Thawhsalnak Ruangih Kan Hlawknak (1 Kor 15:12-20)

By San No Thuan

Jesuh hi thihnak neh in a thosal zo timi hi Christian zumnak ih a hrampi a si. Cumi a zumtu pawl cun, kan nunnak ah, zumnak cak in neih ter a si. Jesuh hi thosal lo bang sehla, Khrihfa khal kan um thei lo ding. Kan um hman ah, kan thangso thei lo ding. Khrihfa a ti aw ko nan, a thosalmi Khrih a si zia zum ve lo pawl cu, Christian nun khal ah an thangso thei hrimhrim lo ding. Ka Christian nun thansonak I rak dawn khamtu bik cu, a thosalmi Khrih a si zia thu, thungai thlak ih ka rak ruah lo ruangah a si ti ka hmu fiang. Jesuh Khrih thihnak in thawh ter sal si lo sehla tiah Paul in a simmi pawl hi, kei in thawh ter a si ruangah, kan hlawkmi pawl thu in kan run sim duh.

1. Zumnak hnget khoh in neih ter. Dungthluntu pawl hnen ih a rak phuang awtu Jesuh cu kan zummi a si.

c. 14. Cule thihnak insin Khrih thawhter lo a si ahcun, thuthang phuan ding zianghman kan nei loih, zum ding khal zianghman nan nei lo.

Peter kha a hlan ah tihhrut zetmi asinan ziangah ral thatnak a nei sal? Peter in a mit rori in an hrem lai, a phatsan lai pawl a thei theh. A hmu theh. Asinan, ni thum hnu ah Jesuh a tho ih, a mah rori in, a hmu. Nga an kaihnak khal ah Jesuh cu a va feh ih, (John 21:6f) an vorhlam ah a vorh ter ih tampi an kaih ngah tikah, Bawipa a si ti a thei. Jesuh in hi pawl hnak in ii duhdawt sawn maw ti pawl an biak aw, nga le sang tla an ei tlaang lai pawl a hmuh theh hnu cun (John 21:15ff), Peter cu a ral a tha tuk thlang ih, thihnak tiang tih lo in thu a sim.

Thomas khal in a zum thei lo tuk ih, Jesuh in a hma pawl a tham ter (John 20:25ff). Cuti vek thotho in, Jesuh in “hmuhsaknak tampi a tuah” nan, ngan theh suak a si lo (John 20:30). Cu theh hnu cun, a zumnak a hnget khoh tuk ih, an thih tiang Bawipaih hna lawng an tuan.

A tui na zummi cu Peter hnen ih a phuang aw tu, dungthluntu pawl hnen ih a lang ih, a kut le ke khal a tham ter, an mithmuh rori ih rawl tla a ei (Luke 24:36-43) ih a phuang awtu Jesuh na zum a si. Curuangah, cui a nungmi Jesuh ih thu cu na phuan reromi a si (c. 14a). Curuangah, kan zummi Bawi Jesuh cu thihnak neh ih thosalmi, dungthluntu pawl ih hmuhmi le thammi Pathian a si ti hi cing ringring aw.

2. Thutak a phuang ngahtu kan si.

c. Cuih tlunah Pathian ih thu ah thuphan perah kan cang ding . . ..

Jesuh khrih tho hlah sehla, Pathian thu kan simmi le kan thlunmi pawl hi thuphan sim le thlun kan si ding. Asinan, a tu cu Jesuh a thawhsal ruangah, kan simmi le kan phuanmi cu van in a rungtummi Pathian fapa Jesuh ih thutak, nunnak le lamzin dik (John 6:14) thu kan sim kan phuang rero a si. Tuisun ah a suak ih, thaisun ih a ziammi minung ruahnak thu menmen phuangtu kan si lo. Jesuh ih a thawhsal ruangah, Jesuh thu kan phuanmi le kan thlunmi cu thutak le nunnak lamzin thu pawl an si.

3. Sual ngaithiamnak cotu kan si.

c. 17. Khrih thawhter a si lo ahcun, nan zumnak hi a kawlawngpi a si ding ih nan sualnak sungah a taang hrihmi nan si ding.

Khrih thawhter sal a si ruangah, kan sualman cawhkuan pawl tla kan parah thleng lo ding in, cross ah a mah in in tuar sak theh. A thosal ih, nitin kan sual pangmi pawl tla Pa Pathian hnen ah sual ngaithiamnak in dil sak ringring a si. Curuangah, misual kan sinan, midingfel/sual nei lo ah Pathian in in pom ih, a fanu le fapa ah in cohlannak cu a si. Sual man cawhkuan tuar dingah, a taang laimi ka si nawn lo ti thei in, mi luatmi na sinak amai hrangah hmang aw.

4. Zaangfahza bik si lo in, dawt dingza bik kan si.

c. 19. Khrih sungah ruahsannak kan neihmi hi khuitawk hman thleng loin hi leilung tlun kan nunnak hrangah lawnglawng a si ahcun, leitlun khawvel minung lakah hin zaangfakza bik kan si ding.

Khrih thosal hlah sehla, zumtu in Pathian sunlawinak hrangah tiah kan ti ih, kan pekmi, kan tuahmi le kan zuamnak pawl hmuahhmuah hi kan pupa tong ih, “suncaw heu le cang pal cim” kan si ding. Asullam cu, suncaw le heu, mai dawlmi cang le pal cim lala si, thathnemnak um lomi nunnak neitu ah kan cang ding ih, zangfakza taktak kan si ding. Asinan, Khrih a thawhsal ruangah, zaangfakza lamlam, dawt dingza bik ah kan cang. Ziangah tile, kan nunnak cu kanmai sunlawinak hawl nawn lo in, Pathian sunlawinak hawlnak ah kan can le nunnak kan hmang. Kan mai uar awknak le langnak ding (popularity) duhnak ihsin, a tu cu, Bawi Jesuh hi midang in ka nun ah ziangtin an hmu thei pei timi tumtahnak thawn kan feh tikah, cui nunnak cu man nei zetmi nunnak ah kan nunnak cu a can ter a si.

Paul khal in “A thinglamtah parah kei cu Khrih thawn thahmi ka si zo. 20. Curuangah, a nungtu cu kei ka si nawn lo; ka sungah a nungtu Khrih sawn asi. Atuih ka nun hi cu I duhdawt ih ka hrangah a nunnak a petu Pathian Fapa rinnak in ka nung a si” (Gal 2:19,20) a ti. Nunnak ih sullam (the meaning of life) cu inn tha le lo tha neih kha a si a ti lo. Khrih ih hmuihmel, lungput, le ziaza kha kan nunnak ih lang ter ding hi a si tiah a sim. Cuti ih a nungtu pawl cu, zoh ringring uhla, “an dum na in iang an nei” tuk. Ziang vek te an si hman ah, Pathian tihzah ih nungtu pawl cu an mawi bik ko ee. An thuhla cu an thih hnu khal ah a hmui ringring.

5. Ruahsannak nung in pek.

c. 20. Sikhalsehla, thudik cu hiti in a si: Khrih cu a thihnak ihsin thawhtersal a si zo ih a thi ciammi pawl thawh ter an si ve ding ti theinak ah rah hmaisa bik aamahkhan a si.

Jesuh Khrih a thawhsal ruangah ah kan unau sungkhat thiciami pawl cu an thimen lo ding. Bawi Jesuh in ni khat nini ah ton khawm awk sal theinak in pe sal ding a si. Cui tlun ah, kan mah khal kan thih tikah, ruahsannak nei lomi bang tuk ih um ding in duh lo. Thihnak cu nun famkim, le duhdim nun hram kan thawhnak sawn a si.

Thunetnak:

Jesuh Khrih a thi ih a thosal zo timi zumnak tel lo in, Christian timi kan um thei lo. Kan ding thei lo. Kan karh thei lo. Zumnak lam khal ah thu ngai thlak a theih lo. A thangso thei lo lawlaw a si. Tuisun ah, na biakmi zo a si ti na thei zo maw?

1. Na biakmi Jesuh cu thihnak neh in a thawhsal hnu ah dungthluntu pawl hnenah a phuang lang aw rero tu, a nung Pathian dik, Pathian hman a si.
2. Curuangah, a thu na sim, na thlunmi cu thudik simtu le thlun ngahtu na si.
3. Thawhtersal a si ruangah, na sualnak pawl hmuahhmuah ngaithiamnak a lo tuahsak theh a si (Rom 4:25). Tuisun ni khal ah a lo tuahsak a si.
4. Zaangfakza kan si nawn lo ih, dawt ding za bik kan si. Ziangah tile, nun daan in thiam ter. Mai sunlawinak, mai larnak pawl kha hlon ta tahrat in, Khrih ih sunlawinak le Khrih sawn lang ding ih nun a si. Cumi in nun daan in thiam ter.
5. Ruahsannak nung khal in pek. Thihnak hi nun hram thawhnak sawn a si timi in theih ter.