Jesuh Khrih Hrangah Christmas Laksawng

By San No Thuan

Christmas caan ah laksawng phunkim pek awk a si. Asinan, hivek laksawng pekawknak hi zo in a thok hmaisa bik tile Pathian a si. John 3:16 sungah Pathian in leilungmi pawl a duhdawt tuk ruangah, a fapa neihsun a pek timi kan hmu. Cuih fapa te cu cawrawl einak kuangsungah Pathian in a ret ih, cui Pathian fapa cu a hung upat tik khal ah in duhdawt tuk ih kan hrangah a nunnak laksawng ah in pek lala. Cuih a nunnak liammi cu sual ngaithiamnak a thlen ter. Nunnak liam tiang a duhdawttu le ka sual I ngaithiamtu a si ti a thei ih, a hnen ih a pantu hmuah cu Pathian in Thlarau Thianghlim (Efe 1:13) le kumkhua nunnak (John 3:16) laksawngah a pek bet. Pathian in I duhdawt ih ka sivek in I cohlang ringring ti na zum zo maw? Na zum ahcun, Pathian fa si theinak, kumkhua nunnak le Thlarau Thianghlim laksawng na ngah ding. Hivek ih laksawng thabik in petu le in duhdawttu Pathian cu sunglawi sinseh!

Tuisun ah laksawng cu kan pe aw ciamco nan a suahni kan lawmh bikmi Jesuh cu laksawng a co theu lo. Jesuh ih a duhbikmi laksawng pahnih in ka lo sim ding. A pakhatnak cu Jesuh cu ka sinak bangtuk in I duhdawt ih I cohlangtu a si ti ih zum hi a si (John 3:14-15). Cumi zumter in duh tuk ruangah, thinglamtah par tiang a nunnak liam in kan sualnak pawl in tuar sak. Khrih ih ka ai ih a tuarnak ruangah, ka sualnak ngaithiam theh ka si timi zum aw. Ka thatta lo cun, ka felta lo cun, cuti men cun ka sualnak Pathian I ngaithiam ding ka zum lo tivek na ruat pang maw? Cuti ih na ruah cun, ziangtluk tiang na that lawngah saw kumkhua nunnak na neih thei ding. John 3:14-15 sungah cun, “Moses in dar rul zuk a tar ang in mifa khal tar a si ding ih, a zumtu hmuahhmuah cu kumkhua nunnak an ngah ding.” John 3:36 “Fapa a zumtu cun kumkhua nunnak a nei” tiah a ti.

Vei khat ah, kawl zin ah mawtaw ka a let ih pakhat pa cu a tlak phah ah thinghram a pawk ngah. A cang deuh le thinghram cu a awn ciamco ih a kiaktum a si hi a ti ih cang ngam nawn lo in a vawk ringring. Zaanvar cui thinghram a pawk. Zinglam a hung thleng ih khua a van deuh tikah a tanglam cu a vun zoh ih pi hnih hrawngah hmun rawn a um ti a hmu ih hma khat te ah a vung dawp pan lo maw. Hih hmun rawn um ti thei ningla tuante ah ka rak cawl huahhi men ding nan, tu cu zaangvar ka thazaang hmuah cem theh ko thinghram vawk in ka tlai tiah a huiha ciamco. Mai thatnak ringih vanram kaitumtu pawl cu zaan thim sungih thinghram pawk ih tlaitu vek a si. Pawk hlah sehla ka tla that pang pei maw? Ka pawk ih le ka bang tuk zo. Thil tha tuah lo pang le hell ah ka thleng ding si ti ih thinphang emem ih um ringring. Thil sual tuah ngah pang cun, “Azelaw hell ram maw ka thlen ko sawh!” tiah thinphang. Asinan, Jesuh in ka aiawh ih a thihnak ruangah, keicu Pathian in “mithiang na si” (Rom 4:7,8) tiah I cohlanmi ka si ti a zumtu pawl cu zing khuavang ih hmun rawn ih dawptu vek khi a si. Ziangahtile ka fel ruangah a si lo, Jesuh ih thihnak le thawhsalnak ruangah Pathian hmaika ah mithiang ih cohlan ka si a ti a thei aw. Pathian ih sual ngaithiamnak co dingah, Pathian ih fanu/pa si dingah thil tha tuah a tum nawn lo. Thil tha a tuahmi cu hi tluk ka sual nan, I duhdawtu, Jesuh Khrih ih dung ka thlun ding ih a tuahmi ka tuah ve ding ti in thiltha a tuahmi a si. Mi a duhdawt le ka duhdawt ve ding. A tangdor le ka tangdor ve ding. Midang hrangah a nunnak tiang a liam ruangah, a tul ahcun ka liam ve ding ti in Jesuh thawn bang aw in a nung. Thatnak a tuahmi cu Pathian ih uknak, vanram minung pawl ih nun daan cu hiti ih um ding a si ti in thatnak tampi a tuahmi sawn si. a um sawn.

Jesuh ih duhmi laksawng pahnihnak cu thil dang hnak in a mah duhdawt bik ding khi a si. Vei khat cu thihnak ihsin a thawh sal hnu ah ngathliar sal in dung a tolhtu dungthluntu pawl hnen ah a lang sal. Cutikah, Jesuh in Simon Peter hnen ah thu hitin a sut, “John fapa simon, hi pawl hmuahhmuah hnak in I duhdawt maw?” (John 21:6tt) tiah a sut. Midang pawl hnak in ti khal a si thei, sur le lawng pawl khal a ti duhnak a si thei. Nga a kaih termi, tongdang in thluasuah a pekmi, pawl hnak in I duhdawt sawn maw tiah a timi a si thei. Jesuh in tuih sunni ah thu in suh vemi cu midang pawl hnak in, leitlun thilri pawl hnak in, thluasuah ka lo pekmi hnak in thluasuah a lo petu I duhdawt maw?” tiah in sut ve a si. Jesuh in thil dang hnak in a mah kan duhdawt ding hi a duhbikmi laksawng a si.

Simon Peter in ka lo duhdawt a ti tikah, Jesuh in veithum rori, “Ka tuu note pawl kilkhawi aw” tiah a ti. Bawi Jesuh ka lo duhdawt timi khi ziangtin ziangtin Jesuh in langh ter a duh? Duhdawtnak timi cu kan duhmi thawn pawlkom aw tlaang, a cakuat um ahcun ziangsi a sim duhmi tiah ruat ih hawl nasa. A zuk khal screen parah tar, facebook ah tar. Bawi Jesuh kan duhdawt ahcun, thlacamnak thawn amah pawlkom ding kan si. Bible siarnak thawn a duhmi hawl ding kan si. A zuk khal tar ding. Cuih tlun ah, a duhdawtmi hi leitlunmi pawl, amah zumtu pawl le zumhrih lo tu pawl kha Jesuh ih in duhdawt bang in va duhdawt ding khi a si. Jesuh in ka lo duhdawt bang in pakhat le khat duhdaw ve uh” tiah in fial (Joohn 15:12). Ziangtin in duhdawt? Kan harsat caan, riahsiat caan ah ruahsannak thar in pek, kan sual tikah kan sual in ngaithiam. Cun, nitin amah bang ding in lam in hruai.

Ziangtin kan duhdawt aw ve ding? 1 John 3:16-18 sungah, duhdawtnak taktak tongkam le awka men si ding a si lo; tuannak ah a lang dingmi a si tiah in sim. Ziangtin duhdawtnak cu a lang thei ding? Jesuh ih a lo bawmh daan zoh sal aw. Pakhatnak, harsat caan le riahsiat caan ah bawm aw ding. Pahnihnak, pakhat le khat ih sual ngaithiam aw ding. Pathumnak, Pathian duhnak lamzin ah hruai aw ding. Cumi kan tuah lawngah kan duhdawt aw taktak ti a lang ih tlun ah, Bawi Jesuh kan duhdawtnak khal a lang ve a si.

Thunetnak ah, Pathian in amah duhdawt in laksawng pek kan thiam hlan ah, in duhdawtnak kha laksawng tha bik a fapa neihsun peknak in a lang ter. Cumi cu Christmas ih kan lawmhmi bik a si. Cuih duhdawtnak lawmhnak Christmas ah Jesuh cu ziang laksawng kan pe ve? Laksawng ngah lo pi in a um pang maw? Jesuh Khrih ih a duh bikmi laksawng cu a pakhatnak ah, a tu na sinak vek ciah in a lo duhdawttu le cohlangtu a si timi kha zum aw. Na tthat hnu lawngah a lo duhdawttu a si lo. A lo duhdawtnak le na sual a lo ngaithiamtu a sinak kha zum in a hnenah kir mei aw. A pahnihnak, Jesuh ih duhbikmi laksawng pahnihnak cu leitlun thilri le thil dang hnak in amah duhdawtbik khi a si. Amah duhdawttu cun, Jesuh thawn thlacamnak in bia aw lo in an um dah lo. A cakuat Bible siar in a duhmi hawl lo in an um dah lo, Khrih thawn bang aw ko thudik ah hruai lo in a um dah lo. Cumi laksawng a petu pawl ih nunnak cun Pathian an sunlawi ter sinsin a si.

Dec 22/2012

Philadelphia, PA