Zianghman a Hmunmi an um lo

San No Thuan

1. Zianghman a hmunmi a um lo (Nothing is permanent)

Tulai Kawlram, a hleice in Lairam le kawlrawn ih thil cangmi pawl zoh tikah, mangbangza taktak a si. Hivek thlen ding hi mang hman ih man ban dah lo mi thil a si. Himi kan zoh tikah, a fiangmi cu lei tlunah zianghman a hmunmi a um lo ti Bible ca ih in simmi a kim sinsin. Minung in kan buai theunak bik cu a hmun lomi kha kumkhua hmun ding vek ih kan ruah tikah, kan nunnak kan buai theu.

“Leilung le a sungih a ummi thilri, milai ih an tlaihsanmi pawl hi an hloral vivo zo; a sinain Pathian duhnak a tuahtu cu kumkhua in a nung ding” (1 John 2:17)

Curuangah, lei tlun ih sumsaw, neih le siah rinsan in hnangamnak hawl hlah aw. Cu pawl cu a rei hlan te ah mitthep kar ah an hlo thei timi hi tuih thil a cangmi pawl zoh in hngilh hlah.

Bible in hnangamnak le lungawinak taktak timi cu Pathian ih thu sungah a um tiah in sim (Saam 1:1f). “Pathian ih thu a ngaitu pawl le tuahtu cu kumkhua in a nung ding” ti khal in Bible sungah in sim.

2. Pathian ih thluasuah na siar thiam maw? (Do you count God’s blessings?)

Inn le lo nei lo, ei le in ding hman nei lotu minung tampi an um lai ah, na duh zat ei thei, in thei, le sinfeng thei in na um hi Pathian hnen ah lungawi thu na sim dah maw? A vui hramtu lawnglawngtu teh kan si pang maw?

1 Thes 5:17 – Ziangvek caan lai khal ah lungawi thu sim uh tiah in ti. Ziangvek lai caan khal ih lungawi thu a sim thiamtu pawl cu zo pawl an si? Pathian a rinsantu, Pathian in kan hrangah ziangkim a thabik a tawlrel ringring timi a zumtu pawl ih nun daan a si (Rom 8:28).

3. Midang hrangah thluasuah phurtu na si maw? (Are you a blessing for others?)

Pathian in thluasuah in pek tikah, kanmaih hrang lawngah nung ding ih in pekmi a si dah lo. Midang hrangih a nungtu hnenah Pathian in tam deuhdeuh a pek. Thil fate kilkhawi thatu cu Pathian in tum deuhdeuh kiltu ah a hmang ringring (Luke 16:10f). Curuangah, Pathian in thluasuah a lo pek daan ih zir in na ti thei tawk, na ti theinak zawn ah midang va pe sin aw. Cucu, Pathian ih pekmi kha a karhzai tertu kan si ruangah, Pathian in tamsin sin thluasuah kilkhawitu tha ah in hmang sin ding.

Curuangah, a hmun lomi hih leiram par lawngah kan sumsaw khawl hlah uh si. Kumkhua kan umnak ding hmun vanram sawn ah khawl uh si. Ziangtin kan khawl ding? Pathian hmin in midang na bommi pawl hi vancung ih rokhawl na si? Midang thazaang a malmi pawl tha na pek, mi farah na zohkhen, a tul sammi pawl na zaangfah, ih na bommi pawl hmuahhmuah khal hi vanram ih ro khawltu na sinak cu a si (Matt. 25:40-45).