Congratulations: Pa Yaw, Pa Pum, le Kawi Chum

Mizaan May 22, 2010 (Saturday) cu Princeton ah kan rualpi pawl Princeton Theological Seminary in MATS degree la ding an si ruangah, ka rualpa Thomas Cung Bik thawn Philly in kan va feh.

Degree latu cu an tam ngaingai. A zate in 210 hrawng in M.Div, MA, MATS, D.Min le Ph.D an la cio. Cumi sungah, kan rualpi pawl: Pum Za Mang, Chan Chum Hei, le Pa Yaw pawl tla MATS tluangte in an theh ve thei. Lungawi za ngaingai a si.

Degree peknak caan an vun thok cu, an awnmawi pawl an tum ih, Bawipa cu thangthat si ko seh tiah Choir an vun sak cu, "Pathian ih umpinak ka thinlung in an vun tep ngah sinsin." An hlasak le a nem, a mawi. An hla pakhat kan zate ih kan sakmi ka duh zetmi cu:

"Bawipa, kei tla na zaangfahnak sungah i cawi ringring ti ka thei. Na duhdawtnak theithiamtu pawl in Siangpahrang vek in na rian kan tuan ding. Kan hmailam ah ziang bangtuk khal kan ton hman ah, harsatnak sung le mitthli tlaknak sung khal ah, nangmah lawng kan lo rian ding"

tiah hla kan sak cu ka hmul hmuah a tho theh. Ka mithli tiang a vung hal.

Degree latu pawl lak ah mipi khal ih an lungawipi bikmi cu mirang fala mitcaw nute, uico in a fehnak a hruai cawp. Cunu in M.Div degree a ngah suak vemi a si. Mitcaw rori in M.Div ngah ko a zuam thei cu aw tiah thazaang ka rak ngah zet.

Degree laktu pawl an rualrual in an vun thlun awk taktak cun, thlacam ka thok. Ka thlacammi cu "Bawipa, kei khal sunglawi zet in Ph.D lukhuh thawn feh theinak i pe hram aw. Asinan, Ph.D degree i lak ter ahcun, cumi thawn a mil awmi, fimnak thiamnak le theihnak i pe hram aw. Ka nunnak zate in le ka tikcu caan zate in, nangmah lo tihzahtu le na thupekmi lawng riantu i si ter hram aw" tiah thla ka cam.

Commencement service kan theh tikah, Princeton ih ummi Pu Za Bik Thang le Pi Par Tha Hniang (Zingzing nulepa) te in rawl thaw zet thawn an inn ah zaanriah in do. Zaanriah ei theh ah, khawmnak tawite kan nei ih, thu tawite in simnak ka ngah ve ih ka simmi cu:

1. Unau theipum seu uh si. Khrih ah unau kan si ruangah, kan neihmi sah khat hnih te tla hlawm aw in bawm aw uh si. Cucu, Bawipaih lungawinak a famkimnak a si.
2. Duhdawtnak lo leiba nei hlah uh si. Cu ti ih kan fehle, kan thinlung le taksa khal a dam ding.
3. Ziang ka si lo ti aw hlah. Na tongkam kamkhat hnih te thawn midang tha pe aw, ttanpi aw. Cutin, midang ih nunnak na tung ding thei ding sokhaw tiah thu ka cah ta.

Rawlei theh in Philly ah kan ra tlung ih zinglam 12:45 a.m. hrawngah inn kan thleng.