4.1. Duhdawtnak Phun Thum

Greek ttong in duhdawtnak hi phun thum in an sim ih cumi cu a tanglam ah ka run sim fiang duh.

4.1.1. Nu le pa Pawlawk Duhnak Ah Hram A Bunmi Duhdawtnak (Eros love)

Greek ttong in duhdawtnak timi an sim tikah phun khatnak cu eros tiah an ti. Asullam cu nu le pa pawlawk duhnak kha hram bun ih duhawknak khi a si. Nu le pa pawlawk duhnak le hiarnak cu a hram thok te in Pathian ih a sersiammi a si. Himi tile sa ih hiarawknak hi innsaang nuam si theinak hrang ah Pathian ih thluasuah a pekmi a si. Bible khal in Pathian ih sersiam a sinak thu a sim. Asinan, innsang nuam timi cu ti le sa ih hiarawknak lawng in a cang thei lo. Nu le pa duhhiarawknak cu a thianghlimmi a si ih, tthit um awk hnu ih hman ding a si zia khal Bible in a sim. Asinan, Pathian in ralrinnak in pek theu. Ziang ruangah tile, duhhiarnak hi a sual ruangah si lo in, minung kan mah in kan hman sual sawn ruangah a si.

Seemtirnak 2:24-25 sung kan zoh tikah, tthitumawk tik ih nu le pa pawlawknak cu pum khat sinak nun daan a si zia khal in sim, “Cuti a si ruangah mipa in a nu le a pa a taanta ih a nupi thawn an kom-aw. Cutiin tisa khatah an cang. An pahnih in lawngfangkheh in an um nain ningzah an thiam lo.”

Bible in nu le pa pawlawknak cu a thianghlim zet in tthit-umawk hnu ih hman ding a si zia khal in zirh. Thufim 5:15-19 sungah,

15. Na nupi parah rintlak in um awla,
Amah pakhat lawng kha duhdawt aw.

16. Midang nunau thawn na neih mi faate tla in,
Na parah ṭhatnak zianghman an tuah lo ding.

17. Na faate tla cu nangmah bawmtu dingah an ṭhang dingih,
Mi phun dang cun an lo bawm lo ding.

18. Curuangah na no lai na nupi parah lungawi awla,
A parah lungawi nomnak nei aw.

19. Cun amah cu zukneng bangin a mawi mi le duhnungza a si.
A duhnunnak cun a lo lungawiter dingih,
A lo duhdawtnak in a lo zeel ding a si.

Hi ca tlang kan zoh tikah, Bible in tthitum hnu ih nu le pa pawlawknak cu a thami, a mawimi, le a sunglawimi a si zia a sim. Asinan, a poimi cu mi tampi cun, nu le pa pawlawknak cu duhdawtnak ah a thupi bik tiah an ruat. Nu le pa pawlawknak cu meisa vek a si. Meisa cu rawlsuannak le na taksa hlum ternak ah na hman ahcun, a tha tukmi a si. Pathian in nu le pa pawlawknak cu tthit-umawk hnu ahcun, meisa bang in nasazet ih alh ter ding in duhsak. Asinan, tthit-umawk hlan ziang tik caan khal ah meisa cu alh ter in hmun kip ah, meisa na ur ahcun, na nunnak ah buainak na tong ding.

Tuisan ah, minung tampi in nu le pa pawlawk lawng ah kan duhdawt-awknak a hnget sin thei ding timi ruahnak an nei ih, tthitumawk hlan ah cui meisa cu an mai tisa duhnak lawng thlun in an alh ter hluahhlo tikah, sir awknak tampi an tong. Ka khuaruah a rak tawi tuk si cu tiah an sir aw sal theu. An nunnak ah duhdawtnak taktak hmu ngah lo in an um ih, duhdawtnak taktak an hal sin sin theu. Asinan, meisa cu meisa alhnak ah le a caan kim tik ih alh ter a si ahcun, a sunglawi bikmi pakhat ah a cang ringring. Asinan, duhdawtnak cu nu le pa pawlawknak lawng hi a si lo.