Pumkhat Sinak Kilhim Thei Dingah

Text: Eph. 4:1-15

Thuhmaihruai:

Vei khat cu Frederick, Maryland khua sungah ka va leeng ih lamzin ah tokheng le cabuai pawl zuarnak hmun ah ka va thleng. Himi a zuartu pa in ka sinak le hnatuan fiang sin in I simfiang. Pakhat le khat kan thuhla kan simawk tikah, cupa cun, “Aw, keicu tokheng le cabuai ka zuar. Curuangah, ka dawr ah mi tampi ra lut duh dingah tangdor te le awka thlumte thawn mi ka biak a tul. Nang tla Jesuh Khrih midang in an nunnak ih an neih theinak dingah na zuar ve” tiah I sim. A diktuk ka ti. Khrihfami pawl cun kan zate in Jesuh a zuartu kan si. Midang in kan zuarmi Jesuh in lei ih an neih theinak dingah, tangdor le thinsau tein, awka thlumte thawn midang kan biak a tul. A hleice in kan nunnak an zoh tikah, an lei duhmi Jesuh ih nun mawite le lungput kan nunnak ah a cuang maw?

Vei khat ah Falam ih kan mintami Thet Mon Myint pa U Myint Oo kha ziangah Khrihfa ah na cang ve lo tiah ka sut. I timi cu, “Khrihfa pawl cu nan then aw tuk ih hlei ah nanmah kar lak ah nan buai tuk. Cuvek buainak pawl karlak ah kei ziang ka tuah ding?” tiah I ti dah. Zum lo tu pawl le midang tampi ih an siarmi Bible ca, an hmuhmi kan Biaknak cu cu kan nunnak a si. Kan nunnak ah ah siar ding tha Bible a lang lo ih, duhnungza Jesuh ih nun le lungput a lang lo ahcun, ziangtin so Jesuh cu an theih thei ding? An zum thei ding? A dungthluntu si an duh ding?

Curuangah, Jesuh in hiti in thla a cam, “Ka Pa leitlunmi pawl in kei hi nangmaih thlahmi ka si ti in zum theinak dingah, keimah I zumtu pawl hi nangmah le keimah pumkhat te ih kan um bang in an nih khal um ve hngai seh" tiah a ti (John 17:17-20). Jesuh ih thlacammi “pumkhat sinak kan neih theinak dingah” ziang kan tuah ding? Pum khat sinak hi Pathian ih in tuah sakmi a si ih, zumtu pawl cun cuih pumkhat sinak cu kilhim ding kan si. Asinan, pumkhat te in, khat le khat nuam zet ih kan um thei ringringnak dingah a man kan pek dingmi a um. Pathian in ziangtin pumkhat ah in si ter ti pawl le pumkhat a taktakmi pawl ih ziaza cu ziangvek a si ti pawl lo ruah ka duh.

1. Pum khat sinak kilhimnak hrangih kan pek tulmi man (Grace of Unity) (cc. 1-3)

Pumkhat si theinak dingah Pathian ih kawhmi kan sinak lang ter a tul. Pathian ih kawhmi kan sinak, Pathian ih miphun, kha ziangtin kan langh ter ding?

1.     Thinlung neemnak (Meekness) (Efe. 4:2). Thinlung neem timi cu a awka hro lo. Mi a to hluahhlo lo. A thilti theinak (power), le a riahsiatnak pawl kha a control ih, daihnak tuahnak lawngah neemte in a hmang. Thufim 15:1 – “Awka neem ih thulehnak in thinhennak a dai ter; asinan tong hrang in thinhennak a suah ter.”

2.     Tangdornak (Humility) (Efe. 4:2). Thinlung tangdor timi cu Khrih ih duhnak kha hmaisabik ah re in, cule, midang ih duhnak, cuhnu ah, maih duhnak a retu pawl kha tangdormi pawl cu an si. Tongdang cun a hngal lo. Amah le mah kha thupi zet ah a re aw lo. Midang kha thupi sawn le upat sawn dingah a re.

3.     Thinsaunak (longsuffering) (Efe. 4:2). Midang in an ti siatmi kha vei khat te ti lohli lo in a theihthiam sak ih, thinsau te in a pawlkom thotho.

4.     Zawiawk theinak (Tolerance) (Efe. 4:2). Pakhat le khat ih danglamnak tete kha duhdawtnak thawn cohlang, zawi aw thiam uh tiah in fial.

5.     Remnak/daihnak (Peace) (Efe. 4:3). Midang thawn remdaihnak tuah dingah cun, Pathian thawn rualremnak nei hmaisa aw. Cutikah, na sunglam ah daihnak na ngah ding ih, midang khal daihnak an ngah ve ding.

Himi panga hi Pathian in kan nunnak ih langh ter dingih a duhmi a si. Cuti ih kan langh ter ahcun pumkhat sinak Pathian ih in pekmi hi kan kilhim thei ding a si.

2. Pumkhat kan si theinak hrampi (Ground of unity) (Efe. 4:4-5).

1.     Ruangpum pakhat: Jesuh Khrih ih ruangpum pakhat sungah zumtu zate a taksa then kan si.

2.     Thlarau pakhat: Thlarau Thianghlim cu ka sungahle midang sung khal ah a ummi a si ih, pakhat le khat kan duhdawtawk tikah Thlarau Thianghlim a lung a awi.

3.     Bawi pakhat: zumtu zate ih kan Bawi le thuneitu cu Jesuh Khrih a si ih, zokhal mah le ti theinak ciar in a hnatuantu kan si.

4.     Rinnak pakhat a um: Jesuh Khrih duhdawtnak, sualngaithiamnak, thilti theinak ringih nung cio kan si.

5.     Baptisma pakhat a um: Thlarau Thianghlim in zumtu zokhal kan zum vetein Jesuh Khrih sungah in hnim tongdang in Khrih thawn in pehzom ter, Khrih thawn pumkhat ah in can ter. Khrih ih taksa then ah in tuah. 

Himi pawl hi kan zoh tikah, zumtu pawl cu kanmah te in pumkhat sinak hi tuahtu kan si lo. Pathian in in tuah sak ciami a si ih, cumi kilhim dingah Pathian ih tuanvo in pekmi a si. Cumi kan kilhim theinak dingah, kan cin ringring dingmi cu, kan zate in Jesuh ih team, party khat kan si. Zohman do aw ding kan um lo. Bawm aw tlaang ding le ttangtlang ding kan si. Jesuh Khrih ih vanram uknak daan hi kan nunnak, innsang ciar le kan miphunpi in an cohlan theinak ding ah simtu ding le langh tertu ding kan si. 

3. Pumkhat sinak thangso le thangso lo tahnak (The signs of maturity in unity)

1.     Jesuh lungput, ziaza le a tuahmi tuahtu sinak (Christlikeness) ah kan tthangso maw? (Efe. 4:13). Kum a rei deuhdeuh ih kan hua aw maw, kan relsia aw maw, kan dodal aw maw cutivek ih kan um ahcun, Jesuh ih lungput le nun daan lam ah kan tthangso tinak a si.

2.     Dinhmun hnget zet in kan din theinak (stability) (Efe. 4:14). Pathian thu fiangfel zet ih theihnak le zumnak lam ah kan tthangso maw? Evangelist pakhat a rat tintein kan rak zum daan a sual tiih buai ih tthen aw ciamco kan si pang maw?

3.     Duhdawtnak thawn thudik thuhman sim awtu (speaking the truth with love) kan si a tul (Efe. 4:15). Thudik thuhman hi kan sim ngam lo ahcun, a rei deuhdeuh tikah kan siatral deuhdeuh ding. Asinan, mualpho rori seh tivek ih thudik sim ding a si lo ih, duhdawtnak thawn a thil tha lam ih kan tthanso theinak dingah himi hi kan rem ah a tha lo maw tiah kan sim awk hrimhrim a tul. Minung cu kanmaih palhnak hi hmuhawk a har tuk ruangah, duhdawtnak thawn kan simawk a tul.  

4.     Kilkip ih thansonak (Holistic growth) kan neih a tul (Efe. 4:15). Taksa damnak, fimthiamnak, hnatuan tha ngahnak dingah, thinlung nomnak lam le Pathian kan duhdawtnak lam ih tthangso dingah teh kan bawm aw maw? Kan tthangso tlaang maw? Kanmah lawng kan tthangso ih, midang pawl dung ih an taan khal le Pathian hmai ahcun, na laksawng ngahmi a mal tuk thotho ding. Ziangruangah tile, Jesuh ih ruangpi a tthanso daan a dik lo ruangah a si.

Thunetnak:

            Zumtu cu Jesuh Khrih ih taksa then kan si. A thlarau ih hruaimi kan si. Amai hna hi kan tuan ciarmi a si. Curuangah, pumkhat ah Pathian in tuah ciami kan si. Cuih pumkhat sinak hi kan hlawknak (Apportunity) a si vek in kilhim ding khal kan tuanvo (Task) a si. Cumi kilhim thei dingah, thinlung neemnak, tangdornak, thinsaunak, zawiawk theinak le remdaihnak lungput thawn kan pawlkom awk a tul. Pumkhat taktak ih ke kan kar le kar lo kan cekvelawk daan cu: Khrih nun daan ziaza thawn kan pawlkom aw maw? Zumnak le theihnak lam ah teh kan dinhmun a hnget sinsin maw? Duhdawtnak thawn thudik thuhman kha kan pawlkomawknak tha ding in kan sim aw maw? Kilkip in fimthiamnak lam, neih le siah lam, mipum lam ah teh kan tthangso maw? Cutivek ih kan tthanso a si ahcun, kan kiangkap pawl in kan neihmi Jesuh Khrih hi a neih an duh ve ding a si.

San No Thuan

April 28, 2013

Chin Community Baptist Church, Philadelphia Biakinn onnak ih ka simmi a si.