Emmaus Lamzin ah Bawi Jesuh ih a Phuanlanghawk Daan

by San No Thuan

Luke 24:13-35

Thuhmaihruai:

Pathian in a phuan awk daan phun hnin in a tlaangpi thu in an then. A pakhatnak cu, sersiammi pawl sung in, le Jesuh Khrih sung in tin an tthen. Jesuh Khrih khal in a thinlung put le Pathian ih sinak, le duhmi pawl a phuan/langh ter daan tampi a um. Cumi pawl sung in, hi tawk ahcun, Emmaus khua lamzin tluan ah Jesuh ih a phuan awk daan hi phun thum in sim ka duh. Emmaus khua cu Jerusalem in peng 7 a hlat (Luke 24:13). Jesuh a thih ih nithumnak zing ah, Emmaus khua ih a fehtu pahnih hmin cu Kleopas le a rual pa ti a si (Luke 24:18).

1. Beidong pawl thawn a feh tlaang ringringtu Bawi Jesuh a si.

“15Cutiin an tong ih an relkhawm rero laiah cun Jesuh amah rori in a hun fuuk hai ih an feh tlang. Amah cu an hmu nain an thei thiam lo. 17Jesuh in an hnenah, “Nan feh phah ah ziang thu so nan rel rero?” tiah a sut.” Luke 24:15-17

Pakhatnak ah, thihnak neh ih a thosaltu Bawi Jesuh cu kan mit in kan hmu lo nan, kan hnen ah in um pi ringring (Luke 24:15-17). Emmaus lam zin ah Jesuh ih thusim ngai duh ah a dung a rak thluntu mi pahnih an feh. An feh lai ah an thin a har, an mang a bang ziangah tile, Rom cozah kut in in runtu ding Profet thar kan nei tiah an rak ruat. Asinan, Jesuh cu thah a si tikah, an bei a dong. An ruahsannak a cem. Cumi lai ah, Jesuh an hnen ah a phuang aw nan, zo a si ti an mit a van ter duh lo.

Caan tampi ah Emmaus lam ih a fehtu te pahnih bang in, kan thinlung a har caan, kan bei a dong caan, ruahsannak ka nei nawn lo tiah kan ti caan tampi a um ding. Cumi lai ah, kan hmuh thei lomi, thihnak neh in a tho zotu Jesuh Khrih kan hnen ah a feh ringring timi kan cing ringring pei uh. A nungmi Bawi Jesuh cun, nangmah in a mah pan na thiam lo lai caan khal ah Amah in a lo naih ih a lo pan ringringtu, a lo fehpi ringringtu a si.

Bawipa in in bia ringring nan, thil dang “aw” (voice) lawnglawng kan hna sungah kan luh ter theu. Caan khat te la in, Bawipa ziang I sim duh ti in, Bawipa thawn pawlkom awknak nei aw. Bawipa ih umpinak le a aw na thinlung sungah a fiang ding. Thlacamnak thawn na thinharnak kha ap aw la, na hna a lo ngam ter ding ih, thil mangbang za tla na ruahbanmi ih leeng ah a lo hmu/theih ter ding (Jer 33:3).

2. Sunlawinak sungah lut dingah, tuarnak a um ta a tul timi hi a fehpimi lamzin a si.

25Cule Jesuh cun an hnenah, “Nannih hi nan va aa so! Profet pawlih an rak sim ciami nan va zum har lawmmam so! 26Messiah hrangah hi thil pawl hmuah- hmuah hi a tuarta theh hnuah a sunlawinak sungih luh ding cu a tul lo maw si?” tiah a ti. 27Cule Jesuh in Ca Thianghlim sung Moses cauk pawl ihsin thokin profet pawlih nganmi tiang, amah ih thu an ngannak hmuahhmuah kha an hnenah a simfiang. (Luke 24:25-27).

Pathian hmaikaa ih mi-aa pawl hi zo an si? (Luke 24:25). Pathian ih mi-aa a timi pawl cu, Bible ih simmi Pathian ih thu a zum thei lo pawl an si. Emmaus lam ih a feh rerotu pahnih te kha Jesuh ih, Messiah cu harsat thihnak a tuar ding ih, sunlawinak pek a si ding tiah a simmi pawl kha an zum thei lo ti a hmu tikah, “Nan va aa lawm lam so! Profet pawl ih simmi hi nan va zum har so” tiah a ti. Nangteh cuih lamzin cu na lamzin a si ve maw?

Tuisun ah, Jesuh in thu in tiam kammi tampi a um. A thusimmi tampi a um: a kumkhua in ka lo umpi ringring ding (Mtt 28:20f), dil uh nan ngah ding (Mtt 7:7f), keimah I zumtu pawl cu thi khal hngai sehla, an nung ding (John 11:25), hi thisen cu nan sual kholhfainak hrang ih ka thletmi thi a si (Mtt 26:28), thilrit a phurmi pawl ka hnen ah ra uh . . . colhdamnak ka lo pe ding (Matt 11:28) tvp., a zum thei lo tu pawl kha Jesuh in, mi-aa in ti a si. Kan zum thei lo deuhdeuh le, Pathian hmaika ah mi-aa kan si deuhdeuh tinak a si. Zum timi cu thlun ngam kha a si. Na zummi Jesuh dung na thlun ngam lo deuhdeuh ih, Thlarau Thianghlim sim zirhnak na ngai duh lo deuhdeuh tikah, atnak lamzin ah na feh thok thlang tinak a si.

Mi-aa cun, a thinlung sungah Pathian a um lo tiah a ti (Ps 14:1). Pathian in leile van a sersiam (Gen 1:1) ti sim na cing ih Pathian a um le um lo tla zum duh lo tu an um tampi. Cupawl cu mi-aa tiah Bible in a simmi pawl an si (Saam 14:1). Ziangah tile, an thinlung ah Pathian a um lo tiah an zum ih, zohman tih a tul lo, duhduh in kan nung thei tiah an ti ih, an nung. Mi-aa na si maw?

Cumi lak ah Jesuh thusimmi kan kaa cun kan zum nan, kan thinlung in kan tuah theu lomi cu: “tuarnak a um hnu ah, sunlawinak a ra” (Luke 24:26) tihi a si. Himi kan kekar daan si ve seh. Tulai ah minung tampi in nomnak le duhduh ih umnak in an nunnak hram an thok theu. Sumpai an neihmi khal a tulmi tuahnak ah hmang lo in, an duhmi ah an hmang an hmang ih thil tulmi tuah ding a um a sile, zianghman hman tlak lo ah an cang. Sunlawinak le nun diriamnak taktak cu Bawipaih duhmi tuahnak tuahnak ah tuar ngamnak in a ra.

Saam 16:11

Nangmah in nunnak lamzin cu i hmuh ding; Na umnak ah lungawinak a kim ih, Na ban thacak ah nomnak kumkhua in a um.

3. Midang zawnruahnak a neitu pawl hnenah anungmi Jesuh a sinak a langh ter.

28An feh tumnak khua an thlen zik zawng ah Jesuh cu a feh hrih ding vekin a um awter. 29Asinain annih in, “Kan hnenah riak ve ko aw! Khua a tlai zo ih a thim thlang fawn,” tiah an kai. Curuangah an hnen riak dingin a thlun. 30An hnenah cun a to ih rawl an hil tlang. sang a laak ih thla a cam hnuah a phel ih a zem hai. 31Cutikah an mit a hung vaang ih Amah a si kha an thei thiam; a sinain an mithmuh ah a hlo sal. Luke 24:28-31

Pathumnak ah, midang zawnruahnak a neitu pawl in Pathian ih sunlawinak le umpinak an hmu fiang (Luke 24:28-31). Emmaus khua an thlen tikah, Jesuh cu khua dang ih feh hrih ding vek in a um. Ziangah cutin a um si pei? Jesuh in zawnruahnak lung an nei maw nei lo ti a hniksaknak a si. Zawnruahnak nei hlah hngai sehla, mikhual an timi pa kha an sawm lo ding ih, an mit khal Pathian in a van ter lo ding ih, Jesuh khal an hmu ngah lo ding.  Cutikah, cute pahnih cun, khua a tlai zo, kan hnen ah riak ve ta aw tiah an ti. Cutikah, Jesuh cun, midang zawnruahnak thinlung neitu pahnih hnen ah a caam ta. Rawl an ei tlaang ih, Jesuh in sang a phel. Culai fangah, an mit a van ter ih, Jesuh a si zia kha a phuang aw. Pathian thawn tong aw in, a lungawinak, thatnak le thluasuah co na duh ahcun, midang zawnruahnak nei ringring aw.

Tuisun khal ah, midang zawnruahnak a neitu pawl ih hnen ah kan Pathian, thihnak ih a neh lo Bawi Jesuh Khrih ih sunlawinak a simi: nun diriamnak, lungawinak, le hnangamnak pawl Jesuh ih a co ter ve a si. Cuih tlunah, midang khal in, an nun ah Jesuh ih sunlawinak, mawinak le duh a nunnak pawl an hmu a si. Philadephia ah midum pahnih te kha bus an to rero lai ah, putar le pitar te an rung lut. Midum pahnih te cu an ding lohli ih, tonak an pek. Cumi ka hmuh tikah, ka thinlung a diriam tuk. Ziangah tile, an nun ah Jesuh ih nun bangtuk, midang zawnruah thiamnak nun ka hmu a si.

Vei khat ah Everest tlangpar kai ding in rualvah pathum cu an sawm aw ih, an kai. A sang deuhdeuh an thlen tikah, a dai tuk ih a kut le an hnar tivek tla khi a khal theh. An rualpa pakhat cu a na ciamco. Himi kan tuam hlawm le cu kan zate in kan thi theh ding ih kan thlen duhnak khal kan thleng thei lo ding tin a rualpa in a sim. Culai ah, a rualpa pakhat cun kei cu kan rual amah lawng ka taansan thei lo tiah a ti. Pakhat deuh cu na duh le hngak aw, kei cu ka rak feh sung ding tiah a ti ih, a feh. Asinan, a mah lawng a khua sik thawn a bah ih kham lak ah a tla that. Culai ah, rualvah pahnih cu a pawk aw, an dir aw, an feh tlang vingvo ih, neta bik ah, harsa bawmcu helicopter in a ra hmu ngah ih a run hngai. Midang harsatnak zawn a ruat ih, a bawmtu cu Pathian thluasuah lamdang zet in an dong theu ti a fiang.

Jesuh Khrih ih tuihsun ah si ter in duhmi cu midang hrangah cite bang ih al ding hi in duhmi a si. Ka duh zetmi tongkam te pakhat cu, “Preach the gospel in the church, live the gospel in the world.” Jesuh thu kha biakinn ah sim aw la, Jesuh bang in midang hrangah nung aw.

Thunetnak

Emmaus khua zin ah Bawi Jesuh in thihnak ih a thawhsal hnu ah a nung taktak a si timi a phuan langhawk daan cu:

1. Thinhar beidongmi pawl taansan dah lo ih, a umpi ringringtu a si.
2. Sunlawinak sungih lut dingah tuarnak lamzin a zawhtu a si. Cumi lamzin cu Messiah ih lamzin a si ti a zum lo tu pawl cu “Nan va aa so!” tiah a timi pawl an si.
3. Midang zawnruahnak a neitu pawl ih hnenah, lamdang zet in a nungmi Jesuh ih sinak kha a langh ter ih, a thuanthu khal Amah Jesuh bang in thi thei nawn lo in a nun ter ve. Cun, a sunlawinak a hmuh ter ih, a lungawi hnangamnak a co tertu a si.