Tuisun Na Thinglamtah Na Phur Maw?

Matt 16:24-25

24. Jesuh in a dungthluntu pawl hnenah, “Zokhal keimah thlun a duhtu cu amah ih duhnak kha taan in a thinglamtah phur in i thlun seh. ²⁵Ziangah tile zokhal mah nunnak hum a duhtu cu a nunnak a sung ding; a sinain keimah ruangah a nunnak a liamtu cun a nunnak a hum ngah ding.

Tui zing cu Saya Bawi Ceu, Shalom Baptist Church, Kalaymo ih an pastor pa ih sermon tawite nganmi ka siar ih, a tlun lam Bible caang ih ti duhnak ka lung a hung fiang sin a bang. Nitin kan nunnak ah Bawipa in, kan mah le thinglamtah phur cio ding in duh. Thinglam tah timi cu Bawi Jesuh san lai ahcun, misual pawl thahnak ding le thihnak a si. Cumi cu Jesuh khal in a phur. A pai duhnak a simi misual pawl aiawh ih a pek awk ruangah a si. Jesuh khal in cui thinglamtah cu phurh a duh lo zet. Asinan, a pai vialmi a si ruangah, cui lamzin cu a mai duhnak el ta hrat in a pai duhnak a thlun. Curuangah, sunlawinak lak ih a saang bik pek a si (Fili 2:5-8).

Curuangah, Jesuh in hitin a sim: ka dung i thlun duhtu cu a thinglamtah phur seh a ti. Asullam cu, ka dung i thlun duhtu cun, a mai duhnak kha el aw seh. That seh tinak a si. Bawipaih duhmi le fialmi, tuanvo pekmi tuahnak ding hrangah, mai duh thluahthlomi nun khal suup awk le hrial a tul. Bawipaih duhmi tuahnak ah na nunnak ah vei ziat na el aw ih, na duhmi tuah ngah lo in, vei ziat na sung? Nangmai duhmi tuah ngah lo in, Bawipaih duhmi tuahnak ah na paih lo thluahthlo khal le na tikcu le thazang na pek a si ahcun, Pathian in mangbangza in a lo khaisaang ding a si.

Thinglamtah ah mai duhmi that ta lo in, sunlawinak nun thar ah thawhsal theih a si lo.

"No Cross, No Resurrection!"

Saya Bawi Ceu ih sermon mi cu:

Nun Martar

Tulai kan san ahcun Martar ih thih cu a um tuk nawn lem lo. Pathian

khalin in phuut ciamco ding cu ka zum lemlo. Ziangahtile kan Khristian

sinak tla a rei phah thlang. Asinan Nun Martar ding cu

Khristian hmuahhmuah phuut kan si ko ding.

Martar cu Fei le Nam, hngawngtan, siti kio, a har theibikih thihtiang

hremnak tuar hi a sibik.Nun Martar timi cu Fei le nam, le hremnak si nawn

lemloin "Mai' nunhremawk" a si bik. Miih hremnak siloin mah le

mah hremawk a si.Cumi hremawknak cu Pathian thu ih ruangih tuar,

duh thluahthlomi suup, hrial, caan/ sung hi a si.

Bawipai ruangih:

Kan sunmi, kan suupmi, kan hrial tento hi Nitin Nun Martar a si.

Nun thianhlimnak thawn Ti le Nga vekin an feh tlang.

Martar tu ding ahcun Pathian in hrilbik deuh a nei in a lang. Nun

Martar ding ahcun kan zaten in hril Bawipai' ruangah,

Bawipai' hrangah kan Nun veiziangzat a martar zo?

Nun Martar lamzin zawh thei cio dingin Bawipa'n lo thlawsuah cio hram seh.