Grow in the Grace and Knowledge of our Lord

Pathian ih  Zaangfahnak le Khrih Theihnak ih Thangso Timi cu?

Grow in the Grace and Knowledge of our Lord 

by San No Thuan

2Pet. 3:17  ¶   Therefore, dear friends, since you already know this, be on your guard so that you may not be carried away by the error of lawless men and fall from your secure position.

2Pet. 3:18 But grow in the grace and knowledge of our Lord and Savior Jesus Christ. To him be glory both now and forever! Amen.

Pathian ih zaangfahnak ah tthangso timi cu ziangvek a si? Cun, Bawi Jesuh Khrih theihnak ah tthangso timi teh ziang a si?

Pathian zaangfahnak ah tthangso timi cu a tawizawng cun, Christian ziaza lam ih tthanso khi a si (2 Pet. 1:5-7; Gal. 5:22-23). Pathian ih zaangfahnak in rundam kan si zo (Efe. 2:8-9), asinan, zaangfahnak cu cu tawk ah a cawl men lo! Ziangti in cuih Pathian ih zaangfahnak theihnak le a fapa Jesuh Khrih theihnak le bangnak ah kan tthangso thei ding? Cumi thu hi Bible ca ih in zirh duh bikmi a si.

A pakhatnak: Pathian in a zaangfah cu thluasuah peknak le thazaang peknak in a zaangfahnak theihnak in tthan ter. Cuih Pathian ih zaangfahnak cun kan sual in ngaidam ih tlun ah, thazaang in pek (2 Tim. 2:1-4). Harsatnak kan tuar caan khal ah tuar theinak thazaang in pek (2 Cor. 12:7-10). A zaangfahnak cun harsat caan hman ah midang bawmh ding a um ahcun, bawmh theinak in pek (2 Cor. 8:1ff).

Kan biakmi Pathian cu zaangfah duhdawtnak thawn a khatmi Pathian a si (1 Pet. 5:10). Zumtu pawl cu Pathian ih zaangfahnak kha a kilkhawitu le a hmangtu kan si (1 Pet. 4:10). Curuangah, Paul in Pathian ih zaangfahnak ruangah, “A tu hivek in ka si thei ve” (1 Cor. 15:10) tiah a ti. Cuvek in kannih khal in Pathian ih zaangfahnak ruangah, a tuvek in ka si theinak a si tiah a titu si ding a thupi zet. Culo ahcun, thluasuah kan don tikah porhawknak le hngalnak in kan khat pang thei.

A pahnihnak: harsatnak tuarnak in Pathian ih zaangfahnak theihnak ah kan tthangso thei. Pathian ih zangfahnak sungih tthanso khi thluasuah don lam lawng in in zirh lo. Harsat le tuarnak khal in Pathian in a zaangfahnak in theih ter thiamthiam. Harsatnak ton lo cun Pathian ih zaangfahnak theihthiam a har. Pathian in nitin kan nunnak hi a zaangfahnak theithiam theinak tlawng (the school of grace) in kai termi kan si theh. A hrek cu thluasuah in a si thei. A caancaan cu harsatnak khal in a si thei. Thuthimnak ah, Israel pawl khi Egypt ram in an suah tikah, ni sarih sung hrawng ih ke ih feh theimi khi Pathian in kum sawmli a rei ter. Cuih kum sawmli sungah cun, “rawl lawng nunnak a si lo, Pathian thu ih nun cu nunnak a si” timi a zirh. Pathian in harsat in ton ter tikah, in zirh theumi cu hi thilri, minung hi rinsan ding an si lo, keimah lawng rinsan ding ka si tiah in zirh theu. Pathian lawng a hmunmi an si ti khal in theih ter theu.

Israel pawl kum sawmli sung a hnipuan a tet dah lo. A ei dah lomi vaan in sang, vaan mana a tlak ter. An in dah lomi lung pacal in tidai thaw zet a suah ter. Harsatnak kan ton tik ih, kanmaih neihmi ih a banh nawn lo tikah, vaan kan zoh theu. Cutikah, Pathian in kan ruahban lo pi in in cawm theu. Cuti in a duhdawtnak le zaangfahnak in theih ter theu. Keimah hi a nungmi Pathian, nanmah tuanvo a lo latu ka si. Ka thu ih nan nun ahcun nan nunnak tuanvo ka lo la theh ding a si timi thu in theih ter sal theu.

Cuih thu cu Jesuh khal in a simnolh sal. Hi leitlun nuntu khuasaknak ah buai hlah uh, Pathian ih duhmi ziang a si timi lawng hawl hmaisa uh, a dang hmuahhmuah cu Pathian in a lo bet theh ding tiah Jesuh Khrih khal in a sim (Matt 6:33). Cuti ih kum sawmli sung, an thinlung in Pathian duh ko, rinsan ko, a duhmi hawl hmaisa ko a hruai hnu lawngah Canaan ram a thlen ter a si. Cucing hman in Canaan an thlen tikah a dang Pathian a bia ih Pathian a taansantu an tam thotho. Pathian in Amaih duhmi hawl le tuah hi thluasuah kan don hnu lawngah tuahtu kan si ding a duh lo. Kan harsat lai hrimhrim ah a duhmi hawltu le tuahtu kan si ding hi a duhmi a si. Harsat lai hman ih Pathian pan a thiam lo tu, Pathian ih duhmi hawl tum lo tu cu ol caan ah Pathian ka rian ding an ti khal le an rian cuang lo ding.

Ka sim duhmi cu Pathian in harsatnak in tuar termi hi a zaangfahnak a si. Ziangruangahtile harsatnak in in zirhmi cu kan thinlung, kan ruahnak, le kan ziangkim in amah lawng kan duhdawt ding a duh (Matt. 22:37).

A pathumnak: Bible siar le thlacamnak in a zaangfahnak le Khrih bangnak ah kan tthangso thei. Thluasuah peknak in seh, harsatnak khal in siseh Pathian kan nunnak in zir ter duh ringringmi cu “A fapa thawn a bangrepmi nunnak kan neih theinak dingah a si” (Rom 8:29).  A fapa Bawi Jesuh Khrih thawn bangawk ding hi Bible ih in zirh duh bikmi khal a si. Cuih nun cu thluasuah peknak, harsatnak lawng si lo in, Bible siarnak le thlacamnak khal in in zirh thotho. Curuangah, Khrih a bang duh pawl to men in Khrih theihnak le bangnak ah an tthangso thei lo. Tinbaw le lawng pawl in an colh duh tikah, thirtumpi an thlak a tul bang in, zumtu pawl khal kan nunnak nun colh hahdamnak ngah dingah Pathian thu siarnak le nunpinak sungah kan nun daan le tikcu pawl hram kan bun a tul.

A palinak: zumtu pawl thawn pawlkomnawk in Pathian zaangfahnak le a fapa theihnak ah kan tthangso thei. Zokhal duhdawtnak innsang nuam ih kan um tikah kan hna a ngam ih, kan tthanso daan a hman. Duhdawtu cuca um lo ih, a tthangsomi naute cu an nunnak ah buainak an tong. Ziangahtile, duhdawtnak an khop lo ih, duhdawtnak an hawl. Cuvek in, Pathian thlarau lam ih kan innsang cu Kawhhran hi a si. Duhdawtnak langh ter aw dingah in pekmi a si.

Curuangah, Pathian in lungawinak lawng in a si lo, harsatnak lawng khal in a si lo, Bible siar le thlacamnak lawng khal in a si lo; Pathian thu ngainak, le zumtu pawl thawn pawlkomawknak khal in a zaangfahnak theihnak ah siseh, Bawi Jesuh Khrih kan theihnak le bangawknak khal ah tthangso ding in tumtah sak a si.

Cuti ih kan tthanso tikah, ziang a cang? Kan nunnak in hmutu le kan thuhla in theitu poh in Pathian an thangthat ih an sunlawih a si. A sangbik ah Pathian cu thangthat siseh tiah an ti. Kan nunnak cu sualnak le thatlonak thawn kan tthencatawk deuhdeuh tikah Pathian cu a sunglawi deuhdeuh. A zaangfahnak le a fapa Jesuh Khrih theihnak ah kan tthanso deuhdeuh tik khal ah Pathian cu a sunglawi deuhdeuh. Peter ih nunnak cu a nun ah siseh, a thih tik khal ah siseh, Pathian cu sunlawinak a co ngah a si (John 21:18-19).

Ref. Warren W. Wiersbe, The Wierbe Bible Commentary: the Complete New Testament in One Volume, 956-7.