Sual Ngaithiam Dil Cingcing ih Sual Cingcingmi Nunnak in Ziangtin Ka Luat Thei Ding?

San No Thuan

April 17, 2013

Ka duhdawtmi ….., 

Thusuhnak: Pastor pa, "Sual ngaithiam dil cingcing ih sual cingcing" tihi Christian nun ih minung tampi ih buaimi a si. Ziangtin cumi nun in kan luat thei pei? 

Thulehnak: Tu na buaimi hi kei tla ka rak buai ve tuk. Keimah le mah tla ka hua awk tuk theu. Himi sung in luatnak ka hawlnak hi kum 15 lai a si thlang. 

Ka hmuh suakmi cu - Jesuh thawn kan pawlkomawknak a maltuk ruangah ka duhmi ka tuah thei lo ih, ka duh lomi ka tuah ringring ti ka thei thlang (John 15:5). 

Jesuh thawn pawlkom awk daan cu: 

1. Bible siar aw. Na siarmi kha ruat awla, cing ringring aw. Thazaang na ngahmi kha ca khal ah ngan khum aw. 

2. Thlacam aw. Ni khat veithum tal thlacamnak thawn Pathian thawn pawlkom aw (Zing, Sun, Zaanlam)

3. Zumtu pawl umnak: Khawmnak, Bible Study tuahnak, Thlacamnak ah tel aw.

Cuti in na tuah ahcun, vei khat te in na duhmi cu na tuah thei lo ding nan, nuam tete in lamzin dik ah na feh thei ding. 

Example 1. thingfa te khi na phun tikah, tidai na toih. Cutikah a nung ih nuam tete in a tthang. Cuvek in, Pathian thu (tidai) thawn na thlarau (thingkung) kha ti na toih le na tthangso sinsin ding. A rei deuhdeuh ding ih, na tthangso deuhdeuh ding (Saam 1:1-3). 

Example 2. Zarh khat ah vei khat lawng rawl ei aw, na cak lo ding, tha na nei lo ding ih, na duhmi na tuah thei lo ding. Na paih lo khal le na to lole na it ringring a tul ding. Cuvek in, Thlarau lam khal ah Bible siar nun, Thlacamnak nun, zumtu pawl thawn pawlkomawknak na neih tam lo ahcun na thazaang a cak thei lo ding. Ni khat ah vei thum rawl na ei ahcun, thlarau lam khal ah vei thum thlacam aw, Bible siar ve aw. 

Ziangruangah Bible siar, thlacam, le zumtu pawl thawn pawlkomawk hi a thupi? 

1. Minung cu na ruahmi le five senses pawl: na mit, na ka, na hnar, na lei, na taksa pawl thawn na contactmi thu pawl in na thinlung le na tuahsernak (action) a lo control ding. 

2. Thil tha lo thawn nan contact awk tam le, na nunnak cu thil tha lo lam ah na thleng ding. 

3. Pathian thu na siar ih, thlacamnak na neih ahcun na thinlung le ruahnak cu Pathian thu in a lo ciah ding ih, a lo thiangfai ter ding ih na duhmi na tuah thei ding. 

Vei tampi ah sualnak na tuah lala pang tikah, ka bible siar le thlacam a mal tuk lai tinak thei awla, Bible siar tam sin aw, thlacam tam sin aw. 

Example: Boxing an thawngawk tikah, vei ziat an thong ngah ih a let a ril timi hnak in, a thosal lohli thei maw timi hi a thupi sawn. Cuvek in sualnak na tuah pang tikah, cumi cu Satan in a lo thongril ngah tinak a si ih, tho awla, Pathian hnen ah ngaithiam dil sal in hmai ah feh aw. Pathian cun na sualnak pawl a lo hminsin sak lo (Rom 4:7-8). Cuhnak in Pathian ih zoh a duhmi cu na tluk theh hnu ah Amah Pathian ih duhdawtnak le sual ngaithiamnak rinsan in na ding thei sal maw timi hi a zoh duhmi a si. Na sualnak hnak in Pathian ih a lo duhdawtnak a tum sawn timi thei ringring aw, a hnen ah a rang thei tawk in kir aw. A hnen ih a kirtu pawl Pathian in Chance a pek sal ringring (Jonah 3:2). E.g. Fapa tlaan hlo le Jonah.