Biaknak lam Degree Pekawk Daan

San No Thuan

Thuhmai hruai

            Vei khat ah lai lam pitar pakhat in,  ram dang ah biaknak lam in Doctorate zir ding ih a pok zik pa thawn an tong aw. Cuih pitar nu cun, “Saya Pa, a tu hi ziangso na zir bet ding?” tiah a sut. Cui pastor pa khal in, “Doctor, ka va zir thlang ding” tiah a ti. Cu tikah cuih pitar nu cun, “Lungawi a um tuk aw. Na ra tlun cun sii in ra dawt thei thlang ding ti” tiah lungawi zet in a ti. Pastor pa cun a sim fiang rero nan cuih pitar nu cun, doctor sive si ih siidawt lo doctor tla a rak um ve maw si tiah thu a ruat nasa. Laimi tampi in Doctor ti ih kawhmi hmuahhmuah in an bangrep theh ah kan ruat theu. Cuih ruah daan cu a dik lomi a si. 

1. Laimi le Doctor Degree

            Veikhat ah Laimi ih suahmi Megazine pakhat ah Laimi sungin kan neihmi Ph.D ngah pawl tiah an ngaan ih cu tawk ah biaknak lam ih Ph.D a ngahtu pawl hmin cu an telh lo. Ziangruangah si pei tiah khua i ruah ter zet. Mihrek khat in ka sut lo nan an ttongmi ka theihmi cu, “Biaknak lam Doctor degree cu ol tuk in ngah a theih si, telh a tlak lo” tiah an ti. Hivek ttong le ruahnak hi khui in a ra ti ka zingzoi tikah a cang theimi thu pathum tar lang ka duh: (1) Tulai Bible tlawng tampi in a dotdot ten zirnak um lo in, duh poh in Doctor degree an pe aw, (2) Kawlram acozah in Khrihfa pawl ih biaknak lam fimthiamnak cu ziang hman a rel sak lomi lungput in in ciah, (3) a thupi bik cu, laimi mipi in biaknak lam ih degree um daan kan fiang lo ruang ah a si bik ti in ka hmu. Cu ruangah a tanglam ah tlawng tambik ih an fehpimi degree pek daan hi run simfiang ka duh.

2. Biaknak lam Degree a phunphun

            Aniam bik in ka thok ding ih a saang bik tiang a sangsang in ka tar lang vingvo ding. Cun a bang aw mi cu numbat pakhat sungah ka ngan cih ding. Cun hi ka nganmi hi a tlaangpi thu in Association of Theological Schools[1] pi feh daan a tlaangpi thu in ka thlun. Asinan, ziang kim ah daan leeng (exceptional) ih tuahmi cu a um ringring ti hi kan thei cia ding ah ka duh. Simduhmi cu tlawng zate in a tanglam ih ngan vek ciah in an feh lo tla a si thei.

            Biaknak lam degree ah hin lamzin pahnih in a um. Pakhatnak cu practical rori in mah in tuah ih zirmi Practical/ministerial degree timi an um. Cu pawl cu Master of Divinity (M.Div), Master Of Religious Education (MRE), Master Of Sacred Music (MSM), Doctor of Ministry (D.Min), Doctor of Missiology (D.Miss), Doctor of Music (D.Mus) tvp., tla an si. Pahnihnak cu Academic degree timi a si ih cu pawl cu Pathian thu (subjects) a phunphun kha a kau thei tawk in library ah research tuah in zirmi a si. Cupawl cu Master of Divinity (M.Div), Master of Theological Studies (MATS), Master of Theology (M.Th), Doctor of Philosophy (Ph.D), Doctor of Theology (Th.D), le Doctor of Sacred Theology (S.T.D) ti pawl an si. A tanglam ah a niambik in a saangbik tiang a dotdot in ka run simfiang ding. 

1. Licentiate in Theology (L.Th) cu ramdang ahcun mipi (laymen) pawl Pathian thu zir theinak ding ih tuahmi a si. A tlaangpi thu in kum thum lole kum li kai a si theu. Kawlram ah cun phun hra a ong lomi pawl in Pathian thu an zir theinak ding ih tuahmi a si ih cu pawl cu pastor khal an tuan thei thotho.

2. Bachelor of Theology (B.Th) le a dang Bachelor (e.g. Bachelor in Music, B.Mus) pawl cu a tlaangpi bik in M.Div kai peh in Pathian hnatuan tumtu pawl ih kaimi a si. Ramdang ahcun, B.Th cu University pakhat tangih tuahmi program a si. Kum li sung kaimi a si. Kawlram ahcun phunhra “A” list in a ongtupawl in Bible tlawng ih an kaimi degree hmaisabik a si. 

3. Master of Divinity (M.Div) cu pastor a tuan tumtupawl hrang zirhnak ih tuahmi a si. Ram hrek khat ahcun, Bachelor of Divinity (B.D) tin an ko. Asinan, a tam sawn ram ah cun M.Div program tiah an ko. Kum thum sung full time rori in an kai. Secular tlawng ih B.A culole Bible tlawng ih B.Th a thehtu pawl ih kai theimi a si. M.Div thawn a level a bang aw mi degree pawl cu:

1. Master Of Religious Education (MRE) Kum hnih sung full time ih kaimi a si. Hi degree pakhat khat a ngahtu pawl cu biakinn le biaknak lam pawlkom pakhatkhat ah Christian Education Department hruaitu si dingih a tumtu pawl hrangah tuahmi a si.

2. Master Of Sacred Music (MSM) cu kawhhran sungih hla le on mawi pawl tuanvo latupawl ih kaimi a si. Kum hnih sung full time rori in zirmi a si. Himi kai dingah cun, Bachelor of Music kaita a tul theu. 

3. Master Of Arts Theological Studies (MATS) Kawhhran sungah pastor tuan ding lam si lo in tlawnglam ih hnatuan a tumtu pawl in Pathian thu an zir hram thawhnak a si.

4. Master of Theology (M.Th/ Th.M) cu tlawng lam ih hnatuan a tumtu pawl hrangih tuahmi Academic degree a si. Ph.D/ Th.D kai theinak dingah tha deuh ih timtuah aw thei hngai seh ti duhnak thawn tuahmi khal a si. M.Div, lole M.A.T.S a thehzotu pawl ih kai theimi a si. Kum khat lole kum hnih sung kaimi a si. M.Th le D.Min cu an level a bang aw ko. Asinan, an dan awknak cu M.Th cu Academic degree a si ih, D.Min cu kawhhran lam hnatuannak  hrang deuh (professional) ih zirmi degree a si.

5. Doctor of Ministry (D.Min) cu hnatuan daan zirnak (professional degree) a si ih  full time ih hnatuan nei pastor pawl kha, part time in fimnak zir thei dingih onmi program a si bik. Pastor pawl in an hnatuannak ah hlawhtling sin thei dingin hnatuan daan le a tulmi dangdang an zirbetnak (continuation education) a si bik. Thuthimnak ah mikaihhruai daan le thusim daan, cun mission tuah daan tivek pawl an zir. M.Div a theh zotu pawl in kai theih a si. A tam sawn tlawng ahcun pastor hnatuan a malbik kum thum a tuanta pei tiah daan an ret. 

D.Min ngah dingah full time in kum khat kai thawn a bang awmi course work zir theh ding a tul. Course work an theh hnu ah an hnatuannak thawn pehpar awmi thu (project) pakhat an ngan ter ih a mal bik kum 1 in a tam bik kum 6 tiang rei a theih.

6. Doctor of Education (Ed.D) cu Christian fimthiamnak le kaihhruaiawk daan thansoter sinnak dingih hnatuan a tumtu pawl hrangih tuahmi program a si. Full time kum hnih kai thawn a bang awmi course pawl a theyta theh a tul. Cutheh in, Christian fimthiamnak thawn peh aw in practical project pakhatkhat an tuah ter. Amalbik kum 4 in a tambik kum 6 sung ah theh ding ih tuahmi a si.  Himi a kai duh pawl cun, Master of Religious Education maw, Education thawn a peh aw mi Master pakhat khat a theh ta a tul. Ed.D thawn an rei daan le an feh daan a bang awmi pawl cu:

1. Doctor of Music (D.Mus) cu awn mawi le hla lam a hlei in an zir. D.Mus ih a kai duh pawl cu music in master pakhat khat ngahtu si a tul.
2. Doctor of Missiology ( D.Miss)  cu mission lam Pathian thu, miphun kip hnen ih mission tuah daan ti pawl a hlei in an zir. A kai duhtu pawl cu M.Div lole M.Th a theh zotu pawl in kai theimi asi. 

7. Docotor of Philosophy (Ph.D)/ Doctor of Theology (Th.D)/ Doctor of Sacred Theology (S.T.D) cu biaknak lam fimthiamnak degree ahcun a saangbikmi a si. A tlawng ih zir in Ph.D pena, Th.D, S.T.D a pena tin biaknak lam ih degree saangbik hi an pe. An bang aw theh ko. US ahcun kum hnih sung full time rori in tlawng an kai ter. Cui hnuah, a dang kum 2 in kum 6 tiang cu ca an siar ih ca an ngan. Curuangah amal bik kum 4, a tam bik kum 8 tiang a rei. U.K ahcun kum 2 tlawngkai ta ti a um nawn lo ih, kai vete in mah le Advisor thawn ca siar le ngan a si. Curuangah kum 3 in kum li sungah an theh ter. A hrek khat ahcun M.Div in direct ih kaiter tu tlawng pawl khal an um. Asinan, a tam sawn cu, a hlei in kan nih Asianmi pawl cu M.Th kai ter ta hi tlawng lam cun in duh sak ziangruangahtile kan casiar le ngan pawl anmaih level sungah lut thei ding in timtuah aw thei ta hngai seh tinak a si.     

Ph.D tuah dingah US ahcun, mirang ttong siar lo in, ram dang ttong pathum a siar tal siarih leh (translate) thei a tul. Cumi cu language exam an ti. Cumi theh in Comprehensive exam timi ca uk 150 hrawng an siar ter ih cumi sungin ni li sung sunvui cami buai an tuah. Cumi an on hnu ah professor pawl in kaa in thusuhnak camibuai (oral exam) an tuah ter bet. Cu hnu ah cauk pakhat an ngan ter. Cumi an ngan theh in Professors pawl, tlawngta pawl le mipi hmai ah an nganmi cauk thuhla kha an sim ih an thusuhmi pawl an let bet. Cucu Defense of Dissertation tiah an ti. Cumi pawl tha te ih an leh thei hnu lawngah Ph.D degree an pek.

D.Min, D.Miss le Ph.D hi an bangawknak zawn a tam zet nan, danlamawknak an nei. Ph.D cu research degree  a si. Zirmi thu (subject) pakhat khat kha thei ngah felfai rori ding in hawl le zir a si ih, theh hnu khal ah mizirh sin ding le thuhman hawl (research tuah) sin ding ih tuahmi fimzirnak a si. D.Min le D.Miss cu professional degree a si ih ministry le mission hnatuannak ah hlawh tlingmi si thei ding in hnatuan daan le mission tuah daan ti pawl thupi bik ih zirnak a si.

8.  Doctor of Divinity (D.D) degree cu biaknak lam hnatuan ah zohthim tlak le upat sunloih tlak a si tiah tlawng pakhat khat in mi a hmuh a si ahcun a pekmi sunloihnak degree a si. A zirnak ruangih pekmi a si lo. Phun ziat a on tul tivek khal a um lo. Himi hi Laimi ih kan ngah tam bikmi a si hmang tiah ka ruat. 

A tawi zawng in,


L.Th (Licentiate of Theology)                        (Kum 3/4)

B.Th (Bachelor of Theology)                         (Kum 4)

            B.A (Bachelor of Art in religion)

M.Div (Master of Divinity)                             (Kum 3)

            B.D (Bachelor of Divinity)                 (Kum 3)

            M.A (Master of Art)                         (Kum 2)

            M.R.E (Master of Religious Education) (Kum 1-2)

            le a dang Master pawl.

M.Th/ Th.M (Master of Theology)                   (Kum 1-2)

            S.T.M (Master of Sacred Theology)

D.Min  (Doctor of Ministry)                            (Kum 1-6)

D.Miss (Doctor of Missiology)                         (Kum 2-6)

            D.Mus (Doctor of Music)

            Ed.D (doctor of Educaiton)                  

le a dang doctor pawl.

Ph.D  (Doctor of Philosophy)                         (Kum 2-8)

            Th.D  (Doctor of Theology)              

            S.T.D (Doctor Sacred Theology)       

3. Degree le Fimthiamnak

Tulai kan san cu fimthiamnak san a si ih degree a phunphun ngah ding kan zuam ih lungawi a um ngaingai. A hlei in kannih Laimi tla cu Pathian in thluasuah in pe zet ih Kawlram acozah lam ih fimthiamnak a tlaksam zet lai ah, hmun tinkim ah Bible tlawng kan kai thei ih cu tawkah Pathian thu kan theihnak a tam sin ih tlunah mirang ca lam khalah thansonak tampi kan nei. Asinan, kan ralrin dingmi cu hi Bible tlawng kan kainak le kan tuahmi hi fimthiamnak lam thupit ter sawn lo in, degree hmin men kan thupit ter sawn sual pang a si ahcun, kan tthansonak lam zianghman in bawm thei cuang lo ding.

4. Ziangruangah Pathian thu (Theology) a zir pawl Ph.D an pek?

Ph.D timi cu Doctor of Philosophy ti a si. Philosophy timi cu Greek tongfang pahnih: Philo, duhdawtnak le Sophia, fimnak timi kommi in a rami a si. Curuangah Philosophy ih a sullam cu fimnak duhdawtnak (the love of wisdom) tinak a si. Ziang thu khal ah thil dik, thilhman thei ding in thu kan ruahmi hmuahhmuah hi Philosophy theh a si. Thuthimnak ah, tui sun ziang ka tuah ding ti ih kan ruahmi khal hi kan nitin te ih kan philosophy a si ko. Kan pupa pawl ih an philosophy cu an hla, an ttongkhuun le, an thuanthu pawl ah tampi kan hmu thei. Curuangah, ziang fimnak khal ah a saang bik degree thlen tik ih pekmi hmuahhmuah cu Ph.D tiah kawh an si. Pathian thu, Minung thu, Ramsa thu, computer thu le a dang dang zirnak ah a netabik ih an pekmi cu Ph.D a sinak a si. Thuthimnak ah, Mathematics ih a sangbik a zirtu khal khi Ph.D thotho a si. Curuangah, kan Laimi pawl in Ph.D ngah zo pawl kan um tiah ca kan ngan tikah, biaknak lam cu telh lo ding tiah kan ti ahcun, biaknak lam zirnak ah thate in a ong ih a thehsuaktu pawl hi zianghman ah kan siar lo thawn a bang aw. Ram pakhat tthangso dingah, fimthiamnak lam ih Ph.D kan tul vek in, Engineer lam ah, Ziinan lam ah, Ramsa lam ah, tvp., in a phunphun kan tul. Cuvek thiamthiam in, taksa lam sibawi a tul vekin, thlarau lam siibawi, Ph.D khal kan tul ve. Curuangah, tlawngkainak ih ngahmi Ph.D cu ziangvek field khal ah kan miphun in an cohlan a tul. Amah belte, zirnak um lo ih ngahmi Doctor degree cu telh cawk an si lo thei men. 

Thunetnak

            A tlun lam ih ka nganmi biaknak lam degree a phunphun a um daan pawl hi a tlaang pi in Association of Theological Schools ih fehpi daan a si. Tlawng khat le khat danlamnak tampi a um. Hi sungah degree hmin kawh daan tampi ka telh lomi an um ding. Cumi pawl cu hi ca tawi te sungah ngan cawk a si lo ruangah ka ngan thei cawk lo. Cu vek thotho in doctor tiah an hmin hmai ah ngan asinan siibawi an si lo. A hrek cu D.D, D.Min, D.Miss asilole Ph.D maw an si thei. Mi pakhat in doctor a ngah kan ti tikah ziangmi doctor degree si a ngah timi hi kan theih bet a tulmi a si.

            Himi biaknak lam ih Ph.D cu secular degree ih Ph.D thawn a bang rep aw ih retmi a si. Biaknak lam ih Ph.D zirtu in secular tlawng ih Ph.D course kha a zirmi thawn a pehtlaimi subject a si ahcun, direct in a zir thei ve. Thuthimnak ah, Kawhhran thuanthu (Church History) zirtu in secular tlawng ih history subject pawl kha direct in a zir thei. Asinan, kawlram ahcun Kawl cozah in a siang hrih lo. Kawl cozah ih ziang a siar lo ruangah biaknak lam ih Ph.D hi ziang siar lo in maw laimi, kan um ve ding?

            Laimi lak ah Pathian in thlawsuah in pek ih fimnak thiamnak lam khal ah kan thangso vingvo ih lungawi a um ngaingai. Asinan, khat lam ih kan ralrin a tul zet ve mi cu Degree lawng pe aw culole degree lawng ngah ih fimnak pe aw lo/ngah lo mi fimthiamnak daan sia hi tlawng saya pawl siseh, tlawng a kaitu pawl lala khal in siseh, kan ralrin a tul zet thlang. Fimthiamnak zir timi ih a tumtahmi a thupi bik cu minung pakhat kha a thinlung, a ziaza le ziang kimah khuaruat thiamtu siter ding hi a si. Kan tlawngkaimi hi kan nunnak khai saang theitu a si theinak ding ah kan theihnak kauh ter sin a tul. Kan zirmi tlunah kan thiam taktak khal a tul. Cuih tlunah cuih kan theihnak le thiamnak pawl kha Pathian ih tuah ter in duhmi tuahnak ih kan hmaan sinsin ahcun mifim thiam taktak kan si thei ding. Cuti in kan khua le ram a mawi sin dingih thansonak a tam sin ding.

 Zuk Simfiangnak:

1. A tlaangpi feh daan ahcun L.Th theh cun peh a theih nawn lo ih ka tarlang nawn lo.
2. B.Th/BA theh hnu in M.Div (professional and academic), MATS, MRE le MCM ah peh a theih.
3. M.Div theh in D.Min, M.Th, D.Miss, Ed.D le Ph.D khal ah peh a theih. Asinan, Asian mi cu M.Th kai ta hi kan hrangah a tha deuh ih Ph.D luh khal a ol deuh. Ed.D ngah thei ding in M.Div ah educational lam course pawl na lak tengteng a tul.
1. MATS na kai le M.Th na kai thei.
2. MRE na theh le Ed.D na kai thei.
3. MCM na theh le D.Mus na kai thei.
4. M.Th na theh le D.Min, D.Miss, le Ph.D/Th.D/S.T.D na kai thei. 

---

[1]http://www.ats.edu/accrediting/standards/overview.asp ah zoh bet aw. Association of Theological Schools sungah America le Canada ih Bible tlawng 130 lai tel ih tuahmi a si. An website cu www.ats.edu timi ah zoh bet aw.