KHRISTIAN PAWLKOM HRUAITU AH TELH LO DING MILAI PAWL


by T.J. Addington

Mi zapi ten Khrihfa kaihhruai awknak sungah telh ci an si lo; mizapi ten hruaitu sinak an neih lo vekin telh lo dingpawl hruaitu lakah telh tikah a kum teltel in pawlkom sungah buainak le harsatnak an thlenter theu asi.

Mi pakhatkhat cu khrihfa pawlkom sungah telh cu a awlte men ding nan hlawn leh a harsa zet theu asi.

Curuangah zovek milai pawl hi khrihfa pawlkom kaihruaitu lakah telhlo a tha?

1.     Bulpak tuah duhmi neitu pawl:

 Kawhhran pawlkom kaihruaitu upa pawl cu mi pakhat si loin a burin kaihhruai theu asi tikah bulpak si loin a bur in Pathian duhnak hawl tlang, riantlang, in mipi rian asi. Bulpak duhmi tuansuahnak asilo ih mibur in Pathian duhnak hawl tlang, rian tlangnak asi sawn. Cuvek lailak ah bulpak tuah duhmi tumrukmi nei an um asile mibur in Pathian duhnak hawl laiah thufehdan an tuahsual theh theu, mibur thinlung anmai duhzawngin an kuaipeng ih thuthluknak cu Pathian duhnak hawl loin anmai duhdan in fehter an rak tum ringring theu ruangah buainak an suahter, pawlkom in Pathian duhnak rian dingin a hawl, a rian rero nak lamzin an hnokter asi.

2.      Hruaitu mibur lungkim tlangmi thu hnuai ah a tuhlut aw thei lo tu

A bur in Pathian duhnak hawltlang cu tangdornak asi ih Pathian duhmi asi tiah hruaitu mibur thlacamnak in lungkim tlannak neihimi thu hnuai ah tangdornak ih tuhlut awknak cu thudang asi. Mi zokhal amai bulpak duhdan in Khrihfa pawlkom umter a tumtu, mibur lungrualnak hnuaiah a tuhlut aw thei lo tu pawl cu pawlkom hruaitu mibur lakah tel ding an si lo. Mibur lungkim tlangmi ah tuhlut aw thei lo tu pawl cu thentheknak an suahter ringring asi.

3.      Lungruh-a dum a rang lawng kaihnget feofeo ih midang duhdan thlun thei lo.

Bulpak duhdan, hmuhdan, pomdan hnget tuk in a kai ih midang in tha an timi le thupi ah an retmi pawl pomsak thiam lo, thleng aw tul can ah thleng aw thei lo, midang thawn pomdan rem aw thei lotu pawl cu khrihfa pawlkom hruaitu lakah telh ding an si lo.

Tahthimnakah, zumnak thu khalah mah lawng leilungtlunah mifim bik, midang hmuhdan le pomdan khal theihthiamnak nei lo, mai pomdan le ruahdan lawng a thabik ah ruat ringring milai pawl cu khrihfa pawlkom hruaitu mibur lakah telh ding an si lo.

4.     Kalhki nak a tuar thei lo tu pawl.

Khrihfa rawngbawlnak hrang thuthluknak tuah tikah mi pakhatkhat cu lungawilo an um theu ding. Curuangah hruaitu lakah lungawilo an um tinten dungsip zuaizo, kalhki nak le dokalhnak pohpoh tuar thei lotu pawl cu khrihfa hruaitu lakah telh ding an si lo. Khrihfa hruaitu cun mai duhdan pom thei lotu, kaihruainak ah lungawi thei lo tu, mah dokalhtu pawl khal hahdam zetin le remdai zetin a pehtlai, pawlkom thei tu asi dingmi asi.

5.      Thutlangpi a thulu vekin khua a ruat thei lo tu.

Bulpak thu le pawlkom thu thleidang thiam lo, thulu thlei dang thiam lo, le thu cipciar buaipi ringring tu pawl cu Khrihfa kaihhruainak ah telh lo a tha. Pathian thu vekin ziangkim khaikhawm theitu le a thutlangpi thawn a pehpar mi thilcang mi le thu ummi pawl khaikhawm thiamtu pawl cu thuthluk lairelnak ah telh ding an si.

6.     Midang thawn rualrem thei lo, bulpak pehtlaihnak ah buainak, mi tawhhmang le mi rem thei lo, thuanthu neitu pawl cu khrihfa hruaitu lakah telh lo a tha.

Kawhhran mibur kaihruaitu mibur cu Thlarau THianghlim kaihhruainak thei thei dingin rualremnak le daihnak in khua a ruat tlang, lai a rel tlang thei tu an si a tul. Cuvek laireltu nei thei dingin khat le khat karlakah remdai ten pehtlaih awknak, rualremnak a um a tul asi. Midang thawn to aw theu, mi rem lo mi nei theu tu, kalhkinak le rem awk lo nak suahter theu tu pawl cu kawhhran kaihhruaitu lakah an tel lo a tha, ziangah tile remdaihnak Pathian cu rualrem le remdai ten thu lai a rel theu asi. Krihfa kaihruai awknak cu mipi thawn pehtlaihnak asi. Hruaitu lakah bulpak pehtlaihnak ah rem lomi, huatmi vek an rak neih asile kaihruainak a tluang thei lo.

7.     Thuneih duhtuk pawl.

Thuneih duhtuk, mai duhdan in khrihfa pawlkom fehter a duhtu pawl hi kawhhran sungah vanduai thlak takin buainak suahtertu, kawhhran dam lo tertu an si theu. Thuneih duhtuk tu pawl in pawlkom mibur lungkim tlangmi lenglam ah bulpak thuken an rak nei ringring ih mibur pawlkom in thupibik ah a retmi hnakin anmai bulpak ruahnak ah a thupi zetin an ruatmi canter ding an tumtah ringring asi. 

Thuneih duhtuk milai pawlin lamtang an tuah ringring dingih kawhhran pawlkom sungah thenthek awknak an suahter. Ziang kawhhran sungah an um tik khalah tihnungza milai an si.

8.     Pathian hawltaktak lotu pawl


Kawhhran kaihhruainak cu Zisu Khrih ih thu asi; Zisu in khuitawk ah a kawhhran a fehpi duh, timi hi kawhhran in a hawlmi le a renmi asi. Curuangah kawhhran kaihhruainak sungah a teltu hmuahhmuah in kawhhran neitu Zisu Khrih ih duhnak le kaihruainak lamzin cu fimkhur in a thlunih Zisu duhmi famkim ter dingin pumpek awknak a tul asi. Cutin tuansuak thei ding ahcun Zisu cu lungbik ah a retu, a hawl taktak tu pawl nunnak lawngah a cang thei mi asi.

Thuthlungthar in kawhhran hruaitu ding pawl ih sinak a ngan theh ih thlarau nun pitling nei lo le a harhdam lo zumtu pawl cu hruaitu ah telh lo dingin a ngan asi.

Translated by Rev. Hre Mang