Nun Thianhlimnak le Thansonak

     

by San No Thuan

Nun thianhlimnak a um lo ahcun thansonak a um lo. Sualnak tuah ding na ruat ding, na hawl dingih na caan a cem ding. Cuih sualnak na tuahmi cun a menmen in a lo taanta lo ding. Na nonak a lo lak sak ding, na thazaang a cem ter dingih, na tikcu caan pawl cu na theih lo kar ah vaate bang in an zuang hlo ding.

Ziangruangah sualnak kan tuah duh lo theu nan, kan tuah si pei? Minung cu theihnak paruk kan nei. Hna in kan thei, kaa in a thawtnak kan thei, hnar in a rim kan thei, mit in kan hmu, taksa in thil kan thei. Cun, kan thinlung ih khur khuaruahnak khal in thu kan ruat ih kan thei. Kan sunglam ih duhhiarnak pawl hi an mahte an suak a si lo. Himi theihnak paruk pawl le a leenglam thil an tonawk tikah cutawk ihsin duhhiarnak timi a ra. Thuthimnak ah, internet maw, TV maw na zohmi in na thinlung a sersiam thei zet. Thu tha na zoh le thinlung ruahnak tha ah a lo hruai ding. Thu tha lo na zoh ih na siar ahcun, ruahnak siava na nei ding. Tunai te ah, Connecticut ih um Sandy Hook Elementary School ah Adam Lanza timi in nauhak 20 le upa 6 a kap that. Hipa hi kum 20 a si ih, video game leh a paih zet. A paih bikmi cu mithal ih raldo lehnak a si. Himi lehnak in a thinlung sungah a taang tuk ih, tlawngah a va feh tikah, nauhak pawl kha himi lehnak ih a lek theu bang in a kap ciamco ih, nauhak pawl cu minung pakhat ah cerek pathum a mal bik in a kap. Nitin kan tuahmi le kan hmuhmi hi caan khat khat ahcun, kan tuah ve taktak leh ding timi cu a fiang zet.

German Scientist pa in ziangti ziaza hi a ra ti a zingzoi. A tuah daan cu, uico a zuatmi kha zing, sun, zaanlam ti in rawl a pek ringring. Asinan, vei khat cu rawl a pek hnen ah pawngte a tum ih rawl a pek. A zarh khatnak cu pawngte awn a theih tikah, a uico cun a zoh men. Asinan, rawl a pek tinten pawngte a tum sak ringring. Thla hnih hrawng a rei tikah, rawl pe nawn lo in pawngte lawng a tum. Cutikah, a uico te cu pawngte awn a theih vetein a khadih a for ciamco ih, a thluak le a sunglam in, rawl ei duhnak a neih cih mei. Cutikah hi Scientist pa in a simmi cu, thil ziangkim hi kan tuah ringring ahcun, kan ziaza ah a cangcih a si tiah a sim. 

Asile, ziangtin nun thianhlimnak kan nei thei ding? Nun thianhlimnak a um lawngah thansonak a um. Nun a thianhlim cun sualnak ruat lo in thansonak hlir a ruat ih a tuah ruangah a si. Nun thianhlimnak timi cu thil dang a si lo; Pathian thu ngai (obeying the will of God) khi a si. Pathian ih thu ngai ih tuah dingah cun, Pathian thu kha na siar ih na thinlung ih na ruah a tul, na cinken a tul (Saam 119:9). Curuangah Bible siar aw. Na siarmi pawl na nun pi theinak dingah thlacam aw. Nunpi thei dingin siar sin aw. Cuti ih na tuah asile, na lam a tluang dingih na tuahmi tinkim ah na hlawh a tling ding (Josh 1:8-9). Bible siar na man lo ih, thlacam caan na man lo ahcun, sualnak tuah duhnak in na nunnak a lo luah khat thei.

Caan tampi ah, Bible kan siar man lo le Pathian thawn thlacamnak le bible siarnak ih kan pawlkomawk man lo khi ziangruangah a si pei tile, a pakhatnak cu maihzawn lawng ruahnak thawn kan nun ruangah a si (selfish life). A pahnihnak cu Bawipaih hrang le midang hrangah ziang ka tuah theimi a um timi na ruah lo ruangah a si. Rawl veithum na ei ahcun, veithum a malbik thlacam ve aw, Bible siar ve aw. Na nunnak cu Bible ih lungput na nei ve ding ih, na tthangso ding.