The secret of power, greatness/glory: love and service
Text: Mark 10:43-45
43 Asinain nannih lakah cun hi bangtuk cun a si lo pei. Nanmah lakah pakhat in a tum bik si a duh ahcun nan zate riantu a si pei. 44Nanmah lakah pakhatnak si a duhtu cun nan zate sal a si pei. 45Ziangah tile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si,” tiah a ti.
Efesa 6:1-4
1Nauhak pawl, Bawipa ih hmin in nan nu le nan pa upat uh. Nu le pa upat cu Khristian ṭuanvo a si ih a ṭhami a si fawn. 2“Nan nu le nan pa upat uh,” timi thukham hi, 3“Na lam a tluang ding ih leitlunah na nun a sau ding,” timi thutiamnak an beetmi thukam hmaisa bik a si.
4Nu le pa pawl, nan faale pawl kha thinheng dingin tuah hlah uh. Cu ai-ah Khristian nundaan ziaza le zirh awknak thawn cawm uh.
Lei tlun ah mi ih duhdawtmi si kan duh cio. Midang ih rinsanmi/sunloihmi sikhal kan duh cio. Midang ih pawlkom mi si tla kan duh cio. Cumi kan si theinak ding ah ziang kan tuah ding? Ziangmi si sunlawinak ih thuthup cu?
Nuhmei nu le a fapa
Vei khat ah, Billy Graham in nuhmei nu ih thu hi ti in thu a sim. Nufa te cu a pa in a tansan hnu ah an mah lawng an si ih, a nu in ka fa hi fimnak thiamnak saang zir ko ka tuah ding a ti ih, haangdum a tuah, ar a zua. Pakan kholh in paisa a hlawh. Cuti in a fapa te cu University tiang a ret. Degree a lak tikah, a pate cu laksawng la ding a si ih, cun, first a ngah ruangah, thusim theinak khal cu an pek. Cu tawk degree laknak hmun ahcun, ka nu ra ve aw tiah a va sawm. A nu ih, kei mi-aa, ni puan hman tthitha nei lo in ka ra duh lo ding tiah a el. Asinan, a fapa te in na neihmi te hru aw la, ra ko aw a ti tikah, a nu cu a ra ve ih, hmun sir te ah, a rualpi pawl ih nulepa, milian thatha pawl ih kiang ah a to. A fapa cun, laksawng a lak ih thu a sim theh tikah, a va feh ih, a nu cu sunloihnak an pekmi medal cu a va pek ih, a degree ngahnak cazual khal a nu ih kut ah a va ap ih, a timi cu, “Ka nu hi pawl hi nangmai ta an si. Nangmah ih ngahmi a si” tiah a va ti.
Hi tlangval pa te ih tuahmi cu duh a va nung ve ti uh law. A nu kha, cathiam lo te asinan a zahpi lo. Cun, a nu ih tumtah sakmi lungthli tum kha thleng ko a zuam. Cun, cui lungthlitum a thlen tik khal ah, himi hi ka nu in, ka nauhak lai in arfa no te bang in in khurhom ih ruangah hi dinhmun ka thlen theinak a si ti a thei fiang a si.
Ziang ruangah, hi tlangval pa te in a nu hi tluk in a sunloih si pei? Upatnak ziangruangah a pek? A ruang bik cu, “A nui duhdawtnak” a comi pawl a hngilh lo ruangah a si. Uico hman in ciizu/duhdawtnak an thei. Rawl petu cu an bo lo. An keu lo. Asinan, kan nih minung tampi cu mai hringtu nu le pa, a bo le a keu kan hmang theu. Uico hnak in kan sinaknak a niam sawn theu.
Pathian ih sunlawinak thuthup: love and service
Martin Luther King Jr. hi tin thu a sim dah: “Mi hmuahhmuah in hlawhtlinnak cu an ngah thei. Asinan, mi hmuahhmuah cu sunloih a si theh thei lo. Ziang ruangah tile, lianngannak le sunlawinak cu mi riantu sinak/service ah a tthum aw a si” tiah a ti.
Hi a simmi hi Jesuh khal in a sim ve. Mark 10:43.
43. “Asinain nannih lakah cun hi bangtuk cun a si lo pei. Nanmah lakah pakhat in a tum bik si a duh ahcun nan zate riantu a si pei. 44Nanmah lakah pakhatnak si a duhtu cun nan zate sal a si pei. 45 Ziangah tile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si,” tiah a ti.
Ziang ruangah, Pathian in a fapa Jesuh kan sual tlennak ding hrangah in pe siang? Jesuh in ziang ruangah, thinglam tah par ih thih ding a ttih zet ko nan, kan sual tlennak ding hrangah thih a ngam?
A phi cu John 3:16 sung ah fiang te in in sim. Pathian in leilungmi a duhdawt tuk ruangah a si. Pathian ih duhdawtnak cu a mah duhdawttu pawl kha a duhdawt ti a si lo. A mah in in duh in duhdawt hmaisa ih kan mah kha Pathian a thinhen tertu kan si nan, Pathian ih duhdawtnak cun, remnak tuah ding cu a thok hmaisa.
1 John 4:9-10
9Pathian ih in duhdawtnak cu a Fapa neihsun hi leilungah hin run thlah in a langter ih amah thawngin nunnak kan conak dingah a si. 10Duhdawtnak timi cu hiti in a si: Kanmah in Pathian kan rak duhdawt ti a si lo, amah sawn in in duhdawt ih a Fapa a run thlah; cumicu kan sualthlah raithawinak dingah a si.
1John 4:19 We love because he first loved us. Pathian kan duhdawtnak cu kan mah in kan duhdawt hmaisa ruangah a si lo. Amah in in duhdawt hmaisa ruangah a si tiah a ti.
Midang kan duhdawt theinak ding hrangah, Pathian in ziangtin in duhdawt? Kan sualnak teh ziangtin a tuah timi hi kan theihfiang ta a tul. Pathian ih duhdawtnak le nulepa ih in duhdawtnak ahcun kan phu lo kan tawk lo lai caan ah kan hrangah thil tha khua an khang ih in tuah sak. Curuangah, Philip Yancey timi scholar pa in hi ti in a sim. “Duhdawt zaangfahnak timi cu taya le ya lo timi par ah a si lo” tiah a ti. “Grace is not about fairness.” Curuangah, Jesuh ih thuthangtha cu na sualnak pawl cu na zum ah zum lo khal ah, na theih ah theih lo ah, a nunnak liam in a mah in a lo tlen zo. Thihnak khal neh theinak dingah, thihnak neh in kan hrangah a tho sal zo. Cumi a thei ih a zumtu pawl cu lungawinak thawn an lung sung a khat a si.
Curuangah, Pathian in ziangruangah a fapa neihsun khal kan hrang ah pek a siang? Ziangruangah Jesuh khal in Bawibik a si nan, a niam bik ah a rung suak ih kan sualnak hrang tiang a nunnak pek a siang? In duhdawtnak le kan hrang ih nungtu, a nunnak tiang liam siangtu a si ruangah a si. Curuangah, kan nih minung pawl khal in Pathian cu kan duhdawt ve ih, kan sunloih ve a si.
Nulepa ih sunlawinak: love and service
Cu vek thiamthiam in sunlawinak ih thuthup hi nu le pa ni ah ziang kan zir thei? Ziang ruangah, leitlun ah nu/pa tampi an um ko nan, in hringtu kan nu le pa cu ziangah kan duh hlei ce? Kan upat hleice?
The unconditional love and service they give to us. Nu le pa cun an fale kan par ah ziang thei lo ih, kan rak um lai khal ah in duhdawt ih kan ttulmi pawl a cang thei tawk in hlawhman nei la lo in in rak tuamhlawm. A tu nazii pakhat ah a malbik hlawhman $ 8.50 nan ei ih, kum hi zat sung in kil man la lo in an um. Nan tulmi tla an lo pe bet. An thu kan el ih an thin kan hen ter lai khal ah kan sualnak in ngaithiam lai hrih.
Curuangah, kan Pathian biakmi hnen in le kan nulepa hnen in kan zir theimi sunlawinak ih thuthup: love and service a si. Duhdawtnak cun, tihnak khal a dawi hlo. Ral thatnak a pek.
1John 4:18 There is no fear in love, but perfect love casts out fear; for fear has to do with punishment, and whoever fears has not reached perfection in love.
Duhdawtnak cu a terh khal a siang. Mi ih zawn khal a ruat. Pathian le nu le pa ih duhdawtnak hi zoh uh la, nan fiang ko ding.
You can give without love.
But you cannot love without giving.
Duhdawtnak tel lo in na pe thei.
Asinan, peknak tel lo in na duhdawt thei lo.
Curuangah, fapa fim le fanu fim cun, an nulepa an upat ih, an duhdawt. An thusim an ngai ih, an lungawinak tuah sak ding an tum tah.
Efesa 6:1-4
1Nauhak pawl, Bawipa ih hmin in nan nu le nan pa upat uh. Nu le pa upat cu Khristian ṭuanvo a si ih a ṭhami a si fawn. 2“Nan nu le nan pa upat uh,” timi thukham hi, 3“Na lam a tluang ding ih leitlunah na nun a sau ding,” timi thutiamnak an beetmi thukam hmaisa bik a si.
4Nu le pa pawl, nan faale pawl kha thinheng dingin tuah hlah uh. Cu ai-ah Khristian nundaan ziaza le zirh awknak thawn cawm uh.
Eph. 6:1 ¶ Children, obey your parents in the Lord, for this is right.
Eph. 6:2 “Honor your father and mother”—this is the first commandment with a promise:
Eph. 6:3 “so that it may be well with you and you may live long on the earth.”
Eph. 6:4 ¶ And, fathers, do not provoke your children to anger, but bring them up in the discipline and instruction of the Lord.
Hi tawk ah thu pahnih a um:
1. Fale ih tuanvo: nulepa upat ding.
“Nulepa upat” timi cu an thusim ngai hi a si. Na nulepa upat/an thu ngai aw timi cu Pathian ih thupek a si ih, cui thupek a thluntu pawl “nan lam a tluang ding ih leitlun ah nan nun a sau ding” tiah Pathian in thutiamkam mi a beet cih. Nulepa upat pek timi cu nulepa ih zonzaih harsatnak cinman khal khi a si.
Na nu a nun nawn lo asile, na nu ih a seherhmi te ziang a um? A lung thlitum kha kim ding in zuam aw. Cu asile, na nui duhdawtnak malte na sam thei ve ding. Ka nunnak ah thil pakhat ka tuah ringringmi thu a um. Ka suahni tinte in 1992 in tui kum tiang ka nu le pa laksawng ka pe ih, cun, an hnen ah thlawsuah ka dil. Ka lu tlun ah an kut an suang ih, thluasuah in pek. Cui an thluasuah pekmi te cu tui’ sun ah ka hnathlam ah a taang ringring ih, thluasuah khal kan unau lak ah ka co bik tisehla ka sual lo men ding.
2. Nulepa ih tuanvo: Kristian ziaza tha (discipline) le Pathian thu thawn cawm ding.
Nulepa pawl kan fa le pawl kha discipline/ziaza fel le mawi nei ding in kan zirh maw? Thlacamnak, le Jesuh bang in kan fale kan pawlkom maw? Mi hrek khat in kei cu Bible ca le ka thei lo ih Pathian lam ah hruai zia ka thiam lo na ti pang maw? Nan innsang ah na fale hrangah thlacam ringring aw. Na thlacam an lo hmuh le, thlacam nun cu an mahte an nei vingvo mei ding. Na fale Bible siar ter na duh maw? Nangmah in Bible siar aw. TV phih caan te nei in, thlacam caan te nei aw. Cu tikah, cui tikah, na fale cu thlarau lam ih hruaitu na si thei ding.
Mother's Day sermon ka pekmi a si. (5/10/09).
No comments:
Post a Comment