Dawtmi Laimi unau hna,
Zeiruang dah Hakha ah hitluk ruah asur, vawlei a kak, min a cimh i inn tamtukte a hrawh timi kong he pehtlai in nan hmuh ning nan von ttial cio i kei zong ka ruah ning tlawmpal tein von langhter ka duh ve. Ka cattialmi asau deuh sual ahcun careltu nih rak ka ngaithiam u tiah kan nawl hmasa fawn hna.
(1) Kan Lairam vawlei hi ano tuk rih:- Keimah hi atu kum 77 chung ah ka um i keimah bantuk kum upa tampi nih nan theih cangmi asi men lai ti ka zumh. Kawlram vuancichoh U Nu arak si lioah 1951 asilole 1952 ah Laitlang vawlei chungah zeibantuk thil manfaak dah a um (gas, diamond, gold, jades tibantuk) tiah culeikam experts a rak zoh ter hna lioah, an hlathlai hnu I an chimmi cu: "Lairam vawlei tang ah manfaakmi thil zeihmanh a um lo; Laitlang vawlei ai semnak hi a kum ano tuk rih" an ti, tiah khuaruahhar ngai in kan rak theih. Hika ah ka chim duhmi cu kan Laitlang vawlei hi ano taktak rih ko rua.
(2) Town Planning:- Nihin ah Nitlaknak ram chung a ummi nih cun nan hngalh cang bantukin mifim ram ahcun khua an ser/tlaak tikah Tilu-luannak kha tthatein an tuah. Cubantukin tuahmi cu zeitluk ruahsur le tilian zong ah khua kha harnak a pee hna lo. Hakha ah hin hlan deuh cu va um rih seh, atu zong ah Town Planning a um lo. Hihi tutan ruahsur ah harnak achuahtertu pakhat asi tiah ka ruah.
(3) Abik in Sakta lam le Gangaw lam karlak ah ningcanglo innsaknak :- Hihi cu Hakha khuami upa deuh cheukhat nih cun nan chimlo hmanh ah nan lungchung ah nan rem ti lailo tiah ka ruah. Ningcanglo innsaknak nih a pawngkam thing vialte haunak a chuahpi. Hi nih ruahti dawptu vawlei ningcanglo in a tuah.
(4) Gangaw lam (Rungtlang) le Sakta lam (Cawbuk tiang) Thingkung tu ciin loin thingkung hau tu in kan tthangcho. Hi kong he pehtlai in Hakha khua biaknak upa cungah ka thinhunnak von chim ta ka duh. Keimah zong 2005-2009 (kum 5 chung) ka khua asimi Thantlang peng,Tikir khua lamcawh ah kum khat voi khat lengmang ka tlung i ram tang ah Tikir khuami hna cu lam ka cawhpi tawn hna. Hakha ah hin tlun lei/kir lei ka caam chungah pastor 4 hang sinah Rungtlang le Sakta lam karlak ah thingkung phun ding hi ka chim/forhfial tawn hna. Kum 5 chungah zeihmanh an cawlcangh lo ka hmuh tikah 2009 kum April thla ah ni khat cu HBA Office (Siangbawi inn, acung dot ah) ah ka thinhun in Morning Devotion an tuah lioah ka luh hnawh hna i an lau. Devotion an dih khawh in "zeicadah thingkung phun kan chimh lengmang hna nain atu tiang nan tuah lo; Biakinn chung I phungchim, thlacam le Haleluijah Praise the Lord ti lawng hi maw PT rianttuan ah nan rel" tiah ka va zaai hnawh hna. Amerika ah ka kal hnu ah cun Hakha Mino Bu nih thingkung an phunnak kong Hakha Post in ka theih tikah ka rak i lawm tuk. Tutan zong ah ram dang ummi Laimi fanau hna sin in bawmhnak ding khua nan khaanmi cung le zeimawzat bawmhnak nan tuah cangmi cungah ka lawmhnak ka chim kho lo. Kan Pa Pathian tu nih thluachuah- vanluhnak in pee ko hna seh.
Kan hnu thla khat lioah atulio RCM Pope Francis nih a phungchimmi (Sermon) a relmi nan tampi lai tiah ka zumh. Tuchan minung nih Pathian nakin phaisa kan biak deuh ruang le cu phaisa kan kawlnak ruangah kan fale chan ah ro ttha peek awk a um tilo tiangin kan vawlei, tiva, rili le thlii kan hrawh dih cang nak kong a chimmi kha thuk deuh le kau deuh in kan ruah a hau hrimhrim cang tiah ka ruah.
Kha, ka cattialmi asau pah cang i careltu nan baa sual lai; hi vial in ka bia ka dongh ter rih lai. Thlacamnak le tuahsernak he hi tluk kan miphun harnak an tem lio can ah i zuam ko hna usih.
Rev. E. Za Bik (Hlawn Par pa)
No comments:
Post a Comment