Dear Zate'n,
Nunau pastor ti kherkher siloin, nunau Pathian hnat'uan tu le thusimtu thu ah fiangnak ka ngah mi ka rak ngan ve.
Nunau Pathian thusim ding thuhla hi napin khua ka ruat dah, cule ka thinlung sung ah, Kan Pathian hrangah nunau le mipa hi a hnat'uan tu hrangah cun a danglam tuk lo ding ti ka hmu suak. Himi ruahnak ka ngah dan tawite'n simfiangnak ka nei ding.
Kan Kawhhran ah Pastor Brian timi in thu a ra sim. A simmi pakhat ka thei ringring lai mi cu, "Jesuh khrih le Paul ih simmi a bangaw lo tikah, Jesuh ih simmi kan pom sawn," a ti. A sim lai ahcu cuvek teh kan Baibal sungah a um ngaingai maw si, tiin ka rak ruat.
Asinan, Paul in nunau cu, 'cutin khatin umseh' tiih a ti mi le Johan. 4 sung ih kan Bawipa Zisu le Samaria nunau nu thu hi ka siar tikah, Pastor Brian ih simmi hi, himi teh a si pei maw? tiin ka ruat nasa. Johan 4 sungah Jesuh le Samaria nunau nu an biak awk theh hnu ah Jesuh in Messiah a si thu a phuang. (4:26). Cutikah nunau nu cu khawsung ah a feh ih mi senpi hnenah a hmuhton mi thuhla a va sim. Rundamtu Zisu Khrih ih thuthangtha cu misenpi hnen ah a phuang tinak a si. Cutiih nunau nu ih a sim mi ruangah khawsung ih a ummi Samaria mi tampi in Jesuh cu an zum. (4:39).
Curuangah, Bawi Zisu Khrih a cotu, a hmu ngah tu, a tong tu cu, nunau siseh, mipa siseh an um men thei lo ih an hmuhmi le an theihmi an phuangsuak ringring sawn a si. Cucu, tulai t'ong in Pathian hnat'uan, Pathian rawngbawl kan tiih a t'uanvo hrangah dinhmun phunphun kan pek men khi a si.
Cule, Mari Magdalene hnen ih Jesuh a langnak kha hitin a si. (Johan. 20:11 ihsin)
A thok ah Mari in Jesuh cu a theithiam lo. Asinan, a mah Jesuh rori in Mari hnenah a phuangaw sawn ih Pa Pathian hnenih a feh ding thu kha dungthluntu pawl hnen ah va sim dingah a fial a si. Jesuh Khrih thihnak ihsin a thosal timi thuthangttha phuang hmaisabik tu cu nunau a si. Nunau rawngbawltu kan ti lala men pei cu. Kan Bawipa Jesuh Khrih thihnak ihsin a thosal timi cu thuthangtha lakih thuthangtha bik a si. Curuangah, nunau thuthangt'ha phuang a sian ahcu, hnat'uan dang pawl khal a sianglo nak ding san a um lo in ka ruat.
Cule, nunau le mipa kan timi hi kanmah milai pawl hrangih tuahmi men a rak si caan a um ding. Amah Pathian hrangah nunau le mipa a danglamnak a um lo ding. Ziangahtile, Thu. (19: 5) sungah Tuufa Nupi Thit Puai timi kan siar thei. San a cem tikah zumtu kan zate'n Jesuh nupi thitpuai ah kan tel thluh ding. Cuhrangah, Moneitu a rat tikah leitlun ih ummi zumtu pawl, nunau khal, mipa khal, kan zate'n "monu" kan si thluh leh ding.
Nan zate'n Pathian thlausuah,
-Kunglal
No comments:
Post a Comment