Tongkam cu Huham Cahnak a Si

By San No Thuan

James 3:4,5

4Asilole tangphawlawng khi ruathnik uh: a tumzetmi a si ih a cak zetmi thli in a fehter; asina in a uktu ngaingai cu a fate zetmi lawng-hernak a si ih cumi hmangin lawng mawngtu in a duhnak ah a fehter.

5Kaa sungih lei khal hi cumi bangtuk a si; a fate na in thuhla tum zetzet in a porh thei. Thing le hrampi ziangtluk tupi kau a si khal le meici fate in a ur kang thluh ṭheu khi ruathnik uh.

Minung hi kan ttongkam mi parah Pathian thluasuah a pe a si. Ziangah tile, kan ttongmi cu kan sunglam ih kan lungput daan le Pathian kan zum daan ih rah khal a si ruangah a si. Curuangah, ttongkam hi huham cahnak neitu a si.

Curuangah Bible ca in, minung ih lei cu kan nunnak kha suk le so lam ah a her ter ih a feh ter thei theitu a si tiah a ti. Ziangvek thawn a tahthim tile, “Lawng le Meisa” thawn a tahthiam. “Lawng” tumpi khi a suk le a so ih a her ter rerotu cu, a dunglam ih lawng hertu (hudder, Burmese pet ) fate khi a si. Meisa fate khal khi a kang ahcun, tupi khal a kang ter theh thei.

Curuangah, thluasuah a dongmi tongkam kan ttong suak theinak dingah, na harsatnak a tumzia kha ttong nawn hlah. Cuhnak in, na Pathian ziangtluk a tum timi kha ttong thok sawn aw.

David le Goliath (1 Sam 17:43ff) ih thu kan zoh tik khal ah, Goliath in David kha a hro ciamco. Tum le a tum zet ih ttih ding za zet a si. A hro daan tla cu, “David, tuisun ni ah na sa vate ka pe ding.” A zawm tai zet. Tuisun ah, kan harsatnak le kan buainak pawl khal in cuvek thotho in, nang cu to men aw. Hivek thil tha le hnatuan tha pawl hi nang in na ngah thei lo ding tiah, hi vek hnatuan pawl cu a tumtuk ih na ti thei lo ding tiah Satan in in ti theu.

Pathian ih thluasuah a pekmi pawl in hivek ih titu an neih tikah, ziangtin an sawn. David hi Pathian thluasuah a pek zetmi a si. Daivid in, “Goliath, nang in na ralnam le na cahnak na rinsan. Asinan, kei ka rinsanmi cu a nungmi Pathian a si. Tui sun rori ah, na taksa hi vate pawl ka pe ding” tiah a ti ve. Goliath ih tumnak, cahnak le awka hromi ih ciahneh a duh lo. Cuhnak in, Pathian ih thilti theinak le cahnak huham kha a thinlung sungah a ciahneh ter. Goliath hnak in Pathian a tum sawn ti a thei ringring.

Nang le kei teh, kan thinlung sungah Pathian rinsan in, kan ka rori in, ka tuah thei ding, ka dam ding, hmailam ah tih lo in ka nor ding tiah ka ti ngam maw?

Bible in na lei (tongue) ih na ttongkam cu na nunnak pi a suk lam le so lam ih mawngtu a si tiah a ti. Curuangah, na nunnak hi thlengh na duh ahcun, thanaunak ttongka (negative words) pawl ttong nawn hlah. Na tuah dingmi le na tuarmi harsatnak hnak in a tum sawnmi Pathian kha rinsan in, nehnak ttongkam pawl ttong sawn aw.