Reminiscence

Casiartu hnenah

No Kolh (Saya San No) hnen in a blog ah ca rak ngan ve ding sawmnak ka ngah ih ka lung a awi zet. Ziang si ka ngan le a tha ding ti ka ruat ih kan nauhak deuh lai thu pawl ka vun mang sal.No Kolh le kei hi tthi khat, veng khat ih rak tthanglian tlang mi kan si. Tlawng kan khan khat dah lo nan Sunday School kan kai tlang nak le veng mino cangvaihnak pawl in rualpi kan rak si. Hi mi ca sung in kan rak tlanlennak, ah tlawng sal tlang ve ding ka lo sawm. (Mirang in a cafang ka duh zet ruang ah a thulu mirang ka run hlan ta nak a si.)

Reminiscence

Kum 20 lai a luan zo. Falam Baptist Church, Falam (Biakinnpi) ah Sunday School, Intermidiate Class kan rak kai lai.

Zaan khat cu Biakinn ah zirnak kan nei. Baibal maw, hla kan zir ti a fiang in ka cing nawn lo. In zirhtu cu Zomi Theological College ih tlawng a kai rero lai tu ka uunu, Sayamah Sui Tin Hoi a si.

Rualpi a neih lo ruang ah kan zir ttheh in an tlawng tiang kan hei thlah. Kei, No Kolh, Di Dim le Matte.

Kan kir lam mawtaw zin kan thlen zik hnen ah No Kolh a ziang ai maw suak thei hlah, a au ih hmakhat te ah hmai ah a tlan. Kei le Di Dim cu kan hni ih dung ah kan tang. Matte in a dung in a hei dawi. Zinpi a thlen hlan deuh ah a bah. Kan hei zon ih No Kolh khal a ra kir sal ve. Matte cu a thei aw nawn lo. A thok cu capo nak ah a ti ter aw hmang tin ka ruat. A si nan kan tthang thei lo cun awloksong in zin kap ih inn ah kan vun zawn.

No Kolh, Uu Sui ko ding in ZTC a va tlan. Kei le Di Dim in kan run kil. Inn tek pa tlan i ra kil pi ve. Matte cu a mit a let phah ih a mai aw kel lo Hakha ttong a ttong ciamco. A ttong vek a si ah cun tlawngpit Haka a tlawn ah an rak ik sik ih hnam-dawi thawi tuah mi a si ti vek...

Ka ttih tukah ka hmul hmuah a tho ttheh.

Tawkfang ah Uu Sui a rualpi pawl thawn an ra thleng. Thlacamnak kan neih hnu ah Dawrhlun an inn tiang in rak thlah pi.

Tlun lam.

Lansung Pu Pek inn kiang in Uu Sui le a rualpi pawl cu tlawng lam an kir sal.

Di Dim bualrawn (Hrang Thio Bualrawn)kiang ih um mi a si ih an inn pial nak zin cun a mah te a tlung ringring mi a si nan "Ka ningtih tuk, kan inn sangka tiang i run thlah uh" a ti ih kan vun thlah.

No Kolh bualrawn thlang um mi a si ih kei hlat bik va tlung ding ka si, Laizo zin sak ah. Ka ningtih ve tuk ih ziang tin ka tlung ngam ding ti ka khuaruah a har laiah No Kolh in nan inn tiang ka lo thlah ding i ti.Cu cun ka thawpi ka suah hlun hlo.Cu tin ni dang bualrawn kiang tiva tiang i thlah theu mi kan inn tiang i thah. Inn sung ka luh tiang i hngak bet lai.

Tu ka ruah sal ah ka ning a zak phah. Ka va rak tthih hrut ve. Ngaingai te cun vun ruah le ttih ding um lo mi a bang nan. Kha lai ah cun ka rak tih daan cu mak.Ka ningttihnak in i rak khuh ttheh ih thu dang ziang hman ka rak ruat baan lo law law. Nan tu ca ka ngan phah in ka ruat sal. No Kolh teh a ning a rak tih ve pei maw? Di Dim le keimah lawng maw ningtih rak thiam?

No Kolh le Di Dim in khaih zaan thu an cin mi in ruah ve seh la ka ttelhh mi tla an bet ding ih kan thu a thaw zet ding. Ziang a va si khal le tu zaan ka hrang ah cun, No Kolh vek mi zawn ruat thiam Sunday School kai pi ka rak neih cu mi vantha ngaingai ka si tin ka ruat aw. 

Ka hnglih thei dah lo mi zaan khat.