Dr. Martin Luther King Jr. Ih Thuanthu Tawi

January thla ih zarh thumnak tlawngkai ni khat ni hi Martin Luther King Jr. (1929 – 1968) kha America rampi in upat sunloihnak an pekni a si. Curuangah, Dr. King ih thuhla hrek khat te le a ttongmi kam khat hnih te amah sunloihnak ding hrangah ngan ka duh. Prineton Theological Seminary ah 2004 ah khan, Dr. King ih Theological Ethics timi kan zir ih cumi ihsin, a lungput le a nun daan hi ka nunnak ih ka zoh tthimmi le ka thuruahnak ii silhkhuhtu bik pakhat a si.

Dr. King hi January 15, 1929 ah Atlanta Georgia ah a suak. A pu hi 1914 in 1931 tiang Atlanta ih Ebenezer Baptist Church ah pastor tuanmi a si. A pu thehhnu ah a pa in pastor a run tuan ih Martin Luther King a thihnu reipi tiang a run tuan. 1960 in Dr. King khal hi EBC Church thiamthiam ah a pa bawmtu ah co-pastor a tuan ih a thihni tiang a tuan. 1948 ah Morehouse College in B.A a ngah. 1951 ah Crozer Theological Seminary, Pennsylvania in B.D a ngah. 1955 ah Boston University in Ph.D a ngah. Boston ih tlawng a kainak ah fala mawi zet le fim zetmi Coretta Scott thawn an tong aw ih an tthi aw. Fapa pahnih le fanu pahnih an nei.

1954 ah, Dexter Avenue Baptist Church, Montgomery, Alabama ah pastor a tuan. Pastor a tuan phah ah, midum pawl tthanso theinak rampi huap pawlkom tiah timi National Association for the Advancement of Colored People (NAACP) ah hruaitu E.C sungtel sungah a tel ve. 1955 ah Negro pawl in midum le mirang thlei daannak ummi hi hriamnam hmang lo in lamzin ah kan duh lonak kan lang ter ding tiah an ti tikah, Dr. King cu hruaitu ding ah zaangfah an dil. A rak el zet nan, nangmai’ in hruai lo ahcun tiah an ti tikah a rak cohlang.

Bus sungah midum pawl cu dunglam ah, mirang pawl cu hmai lam ah, mirang an rat le midum pawl in tonak nan kian ding ti pawl ih thleidannak ummi kha an duh lo ruangah, midum hmuahhmuah bus hrimhrim nan to lo pei tiah thu an suah. Bus zo hman to lo rori in midum pawl khal lungrual zet in ni 382 sung an um. Bus a totu tam bik cu midum pawl an si theu ruangah, bus tampi cu totu an um nawn lo ih bus tampi an cawl. Curuangah, December 21, 1956 ah Supreme Court rori in, midum le mirang bus sungah thlei dannak a um nawn lo pei tiah thu an relcat ih an than.

Cu ti ih, midum pawl in lamzin ah a rual a rual in an feh ih midum le mirang thlei dannak an do laifang ah, Dr. King cu thlawngthlak a tuar. Casia a phunphun kuat a tuar. Zaan laifang khal ah phone in an ko ih, “Negro pa, na thil tuahmi na colh lo ahcun, nangmah le na innsang zate in hmai zarh sungah kan lo that ding” tiah an hro. Culai ah, Dr. King ih a timi cu, “Ka ttih tuknak ah ka tthia thluah thlo. Ka nufa le pawl cu ziang thei lo in ihhmu thaw zet in an it that. Cui’ lai caan ahcun, ka zirmi theology thuk zetzet pawl in hnangamnak in pe thei lo. Hnangamnak cu ka pi ih ii rak sim theumi ‘Pathian cu na kiangnai ah minung bang in a lo umpi ringring sokhaw’ tiah ii timi minung bang in ii umpi tu Pathian timi te cun, ka hna ii ngam ter” a ti. Cu ti ih ka ttihtuk lai ah thla ka cam ih, Pathian ih ii umpi zia ka tep ngah a ti. Mipa khat in hi ti in thu ii sim vek in ka thei, “Dingfelnak le thutak hrang ding aw. Pathian cu a kumkhua in na lam ah a ttang ding” tiah ka hna thlam ah ka thei a ti. Zaan thum hnu ah, an sungte in an sung khat te ih inn ah an riah lai ah, a inn cu bomb in an puah sak. Asinan, thil dik lo hmuahhmuah do ding ah hmai ah ka feh thotho ding a ti ih, Negro pawl hruai in a feh thotho.

1957 ah civil rights cangvaihnak caksin dingah tiah tuahmi pawlkom, Southern Christian Leadership Conference (SCLC) ah president ah an hril. Hi pawl kom in an do betmi cu midum pawl rampi hril awknak khal ah bangraan te’n vote tuah thei ding in an nor pi. A thuruah daan le a ttannak hrampi cu Christian zumnak ah a bun ih, an sandahpiah daan cu Gandhi feh daan a zoh tthim. Kum hlei khat sung, 1957 in 1968 tiang midum pawl a hruainak ah, peng ting sawmruk khual a tlawng, vei thawngkul hluannga thu a sim. Khua kip ih a feh tikah, ‘kan khua lam ah ziang na ra tuah, kir aw’ tiah an rak ti tikah, “Thleidannak le diklonak um hlah sehla ka ra lo ding” tiah a sawn.

Cutluk ih a hnatuan a tam lai ah, ca-uk panga a ngan man lai h, cahram ti cawk lo a ngan man thotho. A thusimmi lak ih a hmin thang bikmi cu “I have Dream,” “Sunmang Ka Nei” timi a si. Cumi sung ih a sunmang a tawi zawng cu, “Ka fale pali hi nikhat ni ahcun, an taksa rong (color) ruangah silo in, an nuncan ziaza par ih zir in thu a tthentu ram ah an tlangleeng leh ding ti hi ka sunmang a si” tiah a ti. Mirang in, “I have a dream that my four little children will one day live in a nation where they will not be judged by the color of their skin, but by the content of their character.”

Vei kul thawng thlak a tuar ih veili hnak ih mal lo thawi le vuak a tuar. Upat sunloihnak degree panga a co ih, 1963 ah Time magazin in “Kum Khat Sungih Milangsaarbik” ah a hril. A kum 35 ah, Noble Peace laksawng a ngah. Noble Peace Prize ngahtu lakah mino bik a si. A laksawng ngahmi $ 54,123 cu civil rights cangvaihnak ih hman ding ah a hlu. April 4, 1968 ah Memphis, Tennessee ih riahbuk motel pakhat ih a um lai ah, an rualpi hrek khat thawn an veranda ih an din laifang ah, a mah a huatu pawl ih mithal in a nunnak a liam ta. A tongmi hrek khat:

1. Thimnak cu thimnak in a dawi hlo thei lo; tleunak lawng in a ti thei. Huatnak cu huatnak in a dawi hlo thei lo; duhdawtnak lawng in a ti thei.
2. Zokhal in duhdawtnak khuatleu sungah ka feh ding maw, mai hrang lawng ruatmi siatralnak khuathim sungah ka feh ding timi a hril tul.
3. Mi pakhat in hih thu cu ka nunnak liam in kan ttanpi ding timi thu pakhat khat tal a hmuh hrih lo ahcun, a nun daan man a nei hrih lo.
4. Minung nunnak ah ziang tluk a nun a sau tihnak in ziangtluk man nei zet in a nung timi hi a thupi sawn.
5. Mi pakhat ih man taktak cu nun nom lai ah khui ah a ding timi ah a si lo. Thubuai a um caan le dotu an um caan ah khui tawkah a ding timi ah a tthum aw sawn.
6. Hitler khal in Germany ram ih a tuahmi kip khi an ram daan thawn a mil aw (legal) lomi a um lo ti hngilh hlah.
   
7. Thil thupimi par ah daite ih kan um men ni ihsin, kan nunnak cu cem hram a thawk.
8. Mi hmuahhmuah in an hmin a thang thei lo men ding. Asinan, mi hmuahhmuah cu mimaksak an si thei. Ziangah tile, maksaknak (greatness) timi cu midang hrangah ziang tluk in a nung (service) timi parah a tthum aw a si.
   
9. A ttongmi dang pawl siar paihtu pawl hrangah: http://www.brainyquote.com/quotes/quotes/m/martinluth109228.html