James 4:6,
Thufim 6:16-19
16-19 Bawipa in a huat mi thil paruk a um,
A fih mi thil pasarih a um.
Puarthau mithmai,
thuphan pertu lei,
misual lo a thattu kut,
sualralnak lawng khuakhangtu thinlung,
thilsual tuah dingah a khul a rangtu ke,
thuphan per tahrat in thu theihpitu sinak,
unau pawl lakih harsatnak a suahpi ṭheutu pa,
Hi pawl hi Bawipa ih fih mi an si.
Caan tampi ah kan ton theumi cu mi pakhat in thil a tuah sual pang tikah, ka tuah sual pang, i ngaithiam aw ti lo in, midang sawn kha an mai sual bang tuk in a va puh ih, a mawhthluk. Cuvek nun daan zia cu a mu lomi le dik lomi nun caan ziaza a si.
A tanglam ih thuhla pawl hi mai palhnak cohlang duh lo in midang a mawhthluktu pawl an si.
Thil kuattu: “Hi cauk pawl hi book-rate (cauk kuat daan man) in le airmail kuat ka duh.”
Zung hnatuantu: “Airmail in ee? Ka tuah dah lo.”
Thil kuattu: “Book-rate airmail kuat daan a um lo na tinak maw asilole, a dang counter hnen ah ka feh tul na tinak si?”
Zung hnatuantu: “Silo, ka tuah dah lo. Kei cu menmen te in lawng cauk pawl ka kuat.”
Thil kuattu: “Book-rate airmail kuat daan a um ko ti?”
Zung hnatuantu: “Zohman in an tuah dah lo. Aman khal ziangzat a si ti ka thei lo.”
Zung hnatuantu ih thuthei lo ruangah, thil kuattu kha a thil tuahtummi sual bangtuk in a thin a har ter. Zam rang zet in, midang thuthei tu ka lo suh sak ding maw ti sehla, cun, ka tuah dah lo ih, ka sual pang ding ruangah, i ngaithiam aw tiah zaangfah dil sehla, a remcaang ko ding nan, ka thiam lo ti a duh lo.
Monu: “Tunai te ih ka pang par man ah $ 75.00 man bill a ra lala. Khami pangpar tom cu kan a dang pangpar pawl man ah a tel theh zo ih ka pe theh zo nan.”
Pangpar zuartu: “$ 100.00 man asinan, ka lo thum ih $ 75.00 in ka lo pek kha na cing ko lo maw? Cu mi kha, ka hnatuantu in an rak thei fiang lo a si ding.”
Monu: “Asinan, a dang cazin sungah himi man tla a tel zo ih, ka lo pe theh zo. Curuangah, ka pe theh zo ti aw?”
Pangpar zuartu: “Sisi, ka lo sim duhmi cu ziangah himi bill na ngah sal thei timi thu ka lo sim duhmi a si. Khavek in midang zohman kan pe dah lo.”
Monu kha kha veihnih rori a pangpar man ah bill a tuar. Asinan, pangpar zuartu in tongmi zoh tikah, kan lo kuat sual timi, I ngaithiam timi a hmang duh lo. Monu kha ziangtluk kan lo thum cumi hman lungawi na thiam lo timi lam ruat ding in a tong ti kan hmu. Pangpar zuartu ih tong dingmi cu, “A vei hnihnak bill cu, kan palh pangmi a si. I ngaithiam aw” ti sehla, thu a tluang theh ding nan, monu ih lungawi thusim thiam lo thu lamlam vek ah thu a can ter.
Thil leitu #1: “Ka rual, kha tin I tul lo in, I kian aw I tile ka lo kian thei ko si.”
Thil leitu #2: “Ka lo hmuh lo pi.”
Thil leitu #1: “I hmu lo nan, ziangtin I tul thei?”
Thil leitu #2: “I hmu khop lo ih a tho aa tla an rak um si hi.”
Thil leitu #2 nak in “Sorry, ka lo ti pang, I ngaihtiam aw” ti sehla, thu a tluang theh ding ih tlun ah ngaithiam a co thei ko dingmi kha a ti duh lo. Thil leitu #1nak sawn kha, thin tawi le mi tha lo ah a puh men.
Curuangah, thil kan tuah tikah, kan mai palhnak kha ka palh a si tiah ti ngam uh si. Kan sual pang tikah, hngal zet ih umtu si lo in, ka ti pang, I ngaithiam hram aw, keimah santlaih lo sokhaw tiah ti ngamtu kan si ahcun, kan kiangkap pawl khal an thin nuam ding ih, sual ngaithiamnak khal a luang ding. Cumi cu tangdormi le mi fim pawl ih nun daan a si.
No comments:
Post a Comment