Kum a Liam ih a Thlum Sinmi Nunnak Nei Dingah

1.   Tukfornak pawl ralring aw.

Minung hi zokhal kan thuanthu kan ngan rero a si ih, mi hrek khat cu a senlai ah duh a nung tuk, a tlangval falat lai ah rinsan a um tuk nan, a hung upa deuhdeuh ih a hlotlau. Zu le sa ah, nunau le mipatnak lam ah, paisa lam ah ti in an hmin a sia ih, an thuanthu mawi lo zet in a cem ta.

David Siangpahrang Bawipa khi Pathian in tuukhaltu in Siangpahrang dinhmun ah a cawisang ih an ram ih an tihbikmi Philistine ral Bawi Goliath khal a neh ter. Asinan, tukforhnak ralring lo in, Uriah ih nupi a sualpi ih, an pa tiang a thah sak. Zohman in an thei lo. Asinan, Pathian in nun a sim ciamco ih, Uriah nupi thawn an neihmi a thih ter, cun, a fapa rori in a pa that ding in hramlak ah a dawi ih, a paih nupi pawl khal a sualpi ciamco.

Asinan, Saam 32:3-5 sungah, David in Pathian hnen ah ngaithiamnak a dil sak tikah, Pathian in a ngaithiam theh sal ti kan hmu.

David cu Judah Siangpahrang lak ah an sunloih bikmi a si nan, a nunnak ah Uriah ih nupi a laksakmi in a thuanthu baal ko a tuah. A poi zet. Curuangah, kum a liamsin ih a thlummi nunnak le thuanthu mawite ngantu kan si cio theinak dingah, tukfornak pawl hi ralring thiam uh si ziangahtile Satan cu kiosa bang in kanmah tukforh ding le thlu dingah a hukrak a si (1 Peter 5:8).

2. Khrih hnen ah na pum pe aw.

Tukforhnak hi kan ralring zet theu nan, ralrin cawk le el thei cawk a si lo theu. Nupa (couple) pawl hi ziangruangah fala le tlangval dang an hmuh khal le an tlubah lo in, an ralring thei si pei? An ralrin theinak bik thu cu, a duhdawt bikmi a nupi/pasal ih ta ka si zo ruangah, a hnen lawngah ka pum le nunnak ka pe aw a si tiih pumpekawknak an neihnak ruangah a si.

Cuvek thiamthiam in zumtu pawl khal Satan in in thlem tikah, kan neh theinak dingah kei cu Jesuh ih thisen ih leizomi ka si (1 Kor 6:20) ih, Jesuh ih ta ka si zo. A hnen lawngah ka pum le nunnak ka pe aw zo a si tiah Khrih hnen lawngah pum kan pek awk a tul.

Saam 1:2-3 – Bawipa ih Daan thlun cu a lungawinak a si; cuih Daan cu a sunzan in a ruat . . . Amah cu tiva kapih a khomi thingkung, a tikcu ih a rahmi le a hnah tla a vuai dah lomi bangtuk a si. A tuahmi kip ah a hlawhtling.

Hi tawk Bible caang ih in sawmmi cu, Bawipaih Daan thlunnak ah khan nun diriamnak le lungawinak a hawltu cu a vuai dahlomi thingkung bang in an thangso vingvo ding a si tiah in sim. Curuangah, David in, Saam 37:25 - “Ka no lai ihsin, a tu ka tar tiang, Pathian a tihzahtu ih fa le pawl rawldil in an toihvah ka hmu dah lo” tiah a sim fawn.

Thufim 10:9  sung khal ah, – “Miding pawl cu an himdam ih hnangamte in an um; asinanin midinglo pawl cu mi in an thei ngah ding.”

Jesuh ih ta ka si ti thei in, a hnen ih pum a pe aw tu cu himdam te in an um ringring ding ih, anmah te in zohman in kham theih lo in an thangso vingvo dingih, thingkung bang in an upa deuhdeuh tikah, rah le par tha an hung tlai deuhdeuh ding a si.

3. Pathian hnenah ziangkim ap mei aw.

      Mi hrek khat in an kum upa deuhdeuh ih ka thihnak tla a nai cuahco tivek in an ruat ih, an thirual pakhat a thih le keimaih caan a si thlang ding tivek in an um ih an thin a phang ciamco theu. Culole, mihrek khat cu ka nunnak hi harsatnak a tam tuk aw, ka hmailam ka zoh ah le, ruahsan ding ka nei nawn lo ti in, beidong le riahsia in an um. Bible ca in beidong riahsia in kan hmailam thu ah kan um lo ding hi in duh nasa.

Matt. 6:31-34 “Ei in ding le sinfen ding tla khui in so ka ngah ding, ti in donhar in um hlah uh. Hi pawl cu Pathian thei lo khawvel pawl ih an helhkam ringringmi an si. Vancung ih a ummi nan Pa in hi thil pawl nan tulzia cu a thei a si. Cuhnak in Pathian uknak le a felnak hawl hmaisa sawn uhla thil dang hmuahmuah cu a lo pe beet ding a si. Curuangah thaisun hrangah donhar in um hlah uh; thaisun in donharnak amah tawk in a nei ve ding. Ni ni khat ih a phurhmi harsatnak thlunah a dang beetcih ding a si lo” tiah Jesuh in in sim.

Pathian hnen sawn ah kan thinharnak le hmailam hrangih kan khuaruah harnak pawl hi ap sawn aw. Na thin a har tikah nangmah lawng in tuar hlah. Pathian hnen sawn ah hlan sawn aw. Pathian kha tuanvo lak ter sawn aw.

Minung tampi in ka thih le teh vanram ka kai pei maw tiah khuaruah khal in a umpi an um. Mi vek in le biaknak lam ah ka zuam aw thei lo, ka nun daan le a tha lo hiti cun, vanram teh ka kai pei maw ti ruat in an thin a bang. Cuvek na si ahcun, Jesuh hi ti in in sim.

Matt. 11:28 sungah Jesuh in, “Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding. Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding. Ziangahtile keiih kawn phurh cu a nuam ih ka thil khal a zaang a si” tiah a ti.

Bawi Jesuh in himi ah thu pathum in sim: Ra uh. Felnak le thatnak in sual ngaithiamnak ngah tum hlah. Sualnak huham ihsin runsuahnak, le taksa thinlung thlarau damnak cu Amah Jesuh hnen ah ra in an zum le rinsannak in a si. Jesuh ih thisen in ka sualnak I kholhfai zo ti zum aw. Sualnak huham cahnak in I runsuak zo ih, ka taksa, thinlung le thlarau damnak cu Jesuh in I pe theitu a si ti zum aw. Na zum ahcun, na hmailam hrang thinphan um lo in, colhdamnak na ngah ding. Cuih colhdamnak cu tongdang in Pathian thawn remdaihnak (Rom 5:1) a si.

      Jesuh ih in tuah sakmi thuthangtha zum menmen lawng hi Jesuh in tawk a ti lo. Ka kawn hi Phurhnik uh tiah in fial. Cumi ih sim duhmi cu kan nunnak kha a hnen ah ap aw in, a thungai ding hi in fialmi a si. A dungthluntu si ding in fial. A dungthluntu a simi pawl khal colhdamnak nan ngah ding a ti thotho. Hi tawk ih a timi colhdamnak cu Pathian ih hnangam daihnak (Fili 4:6-8) a sim duhnak a si.

A pathumnak ah Jesuh in in fialmi cu Ka hnen in zir uh tiah in fial. Asim duhmi cu Jesuh ih thu tam deuhdeuh kan theih tikah, kan sinak le kan nun daan ding kan thei aw deuhdeuh. Jesuh sinak kan theih deuhdeuh tikah, amah kan rinsan ngam deuhdeuh, nun daan khal kan thiam deuhdeuh ih lungawi hnangamnak khal kan nei deuhdeuh.

4. Midang hrangah Khrih hmin (Khrih aiawh) in nung aw.

      Pathian in a fa le pawl nun ter in duh daan cu midang hrangah cite bang in al uh tiah in fial. Meisa bang in fehnak a hmu lo pawl hmu ding in na tleunak kha vaan ter uh tiah in fial (Matt. 5:13, 14). Lei tlun ah nun thluasuak bik pawl cu midang hrangah Amah Jesuh aiawh in a va bawmtu, a va zaangfahtu, an zawn a va ruattu le a nunnak a tung dingtu kan si ahcun, kum a liam ih a thlun sinmi nunnak neitu kan si ding.

___________________

San No Thuan

Sermon on April 6, 2013 on the Birthday of Dr. Za Hlei Thang

Frederick, MD