Israel pawl hi kum 400 sung rori Egypt ram sungih an um tikah, an thinlung le ruahnak pawl cu Pathian thawn a hlat aw vingvo. Pathian Egypt sal sung in a luat ter theh hnu ah, ti le rawl khal tthitha ih a um lo nak ramcar lak ah, kum sawmli rori, a um ter. Lam an hlo ti le a si lo. An feh rero nan, an thleng thei lo rori si ko. Ziangruangah si pei? Pathian in ziang a zirh duh si pei?
Pathian ih a zirh duh bikmi cu a faa le pawl an thinlung zate, ruahnak zate, le thazaang zate thawn Pathian lam ih an hoi kir sal theinak dingah a si. "After 400 years of slavery, the children of Israel needed to have their hearts, souls, and minds reoriented toward God."
Pathian kha thinlung zate, ruahnak zate le thanzaang zate thawn a duhdawt duh lo tu pawl cu ramcar sungah an thi theh. Egypt ram ih suakmi lak ah, Joshua le Caleb lawng canaan ram a nung cing in a luttu an si.
Mipumsiarnak 14:26-30 sungah, Bawipa in Moses le Aaron hnenah,
“Ziangtik tiangso hi miṭha lo pawl hi ka parah an phunzai ding? An tlawhciarnak hi ka thei tamtuk zo! 28Curuangah an hnenah, ‘A nungmi Pathian ka si ih siatcam in thu ka lo kam: Ka hnenih nan dil vek cekci in nan parah ka tuah ding. Bawipa a si mi keimah in ka ṭong zo. 29Nan thi ding ih hi hramlak ahhin nan ruak pawl cu ṭhekdarh thluh an si ding. Ka parih nan phunzai ruangah nan lakih kum kul tlun minung zohman Kanaan ram nan thleng lo ding. 30Hi ram co dingah thu ka rak lo kam. Asinain Kaleb le Joshua siar lo pakhat hman nan thleng lo ding” tiah a ti.
Caan tampi ah, Pathian cu kan duhdawt kan theu nan, kan thinlung zate in a si theu lo. Kan thinlung hrek cu Satan kan pek. Kan thazaang khal a hrek cu Satan cu kan pek. A hlei in, kan ruahnak tla cu, Pathian thu ruahnak hnak in, that lo nak ruahnak ah a tam sawn kan hmang theu.
Caan tampi ah, kan tumtahmi thleng thei ding in, hmai ih kan feh rero lai ah, ziangah so Bawipa i thlen ter thlang hrih lo? Ziangah so ka lo dilmi na kim ter hrih lo tiah kan vui hram theu. Cun, kan ti theumi cu, ka tumtahmi ka thlen ahcun, na sunlawinak hrangah nasa tak in ka tuan thei ding tiah kan ti theu. Asinan, Bawipaih hrang ahcun, a thupi sawnmi cu (future) kan thlen duhnak ih kan thlen hnuah nasa tak ih a hna kan tuan ding hnak in, Atu (now) kan feh rero lai ah, kan thinlung, ruahnak, le thazaang zate in Amah lawng kan duhdawt maw timi hi a thupi sawn ih a retmi a si.
Daanpeksalnak 6:4-8
4“Maw Israel mi pawl, ṭhatein ngai uh! Bawipa Amah pakhat lawng hi kan Pathian a si. 5 Bawipa nan Pathian cu nan thinlung zate, nan nunnak zate le nan thazaang zatein nan duhdawt pei. 6Tuihsun ih ka lo pekmi thukham pawl hi nan thinlung sungah caam ringring seh. 7Nan faate pawl zirh sin uh. Inn nan um tikah siseh, lengih nan feh tikah siseh, sim ringring uh. Nan colh tik le hna nan ṭuan tik khalah saal ringring uh. 8Nan baan ah ṭem uhla, a lo theitertu dingah nan cal ah ben uh. 9Nan inn sangka tlunah le nan kotka par khalah ngan uh.
A tu na feh lai ah, na thlen tumnak cu a thupi tuk ko. Cumi na tumtahmi na thlen tikah, Pathian hrangah nasa tak in ka tuan ding tiah na tumtah ko ding. Asinan, Pathian hrangah cun, cuhnak ih thupi sawnmi cu, a tuih na feh rero lai fangah, Pathian hnak in, duhdawt sawnmi dang na nei maw? Pathian thu hnak in, a lo ciahnehtu thu na ruahnak ah a um pang maw? Pathian sunlawinak hnak in, thil dang hrangah na thazaang le tikcu na cem ternak a um lai pang maw? timi hi a thupit ter sawn mi a si.
Bawipa, nangmah lawnglawng ka lo duhdawt, nangmah thawn kan pawlkom ringring thlang ding.
Bawipa, na Bible tongkam cu ka siar duh bikmi le ka ruahnak ciah biktu ah si hram seh.
Bawipa, hnatuan i fialmi lawng tuahnak ah, ka tikcu le thazaang ka hmang thei ding in, ii bawm hram aw. Amen.
No comments:
Post a Comment