Thlarau Khat Nun (Eph 5:18)

18. Zu ri hlah uh; zu cu a lo siatsuahtu lawng a si. Cuhnakin Thlarau in khat sawn uh.

Thuhmai hruai

Zumtu in kan nunnak ah taksa, thinlung le thlarau lam ah tthangso ding in kan feh rero lai ah don khamtu a um ringring. Cui in dawn khamtu cu sualnak a si. Sualnak sung ih kan nunnak kan cencilh tikah, cui sualnak cun, kan tikcu, kan thazaang, tihzat upatnak kan comi pawl tiang a zate in in lak sak theh. Cui sualnak le that lonak hi ziangti in kan neh thei pei?

Naute khi a suah tikah, minung tampi in ziang a zoh theu? Zo thawn an bang aw? A hnar te cu a nu a zon. A cal te cu a pa a zon tiah an ti. A thang le thang lo ti khal siizung ah an tah ringring. A kut, a ke, ziang tluk a hung sau, a luu ti pawl an tah. Zumtu teh Pathian in kan thangso le so lo ziangmi in in tah?

Zumtu pawl kan thanso le so lo cu “a fapa Jesuh thawn kan bang aw maw bang aw lo” (Rom 8:28) ti hi Pathian ih in tahnak a si. Jesuh thawn a bang aw timi cu ziangmi hi a si?

Rom. 8:29 For whom he did foreknow, he also did predestinate to be conformed to the image of his Son.

Jesuh Khrih thawn bang aw ding timi cu kan thinlung le ziaza pawl cu ziangvek an si? ….. Thlarau ih rah pawl an si.

Gal 5:22,23

22Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, 23nunnem tangdornak le suup theinak tla an si.

The Bible says, “The fruit of the Spirit is love, joy, peace, patience, kindness, goodness, faithfulness, gentleness and self-control”.

Thlarau rah pawl tiah a ti lo. Thlarau ih rah cu ti in plural hmang lo in singular in a hmang. Asim duhmi cu zumtu hmuahhmuah nun ah a lang dingmi ziaza pawl an sinak a lang ter duhmi a si. Kan theih dingmi cu cu pawl cu Thlarau ih rah an si.

Thlarau rah pawl kan sung ih a rah theinak dingah ziang kan tuah a tul?

Minung in kanmah te kan rah theimi a si a ti lo. Thlarau ih rahmi pawl an si tiah a ti. Himi rah pawl kan sung in a rah theinak dingah, thlarau thianghlim ih control mi/ukmi kan si a tul.

Eph 5:18 sungah, “Zuu ri hlah uh, … cuhnak in thlarua thianghlim thawn khat sawn uh” in ti.

Zuu na rit tikah, zuu in a lo control bang in, thlarau thianghlim ih khat timi cu “thlarau thianghlim ih ukmi/controlmi” tinak a si.

Ziangti in thlarau thainghlim in kan nunnak in uk thei ding?

1. Sualsirnak (repentance) a tul. Pathian kha nitin kan suh dingmi a um. Cumicu, khui tawk zawn ah Bawipa ka nunnakah, thuneitu ka lo re lo. Na theih awk a si le, cui sualnak in kir sal aw. Pathian hnen ah a tu le tu na suh awk dingmi cu “Bawipa na duh lo zawng nun, keimaih thuthu ih ka nunnak zawn a um maw?” tiah sut aw ringring aw la, na sual sir lohli aw. (Psalm 139:23-24).

Caan tampi ah Pathian in kan sual tikah, in hua tiah kan ruat theu. Asinan, kan Pathian cu a le pawl ih sualnak le ttah aihramnak a thei ringirngtu a si.

Israel pawl Igypt ram sal ih an taan tikah, hrem an tuar. Cutikah, cui a harsatnak pawl cu zo an sim? Pathian hnen ah an sim. Curuangah, Pathian in Moses a kawh tikah, “Ka mi Israel pawl ih ttah aihramnak cu ka thei a si. Feh aw la va run. Na hnen ah ka um ding tiah a ti.”

Cu vek in, zumtu pawl kan sual pang tikah, 1 John 1:8,9 … Pathian hnen ah sual ngaithiam kan dil sal a si ahcun, Pathian in kan sualnak pawl in ngaithiam theh ding a si tiah a ti.

Pathian hnen ah sual ngaithiam dil in Pathian hnenah thlacamnak in kir aw. Nan thinlung sung in sual thilrit pawl hmuahhmuah a lo laksak theh ding a si. God will never forsak you.

2. Jesuh ih nunnak langter dingah, na nunnak a tu in tho aw la, hmai ah feh in up aw (submission). Zumtu ih sungah, tisa le thlarau duhnak pahnih a nung. Caan tampi ah, tisa duhnak ah kan nunnak kan hlan aw. Cutikah, Jesuh Khrih cu kan taanta theu. Curuangah, kan nunnak ah thlarua in rah a rah thei lo.

Pathian in Israel pawl kha luatnak pek a duh. Asinan, Pharaoh cun a duh lo. Cutikah, Pathian in a huham Pharaoh a hmu sak. Harnak phun hra a thlen ter. Phun kua a thlen tiangah, Pharaoh cu a duh hrih lo. Asinan, a neta bikah cun, tuu thisen kha an sangka tlun ah a hnih ter. Cumi a hnih lo pawl innsang cu an fapa upa bik thihnak an tuar. Cutikah, Pharaoh in Pathian ih huhman a celh nawn lo ih, Israel pawl a thlah a si.

Cuvek thiamthiam in, zumtu pawl hi Satan in thlah in siang lo. Kan sualman leiba kuan ter in duh hrih. Asinan, Jesuh in, cui kan sual man leiba in tuar sak theh zo a si. Thinglam tah par ah sualnak huham khal a neh zo. In neh ter zo a si.

Rom. 8:2 For the law of the Spirit of life in Christ Jesus has set you free from the law of sin and of death.

Jesuh thisen in lei zo ruangah, miluat kan si zo. Sualnak in a sal ah in kai taang thei nawn lo. Pharaoh/Satan/sualnak in a lo kai tum khal le mi luat ka si zo ti thei ringring aw.

Bible in, “5Nan sungih hna a ṭuantu leilung pumsa duhnak: nupa sualnak le zoh mawi lo nuncan, taksa hiarnak le hurnak le hamṭamnak pawl tla cu nunter nawn hlah uh” (Col 3:5) ah a sim. Curuangah Paul cun, “A thinglamtah parah kei cu Khrih thawn thahmi ka si zo. 20Curuangah a nungtu cu kei ka si nawn lo; ka sungih a nungtu Khrih sawn a si” (Gal 2:19,20).

3. Pathian rinsan aw la, a thu ngai aw (trust & obedience) .

Israel pawl tipisen an kaan zik le rawl lo ti lo in ramcar lak ih an um lai khal ah Pathian an rinsan ih a thusim an thlun tikah, Pathian tipi sen khal a tthen awk ter ih, leiro lak ah a feh ter. Ramcar lak khal ah an theih dah lomi van mana le lungpi ti in a cawm. Curuangah, Moses in a thih zik tikah, thu a cahta. Daan 8:2-3 sungah:

2Nelrawn ramṭhing ah kumpi kum sawmli sung Bawipa nan Pathian in a lo hruai ih a thupekmi pawl nan thlun tum maw tum lo tiin nan thinlung sungih thuruahmi pawl theih duh ah nan hnenih harsatnak a thlenterzia pawl kha ruat uh. 3Rilrawng in a lo ret. Cuih hnuah nanmah le nan pupa pawl in nan ei dah lomi manna sang nan ei dingah a lo pek. Hitiih a tuahnak cu rawl lawngin nunnak a si lo; Pathian hmurka in a suakmi thu in nunnak a si sawn, ti nan theihnak dingah a si.

Cuvek in, kan nih zumtu khal in, kan kaan dingmi tipi tla milai thazaang cun, a har zet ko ding. Kan tulhaimi pawl khal nei lo in, kan um caan tampi a um ko ding. Culai caan khal ah kan Pathian cu kan harsatnak le kan tonmi thuhla pawl hnak in a tum a cakmi Pathian a si ti thei in, Pathian kan rinsan ih a thu kan thlun ahcun, van mana le lungpi ti thawn kan nunnak puar le tlei zet in in cawm ding a si.

Thungainak cu Pathian ih thilti theinak kha na sungah a luan tertu a si. John 15:5-7 sungah, Jesuh in “5Keimah cu Sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangah tile keimah tel lo cun zianghman nan tuah theimi a um lo. 6Zokhal keimah sungih a um lomi cu Sabit hnge an hlon ih a carmi bangtuk a si ding” tiah a ti.

Zo ih thu si ngai ding tuisunni ah na tum? Na tisa diriamnak ih fialmi thu ngai na tum maw, Jesuh ih thupekmi ngai na tum? Jesuh thupekmi ah na ngai a siahcun, na nunnak ah thlarau in rah tampi a rah ter ding a si.

Thunetnak:

The purpose of your life?

Pathian in kan nunnak ah si ter in duh bikmi cu a thlahmi Jesuh Khrih thawn bang awk ding hi a duh bikmi a si (Rom 8:28,29).

Jesuh lungput le ziaza pawl cu ziangvek an si?

Thlarau ih rah phun kua pawl an si.

Gal 5:22,23

22Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, 23nunnem tangdornak le suup theinak tla an si.

Hi thlarau rah phunkua pawl hi, minung lam ih zuamnak men ih thil cang theimi an si lo. Thlarua thianghlim ih rahsuahmi pawl an si. Thlarua thianghlimih rah phuankua pawl hi kan nunnak ih a rah theinak dingah, thlarau thianghlim ukmi kan si a tul. Eph 5:18

Jesuh Khrih thawn kan bang awk theinak dingah, thlarau thianghlim ih ukmi kan si a tul. Kan nunnak ih thuneitu kan si ter lawngah, kan nunnak cu a sersiam thar sal ding a si. Asile, thlarau thianghlim ih ukmi/controlmi kan si theinak dingah ziang tuah kan tul?

1. Sualnak kan tuah pang tikah, Pathian hnen ah kan sual phuang in kir lohli uh si. Pathian in kan kir sal ding in hngak ringirng.
2. Khrih ih sinak pawl lang tertu si dingah na nunnak hlan aw. Commit your life to represent/reflect Christ. Pharoah/Satan ih kaih theimi na si nawn lo. Pathian in Jesuh thisen in a lo luat ter zomi na si. Na luat thei lo ding sualnak a um lo.
3. Amah rinsan in thusim ngai. Na buainak hnak in Pathian ih huham cahnak a tum sawn ti thei in, Amah rinsan aw. A thusim khal ngai aw. Canaan ram a lo luah ter ding.