Pastor Hi Case-worker A Si Lo

Rev. Stephen Hre Kio

Hi ca hi Dallas-Fortworth airport ah, Indianapolis i zuan awkah ka hngak lioah, ka ṭial. CBC USA chungtel Khrihfabu sinah ka ṭial. Ka ṭial a hau tiah ka ruah caah ka ṭialmi a si.

Tuzarh chungah, nithum chung (Oct 30 in Nov 1, tiang) Dallas khua lengah, Assembly of God i  ngeihmi Lakeview Conference Center ah CBC USA Ministers’ Council hruainak in Retreat kan ngei. Retreat timi cu “I hrimh ṭhannak” ti awk zong a si. Pastor pawl bia i ruahnak le cawnnak zong kan ngei. ABC Pastor Rev. Stephen Price nih, Radical Forgiveness a kan chimh i a ṭha ngai ka ti. Pastor 40 hrawng kan kai. A kai lomi hi Pastor 16 hrawng an um. An kai lo hi an sung ngai tiah ka ruah. Ni thum chung Pastor pawl he bia kan i ruahnak ahhin a fiang ngai in a langmi cu: Pastor tampi nih case-worker an ṭuan ti hi a si.

Case-worker rianṭuan hi Laimi kan caah a herh ngaingaimi a si. USA i a phanka tampi kan um caah bomhhaumi tampi an um. Case-worker nih a ṭuanmi hi phun tampi a um. A cheu cu a phanka mi umnak Apartment umnak i bomh a herhmi vialte bomhnak a si; a cheu cu Social Security number soknak caah a si; a cheu cu ID caah a si; a cheu cu Medicaidsoknak caah a si;  a cheu cu foodstamp soknak caah a si; a cheu cu damlo ruangah sibawi sin kalpi awkah a si; a cheu cu riankawlnak zung i kalpi a si. Khrihfabu pakhat nih mi bawmtu case-worker pakhat cu ngeih-awk hrimhrim a si. Sihmanhsehlaw Pastor hi case-worker ah hman awk a si lo.

Pastor nih cun Pastor rian ṭuan-awk a si. Pastor rianṭuan cu an innchungkhar caah thlacam le kaihhruainak, Khrihfabu chungah inn kipah thlacampiak, a damlomi hna sizung ah siseh, an inn ah siseh ven i thlacampiak awk, sangpumh ah hruaitu le phungchimtu si awk, Khrihfa Upa meeting, Church Council meeting, Nubu le Mino hna meetingah kai awk, farah zonzai zohkhenhnak ah i tel awk, le phungchim (a biapi bikmi) awkah i timh awk hna hi an si. Phungchim hi Pastor kum tampi a ṭuanmi hna nih an ti tawnmi cu phung voikhat chim awkah hin nazi 10-30 kar i timh a hau, an tit awn. I-timh tikah Baibal rel, thlacam, khuaruah, phungchim duhmi caṭial, a herh ahcun voihnih thum zong ṭial a haumi a si. Culengah cun Khrihfabu i-hruai khawhnak caah administration tlaih pah a hau fawn rih. Khualtlung le mileng zohkhenh a hau rih i, pawngkam Khrihfabu dang hruaitu hna he i-ton le thlacam ṭi awk a um rih. Hi bantuk a ṭuan taktak a si ahcun nikhat chungah nazi 8 lawng a si lo; nazi 12 le 16 chung ṭuan awk a um lai. Emergency hna a um ahcun nazi 24 chung rian a ṭuan caan a um lai.

Hi rianṭuan – case-worker le Pastor rianṭuan hi – mi pakhat nih a cemhchih ahcun a min meen cun a ṭuan ko lai; asinain tlamtling tein a ṭuan kho lai lo. Khrihfabu pakhat nih minung 100-200 an ngeih ahcun case-worker rian hi mi pakhat nihfulltime in ṭuan awk hrimhrim a si lai. Pastor nih ceemchih awk a ṭha lai lo. Case-worker rian hi nan Pastor nan ṭuanter a si ahcun thil pahnih thum a chuak ko lai:

(a)    Nan Pastor cu case-worker rian he Pastor rian he a ṭuan ahcun kum khat hnih hnuah cun a celh lai lo i, “zaa seh” tiah aa phuak ko lai. “Pathian rianṭuan cu mah hi lawng hi a si ṭung lo,”  a ti lai. Cuti a si ahcun ahohmanh nih amah kha mawhchiat awk a si hnga lo.

(b)   Aa phuah lo hmanh ah Bawipa Ni (Sunday) i a phungchim hi thlakhat thlahnih, kum khat hnih ahcun a ngianh chin lengmang lai i, (ei tlak Thlarau rawl a si lai lo i) Khrihfabu chungtel an phunzai, an tlakciar ko lai. Nan Pastor hrimhrim nih a phungchim ah a lung a tling lai lo i, thachia zaangchia in a um chin lengmang lai.

(c)    Pastor nih thlarau rawl a pek kho hna lo ahcun pumh zong an duh lo chin lengmang lai.

(d)   Pastor rian cu tlamtling tein ṭuan kho lo, case-worker rian zong tlamtling tein ṭuan kho lo ah a cang lai. A pahnih in tlamtling lo ah a cang lai.

(e)    A donghnak ahcun a thitha a derdai lai i, damlonak hna ah a thlak lai i, an innchungkhar dihlak caah harnak an tong lai. Minung celh-awk a si lo, an ti lai i, a hnabei a dong ko lai. Hiti a si ahcun Pastor/case-worker santlaih lo bia a si lai lo; khuakhan tawlrel thiam lo bia  a si men lai.

Hi buntuk hi a cang kho ngaimi a si caah Pastor nih case-worker rian hi ṭuan lo ah a ṭha. Pastor cu Pastor rian ṭuan ko seh.Case-worker rian a hau hrimhrim ti a si ahcun midang pakhat rian pek ding a si ko, part-time zong in. Khrihfabu nih case-worker caah phaisa pek awk a um lo ahcun phun dang in case-worker caah phaisa kawl awk a si. Khrihfabu dihlak budgetchung in ruah awk a si. Budget chung in a si kho lo ahcun phundang in phaisa kawl awk a si. Phaisa kawl khawh a si lo ahcun bomh a haumi pumpak in, asiloah, family in phaisa thawh cio awk a si ko. Bomh an hauh caah cu bomhnak caah cun a hlei in phaisa thawh ve awk a si ko.

CBC USA chungtel Khrihfabu hna nih Pastor hi case-worker kan ṭuantermi vialte hi tuan ah ṭuanter lo awkin ruah cio awkah kan sawm hna. Cu loah cun kan Khrihfabu thlarau rawl hmu loin “thlarau rawlṭaam” an si lai. “Rawl a ṭaammi ngakchia cu ca a cawng kho lo” an ti tawn. Thlarau rawl – Baibal cawnnak – hmu kho lomi kan si ahcun kan Bu caah ngandamlonak a si lai.