Thuhmaihruai:
Billy Graham in, “Satan in na nunnak kha Jesuh Khrih zum lo
ding in in tuah thei lo a si ahcun, rundammi na si lo tiah a lo ti ringring
ding ih, rinhmainak nei ko a lo tuah ding.”[1]
Rundamnak ka ngah maw ngah lo, ka thih tikah vanram ah ka
thleng ding maw thleng lo ding ti theifiang lo ih kan umnak thu pathum in lo
sim ka duh.
1. Sualnak hi
rinhmainak a suah ter.
Zumtu in sualnak kan tuah thotho tikah, Pathian in kan
sualnak in hmu ih in hnong ding tiah an ruat. Curuangah, sualnak in rinhmainak
a suah ter. Mihrek in ka thin a tawi thotho lai, ka nun ka thin thei cuang lo,
tvp curuangah vanram cu ka co ding ka zum lo tiah an ti.
Hiti ih kan ruahnak cu Pathian cu sual hawltu palik vek ah
kan ruah ruangah a si. Asinan, Bible in Pathian cu palik vek tiah in sim lo.
Saam 145:8 sungah, “Bawipa cu mi duhdawttu le mi zaangfahtu a si; a thinhen a
har ih a hmunmi duhdawtnak in a khat.”
Mihrek in computer laksawng in a lo pek. Asinan a lo timi
cu, “Computer na nei dah lo ti ka thei asinan na tham tikah na palhnak a um
pang ahcun ka la sal ding. Na cangan le computer tham daan ah na palh thei lo”
lo ti sehla cupa cu ziangtin na ruat ding? “A cang thei lo, computer hman ka
tham dah lo pi, ka palh pang thei si” tiah kan ti cio ding ka zum.
Asinan, minung tampi in Pathian cu cuvek minung dingah kan
ruat. Kumkhua nunnak in pek ih, asinan, sualnak kan tuah pang ahcun lasal
dingah kan ruat. Asinan, Pathian cu cuvek in kumkhua nunnak in pe lo. Kumkhua
daih in fa sinak in pe a si. John 10:28
“An hnen ah kumkhua nunnak ka pek ih ziangtik hmanah an thi nawn lo ding.
Zohman in in long thei fawn lo ding.” Khrih ih kut sung ihsin zohman in in la
thei nawn lo ding.
2. Phurnak le
rinhmainak
Zumtu tampi in rundamnak ngahtu an sinak kha an phurnak le
taksa ih theihnak ah an bunawk ruangah a si. Camping le crusade ah an phur le
an mitthli a tla, an tapi. Cutikah, ka piangthar rori tiah an ruat aw. Caan a
rei deuh tikah cu pawl kha an hlo vingvo ih piangthar, kumkhua nunnak neitu ah
an zum aw nawn lo. Ziangah cutin an cang tile an phurnak le lungawi riahsiatnak
parah rundam an si le si lo kha an bun awk ruangah a si.
Minung ih phurnak cu a tum a kai thei ringringmi a si. Cumi
parih na zumnak na bun ahcun, rundam na si le si lo na fiang dah lo ding.
3. Rundammi ka si zo
ti ih zum cu hngal a si tiah an ruat.
Mi hrek in “ka thihtikah vanram kan thleng ding tiah ti aw
tu pawl cu hngal le puarthau a si” tiah an ti. Asinan cumi a si lo ziangahtile
“Pathian in in rundamnak cu kan that le fel ruangah silo; a zaangfahnak liolio
ruangah a si.”
Efesa 2:8-9 –
“Ziangahtile nannih cu Pathian zaangfahnak zaarah zumnak in rundam nan si.
Cuhrangah zohman porhawk ding a si lo.”
Rundammi ka si zo timi cu kan felnak le thatnak ruangah tiah
kan ruah ahcun, cucu hngal le puar a si. Asinan, rundammi ka si kan ti awk
theinak cu Khrih ruangah a si tiah kan ti ahcun a dikmi a si. Mihrek in, “Kei
cu ka thih lawngah vanram ka kai le kai lo ding ka thei aw ding” tiah a ti awtu
cu maih felnak le thatnak rinsan awtu pawl an si sawn.
Thunetnak
Rundammi kan si taktak, vanram cu ka ta a si tiah na ti
theinak dingah:
1.
Nangmaih felnak le thatnak kha rinsan aw hl ah.
2.
Thinlung phurhnak khal rinsan hlah.
3.
Pathian ih zaangfahnak thuthangtha zumnak thawng
in rundam ka ti timi Bible ih simmi lawng rinsan aw.
No comments:
Post a Comment