Zuamawknak Tuah Hi A Sual Maw?

Ka rual Christian apuih le zatein,  

Mino te na si nan, hivek thu tha zet na ruah thei cu ka lo lawm zet. Kan dung zumnak thu na nganmi khal thazaang ka rak ngah zet. Kan dungah khan "lei daan ih pawlkomawknak cu fehsual liberal pawl ih daan" tiah na ti lai ah, Laimi cu pawlkom aw sawn ding kan si. Christian kan si hnu ah Lo zin hman ah feh tlaang thei nawn lo ih kan um hi kan Pathian thu theih daan kan ruah sal a tul. Kan pawlkom aw lo tukmi hi a tha lo tiah ka lo let dah. A tu ih, na canganmi sungah, Christian pawl cu Pathian thu sungah pawlkom aw ding kan si tiah na ti ih ka lungawi zet. Himi hi Laimi ih kan ttul tukmi Pathian thu a si. 

Na cangan a tha zet ka vun ti lai ah, a tanglam ih na cangan betmi te ka vun siar tikah, thu tam nawn i ruah ter: 

"Amahlawngte, thiamsawn cuhaw tahratin zuamaw ciamco khi cu Bible ah a rak um lo rair. Bible um lomi thilpawl, zumtu kan pawlkawmawnak ah kan telh, kan hmanguar a si ah cun , hi ti te in tluangtlam(simple) takin ka vun sang hngai ding 'Liberal thuphan pawl ih tuahmi pawlkawmnak' a si ka ti ding."

A tu ih na ngami thu ka siar tikah,  thu ka suhawkmi cu pawlkomawknak neih tikah, "Zuamawknak tuah hi a sual maw?" ti hi a si. Bible sungah teh a um maw ti tla ka vun sut aw. Kannih Baptist pawl hi kan pawlkomawk tikah, hla, Bible siar le cangan zuamawk ti pawl a phunphun zuamawknak uar zet pawl kan si ih, kan feh sual teh a si pei maw ti pawl ka ruat hruthro. 

Asinan, zuamawknak tuah hi a hmaan bik a si lo hman ah, a sual a si ce lo ti ih ka ruahnak lo hlawm ka duh. 

1. Bible ca in zuamawknak neih ding hi tha in pe maw? 

A tanglam Bible ca pawl ah Pathian thu ih tthangso dingah, Khrih banghnak lam ah zuam aw ding kan si zia Paul ih in sawmnak kan hmu  thei sokhaw. 

1 Cor 9:24-26

²⁴Tlan zuamnak ah mi tampi an tel ṭheu nain pakhat lawngin tlan zuamman a ngah ti cu nan theih ṭhehmi a si. Curuangah zuamman ngah suak dingin tlan uh. ²⁵Leh zuamnak ih a teltu hmuahhmuah in an zir laiah cun daan fekzet an thlun ih an taksa an sawizoi. Cutiih an zuam rero cu a vuai theimi pangpar kual lukhum meen ngah duh ah a si. Sikhalsehla kannih cu a vuai thei lomi pangpar lukhum ngah duh ah daan fektein kan thlun ih kan sawizoi aw ve. ²⁶Curuangah hmuitin thleng suak dingin ka tlan ih thli lak a thong meentu pa vek ka si lo. ²⁷Leh zuamnak hmunah tel ciar uh tiah midang ka sawm rero hnuah keimah riangri hnonmi ka si pang ding, ti phan ah ka taksa cu ka hrem ih ka uk a si.

Heb 12:1

¹Kannih khal hitlukin a tammi thutheitu pawl in mero bangin in kiil ruangah kan fehnak lamzinah in dawnkhamtu thil pawl kha hlonin in ṭawnhremtu kan sualnak thilrit cu tlansan tahratin kan hmaiih a ummi tlanzuamnak ah taimak suah in tlan uhsi.

2. Zuamawknak hi ziangruangah kan tuah? 

Zuamawknak tuah hi a siatnak khal a um ding nan, a thatnak tampi a um ti kan hmuh ruangah a si. Zuamawknak kan tuah duh san biknak cu Pathian thu le hla ih tthangso sin dingah a si. 

Zuawmnak ih a siatnak um theimi cu, pakhatnak ngah duh tengteng ih ngah lo pang tikah pakhat le pakhat mawh thluk aw, thinheng le riahsia ih um, ningzak le thanau ih umnak pawl hi a dik lomi thinlungput pawl an si. Pathian kha a thinlung tak in a thabik ih thangthat ding hi a thupi bik an ruat theu lo. Kawhhran pakhat le khat kan thiam lomi kha thiam ko bawm aw tum lo in, mah lawng thiam tum duhnak lungput pawl hi a dik lomi a si. Bawmh a tulmi pawl bawm aw ding kan si. 

Zuamawknak ih A thatnak cu: 

1. Thlacamnak thawn a tha bik in timtuah ih Pathian hmai le mipi hmai ah thinlung tak in Pathian thangthat thei dingah a si. 

2. Mah le kawhhran le khuatlaang sungah Pawlkom aw hngai seh tinak a si. Hla an zir, an timtuah tlaang ih an pawlkom aw sinsin. 

3. Hla thiam lo pawl in, solfa thiam kan tul, hla phuah thiam kan tul, guitar tum thiam kan tul, keyboard thiam kan tul tiah an hmu aw ih, "Zir duhnak" a suah ter. Mino pawl in hla an phuah ih hla phuah an thiam tata. Poitulnak le sawmngiarnak (Demand and challenge) um lo in thansonak a cak thei lo. Kan mino pawl tthanso ter kan duhnak lamzin ah zuamawknak kan tuah thiam a tul ngaingai. 

4. Hla thar thatha suak seh ti duhnak. 

5. Pathian thu kha hla in siseh, Bible zohlo siarnak in siseh kan zuam aw ih, an thinlung le thluak sungah ciah neknek thei ding ih kan zirhawknak pakhat a si. 

Hivek thil thatha suah ter theinak caan hman daan (program) a tuahtu pawl hi "Liberal thuphan pawl ih tuahmi pawlkawmnak' a si ka ti ding"  tiah na timi cu kei cun ka ti ngam lo ding. Midang kha feh sual, liberal thuphan pawl ti ngam ding khawp in ka theihnak le ruahnak a kau thei hrih lo aw. 

Ka lungawi, 

Sanno

www.sannothuan.com

On May 16, 2012, at 6:13 PM, christian puih wrote:

                                                                                                                       Pawlkawmawnak

“Nannih khal kanmah thawn pawlkawmawknak nan neih theinak dingah, kan rak hmuh zomi le hna ih kan rak theih zomi cu nan hnenah kan phuang a si. Kan pawlkawmawknak cu PA le Fapa Jesu Khrih thawn a si” 1 John 1:3

Pawlkawmnak hi a thupi tuk. Taksa dan khal ah milai mahlawng um a thei lo, kiangkap senpi thawi um tlang ringringmi kan si tikah, mi va kawm lo a theih lo. Mi pawlkawmnak nei dah lo cu mi banglo thu a si ding. Cuvek thotho in, thlarau lam khal ah Pathian thawi kan pawlkawmaw(pehtlaihaw) ringring a ṭul. Pathian thawi pawlkawmnak kan thlahthlam a si ahcun, kan nun a ro in a cau tengteng ding. Kan pianthar veten kan thlarau le Pathian thlarau cu a pehzawmaw ko nan, nitin pawlawknak hi cu neihbet ringring dingmi a si. Veikhat neihmi pawlawknak kha ringlan a thei lo.

Cun, a hleicein zumtupawl khal Pathian thu thawi khat le khat pawlkawmnak hi kan neih tengteng dingmi a si. Cucu, Khristian nun mawi a si hleiah Pathian duhmi khal a si fawn. Asinan, cui kan pawlkawmnak cu Bible ih zirhdan(simdan) vekin si hram seh. Ziangahtile, zumtu kan bul hrampi(foundation) kan ṭhumawnak bikcu Bible a si. Bible hi a famkim tuk lawmman. Zumtlak le rinsantlak a si. Bet ding a um lo ih, hlon ding khal a um fawn lo. Curuangah, kan nun dan le zumtu khat le khat kan pawlawknak(pehtlaihnak) khal hi Bible sungah a famkim. Bible leng(pial)lam ih kan rak tuahmi thilpawl khi zumtu hrangah cun fehsual a rak si ziar. Asile, zumtupawl ziangvek pawlkawmnak so kan neih ding?

Sim zo bangin, Bible ih sim(zirh) dan vekih neih ding a si. Bible cun ziangtin maw in sim(zirh)?;

1). John 13:34 “ Nan hnenah thupek thar ka lo pe, pakhat le pakhat duhdawaw uh. Keimah ih ka lo duhdawt vekin nannih khal pakhat le pakhat duhdawaw uh”.- Zumtu khat le khat duhdawaw zetih pawlkawmnak nei ding kan si. Cucu thupek a si. Duhdawtnak ah cun thil tampi rel ding a um. Sinan, pakhat te lawng ka rel ding. Jesu in 'keimah ka lo duhdawt vekin' ti a si ruangah, anih(Jesu) cun a hlomi(mihlo/thlarau hlo) pawl in duhdawt ruangah in rundam, cross parah in hawlsuak. Cuvekin, kannih khal kan duhdawaw taktak a sile, thil dang ai-in mihlo(thlarauhlo) pawl duhdawtnak taktak thawn ṭangrual in kan hawlsuak tlang vualvo a ṭul. Cucu,zumtupawl  kan pawlkawmaw tikih kan ngai pawimawh bik dingmi a si. Zumtu kan damsan khal a si fawn.

2). Hebru 10:25 “Mi hrekkhat ti dan vekin, kan khawmawknak bansan loin, pakhat le pakhat thazang peawtawn uh si. Ni cu a nai deuhdeuh ti nan theih bangin thazang peaw sinsin uh.”-Zumtupawl kan lakih a tluk le a rilbahmi, thanaumi pawl le khat le khat thazangpekawtawn  ding kan si. Zumtu hmun khatih kan pungkhawmaw can khi thlarau lam ih thazang kan lak tlang dingih tikcu remcang zet a rak si. Curuangah, pawlkawmnak kan neih tikah thil dang ciamco ai-in kan zumtupi a riahsemi, a tlukbahmi, thanaumi pawl hi kan ti theitawk cio ih thazang kan pekawtawn ding a si. 

3). Dungthlutu(Apostolpawl) 2:46 – “Ni tin lungrual ten Temple kulh sungah an tongkhawmaw. Inn khat hnu inn khat ah sang an phel ih, lungawi le tangdawrnak thinlung thawn rawl an ei khawm.”-Zumtu hmaisa pawl khat le khat pawlkawmnak an neih tikah an neih thil thawhkhawm in ei le inn tlangnak an nei ṭheu. Curaungah, kannih zumtupawl hmunkhat ih pawlkawmawnak ah hin tirawl kan ei tlang inn tlang tikah khat le khat kan ngainaaw sinsin a si. Ei inn khal hi kan pawlkawmawnak ih telh dingmi thil thupi pakhat a si ve.

4). Dungthlutu(Apostolpawl) 2:47 – Pathian an thangṭhat ih, mi hmuahhmuah hnenin mithmaiṭha an ngah. - Zumtupawl hmunkhat te ah Pathian kan thangṭhat tlangmi khi zoh a mawi in duh a va nung so. Kan pawlkawmaw tikah Pathian thangṭhat tlangnak hi neih tengteng dingmi a si. Zumtu hmaisapawl cu tiih Pathain thangṭhatnak an neih tlang tikah zumtu thar tampi an karh vivo a si kha. Hivail in kan duhtawk hrih pei.

Curuangah, pawlkawmnak kan neih hi a rak sual lo lawlaw. Thil ṭha tuk le neih tengteng dingmi a rak si sawn. Asinan, zumtu kan si vekin kan pawlkawmawnak hi lei dan si loin Bible ih sim(zirh) dan vekin tuah ding kan si. Pathian thangtahnak hla sak, Bible zohlo siar le hlim le lungawi zetin Pathian thangthat tikih lam tivekpawl khal hi a rak sual lo lawlaw. Amahlawngte, thiamsawn cuhaw tahratin zuamaw ciamco khi cu Bible ah a rak um lo rair.

Bible um lomi thilpawl, zumtu kan pawlkawmawnak ah kan telh, kan hmanguar a si ah cun , hi ti te in tluangtlam(simple) takin ka vun sang hngai ding “ Liberal thuphan pawl ih tuahmi pawlkawmnak” a si ka ti ding.

Hminsin: Hi pawlkawmnak thu hi zawih Kawhhran khal ka bat hrimmi si loin, kan dung zumnak thu artical ka nganmi sung ih, pawlkawmawknak thu malte ka nganmi kha saya pakhat in a lungkim lo thu a rel ruangah, kim cang deuhin ka run betmi a si.

Christian apuih
Louisville KY
USA