Ziangruangah Baptist Ka Si?

Thuhmaihruai

"Ziangruangah Baptist ka si" timi hi thate'n ka rak ruat aw dah lem lo. Mi pakhat khat in nang teh ziang ruangah "Pawl" dangah na tthawn ve lo tiah in suttu um bangta sehla ka let thei cuca lo ding. Ka pa lam ih ka pu le ka nu lam thisen ih ka pu te an pahnih hi kan  khua ah Pathian awi hmaisabik pawl an rak si. Cui' Pathian thu cu Baptist Missionary (Mirang & Karen) pawl in an rak sim ruangah an zum ih rirai biaknak ihsin Khristian ah an rak cang.  Missionary pawl ih an rak kenmi cu Jesuh Khrih lawng siloin an Pawl/Denominaton a si mi,  "Baptist" tla zumtu thar pawl cu an rak sin ter cih. Cui' Missionary pawl ih Lairam ih an rak tuh ta mi "Baptist" cu ka pi le pu te ih sungsuak faa te hnenah sankhat hnu sankhat phuaktheih nawn lo mi angki/kor bangtuk in tu ni tiang kan run sin sawng vivo. Curuangah ziangah Baptist na si in ti sehla, "ka nulepa/ ka pilepu pawl Baptist an si ruangah" tiah ka leh hai ding. Hi thu hi thudik a si. Asinan, tuni ah cun hi thu lawng hi Baptist ka sinak ih kan ttansan (reason) dingah ka duh tawk thei nawn lo. Baptist ka sinak sim fiangnak dingah thuk deuh ih laihsuahmi ttansan (reason) pawl phorhsuah ka duh. Curuangah hi Cahram ngan dingah ruahnak a suahnak a si.  

 A pahnihnak ah, hi cahram ngan dingih i tultubik thil pakhat cu Laimi pawl hi ramdang kan thleng tikah Pawl/Denomination a thupi nawn lo titu tampi an um. Culawng siloin, "Baptist" timi hmin hman thei paihlo khop ih a huat ih huatu kan Laimi lakah an um vivo. Cutikah "Kei teh ziang ruangah Baptist ka si? Ziangruangah hi tluk ka ttan? Ttantlak teh a si maw? ka ttansan hi ziang a si? ..etc…,.ti  pawl hi i ruatter zet. Curuangah Baptist thu hi thaten ka ruatsal ih ka tlin tawk te'n ka hliakhlai tikah "Ziang ruangah Baptist Ka Si" timi pawl tawkfang ka hmu fiang aw. Cumi pawl cu casiartu pawl hrangah a thahnem pangah ti'n hi cahram hi ka run ngannak a si.

I. Baptist Thawhkehnak

Kawhhran dangdang ahcun dintu (Founder) an nei cio. Thuthimnak ah Martin Luther, John Calvin le John Wesley te pawl hi anmah ih an zumnak thupom (Theology) ih zirin Lutheran, Reformed Church le Methodist Church ti'n pawl dintu  an rak si. Asinan, "Baptist" cu milai daan in dintu (Founder) fumfe a um lo.  1609 kum ah John Smyth le Thomas Helwys te pahnih cu Holland ram ah Baptist Kawhhran an rak din. Asinan, "Baptist" zumnak (Faith & Belief)  pawl hi an mah ih suahpimi  thupom (Theology) a si lo. Cuhleiah an mah hi Bible lamah zirnak sang nei (Theologian) tla an rak si lo ruangah hi bangtuk thupom (Theology) thu thuk zetzet suahpi thei khal an rak si lo. A um ciami zumnak thupom tampi sung ihsin Bible Zirhdaan thawn a mil aw bikmi pawl lakkhawm ih fehpitu hmaisabik pawl an rak si fang. Curuangah Baptist cu zo nih a din ih, ziangmi ni, hla, kum ah an rak thok timi felfai zetin rel theih a si lo.

Asinan, kan rel theimi pakhat cu "Baptist" thupom cu Khristian Santiluan thleng danglamtu Protestant Reformation (c. 16^th Century) san lai ih Reformation Theology (Serthar Salmi Zumnak Thupom) sung ihsin a irhsuakmi asi timi a si. Protestant Reformer pawl sung ih hmin thangbik pawl cu Ulrich Zwingli, Martin Luther, John Calvin te pawl an si.  An zaten Bible hi an tansan ah an hmang. Kawhhran sungah Pope hnak in thuneitu dingah Bible an hril. Bible hi mi hmuahhmuah ih siar ding a si an ti cio. Cun, Bible ih zirh daan vekin Rundamnak cu Kawhhran sungah um lo in zaangfahnak ruangah zumnak thawn kan co mi a si ti pawl an au pi. Himi thupom pawl hi tusun ni tiang kan nih Baptist pawl khal in kan run pom sawng vivo mi a si.  Asinan, hi Reformer kan pa le pawl hi an rak tthanlennak an Mother Church ih thupom tampi cu thlah thei lo in an keng telcih mi tampi a um. A hleice in Tihnimnak thu ah an Mother Church ih hman daan Nausuakpek baptisma peknak (Infant Baptism) le  tithlorh baptisma (Sprinkle) cu an hmang lan ta. Asinan, Baptist kan pa le pawl cun himi tipil innak cu Bible thawn a mil aw lo a si an rak ti. Curuangah Zumtu lawng tipilnak (Believer Baptism) le tidai sungah Hnimpil (immersion) hi Jesuh Khrih a mah rori ih in zirhmi a si tin ttan an lak ih tusun ni tiang kan run hmang lan ta. Curuangah Baptist ka sinak ka ttansan (reason) hmaisabik cu Baptist thupom/feh daan pawl cu Bible zirhdaan thawn a milaw ih Jesuh Khrih amah rori ih rak thokmi asi tiah ka zum ruangah a si.

II. Baptist le Zalennak

a). Thlarau Zalennak

Baptist hi thlarau zalennak uarbik pawl kan si. Pathian kan biak theinak dingah le sual thlah thawinak kan tuah theinak dingah kan mah le Pathian karlak ah Palai  kan tullo ti tu pawl kan si. Zumtu hmuahhmuah Puithiam Sinak (Priesthood of All Believers) hi kan pom ruangah Pathian hnen ah simsaktu/dilsaktu palai tullo in kan mah te'n zalen zetin Pathian kan biak thei ti tu pawl kan si.

Cuvek thotho in Pathian kan biak tik khal ah a hmun le hma hi thupi zet ih retmi Kawhhran kan si lo. Judah pawl cu an Biakinn sung lawngah Pathian um ding ah an ruat ih Biakinn sung lawng ah Pathian biak dingin an ra pan theu. Kawhhran dang dang khal ah Pathian hi a hmun le hma, tikcu caan neihter in an biak theu. Cuhleiah, Biakinn sungah rimhmui cu khang tahratin meikhu lak ah Pathian biak hi Pathian duh zawng sihmang ti'n Pathian a biaktu tla tampi an um. Kawhhran hrek khat lala cu minung ih phuahcop zumnak thupom (creeds) pawl cu biak khawmnak sungah salnon rero ih biaktu khal an bo lo. A hrekkhat Creed pawl tla cu hlanlai Latin tongfang pawl tla an si ih zohman ih a suullam thei lomi tla tampi a um. Asinan, Baptist pawl cun Pathian biak timi cu thutak le thlarua thawn biak ding asi timi Jesuh Khrih ih in zirhmi cu thupi ah ret in hmun le hma, tikcu caan a hranpa ih nei cuang lo in zalen zetin kan umnak tinkip ah kan thlarua thawn Pathian a  biatu pawl kan si.

Cuhleiah Baptist hi Hrintharnak uarbiktu Kawhhran kan si ti seh la ka sual lo ding. Ziangah tile tipil kan lak zik tikah "Jesuh cu i runtu le ka Bawipa asi tiah na zum maw?" tiah a zumnak thu  sut a si ringring. Culengah Kawhhran sungtel sinak dil tik khal ah " Jesuh cu i runtu le ka Bawipa asi tiah na zum maw?" timi thusutnak hi neih ringring asi. Ziangbangtuk minung khal Jesuh Khrih hnen ah zalen zetin a ra thei ih zalen zetin Bible khal a siar thei asi timi hi Baptist pawl ih pom dan a si.

b). Kawhhran Zalennak

Kawhhran hrekkhat kan zoh asile Kawhhran uktu le thuneitu cu a dotdot in an nei. Cumi cu mirang tongin Hierarchy tiah an ko. Asinan, kan nih Baptist pawl cu Hierarchy system cu kan duh lo. Ziangah tile kedam sungih a lo suntu hling umnak cu kedam a hruktu nangmah nih na thei bik vekin Kawhhran thansonak dingah Kawhhran sungtel pawl nih a tulmi an thei bik. Curuangah Kawhhran kaihhruinak ah zovek pawlkom, party le bulpak khal in kan Kawhhran tlunah thu an nei theilo ih Kawhhram cu a mahte zalen zetih ukawktheinak (Local Church Autonomy) a nei  a si tiah kan pom.  Curuangah Kawhhran thu ah Jesuh Khrih cu kan lu, in uktu a si ih Bible cu sual/palh theilo le Kawhhran tlun ah thuneitu sangbik a si tiah Bible uar zetmi Kawhhran kan si.

c).  Biaknak Zalennak

Khristian san thuanthu sungah Siangpahrang ih thuneihnak cu Biaknak sungah nasatuk in a lut ruangah cui' san ih Kawhhran pawl cu thangso lam pan loin tumsuknak le siatralnak sawn a thlenter phah thluh. Cui' san, kum 400 sung cu Dark Age tiah an rak ko. Curuangah Baptist pawl cun Acozah le Biaknak lam hi hnuaihnih aw ding a si lo tiah thupi zetih ruattu le fehpitu kan si. Acozah cu a ram sungah daihnak le thansonak a um theinak dingah daan le duun (Law & Order) thawn uktu ding an si ih Khristian Biaknak cu ram mipi hnenah Pathian thuthangtha simtu ding kan si tiah Baptist cun a fehpi. Curuangah Acozah le Biaknak lam cu kan hnatuan a bangaw lo law law ruangah pakhat le pakhat hnuaihnih aw loin zalen zetin mah ih hnatuan cio kha tuan ding kan si tiah Baptist cun tusun tiang a feh pi. America ram ih Baptist kawhhran rak din hmasabiktu Roger William (c. 1631) cu amah vek ih Biaknak zalennak hawl in America ram a ra thlengtu a rualpi pawl ih dinmi Massachusetts acozah cu Biaknak lamah thu nan neituk tiah sual a puh hai ruangah England ram ih kuatkir (Deport) ding tiang a thu an rel dah. Asinan, an ram ah an kuatkir man hlan ah Rhode Island ah a tlan man ih cutawkah Native America pawl thawn Baptist Kawhhran an rak din vivo a si. Hi thu pawl kan zoh tikah Baptist pawl cu hnaihnoktu um lo in zalen zetin Pathian a biak duhtu pawl kan si timi a fiang. Curuangah Baptist ka sinak ih ka ttansan (reason) pakhat cu  Pathian cu zalen zetin kan biak theinak ruangah a si.

III. Baptist le Serh le Sang

Baptist hin serh le sang pa (2) kan nei. Serh le Sang kan timi cu mirang tongin Ordinances ti ah an ko. Ordinances timi cu Order (Thupek) timi tonghram ihsin a ra mi a si. Curuangah serh le sang Ordinances cu minung ih phuahcop siloin Jesuh Khrih nih tuah dingah thu in pekmi, order in pekmi tinak a si. Kan zoh tlang hnik pei.

i. Zumtu Lawng Tihnimnak (Believer Baptism)

Baptist le Kawhhran dang dang pawl ih kan danglamnak bikcu Tihnimnak (Baptism) ah a si. Baptism timi cu Greek tongin Baptizo timi ihsin a ra an ti. Baptizo timi cu hminpil tinak a si. Curuangah Baptist pawl cu tihnimnak kan lak tikah tidia sungah kan ruangpum zaten hnimpil a si hnu lawngah kan di a riam ih kan cohlang thei. Tihnimnak ih  a suullam cu kan Bawipa Jesuh Khrih ih a thihnak, an phumnak le a thoksalnak langternak dingah a si. Curuangah Baptist pawl cun Bawipa Jesuh thihnak le  thawksalnak a zumtu,  Zumtu lawng Baptisma peknak (Believer Baptism) a hmangtu le a uarzettu kan si. Baptist Kawhhran ih kan Pa bik a si mi John Smyth hi a nauhak lai ih  Baptisma a rak lakmi cu a di a riam thei lo ruangah rundamnak a congah hnuah a mah le a mah ti a hnim aw sal ih cumi hnu ah a dungthluntu pawl tla a hnim hai vivo. Cuticun Holland ramah 1609 ah Baptist Kawhhran a rak din a si. Curuangah Baptist pawl cun  Tihnimnak hi rundamnak conak a si tiah ziangtik khal ah kan ruat dah lo. Rundamnak kan co mi kha langter (outward Expression) dingah kan tuahmi a si sawn.

ii. Bawipa Zaanriah

Kawhhran hrekkhat cu Bawipa zaanriah an hman tikah Sabitti le Sangreu cu Bawi Jesuh ih thisen le taksa ngaingai (Transubstantiation) ah a cang tiah an pom. Cun, hrekkhat lala cun Bawipa zaanriah an hman tikah Sabitti le Sangreu cu Jesuh Khrih ih thi le sa thawn an um tlang (Coexist) asi tiah an pom. Tahthimnak ah thirpum pakhat cu meisa sungah kan hlon asile thirpum le meisa cu an um tlang (coexist) ih thirpum cu a ling hluahhlo. Asinan, thirpum le meisa cu a dang dang an si tho tho. Hi thupom hi Consubstantiation tiah an ko. Asinan, Baptist pawl cun a pahnih ten kan cohlang thei lo. Ziangah tile Bawipa zaanriah kan hmang timi cu kan Bawipa Jesuh Khrih ih kan hrangah a tuarnak le a thihnak pawl cingmang salin mah le mah cekfel awknak thawn kan sualpalhnak  ihsin siirawk saal in a thar in thlarau thazaang (Genuine Spiritual Strength) laksalnak dingah kan tuahmi a si. Simduhmi cu kan hmanmi a thilri (Substance), sabitti le Sangreu kha thupi ah ruatloin a suullam kha kan thupitter sawn tinak a si.                     Himi a tlun ih Serh le Sang pahnih hi kan Bawipa Jesuh ih in zirhmi le in fialmi ta mi pawl an si. Curuangah Baptist pawl ih serh le sang kan hman daan hi Bible thawn a naih awbik ih a milawbik fawn. Hi thu pawl thate'n ka ruahsal tik khal ah Baptist ih ka um hi a tha ka tibik hrih thotho.

IV. Baptist le Mission Hnatuannak

Pathian nih leitlun ah minung  a retsannakbik cu miphun hmuahhmuah hnen ah leilung a deng tiang a thuthangtha phuan dingah a si. Hihi Jesuh Khrih a mah rori ih in fialmi a si. Hi thupek hi Baptist cun thupizet ah retin Leitlun khuaza ramkip ah Missionary palai tampi a thlah. Sum le pai cem in an thlanhri a put ih an thisen a luang khal le an bansan cuanglo. Minung nunnak tampi a ziam ral.  Laitlang hmanah Baptist Missionary pawl ih thlanmual hmuh ding a um lai. Asinan, Mission hnatuannak cu a cak deuhdeuh. Tusun ni tiang Baptist pawl hi leitlun ah Missionary Palai thlah tambik an si ringring. Laimi dinhmun in kan sim khal asile kum 16 sung CCOC hna kan rak tuan. Kan faate pawl hman kan pek siang lomi inntangih arti tiang zuarin ttan kan rak lak cio. Ramdang  bomnak piakhat telloin Lairam ih Baptist pawl ih suah pi mi  sumpai Ks. 170 milloins (Ks. 170,000,000/-) lai a rak cem. Palai pa (9) nih an nunnak an liam phah.

Cuhnu khal ah cawl cuang lo in. "Jesuh cu Bawi a si" timi thulu tar in CMC (Centenary Mission for Christ) ti’n Kawl le Vai lakah kan tuan thotho. Atu khal ah kan ruan rero lai. Chin Baptist Convention (the late ZBC) tang ah CBM (Chin Baptist Mission) tin kum 2013 ihsin 2028 tiang  Project tumpi tuah in Leitlun ih Laimi Baptist hmuahhmuah kom khawm in thlanglam Laitlang le Kawl le Vai pawl hnen ah  kan tuan hrih ding. American hram bun, Chin Baptist Association of North America (CBANA) khal in CBM tang ih Chindwin Mission Field ah Palai (33) thlah in Mission hna kan tuan rero.  Kum 2028 ah Chin Baptist Convention (the late ZBC) pi kum 75 a kim dingih cumi hnu khal ah Diamond Jubilee Mission (Holistic Mission) cu nasa sinsin in kan tuan ding. Hitivek ih Mission hna kan tuannak ah an thlarau lawng runsuah siloin an nuntu khawsak daan tiang runsuah dingah Baptist Mission cun a tumtah ringring. Curuangah fimthiamnak hrangah tlawng thatha an sak, Hardamnak hrangah Sizung thatha an din. Miharsa pawl an bawm ih tthansonak an khih hmuh. A naibik in simseh la Kawlram,  Yangon University pi khi Baptist Missionary pawl ih a hram rak tohter mi a si. Asinan, tusun ah cun tlawng sungih a ummi Judson Biakinnpi lawng hi Khristfa pawl nih an run co. Cuticun Khristian santhuanthu sungah siseh, tu ni ih a luang reromi santiluan sung khal ah Bawptist pawl cun Mission hnatuan cu a thupibik ah kan ret ringring ih Kan Bawipa Jesuh Khrih a raksal  lai hlan lo kan tuan hrih ding. Hi thu pawl ka zohsal tikah Pathian duhnak thawn a pialnak ka hmu lo ruangah Baptist ih um hi ka zahpi awlo ih ka duhbik thotho.

V. Baptist le Ttanrualnak

Baptist Kawhhran thuanthu kan hliahhlai tikah Baptist Kawhhran pawl cu ziangtluk in an lian hman ah an mah ten "Paksai" in an um dah lo. A bur a bur ih um pawl kan si. Thuthimnak ah Falam khua ih  Falam Baptist Church hi an mah te'n um bang sehla ziangtluk in zo an lian ding!!! Asinan, an mah lawng an um dah lo. An naihmi sumpai tla an mah lawng in an hmang dah lo. A pawngkam ih ummi Kawhhran pawl thawn hmunkhat te ah an um ih a naihmi tla an hlawm aw ringring. Cuvek in a naih aw deuhmi Kawhhran pawl hmunkhat ah kan um tlang ih cumi cu Association pakhat tangah kan kom khawm aw. Cumi Kawhhran tampi komkhawm aw mi Association cu a mah vek Association dang dang thawn an komkhawm aw lala ih cu mi cu Convention tiah kan ko. Cuticun ram tin ih Convention pawl cu an komkhawm aw lala ih Leitlun pi huap Baptist pawlkom (Baptist World Alliance) ah a hung cang ih cumi tangah kan zaten hmunkhat ah Pathian ram hrang ah hna kan tuan tlang.

Culawng hman siloin, Baptist pawl cun Greek tongih Oikoumene tiih an timi Pathian ih Innsungsang (The Household of God) timi pom hngettu kan si. Curuangah zumtu hmuahhmuah cu Kawhhran thlaihdannak umloin kan zaten Pathian ih Innsungsung ah sungtel kan si  tiah kan pom ( Zo ih Kawhhran hman "Mithi Kawhhran" tiah kan sawisel dah lo).  Thuthimnak ah Falam khua ah Falam Christian Council (FCC) timi pawlkom a um. Kawhhran tintian ihsin hi pawlkom ah an tel. Hi pawlkom hi Baptist pawl ih rak hoha ringring mi a si. Zung hrangah FBA in zungkhat pakhat tla a pek. Cuvek thotho in MCC timi Myanmar Council of Churches cu Yangon ah zung an nei ih hruaitu pawl cu Baptist ihsin an tambik ringring. World Council of Churches (WCC) cu leitlunpi huap Khristian pawlkom a si. Himi sung khal ah Baptist pawl cun nasazet in Kawhhran dang dang thawn hna kan tuan tlang. Curuangah Pathian ram hrangah  Kawhhran thlaihdannak um lo in, "Ttanrual cu cahnak" timi  thu hi a dik asile Baptist ih ka um hi ka sual lo tiah kan sangaw duh thotho.

VI. Baptist le  Mah Ke Tlun ih Dinduhnak

1953 kum ah Zomi Baptist Convention (ZBC) timi Baptist pawlkom cu Lairam ah an rak din. Hi pawlkom sungah Falam Baptist Associaton (FBA), Hakha Baptist Association (HBA) le Teddim Baptist Association (TBA) ti'n association pa (3) lawng an rak um. Sumlepai harsatnak tampi an rak tong. Asinan, Baptist kan pa le pawl cun ram dangmi hnenah bomnak paisa piakhat hman an rak dil lo. An mah ke par ih ding thei dingin an rak zuam. Cuih ziin cu tusunni tiang Chin Baptist Convention (the late ZBC) cun a run sunzom vivo. Kan neinung zet lonan, mi kan daw ve ce lo. Anthur hang le Thlahmai beu kan ei khal le kan hni siamsi thei thotho. Ziangah tile maih Loram sungih thlairah cu mi dang Loram sungih thlairah hnak in a thaw deuh ti'n kan ruat ruangah a si. America ram kan thlen hnu khal ah Baptist dik tak pawl cun American pawl hnen ihsin bawmnak diltu siloin a bawmtu ah kan cang sawn. US ram ih Laimi Baptist Kawhhran pakhat tla cu ABCUSA sung hman ah kum tin sumpai  thawhtambik lamah a ding ringring. Curuangah an pastor pa tla cu ABCUSA sungah E C  tiang a thleng ban a si. Hi thu pawl kan zoh asile Baptist pawl cu midiltu hnak in mi bawmtu, ziangmi in pek ding timi hnakin ziangmi ka pek thei ding timi lungput, mah ke tlun ih ding a duhtu Kawhhran kan si zia kan thuanthu sungah a lang a si.

VII. An Lungkhawng Man Zuar Sian a Si Lo

Siangbawi Arthur Carson le a nupi Laura te pahnih cu  March  15^th   1899 ah Lairam  Hakha khua ah an rak thleng. An thlen zaan ih an tontehmi thu cu Siangbawinu Laura Carson ih nganmi, "Pioneers' Trials, Trials and Triumph" timi cabu sungah hi tin a ngan,"A hmaisabik Hakha khua kan thlen zaan cu zaan hi a sau cuang ce. Kum zakhat lai a rei vekin ka thei. Ka mithli hnul phah in, "Arthur, hivek ramthing le ramcar ah hivek fihnungza minung pawl thawn cun ziangtin so kan um thei ding... kei ka lo umpi thei lo ding" ti ah ka ti ih Arthur cun nuam te'n hi tin i leh, "Cuvek in tong hlah hmen, Duhmi…. Daite'n ittaht tum sawn aw.  Zing khua a vang cing ding. Cutikah khua tleu mawi kan hmu leh ding. Kan kutken Bible bungcang te kha na mang nawn lo maw si, " Jesuh thawn ziangkim ka ti thei" timi kha......". Cuticun zinglam khua tleu hngak in kum 9 sung hna a tuan hnu April 1^th 1908 ni ah Siangbawi Arthur Carson cu a duhdawtmi a nupi le Laimi pawl tanta in Pathian tang sungah in colhsan. A ruak cu Dr.  E. H. East nih Hakha khua Missionary Compound ah a vui liam ta a si.  Siangbawi Arthu Carson ih thlanlung tlun ah lairam zuk an suai ih cumi tlun ah " Rev. A. E. Carson, First Missionary to the Chins, Born August 6, 1860, Died April 1, 1908" ti ah an ngan. Cuih lungtlep tlunih an ngantami ca cu tusun ni tiang Laimi Baptist pawl ih thinlung sungah phiahtheih nawnloin a run ngan aw cih vivo. 

Nuraltha Siangbawinu Laura cu a pasal ih a tansan hnu kum (12) tiang rori Laimi pawl hnen ah Pathian hna a run tuan ta. Tuih kan sak rero theumi hla (Hymn) fing 126 in let sak hlei ah Thuthangtha pa (4) le Tirhthlah tla in let sak. Laimi tampi Jesuh ke hram ih a hruai hnu, Lairam ih zing ni tleu mawi tantan in  July 19th 1942 ah America ram ah in tansan a si.

Laimi pawl hrangih nunnak rak pek hrihtu Baptist Missionary pakhat cu Siangbawi Rev. Dr. C H Cope a si. A mah hi a nupi thawn Laimi pawl  hrangah kum (30) sung rori Pathian hna rak tuantu a si. Fimthiamnak lam ah Laimi pawl mibang dingin lam in hruaitubik a si. Laica ngan daan in tuahsaktu le Teddim Bible in letsaktu khal a si. June 11, 1938 ah Pathian hnen ah in colhsan ih a hnatuanpi Arthur Carson ih thlanmual kap te ah an rak vui ve a si. Carson te nupa ih theh thei lomi hnatuan cu bawmtu dingah Baptist Missionary pakhat hnu pakhat Laitlang ah an ra ih Thlaraulam lawng siloin, fimthiamnak, hardamnak le kilkip thansonak hrangah thlanhripi putin, suurhan kianloin an rianmi Bawipa hna an rak tuan khawm a si. Hivek pawl ruah tik ah Baptist phahsan in bawmtu thatha hnen ih fehsan men ding hi thil harsa zet a si.

Curuangah Baptist ih ka umnak ka ttansan pakhat cu Missionary pawl, kan pulepa pawl ih lukhawng zuar sian a si lo ruangah a si.

 Thunetnak

Hi Cahram hi keimah vek "Ziangruangah Baptist Ka Si?" timi thei cuca lo pawl hrangah thathnemnak um pang sehla ti saduhthatnak thawn ka nganmi a si. Thungai ti ahcun Baptist Kawhhran tla sambaunak tampi nei mi Kawhhran a si ve. Cuhleiah Baptist thu cu keimah vek mihlawhsam zet in kan ngan tikah a hlawhsam sin sin. "Arbawm ih Tidai Khai Bang," an ti theu bang in hi cahram ah a dokmi le a ong tampi a um ko ding. A hahdammi kha lak tum in siatsuah theitu a um pang asile tansan dingah ka lo sawm hai.

Hiti'n ka thu ka netter hnik pei, kei mah hi Baptist pacang ka si ti fiangte'n ka thei aw. Cucu tuni tiang ka di a riam zet. Asinan, Baptist ka sinak hnakin ka di i riamtertu sawn cu  Jesuh thisen ruang ih “Rundammi Khristian” pakhat ka sinak zawnah a si. Hi zawnah hin kan zaten kutkawi aw in Pathian hnathiang ttuantlang cio uh si.

Khrih ah,

Biak Lian Thang

Battle Creek, USA.

Ronmi Cabu le Cahram pawl:-

1.       ABC,USA, "Baptist Distinctive and Diversity"

2.      ABC, USA, "We are American Baptist".

3.      Bill J. Leonard, "Baptist Ways: A History,".

4.      Gene E Bartlett, "These are Baptist".

5.      ZTC, "Chin Church History,"

6.      Articles…