Nupi Tha Thum or Nu Sunglawi?

A Woman of Excellence

Thufim 31:10-31

Thuhmaihruai:

Bible sungih Thufim (proverbs) vek lei tlun cabu ah thufim tampi a um. Asinan, Bible sung Thufim ih a danlamnak thu cu “Pathian tihzah aw” timi hi a si ih, thufim dang ah cuvek a tel cih lo.[1] Hi Bible Thufim sung ih nun daan pawl hi Pathian tihzahnak ih rah an si. Hi Thufimpawl hi a tam sawn cu Pathian in Siangpahrang Solomon hnen ah fimnak a pek ih, Solomon in a fapa (Rehoboam a si thei) nun a sim zirhnak a si.[2] Curuangah, tuih sun ah, hi thufim pawl hi a sangbik Siangpahrang Pathian ih fanu le fapapawl a simi kan zate theih dingah le thlun ding thazetmi an si.

Hi tawk Thufim 31:10-30 tiang ih a simmi hi nunau hrang lawngah si lo in, mipa hrang khal ah a si thiamthiam. Nunau hman in hi tluk an si dingah cun, mipa sinsin cu hi hnak in ke kar khat kar sinsin ding kan si timi hi thazang kan laknak ah cang hram seh. Cuih tlun ah, mino pawl in hi cu nupi nu le pacang pa hrangah a si tiah kan ti pang lo ding a thupi. Psychologist pawl in nu tha/pa tha si dingah cun, kum 20 sung na tha/pa tha ih ziaza kha zuam zet ih na nunpi a tul. Culawngah cuvek nun pawl cu na ziaza ah a cang cih ding tiah an sim.

1. Lei tlunmi pawl ih an uarmi le an dawtmi nunau cu zovek an si?

Mihrek cun hmel mawi, iang nei zet pawl an uar. Mihrek in sumpai tampi nei pawl an uar fawn. Mihrek in mihmai ih lar zet pawl, hlasak thiam, hnipuan hruk daan khal ah hot ih hot pawl khi a si theu. Mihrek in fimthiamnak sang nei an uar. Nangteh na uarmi le na dawtmi nunau pawl hi zovekpawl an si?

2.   Bible ih a uarmi, Rinsan le Upat Tlak Ziaza Neitu Nu (A woman of Noble character) tiah a timi pawl hi zovek an si ih, ziangvek ziaza nei pawl an si? Thufim 31:10-31 sungah kan hmuhmi kan zoh hnik pei.

1.     Rinsan a tlak zet (Thu. 31:10-12)

                                               i.     Nupi thathum:  (Mirang: noble, virtuous, honorable, worthy) ziaza lam ah cawn tlakmi nu tinak a si (c. 10).

                                             ii.     Rinsantlakmi sinak: Hna a tuanmi in a pasal kha nehsawh a tum lo (c. 11).

                                            iii.     Pumpekawknak: A hnatuanmi hi a pasal par ih thiltha thlen ter ding lawngah a tum (c. 12).

                                            iv.     Pa-fa ih rinsan tlakmi nu cu hmun hla ih um caan khal ah a pasal in a rinsan. A pasal le a fale pawl riahsiatnak ding thil tha lo tuah ding a tum in a tum lo tinak a si.

2.     Hnatuan a taima zet (Thu. 31:13-16).

                                               i.     Umlak ti nei lo in tuuhmul le patzaai puan a tak (c. 13). Sim duhmi cu hnatuanmi si hi a upat. To men, um huahhi men duhmi nu a si lo.

                                             ii.     Lam hlatpi in ti rawl a rak phur (c. 14). Dawr a fehnak in tirawl pawl a tlunpi.

                                            iii.     Zing khuavang hlan in a tho (c. 15).  Ziang a tuah? Innsang pawl rawl a suan sak (c. 15a). Rawlsuan le rawl timtuah a zaangzel lo.

                                            iv.     Leiram a hawl, a lei ih cabit kung a cing (c. 16). Sum hawl daan (business mind) a thiam ih, hnatuan a zuam tinak a si.

Vei khat fala nu in a nu pakaan pawl a kholh lai a zoh ih, thu a ruat. Ka nu hi vei ziat cawk hivek a tuah ti pawl a ruat ih, “Ka nu, hivek pakaan kholh tivek pawl hi na hne lo maw si?” tiah a ti. A nu in, “Kei pakaan ka kholh men a si lo, ka inn ka sak rero a si” tiah a sim. Thufim 14:1 sungah, “Nunau fim in an inn an sak ih, nunau aa pawl in a maih kut lala in an balsiat” ti a um. Nufim cun, an taimaknak san cu an inn sungsang tha te ih sak an duh ruangah a si.

3.     Taksa cahnak le ziaza lam felfainak (c. 17-19)

                                               i.     Taksa lam cahnak: Hnatuan a taima zet, a tha khal a cak (c. 17)

                                             ii.     Ziaza lam cahnak: Thil a tuahmi pawl kha man a neihzia a thei (c. 18-19). Ziangtluk in innsang kan tthanso ter/ttumsuk ter thei ti a thei.

                                            iii.     Emerson (American cangan thiam mifim) cun, “Minung pawl hi an hringtu nu ih hruai daan bang in an cang.”

                                            iv.     Nu fel cun a nun daan in a faale ih ziaza le lungput tha neitu ah a hruai.

4.     A siang zet (c. 20)

                                               i.     Mi farah le mi nunhar hnen ah a tirh a siang zet.

                                             ii.     A hnatuanmi pawl hi a maih hrang men ah a si lo. Midang tundinnak hrangah a si ti a langh ter.

5.     Innsang hrang a ruat zet (cc. 21-22)

                                               i.     An sungtein buuhlum zet in a ret (c. 21a)

                                             ii.     An sungte hrang tumtahnak a nei cia (c. 21b)

                                            iii.     Mawi zet ih a thuam aw (c. 22)

6.     Pasal a cawisang (c. 23, 24)

                                               i.     A pasal kha khua tlang ih upatmi si ding in a bawm. Her husband is respected at the city gate (khua tlaang ih upatmi) (c. 23).

                                             ii.     A hnatuanmi pawl hi a pasal ih kaihhruainak hlawhtling thei ding in a bawm. A upat ih a tung ding.  

7.     Sumsaw let a thiam (c. 24, 16)

                                               i.     Innsang sumsaw a karh ter (c. 24). A pasal ih hlawhmi lawng a ring lo. An innsang sumpai thangso ko a rak tawlrel ve.

                                             ii.     Pasal kut lawng zohtu pawl hi Bible in a dik a ti lo.

8.     Ziaza lam ah felfai zet in a um (cc. 25-27).

                                               i.     A thazang a cak (c. 25a)

                                             ii.     An upat zet (c. 25b)

                                            iii.     Hmailam hrang a thinphang lo/a lungawi (c. 25c).

                                            iv.     Fimkhur zet (c. 26)

                                             v.     Awka neem ten a tong (c. 26b)

                                            vi.     Innsang thu a tawlrel (manager hna a tuan) (c. 27). A zaangzel lo (c. 13, 27b).

9.     Tihzah upatmi a si (cc. 28-31)

                                               i.     A fale pawl in an thangthat zet (c. 28)

                                             ii.     A pasal khal in a lawmzet. An pa in, nu hmuahhmuah cu an tha ko nan, nang cu na tha hleice tiah a ti. (c. 28-29)

10.  Tihzah upat tlak a sinak ih thuthup (cc. 28-31).

                                               i.     An mawinak, fimthiamnak, le neihnak hi Bible ca in nunau pawl ih sunlawinak a ti hrimhrim lo (c. 28). Ziangahtile, iang neih le mawinak cu a rei hlan ah an ziam lohli thei tiah a sim.

                                             ii.     Pathian an tihzahmi lungput le ziaza khi a si tiah a ti sawn (c. 30).

                                            iii.     Tong dan cun, Khrih ih ziaza thawn bang aw in ke a kartu pawl cu sunlawih upat tlak an si a tinak a si. Cuih Khrih ziaza nei dingah:

1.     Pathian thawn nitin Thlacamnak le Bible siarnak in pawlkomawk a tul. Culawngah kan thinlung cu Pathian ih thu in in hruai thei ding (Kol 3:10,16).

2.     Na tuahmi tinkim kha Jesuh ih hmin lawng in tuah aw (Kol 3:17). “Jesuh hmin in thil tuah” timi ih sullam cu (a) Jesuh aiawhtu ka ti timi thei ringring in thil tuah aw (b) Jesuh ih sunlawinak hrangah ziangkim tuah aw. Midang in kanmah in sunlawi ter ding in si lo in, Jesuh ih hnen ih lungawi thu an sim in amah an duhdawt theinak dingah, ziangkim tuah aw.

                                            iv.     Pathian khuazing a tihzah tu cu a fim ding ih, a tlun ih simmi ziaza pawl hmuahhmuah khal neih theinak Pathian in a pe ding a si timi hi Thufim cauk ih simduhmi khal a si. Ziangah tile, Pathian tihzah cu fimnak ih hramthoknak a si ruangah a si (Thufim 3:7).

Thunetnak:

Thufim hi Siangpahrang faalepawl ih nun daan ding ih zirhmi thu a si. Nang le kei cu Pathian a saangbik Siangpahrang ih faa kan si ruangah, Pathian in Solomon le mifim dangdang hmang in in zirhmi thu pawl an si. Cumi pawl sungah, Thufim 31:10-31 sungih in zirhmi nunau sunglawi tiah a timi pawl cu:

1.     Rinsan tlalmi a si.

2.     Hnatuan taimi mi a si.

3.     Taksa le ziaza dam cahnak neitu a si.

4.     A tirhsiangmi a si.

5.     Innsang ruattu a si.

6.     Pasal cawisangtu a si.

7.     Sumaw hawl thiamtu a si.

8.     Ziaza ah felfai zettu a si.

9.     Midang ih thangthat comi a si.

10.  Leenglam mawinak hnak in sunglam mawinak a simi Pathian tihzahtu, ziangkim ah Bawi Jesuh aiawh in, Pathian sunlawinak hrangah cangvaitu a si.

---

[1] John F. Walvoord and Roy B. Zuck, The Bible Knowledge Commentary: OT (99), 906.

[2] Tom Fry, The King’s Family Altar (2012), 3.