Jn 3:16)

b.     Pathian ih rundamnak cu kan thatman a si lo, laksawng a si. (Eph 2:8-9).

c.     Zumtu in kan sualnak kan tuah pang tikah, Pathian hnen ah sualsir in sual ngaithiamnak kan dil sal tikah, Pathian in in ngaidam. (1 John 1:8,9).

Pathian in misual zohman a taansan lo. Kan hrangah daihnak le hnangamnak in petu daihnak Siangpahrang a si timi hi tui Christmas caan ih sin thok in kan zum hrih lo a si le zum in rinsan uh si. Cu tluk ih in duhdawttu Pathian hnen ah kan sual sir in kan nunnak hlan aw aw sal uh si. Amai hnen lawngah daihnak a um (Ps 16:11).

Saam. 16:11  "Nangmah in nunnak lamzin cu  i hmuh ding; 

Na umnak ah lungawinak a kim ih, 

Na baan thacak ah nomnak kumkhua in a um.