Na Thinlung Sungah Jesuh in Hmun A Nei Maw?

By San No Thuan

Luka 2:13-14   

• 13. Hmakhatteah cuih vancungmi thawn hmun khatah vancung ihsin vancungmi burpi an rung lang ih Pathian thangṭhatnak hla an sak.
• 14. “A saang bik vanah khin Pathian cu thangṭhat si koseh; A duhdawtmi minung pawl umnak leilungah hin remnak leeng koseh,” tiah an ti.

Minung pakhat kan si cun, midang pawl thawn pawlkomawk a tul. Cu tikah, thu el awk caan le thinlung hmu awk lo caan a um theu. Buainak a suak theu. Leilung pi huap khal in zoh tikah, buainak le thah awknak hlir in a khat.

Asile Vanmi pawl in Bawi Jesuh Khrih a rung suah tikah, lei tlun ah remnak le daihnak leng hram seh tiah thlawsuah an pekmi cu thu lo lak maw a si ding? A cang thei lomi thlawsuah maw an run pek? Leitlun ah, kan kawhhran ah, kan innsaang ah, pakhat le khat karlak ah, remnak ziangti’n a um thei ding?

Leitlun ralpi veihnihnak lai ah, German ralkap pawl le British ralkap pawl cu an do aw ciamco. Christmas ni an thlen tikah, ral kap hrek khat cu inn khat ah an va lut ih, zaan riah an ei tlaang. Na hnen ah lungawi hnangamnak thlenghram seh, “Merry Christmas” tiah an kut an kai aw. Jesuh Khrih kha thuneitu ih an ret tikah, an pawlkom aw thei. Rawl an ei tlaang thei.

Jesuh Khrih kha uktu le thuneitu a sinak hmun ahcun, remnak le daihnak a um. Ziangah tile, anih cu remnak le daihnak tuahtu Bawi a si. Kan khua tlaang, kan biak inn, kan innsaang, pakhat le khat kar ah remnak um thei dingah, remnak siangpahrang, Jesuh Khrih kha kan thinlung uktu ding ih kan sawm a tul. Amah kha hmun le ram na pe ding maw? Remnak, daihnak tuahtu Bawi a si. 

Jesuh kha an nunnak uktu le thunei tu ih a rak cohlan tu pawl ih nunnak ah ziang a thleng? Mary kha vancungmi in a nunnak kha Bawi Jesuh ih suahnak ah hlaang ding in a rung sim tikah, Mary cun, a pasal ih taansan ding khal a ruat, a mualpho ding khal a ruat, cun, midang in thah hman in that men ding ti a ruat. Asinan, Mary cun, “kei cu Bawipai’ salnu ka si. Na simmi bang in ka par ah si ko seh” tiah a ti. Cu tikah, Pathian in a pasal ding khal a hawl sak ih, nu sunglawi bikah a can a si. 

Vancungmi in Jesuh a suah tikah, lei tlun ah remnak le daihnak leng hram seh tiah thlawsuah an pekmi cu a tak ih remdaihnak kan kawhhran le kan khua tlaang ih a um theinak dingah, Jesuh kha na thinlung sungah hmun pe aw. A mah kha thunei tu ah tuah aw. Thil na tuah hlan ah, “Bawipa himi ka tuah dingmi i siang maw?” tiah khuanh dil ta aw. A lo sian le lawng tuah aw. Mary bang in na nunnak kha a lo khaisaang ding. Nu sunglawi bik, pa sunglawi bik ah thlawsuah a lo pe ding. 

Immanuel Pathian

By San No thuan

Bible caanghril:

• Isai 7:14 “Atu ah Bawipa amah rori in khihmuhhnak a lo pe ding. Nunau no pakhat in fa a vun ih fapa a hring dingih a hminah Immanuel  tiah an sak ding.”
• Luke 2:10 “Tihhlah uh! Nan hrangah thuthang tha ka run keng. . ..” 

Thuhmai Hruai

Minung tampi in kan  thanaunak bik cu kan duhmi le tulmi kan ngah thei lo ding timi lungput kan neih tikah, kan tha a nau bik. Cu ti ih kan tha a nau lai tak ahcun, lei tlun thu thang tampi le minung tampi cun, na duhmi na ngah thei lo ding, “You can’t get what you want” tiah in ti betbet. Tuizing cu khawm ding in ka pok ih ka to theumi tlaangleeng ka tlai. Neta deuh tlaangleeng cu minit 45 hrawng hngah a tul ih, khawm ka khel lo ding ti ka ruah tikah, ka thin a nuam lo zet. Asinan, hril ding a um lo. Ka hngak lawlaw ding ka ti ih cu lai ah, coffee dawr pakhat ah ka lut ih hmuk le coffee ka va lei. Cui’ coffee dawr sung ahcun, mi pakhat in hla a sak ih cumi in ka tha ii nau ter sin. A hla sakmi cu “Na duhmi na ngah thei lo ding” timi hla a si. Mah hman tlangleeng tlai tilak ah, cui hla cu mi tha a va nau ter ve aw tiah ka ti rero. Lei tlun ih thu le hla tampi hi kan nunnak ah thapetu si lo in, thanaunak lawnglawng a suah ter tu an si theu.

            Asinan, Pathian thu cun ruahsannak nung a lo pe ding ih, na tha a lo thawh ter ding. Pathian thu in ziang in ti? John 10:10 sungah, “Kei cu nunnak nan ngah ih, cui nunnak cu famkim zet ih nan ngah theinak dingah ka ra a si” tiah Jesuh in a sim. Cui Pathian cu a hmin ah, “Immanuel” a si tiah Profet Isaiah in a rak sim (Isai 7:14). Immanuel timi cu Hebrew tong a si ih, Im (hnenah) nu (kan mah) el (Pathian) timi ttongfang kom awmi a si. Asullam cu, “Kan hnenah a um ringringmi Pathian” tinak a si. Zumtu Christian pawl ih kan biakmi Pathian cu kan hnen ah a um ringringmi, Immanuel  Pathian a si.

            Immanuel Pathian a zumtu le zum lo tu pawl ih nunnak ah a thlengmi thil pathum sim ka duh. A pakhatnak ah, “Kan hnen ih ummi Pathian” ti ih kan zum lo tikah, kan nunnak ah ziang a cang? A pahnihnak ah, Pathian ih duh lomi kan tuah tikah teh, Pathian in in taansan maw? A pathumnak ah, kan lungleennak le riahsiatnak pawl ziang tin kan neh thei ding timi thu pawl hi a tanglam ah sim ka duhmi a si.

1. “Pathian a um lo” timi zumnak ih a rah.

            Khui tikah kan nunnak hi siatralnak lam zin a pan bik? Khui tik caan ah thathnemnak um lo zet in tikcu caan kan cem ter tile, “Pathian a um ngaingai lo. Tihzah ding a tul lo lawlaw” timi lungput kan neih caan hi a si bik. Cui thinlung put kan neih tikah, “moral holidays,” duhduh ih nun duhnak a suah ter. Curuangah, Saam 14:1 khal in hi tin a sim, “Mi aa cun a thinlung in, ‘Pathian a um lo’ a ti. Milai cu an siat theh a si. Ningsinza thil tampi an tuah. Thil tha a tuahtu pakhat hman an um lo.” Pathian a um lo ti kan thinlung ih kan zum ve te’n aat hram kan thok timi hi Bible ca ih in simmi a si.

            Christmas caan ah kan mah le mah a thar in Pathian ih hmin cu “Immanuel” timi “Kan hnenah um ringringmi Pathian” a si tihi cingmal sal uh si. Ziangkim kan ruahmi le kan tuahmi khal hi in hmu thehtu le in thei thehtu Pathian a si ti cingmang sal uh si. Nitin zaan tin in, ka hnen ih a um ringringtu Pathian ih lungawinak hawl in a tuahtu ding ah sersiammi kan si ti cing ringring uh si.

2. Sualnak kan tuah tikah teh Pathian in in taansan maw?

            Tuisun ah minung tampi ih an suh deuhmi cu Pathian a um maw timi hnak in Pathian kan hnen ah in umpi taktak maw tihi a si deuh. A lungawinak kan tuah lawngah maw Pathian in in umpi. A duh lo zawng kan tuah tikah teh Pathian in in taansan maw timi hi kan ruah dingmi thupi zet thu a si. Minung tampi in keicu ka sual tuk ih Pathian thlarau in ii taan san zo. Kei cu thla ka cam khal le hmual a nei lo ding. Thu ka sim khal le Pathian in thlawsuah a pe lo ding. Hna ka tuannak khal ah Pathian in hlawhtlinnak ii pe lo ding tiah kan ruat. Cutik ah, kan sungah ralhruhnak lawnglawng in a khat. Cui ral hruhnak cun, kan ruahsannak a thim ter.

Cumi pawl hrangah si, vancungmi pawl in, “Tihhlah uh! (fear not!) Nan hrangah thuthang tha ka run keng… Nan mah runtu Khrih a suak zo . ..” (Luke 2:10) tiah an run sim cu. Cui naute cu “… a hmin ah, Immanuel tiah an ko ding” (Matt 1:23) tiah Profet Isaiah hmang in a hlaan kum 700  lai ah a rak sim cia zo, “Atu ah Bawipa amah rori in khihmuhhnak a lo pe ding. Nunau no pakhat in fa a vun ih fapa a hring dingih a hminah Immanuel  tiah an sak ding” (Isai 7:14). Curuangah, Christmas caan ah Pathian in in taansan dah lo ti mang sal uhsi. Nan hnen ah san a cem hlan lo ka lo umpi ringring ding tiah thu in kamtu cu kan biakmi Pathian a si (Matt 28:20). Ahmin ah “Immanuel,” “Kan hnen ah in umpi ringringtu Pathian” a si. Na sual le ve te’n, Bawipa na parah ka sual a si tiah sual ngaithiam dil aw. Na sualnak a lo ngaithiam ding ih, na taksa, thinlung, le thlarau tiang damnak a lo pe ding a si (2 Saan 7:14, 1 Jn 1:9). “Pathian in in umpi” timi zum cu a thatnak le a thluasuah pawl cu kan par ah a kumkhua in cat lo in in burh camcin ding a si ti zumnak khi a si (Ps 23:6).

3. Lungleennak le riahsiatnak pawl teh ziangtin kan reh ter ding?

Lei tlun ih kan nun sungah, kan nulepa, kan u kan nau, kan nupi, kan pasal maw kan rualpi pawl in caan khatkhat ah in taansan theu. Cuvek caan ah kan lung a leeng, kan um a har ih, mitthli thawn in taansantu nu maw pa kha “Khui ah na um?” tiah kan thinlung le kan awkam khal in kan hlam ciamco. Cui lungleennak pawl cu Pathian thawn kan pawlkomawk hlan lo cu a reh dah lo ding. Na lung leen vete’n, love songs pawl ngai ciamco hlah. Dunglam ah an lo hnuk ding ih, na lungleen a zual sinsin ding.

Cuhnak in Pathian cu Immanuel, kan hnen ih a ummi Pathian a si. Na ttongmi ngai a duh. Amah khal in a lo bia duhtu Immanuel Pathian a si. Curunagah, na lung a leen tikah, na riah a siat tikah, Pathian thawn thlacamnak in biak aw uhla, a thluasuah pakhat hnu pakhat siar in lungawi thu sim aw. Na dil duhmi khal dil bet aw. Ka hmailam cu a kut sungah a um timi zum aw la, a hnen ah na phurhrit kha hlan aw. Cui tlun ah Pathian in a ttongkam Bible sung in teh ziang i sim duh tiah siar in ruat aw, ngai aw. Cutikah, na lungleennak a reh ding. Caan tampi ah Pathian in  ii umpi ti zianghman kan taksa in kan khaansa thei lo tiah na ti men ding. Na taksa in na khaansa lo khal le Pathian cun a lo um pi ringring a si. San a cem lai hlan lo ka lo umpi ding tiah thu in kamtu Immanuel Pathian a si. 

Thunetnak

            Lei tlun minung tampi le thuthang tampi cun, na duhmi na ngah thei lo ding tiah a lo sim ciamco ko ding. Asinan, Pathian cun, “Ka fa, na duhmi le ttulmi ngah thei ding in lo bawm dingah, na hnen ah ka lo umpi, Immanuel Pathian ka si” tiah in ti.

            Culai fangah, siatralnak lam ih a fehtu pawl cun, an thinlung in ‘Pathian a um lo. Na duhduh tuah aw. Na thinlung in na ruahmi kha tuah hluahhlo aw’ tiah an ti. Asinan, thansonak lam zin ih a fehtu pawl cun “Pathian cu i umpi ringringtu, Immanuel Pathian a si tiah an ti ih, a lungawinak lawng ka ruat ding ih ka tuah ding” tiah an thinlung sungah thuthluknak an tuah.

            Minung kan si bang in Pathian ih duh lomi kan tuah pang tikah, “thluasuah dong nawn lo ding vek in ruat aw hlah.” Vancungmi ih simmi thei sal aw. Tih hlah (fear not). Cuhnak in Pathian hnen ah sual ngaithiam dil sal aw (2 San 7:14). Satan in, “sualnak na tuah zo hnu ahcun, hlawhtlin ding cu ruahsan hlah. Pathian thlarau in a lo tlaansan zo” tiah tihrut ko a lo ti khal le, “Satan, ka biakmi Pathian cu Immanuel Pathian, kan hnen ah a kumkhua in umpi ringringtu a si” tiah ti mei aw. Satan cun, ai ka bum tum nan a ngah ual lo tiah a ti ding ih a lo tlaan san ding.

            Na lung a leen tik le na riah a siat tik khal ah, Pathian cu Immanuel Pathian a si tiah cingmang sal aw la, a thluasuah siar in lungawi thu sim aw. Amah thawn thlacamnak in le Bible siar nak in biak aw ringring aw. Na lungleennak le riahsiatnak an hlo sal mei ding. Ziangruangah tile Pathian cu kan mit in le kan taksa in kan tawng tham thei lo nan, kan thinlung muril ah fiang zet ko in bia theitu Immanuel Pathian a si.

Note: Hih sermon hi Philadelphia Burmese Baptist Church ah 12/14/08 ah ka simmi thu a si. 

Rualpi Tha Cu Sui Le Ngun An Si

Lai hla lak ah a tawi fawn ih sullam a nei zetmi hla ka timi cu a tanglam ih hla hi a si. Himi hi social kan tuah tik khal ah kan sak ringring theu. Asullam a tha fawn ih nunpi cih dingah a mawi zetmi hla a si. A tanglam ah ka vun langh ter ding.

"Rual thar hawl, rual hlun hngilh hlah.
Rualpi tha cu sui le ngun an si."

Lei tlun kan nun sungah, rualpi tam a nei theitu hi ziangkim an tuah ah an hlawh tling. David tla kha Jonathan thawn rualpi ih an can tikah, Jonathan pa, Saul Siangpahrang pa in that tum rero khal sehla, that thei lo ding in, Jonathan in a sim cingcing ti kan hmu.

Rualpi tha timi cu kan par in in uktu si lo in, kan kiangah in umpitu le thu kan ron theimi a si. Kan tulnak ah in bawm ih, sim tulnak ah raltha zet in a mawi lomi kan nun daan in sim ngamtu a si. Kan thanau lai caan ah ruahsannak nei ding in tha in pe ih, kan lungawi caan ah in lungawi pi vetu a si. Midang kan sim ngam lomi khal ral tha zet in kan sim ih, thlacamnak in in bawmtu le kan rinsanmi a si. A lungawinak ding kan hawl ih kan lungawinak ding khal a hawl vetu a si. Amai zawn lawng a ruat lo ih, kan zawn khal in ruat zettu a sinak kha a tuah sernak in a langh ter. Asinan, cumi parah a porh aw dah lo. Kan thanso in hmuh tikah, a lung a awi ih, kan thiam lomi khal thiam ko in sim in zirhtu a si.

Rual thar cu hawl aw la, an mah ih rual tha va si hmaisa aw. Asinan, na rualpi hlun pawl kha hngilh lo in a kom ding zuam ringring aw. Ziangah tile, rualpi tha cu nangmah le nangmah na pekawk theimi laksawng lak ah a sunglawi bikmi laksawng an si.

Duhnungza Innsaang

Ka mit thlam sungah hi ti in duh a nung zetmi innsaang ka vun hmu. Lei tlun tisa ahcun a farah zet ko nan, Pathian thu sungah a nupi le fale pawl a hruai ih, pakhat le pakhat an duhdawt awk a si ahcun, cuhnak ih inn saang nuam a um thei nawn lo ding. Curuangah, thu nitin te ih kan suh awk dingmi cu, Pathian hi ka thinlung taktak in ka duhdawt maw? Pathian duhdawt taktak timi cu Pathian lungawinak ding lawnglawng ruat in, tuah ih caan cem ter hi a si. 

Daihnak Siangpahrang

by Khun Siang Mawi

Bible sirhsan: Isai 9:6

Tuzaan ah Pathian cu ziangruangah Bible ca in daihnak Siangpahrang tiah a ti timi hi ruat khawm tlaang ding ka duh. Pathian cu ziangruangah kan hrangah daihnak Siangpahrang a si tile:

1.     Pathian cu kan ruah banmi leeng in in duhdawttu a si ruangah a si (John 3:16). Himi John 3:16 cu kan zaten kan nau hngak te lai ih siin kan theihciami Bible caang a si. Pathian in in duhdawt tuk ruang ah a fapa neih sun in pek ih cu mi a fapa zum tu hmuah hmuh cu kumkhua nun nak an co ding a si a ti. Kan tuanman le felman ruangah, Pathian in in duhdawt tiah in sim lo. “Ka phu lo na cing in i duhdawt timi hi ZUM IH RINGTU si ding hi kan tuanvo a si. Pathian in a nunnak pektiang duhdawtmi ka si ti kan zum ve te in, nun tharnak kan sungah a thok a si.”

2.     Pathian cu kan hrangah daihnak Siangpahrang a sinak cu: Pathian cu misual kan si ko nan, rundamnak cu laksawng in in petu a si (Efesa 2:8-9). Pathian t’ongkam in ziang a ti, “Ziangah ti le nannih cu pathian ih zangfah nak ruangah zumnak in rundam nansi. hi rundamnak cu tuannak ih nan ngah mi a si lo  ih laksawng a si. Curuangah zo hman porhawk ding nan si lo.” Kan mai’ thatnak ruangah si lo in, Jesuh kan ai ih a thihnak ruangah, sual ngaidamnak Pathian in in pek ti kan zum vete’n kan sungah lungawi hnangamnak a thok a si.

3.     A pathumnak ah, ziang ruangah, kan hrangah Pathian cu daihnak le hnangamnak a si tile zumtu kan si hnu kan sual pang tikah, sualsir in thla kan cam tikah kan sual ngaidamtu a si (Siar aw: 1John 1:9). Kan nih zum tu tam sawn cu kan piangthar pek ah a si lo le crusade theh ah thizik ten Pathian kan zum . Cun a rei a rei in sual kan tuah ti ih kan ruat aw veten Pathian in in duh nawn lo tin kan mah te kan ruat. Cun, ka thih le hell ah ka tla ding tiah kan ti aw mei. Cuvek Pathian thu ruah daan cu, “ka that le vanram ka kai ding, ka sual le hell ah ka tla ding timi ruahnak ih sin a rami a si. Pathian ih duhdawtnak zumnak in vanram kai tum lo in, mai thatnak ih vanram kai kan tum ruangah a si. Mi nung cu tisa ih um lai kan si ruangah, sualnak kan tuah pang thei. Cu ti ih sualnak kan tuah pang caan ah, Pathian hmai ah kan sual kan phuang ih ngaithiam kan dil ahcun, kan sualnak in ngaithiam ding a si (1 John 1:8,9). Cun, Saam 145:8 khal ah, “bawipa cu mi duhdawttu le mi zangfah tu asi; athinheng a har ih a hmunmi duhdawtnak in a khat” Ati. Curuangah, duhdawtnak thawn a khatmi kan Pa Pathian hnen ah kan sual pang a si le, sual phuang in ngaithiam dil ding kan si.

4.     Thunetnak: Pathian cu kan hrangah daihnak le hnangamnak Siangpahrang a si. Ziangruangah tile,

a.     Pathian cu kan ruah banmi ih leeng tiang in duhdawttu a si. (Jn 3:16)

b.     Pathian ih rundamnak cu kan thatman a si lo, laksawng a si. (Eph 2:8-9).

c.     Zumtu in kan sualnak kan tuah pang tikah, Pathian hnen ah sualsir in sual ngaithiamnak kan dil sal tikah, Pathian in in ngaidam. (1 John 1:8,9).

Pathian in misual zohman a taansan lo. Kan hrangah daihnak le hnangamnak in petu daihnak Siangpahrang a si timi hi tui Christmas caan ih sin thok in kan zum hrih lo a si le zum in rinsan uh si. Cu tluk ih in duhdawttu Pathian hnen ah kan sual sir in kan nunnak hlan aw aw sal uh si. Amai hnen lawngah daihnak a um (Ps 16:11).

Saam. 16:11  "Nangmah in nunnak lamzin cu  i hmuh ding; 

Na umnak ah lungawinak a kim ih, 

Na baan thacak ah nomnak kumkhua in a um.

Hnamawknak Ruangih Hnaset

Na tuk ih hnamawk cu hna in a celh lo eh!

Tuisun ih BBC ka siarmi cu ka theih dah kel lomi thu thar a si. Guangdong ramthen ih Zhuhai khuami Taluk nu a tlangval pa thawn na tuk deuh in an hnam aw ih a hna kehlam a set ih siizung an thleng. 

Menmen ih hnamawk cu ziang hman a poi lo nan, na tuk ih hnamawk tikah hna a set ter thei tiah Tuluk ram doctor pawl in an sim. "The kiss reduced the pressure in the mouth, pulled the eardrum out and caused the breakdown of the ear." Cun Shianghai Daily thuthang ca khal in a simmi cu natuk ih hnamawk tikah, kan hna pahnih karlak ih thli kha a mal ter ih, kan hnakhuangte kha a siat ter tiah a sim. Hitawk ah hmet aw la BBC thathang ah na siar thei ding. 

Kei tla ka hna a rak set lo cu ka van tha ngaingai si .. he he he

A Short Biography of Dr. Ni Khuai

Dr. Ni Khuai was the first MBBS among the Chins and the second FRCS all over Burma. He completed FRCS, Fellow of the Royal College of Surgery, with "A" Grade from Edinburgh University, England in 1955. Though he was invited by many EU countries to serve their countries with a high rate of pay, he rather chose to return to his own country and joined as Surgery Specialist in Rangoon Hospital. Later he applied for going to serve in Chin State.

U Nu, the former Prime Minister of Union of Burma and the head of Health ministry were amazed when Dr. Ni Khuai and his father submitted their application to serve in Chin State. The then Health minister even asked them thrice whether Dr. Ni Khuai really wanted to work in Chin state. As the concerned authority granted his request, he started serving as head doctor at the hospital of Falam, the former capital of Chin State, in 1957.

For Dr. Ni Khuai, there was no working timetable, but he was ready 24 hours for his patients. He respected his noble works and treated all his patients equally. He gave no preference whether the patients were un-educated, rich or poor. Due to his dedicated works, the 25-bedded hospital was increased up to 4 times. When he started to join Falam hospital, he was the only doctor in Chin State capital's hospital, but due to his hard working, there were more than 10 specialists plus 11 junior doctors, 9 sisters, 11 blue staff and 10 train nurses. There after, Falam Hospital was known as Specialist Hospital of Chin state.

The motto of Dr. Ni Khuai is:  “To Serve Others.”

During his time, patients in every village in Chin State believed that they would surely be healed if they were admitted to Falam hospital or if they got Dr. Ni Khuai's treatment. The patient's faith and belief were true. Their health was recovered when they came to the hospital. Though most of the Chins were poor, all patients had a chance to get treatment as Dr. Ni Khuai was kind enough to treat them with free of cost. Moreover, he gave them free medicine, lodging as he himself hosted patients from remote villages at his own residence. He gave them food, the same food his own family used to have, clothes, moral encouragement, even lunch and money to those poor patients when they were discharged.

Dr. Ni Khuai’s patients were not only from Falam, but also from every corner of Chin State, people from delta areas and even from Mizoram. He was kind, polite, and gentle on patients as well as on his working staff. Junior doctors who used to work with Dr. Ni Khuai became famous and outstanding doctors. For his noble works and kind services, he was awarded Wunnah Kyaw Htin title. His father, Major Kap Cong, was also awarded the same title. Therefore, he was a good son who followed his father's footsteps.

He gave his time, strength, capacity and knowledge to his beloved fellow Chins, but still, some corrupted employee gave wrong reports to the authority, which made him need to transfer. The whole community at Falam, the former capital of Chin State and other parts of Chin State knew very well that he was an ideal doctor. They all knew that he was kind to every one and never corrupted.

Even elderly people could not hold their tears when they heard this bad news that Dr. Ni Khuai had to transfer from Chin state to another place. Due to the people's request, he could not leave Chin State easily. Individuals, organizations, church leaders, community leaders etc.. visited Dr. Ni Khuai and begged him not to leave them but he had to. Every villager of the high way between Falam, Kalay Myo, and Sagaing stood on the roadside with flowers and cultural dresses to show their sorrow of losing such a kind and noble man.

Though Dr. Ni Khuai knew those corrupted men who reported him, he gave no bad response or never tried to revenge them. Instead, he even prepared a special dinner for them with prayer. When he was working in Mandalay Hospital and other parts of delta areas of Burma, the Burmans said, "Thanks to the Chins for giving us such a good, kind, expert, and ideal doctor."

Collected by

BenHur S. Lyzo
Editorial Consultant
RFA- Chin Program

Mirangca Zirnak Thazet

Mirang ca siar daan, ngan daan le ngainak lam ah a phunphun in a zir paihtu pawl hrang g website tha zet hi tawk ah HMET  aw la, khat lam te ih ka tarmi vek webpage na thleng ding. Himi website na thlen vete'n hmmmm . . . fala mawi tak pakhat a ra suak ding ih cumi in na tuah daan a zate in a lo simfiang ta ding. Aman le pek tul lo in, mirang ca zir theinak a si ih a man hla zet. 

Cu thehcun, himi zuk ih Register timi te kha hmet aw la, na hmin le password pawl tuah aw. Cule, neta lam cun, na hmin le na password thawn Sign In timi in na lut thei ding.  

Himi website sungah, level pathum in an then: 1st English Course, 2nd English Course, le Practice English and Reading ti in an then. Pakhat khat kha na click a si le, a sungah na hril dingmi tampi a um bet ding. Thuthimnak ah, Home, School, Shop, Vocabulary tvp na hmu ding. Cumi kha na click vingvo a si le na tuah dingmi a lo sim ding. Mic umnak zawn te nan hmeh a sile, mirang aw suah na thiam theinak ding ah a lo zirh ding. Listen timi zawn na hmeh le vei khatnak cu mirang pakhat in a lo ttong sak ding ih aw. Cun, Record timi a hmehnak te na hmu ding ih, nangmah a lo ttong ter ding ih, na computer mic in na ttong ding. Cu theh in, playback timi na hmeh le na ttongmi kha a ttongmi thawn ziang tluk a nai timi a lo sim ding. A tha zet. Rak zoh leh aw. An website hmin cu http://www.usalearns.org/ a si. 

Vancung Laksawng

Lei tlun mi pawl nan lungawi uh

Nan mah runtu Khrih a suak zo

Laksawng lakah sunglawi bik cu

Kan sualnak hmuah ngaithiam dingah

Van Bawi fahniang Jesuh Khrih cu

Lei tlunmi hrang pek asi zo.

Zaan tim lai ah, Tuu khal pawl hnen

Bawipai vanmi a rung lang ih

Van tleunak in run cerh hngai ee.

Tihleh khur in an um lai ah

Tih hlah uh law, nan mai hrangah

Thuthangtha bik ka run keng ee.

Tuih zaan ah hin, David khua ah

Nanmah Runtu, Bawi a suak zo

Cui naute cu, puan in an tuam

Caw rawl einak kuang sungte ah

Daite in ee, an hlum ding ee.

Judah ram um maw Bethlehem

Juhdah khuapi pawl lak ah hin

Khua fate bik na si hrimhrim lo.

Ziangah tile na sung ihsin

Hruaitu pakhat a suak ding ih

Ka minung pawl a kai hruai ding.

Pathian hrangah thil harsa le

Tuah thei lomi ziang hman um lo

Na ke kar daan, bawipa up aw

Na ruah lo mi dinhmun tiang in

A lo hruai ding, a lo thlen ding.

Cui thil thu cu, nangmai cahnak

Thilti theinak thawng in si lo

Pathian cahnak, thilti theinak

Huham thawngin a cang suak ding.

Fala him te Mary hnen ah

Vaan Bawi fahniang, a suah tikah

Milai lam in thilcang thei lo

Sihman sehla, Vanlam huham

Cahnak thaw cun, a harmi thil

Zianghman um lo, a cang suak thei.

Zuu le Tursiabik Ruul

Ruul tur sia bang, neitu zuu cu

In pek ahcun, intu hmuah in

Rawl ei thawtnak, khuat tan si maw

ziang poi hlah ngei, tiah an thok cio.

Can a rei cun, an taang zuu sal

Khuat tan ihsin, lang hnih thum ah

Zarh tin te in, nitin te ah

Hnatuan hnu in, tuan hlan khal ah.

Zuu sal si cun, nautat an tuar

Mifim bik khal, mi-aa bik ah

Milian bik khal, farah bik ah

Mino nal khal, tar sia bik ah.

Zuu ih man cu, hma na pu ding

Nan tthen aw ding, na farah ding

Nautat na tong ding, leiba na nei ding

Kum no te in, na ngor caar ding.

Lai mino tha, khuathai sung ih

Thlum zet bangmi, tursia zuu khi

Na hahio hlah, taansan mei aw

Nunnak lamzin, na hmu sawn ding.

Fale Kilkhawi Daan

By  San No Thuan

Fale kilkhawi daan phun li:

Fale kilkhawi tikah, asilole nun kan sim tikah, a tlaangpi thu ah phun li in simzirh daan a um tiah leitlun mifim pawl cun an hmu:

1.    Duhdawt zet ih, nun sim dah lo.

Hi pawl cu an fale an duhdawt tuk nakah nun an sim siang lo. An sual khal le an fale an ttan. A caan a rei tikah, hi vek fale pawl cu nun can ziaza tha lo neitu ah an hung cang.

2.    Duhdawt lo ih, nun sim tuk pawl.

Duhdawt lo in nun simh tikah, ttong a hrang ih, kut le ke khal an sup lo. Cu tikah, a rei hlan ah fale pawl in nun a simtu pawl kha an do sal.

3.    Duhdawt khal duhdawt lo ih, nun khal sim lo.

Hi pawl cu an fale kha siatralnak pit tawp ah an thlen ter.

4.    Duhdawt zet ih, nun khal sim thotho.

Hivek inn sungsaang ahcun, fale pawl an fim ih, fimvar zet in an thangso. An mahte khal ramri nei in nunthiamnak an nei.

Bible in fale pawl nun sim daan hi ziang ti in in zirh (Heb 12:5-11).

Pathian in a fale pawl ziang tin a kilkhawi?  Pathian in a duhdawtmi fa cu nun a sim a ti (Heb 12: 5-11). Pathian in nun a sim ti tikah, nun daan in sim in zirh ih, ralrinnak thupi zetzet pawl in pek tinak a si. In vuak in thawi tinak a si lo. Ramri nei dingah nun in sim in zirh tinak a si.

⁵Pathian in a faate pawl nan hnenah thapeknak thu a lo simmi kha nan hngilh zo maw si? “Ka fapa, Bawipa in nun a lo sim tikah ziang siar loin um hlah aw. A lo kawk tikah na tha nau hlah. ⁶Ziangah tile Bawipa in a duhdawtmi cu nun a sim ih, fa ih a cohlanmi cu a hrem ṭheu a si. ⁷Harsatnak cu nan pa ih pekmi nunsimnak a si tiin tuar hram uh; ziangah tile harsatnak nan tonmi hin Pathian in a faate ah a lo ruat a si ti a langter. A pa ih nun a sim lomi fa a um dah keel maw? ⁸A faate pawl a hrem ih nannih bul a lo hrem lo ahcun faate ngaingai nan si lo, fasawn nan si ti a sawh ding. ⁹Leilung tlunih kan pale pawl ruathnik uh; in hrem nain kannih in kan upat. Nunnak kan ngah theinak dingah Thlarau lam kan Pa ih thu cu ziangtluk in so thlun sinsin ding kan si? ¹⁰Kan pale pawl cun a ṭha tiin an ruat ruangah caan tawite sung in hrem; sikhalsehla Pathian cun kanmah ih ṭhatnak hrangah le amah ih thianhlimnak kan ṭawm theinak dingah in hrem a si. ¹¹Hremnak kan tuar tikah kan tuar laiah cun kan lung in awitertu si loin kan riah in siattertu a si. Sikhalsehla a hnuah cun cubangtuk hremnak in nunsimnak a tongtu pawl cu an nunnak ah daihnak le dingnak laksawng an ngah ding.

Pathian cu kan sualnak hawltu a si lo.

Mihrek khat in Pahtian in nun a sim tiah kan ti tikah, Pathian in a thawi/a vuak tiah kan ruat. Culole, Pathian cu kawlram Palik (police) vek in kan ruat ih kan sualnak pawl cazin ah a ngan ih, kan sual man in hremtu vek ah kan ruat. Cumi ruahnak cun, Pathian cu mi duhdawttu hnak in mihremtu vek ah kan mitthlam ah a cuan ter. A taktak ahcun, Pathian cu in duhdawt biktu kan nulepa vek in in duhdawt ih lam in hruaitu a ti. Kan sual pang hman ah duhdawtnak thawn in cohlangtu a si. Kan sualnak in ngaithiamtu a si.  Baibol sung ih, fapa tlanhlo pai’ thuanthu kha kan zoh tikah, a sual zet nan, a pa ih a duhdawtnak cu fate khal a zor hlei lo. Himi thuanthu hi fapa tlanhlo pa ih thuanthu hnak in a pa ih duhdawtnak a thuk zia Bawi Jesuh in in sim duhmi a si. Cumi thuanthu hmang in Pathian in kan sual tikah, kan sualnak hmuahhmuah in ngaithiam thei daan fiangte in in sim.

Billy Graham in a fanu nun a sim daan

Billy Graham in a fanu nun a sim daan TV sungah hi ti in a sim. Ka fanu in tlangval a nei. A tlangval neihmi kha zuu in ringringmi a si ih, ziaza tha a si lo ti kan thei. Curuangah, ka fanu kha a nu thawn himi pa thawn tthi aw lo ding in nun kan sim, kan zirh. Kan leem. Asinan, a duh lo ih ka tthi thotho ding tiah in ti. Cu tikah, kan nih in kan timi cu, Kan duhdawt bikmi kan fanu, na va umpi duh tattak ahcun feh ko aw. Asinan, na nunnak ah harsatnak tumpi na tong ding. Harsatnak na ton tikah, hngilh hlah, na nulepa in kutza pharh in kan lo hmuak ringring a si timi hngilh hlah tiah kan sim ta. Kum 2 an umawk hnu ah, kan sim vek ciahcun, kan fanu cu a thin a har ih, beidong in tikcu caan a hmang. Vei khat cu “ka pa ka ra kirsal ding” tiah  phone ii set tikah, ka fanu, “Ra kir aw. Ka lo hmuak tiah ka ti ih lungawi le raltha zet in a ra kir” tiah a sim. Himi vek duhdawtnak le cohlannak hi Pathian ih in duhdawtnak le cohlannak cu a si tiah a ti. Billy Graham in a fanu nun a sim daan a tawi zawng in kan zoh a si le, a fanu kha thil thami le tha lomi a sim ih, a cang theimi thu pawl khal a sim ralrinnak a pe theh ta. Cu thehhnu ah, a tha lomi hril lo ding ah, a leem. Asinan, a funu in a duh lo tikah, a duhmi a hril ter ih duhdawtnak thawn a tlun sal ding a rak hngak hlap thotho.

Pathian ih nun in sim daan

Pathian in nun in sim tikah, dimte’n awka neemte in kan thinlung sungah nun in sim thok. Kan duh lo tikah, ka fa himi cu tuah hlah aw, siatralnak na tong ding tiah a leemte’n in leem thotho. Kan duh lo tikah, kan nunnak ah harsatnak in tuar ter. Himi hi si, Paul in nan sung ih thlarau thianghlim mei alh kha mit ter hlah uh tiah in sim (1 Thess 5:19). “Thlarau Thianghlim mei alh mit” timi cu Pathian thlarau in nun in simmi kha kan el (hmit: quench) ta hrat ih kan mai duhmi lawng kan tuah/thlun timi hi a sim duhmi a si. Cu tikah, harsatnak kan tong ih, cui harnak cu a mai in pekmi a si lo. A thu kan ngai lo ruangah, sualnak kan tuah ih cui sualnak ih a rah a si theu. Cu ti ih ka ti tikah, harsatnak hmuahhmuah hi kan mai sualnak ih rah a si tiah ka tinak a si lo. Thuthimnak ah Job tla khi zoh hnik uh la, a sual ruangah a si lo. Satan ih hniksaknak a si. Tu ih ka simmi harnak cu Pathian ih nun sim kan duh lo tik ih kan tonmi harsatnak a si. Cu ti ih harsatnak kan ton tikah, Pathian in ka fa ka lo simcia kha. Ka ttongmi cu pelh kel hlah khaw maw tiah thu in sim. Cu ti in, ka palh ngai tiah, ngaithiam kan dil ih kan kirsal tikah, kan thinlung, taksa le kan ningzahnak ding thu pawl hmuahhmuah khal a tha bik in a rem theh ih, in dam ter sal a si (1John 1:8,9). Curuangah, Pathian ih nun sim daan cu, sualnak kan tuah zik tikah, himi cu tuah hlah aw tiah ralrinnak in pek. Kan ton dingmi khal in sim theh. Cu theh in, sualsir in kan kirsal tikah, lungawi te in in cohlang. A dingfelnak le a thianhlimnak cu duhdawtnak in a thlun ringring  a si. T’ong dang in kan tile, Pathian cu a daan (disciplines) khal in sim. Cui a daan kan thlun duh lo lai caan khal ah a duhdawtnak  (love) in kan nunnak in cawi in pom ringring thotho ti khal in sim a si.

Thunetnak

Fale nun sim tikah, a tel ringring dingmi thu pahnih cu: daan (disciplines) le duhdawtnak (love) a si. A pakhatnak ah, na fale na duhdawt taktak a si le, a nun daan ding (disciplines) zirh aw. Nun na sim tikah, cumi cu na tuah le cu vek na thleng ding tiah a ton dingmi pawl tiang na theih zat sim zirh aw. A sual tikah, mi hmai ah si lo in, a mah lawng a tuahmi a sual zia thu sim aw. Mihmai ih na sim a sile, a ning a zak ding ih, na par ah a thin a heng ding. Mirang ttong cun, “put some boundary” tiah an ti. Asullam cu, a nunnak hrangah ramri neih ter aw. Ramri nei lo in a nun pang a si le, luantuk in a nung pang ding. Cui ramri cu ziang tin kan tuah sak ding? Pathian ih duhmi cu ziang a si timi Bible sung ih thuanthu pawl hmang in sim aw. Cun, ziangkim ah Pathian thu a ron thiamtu si ding in an nauhak lai in thlacam pi aw. Thlacam cu Pathian thawn thu ruahrel khawmnak a si. Pathian tihzah le thungai cu a nunnak ih tahfung re ding in sim aw. Cutik ah Pathian ttongkam thlun in amah te ramri nei ih nung thiamtu ah a hung cang ding.

A pahnihnak cu na duhdawtnak langh ter aw. Pathian ih duhdawtnak cu hi vek a si timi na nunnak in langh ter aw. Na simmi pawl lakah, a thupi bik ih na sim dingmi cu Pathian cu kan sual hawltu si lo in, sualnak thangsung in kan luat theinak ding ah, in bawmtu, in cohlangtu le kan sual in ngaithiamtu le in duhdawt biktu (love) a sinak khal nan nunnak in langh ter aw la simfiang aw. Minung tisa ih um kan si lai tikah, tisa duhnak caan khatkhat cu na fa a feh pang caan a um pang thei. Cutikah, ka sual ngaithiam in in ttanpi duhtu Pathian le ka nulepa, rualpi pawl an um timi thinlung a neih ahcun, a ruahsannk hlo lo in, nunnak lamzin ah a kir sal ding. 

Cu ti in an nun daan ding ah Pathian ih daan thatha thawn rii na khiah sak ih, an sual tikah, duhdawtnak thawn an sualnak sung in luat ding in  na bom tikah, a thok ahcun, na fale in an lo hua men ding. Asinan, a rei hlan ah, “Ramri nei ding in nun in rak sim ruangah kan lungawi tiah an lo ti leh ding.” Mirang cun, short time pain but long time joy timi huatnak le harnak cu caan tawite sungah na tuar ko ding nan, na lungawi caan cu caan saupi a si leh ding.

Freedom From Deception

• Ex. 32:1 When the people saw that Moses delayed to come down from the mountain, the people gathered around Aaron, and said to him, “Come, make gods for us, who shall go before us; as for this Moses, the man who brought us up out of the land of Egypt, we do not know what has become of him.”
  
• Ex. 32:2 Aaron said to them, “Take off the gold rings that are on the ears of your wives, your sons, and your daughters, and bring them to me.”
  
• Ex. 32:3 So all the people took off the gold rings from their ears, and brought them to Aaron.
  
• Ex. 32:4 He took the gold from them, formed it in a mold, and cast an image of a calf; and they said, “These are your gods, O Israel, who brought you up out of the land of Egypt!”
  
• Ex. 32:5 When Aaron saw this, he built an altar before it; and Aaron made proclamation and said, “Tomorrow shall be a festival to the LORD.”
  
• Ex. 32:6 They rose early the next day, and offered burnt offerings and brought sacrifices of well-being; and the people sat down to eat and drink, and rose up to revel.
  

In the wilderness, the Israelites happened to put their trust in Moses rather than God. When they thought that Moses disappeared, there came backsliding and corruption.

When people put their eyes on man, there are three consequences:

1. They will spend their times and belongings for meaningless life (Ex. 32:2-4).
2. They celebrate their lives in worldly manner (Ex. 32:5)
3. They are committed to other God (Ex. 32:6).

Freedom from deception: In order to be free from any deception from this world: 

1. Be humble before God 1 Pet 5:5,
2. Love the truth/the word of God, 2 Thes 2:9
3. Fear the Lord, Ps 34:13-14.
4. Make the cross of Jesus the center of your life 1 Cor 2:1-5

Innsang Nuam Hminsinnak Panga Pawl

Cangantu: Rev. Run Cung Mang

Thuhmaihruai:

Innsang timi hi a thupizet ih innsang nuam timi hi a thupi sinsin. Innsang nuam a um vekin innsang nuam lo timi a um ve. Innsang nuam le nuam lo timi hi damnak, mawinak le lennak lawng parah a tthum aw thluh lo. Pathian theitu, Khrih lungput neitu le tthanso duhnak thinlung thianghlim neitu nu le pa le fahniang le pawl um khawmmi innsang si a ttul. Culawngah a tthangso thei. Pa lawng in Pathian thei, nupi fanau zuva thluh tivek, Nu lawngin thlarau mi si in pasal fanau pawl cu leitlun tisa duhnak ih nomceen rero men tivek, le fanau pawl lawngin piantharnak co in nu le pa hmuah Pathian le biakinn zianghman ih ngaihsak remrem lo tivek khi innsang nuam a um thei  dah lo. Pa, Nu, le Fanau zate'n Jesuh Khrih sungah nuntharnak nei in khat le khat duhdawt awton le thungai aw hluarhlo ih um khawmnak hmun cu leitlun vanram a si.

Hminsinnak   1: Riantu Siduhnak Lungput

Innsungsang ah Pasal in simaw, Nupi in simaw duhdawtnak taktak le tangdornak lungput thawn ziangmi ka lo tuah sak ding? timi sut ih riantu si thei cuh ahcun a nuambikmi innsang a si aw thei ding. Cuti si loih kei ka thupi sawn, keimai' hawl le ttuanmi, keimai' thu in thu feh seh, kan ti sung poh cu entai awknak le buainak a suak ringring ding. Innsungsang ah nomnak taktak a um thei lo ding. Paul in Khrih nan upat vekin pakhat le pakhat upat hmaizah awknak nei uh in ti. Midang hrangah nun cuh awk cu innsang nuam sinak thuthup a si.

Hminsinnak:      2: Nupi le Pasal karlak ih theihthiam thuk awknak

Nupi le Pasal nulepa karlak ah pakhat le pakhat theihthiam awknak hi a thupizet. Fala le Tlangval silai ih pakhat le pakhat theihthiam awknak ihsin hram a thok ih nupi le pasal si hnu ah pakhat le pakhat theihthiam awknak a thuk deuhdeuh a ttul. Pakhat ih sinak le duhnak pawl theithiam awton in duhnak thlun awkton a thupi ngaingai. Pathian ih duhzawng le duh lo zawng theihthiam a ttulzet. Tlaksamnak tete tla theihthiam aw in pakhat le pakhat zawi awton ding le ngaithiam awk ding a thupi ngaingai. Nupi le pasal pakhat le pakhat zawnruah awknak a um lawngah lungawinak le nomnak taktak a um thei.

Hminsinnak: 3. Fahniang pawl Fimthiamnak Zirh ih Kaihruaitu Nu le Pa

Fahniang pawl an thinlung put le an thluak khuaruah daan fimkhur le tthangso dingin fimzirhnak le cawmdawlnak hi a thupi ngaingai. Kawl thufim pakhat ah "fahniang pawl an tthat lo asile nu le pa ih lu parah mawhphurh a si" ti'n a um. Pathian pekmi thluasuah ro sunglawi pawl lakih mankhungbik fanau pawl taksa in siseh, fimnak in siseh an tthanlen pitlin vingvo ih Pathian hmai le mipi hmaika ih duhnungza mit-hmai ttha ngahtu an si le nu le pa hrangah hmaihngalnak le thluasuah tumpi a si. Curuangah leitlun fimnak, vanlam fimnak buk awton ih an ngah theinak dingah fimzirnak hmun ah kaihhruai thiam ding le Pathian Thu zirnak hmun ih fehpi thiam ding a thupituk. Fanau pawl fimzirnak ih a kaihruai thiamtu nu le pa cu mi thluasuak le mi lungawi an si.

Hminsinnak: 4. Nu le Pa Upat thiamtu le Thungainak nun neitu Fahniang pawl

Thungainak nun neitu fahniang le pawl umnak innsang cu innsang nuam a si. Mah hringtu le cawmtu nu le pa upat ttihzah thiamtu fahniang pawl cu mi thluasuak le mi lungawi an si. Inn sungsang ah siseh, biakkhawmnak  hmun ah siseh, hmuntin ah nu le pa ih thusim ngai in fimkhurzet ih nungtu fahniang pawl cu ningzah mualphonak an tong lo, an sullam a tluang ih ziangtinkim ah hlawhtlinnak an ngah. Fimthiam an zir an cawnnak ah siseh, pum cawmnak  hrangih hnattuan an neihnak ah siseh, an hmui a ngil ih thluasuah an dong thei cuang. Nu le pa an duhdawt, an cawmdawl ih hringtu nu le pa ih thluasuah le sersiamtu Pathian thluasuah an dong. Lei thluasuah le van thluasuah a pahnih in an dong. An rualpi lakah zohso mi an si ih cawn tlak le zohtthim tlak an si. Innsungsang dinhmun khaisangtu khal an si.

Hminsinnak: 5. Duhnungza Hruaitu Pitling simi Pasal pawl

Innsungsang ih lubik cu atlangpi thu cun Pa asilole Pasal a si. Kum zabu 21 san, IT san le Computer san khalah ram picang le miphun cangkang Nitlaknaklam ram le Nisuahnaklam ram tin ah Pa hi lusutubik le innsungsang ih ttuanvo neitubik cu a si aw ringring ko. Curuangah innsang ah Pa hi kaihruai awknaklam ih thiamtu, thil tawlrelnak (management) thiamtu asile a innsungsang cu a nuam, a remcaang in a tthangso ngiaingiai ding. A nupi fanau kha thuneihnak in a uk ih uktu si loin duhdawtnak thawn a fingkhawi, a khaisang ih a kaihruai thiamtu pa a si ding a thupi ngaingai. Keimai' thu lawngin thu feh seh titu pa si loin tangdornak thinlung a nei ih innsungsang thawn innsang khawm nei in le khukbil ih thlacamnak nei theitu, innsang mi pawl ih hmuh daan le ruah daan a hmu thiamtu, duh daan a sut hlam thiam ih a tthabik ih fehpi thiamtu pa, pitling (mature) hruaitu a si lawngah a innsang cu a kilkip in a tthangso dingih innsang nuam le mawi a si thei ding.

Thunetnak:

Innsungsang dinsuahtu hi Pathian a si. Innsang nuam le famkim si dingin fanau thluasuahtu le sum le saw, thil le ri, neih le siah tampi thluasuah hmuifu burhtu tla Pathian a si. Innsang ah Pa in amai' ttuanvo a neh, Nu in amai' ttuanvo a tlinh le fanau pawl in anmai' ttuanvo an ti thei cio ahcun cuih innsang cu innsang nuam le tthangso an si tengteng ding. Pathian hmin a sunlawitertu, Pathian uknak ram a karhzaitertu le Khrih le miphun hrangah mi tthahnem, mi ttangkai le Pathian sunlawinak langtertu zohtthim tlak innsang an si ding. 

Hminsin:

November thla "Khristian Innsang Zarh Karkhat (Christian Family Week)" sunloihnak ih nganmi cahram (article) a si.

Reference:

-Gary Chapman,"Five Signs of A Loving Family":1997 (New York Time Bestselling Author)