Jesuh cu Bawi a si timi ih Sullam

Fili 2:9-11

1.     Jesuhi h sinak: rundamtu le thuneitu, luubik khal a si.

Laimi tampi in Jesuh ih thu kan sim tikah, sualnak Satan sal sungih sin rumdamtu lawngah kan sim theu. Asinan, thuneitu le luubik a sinak kan sim tamtuk lem lo. Pathian thungai in vancung sunlawinak khal taan in thihnak tiang tuar in Satan, sual sal sung ihsin in runsuak tikah, Pathian in a saangbik ah a khaisang a si. Pathian in zo vek hnen khal ah siseh, ziangvek caan khal ah siseh, thuneitu luubik si dingah a ret zomi a si.

Caan tampi ah Jesuh cu na nunnak ih Bawi si ter aw kan ti theu. Bawi kan si ter lawngah Bawi si ding khin kan thinlung sungah ka ruat theu. Asinan, Jesuh cu na si ter a tul lo. Bawi a si cia. Na si ter lo khal le Bawi a si cia zo. Cuhnak in, na nunnak kha a maih hruainak tang ah ap aw sawn aw. Ka thuthu in ka um lo ding; na thuthu in ka um ding tiah ti sawn aw. Cucu, mirang in surrender an timi cu a si.

Jesuh kha thuneitu bik le hruaitu bik ih a re lo tu cu ziang thawn kan bang aw tile cawhmai ah cawleeng retu thawn kan bang aw a si.

2.     Jesuh cu ka Bawi ah ka cohlang kan ti tikah ziangmi si a sullam

Minung in nun daan phun hnih kan nei. Private life, maih pumpak ih theihmi nun daan le Public life, mipi ih theihmi nun daan ti in pahnih kan nei. Cumi a pahnih ah Bawi, thuneitu ah ka pom a si tinak a si.

Mi tampi cu mipi ih in theihmi nun daan fang lawngah Jesuh cu Bawi le thuneitu bik vek ah kan re theu. Mi hmai ahcun, Pathian tihzah zet, thlacam zet, Bible siar zet, Pathian duh lo mi hrial hluahhlo ngam kan um. Asinan, private life, maih pumpak ih nun ahcun, Jesuh hi thuneitu bik ah kan re duh nawn lo.

Jesuh ih thu a neih theilonak hmun cu Satan ih umnak a si. Na pumpak nun ah Jesuh cu Bawi le thuneitu ih a retu pawl cu an mithmai, awkam le nun daan ah a hung lang a si. Jesuh kha thuneitu ih kan ret lonak hmuahhmuah cu Satan ih a tlanleen ngamnak le a buu ah a tuah a si. Cu tawk hmun ah, zumnak, ruahsannak nung, le duhdawtnak, lungawinak taktak a um lo.

Jesuh hi na ruahnak, na thinlung, na hmurka le nun daan pawl ah thuneitu a sibik a si maw? Dr. S. M. Zwemer cun, “Jesuh cu na nunnak zate ih Bawi a si lo ahcun, na Bawi a si lo lawlaw tinak si.” If Jesus is not Lord of all, He is not Lord at all. Pathian cu Jesuh cu ziang hmuahhmuah ih Bawi le luubik ih a retmi a si. Nang le kei in kan duh caan lawng ih Bawi vek ah kan ret ih, kan duh lo caan ah Bawi ah kan ret duh lo ahcun, na lal, na Bawi a si lo lawlaw tinak a si.

3.     Jesuh hi ka Bawi a si a ti taktak tu ih tuah dingmi

Mi pakhat in, “Jesuh hi ka Bawi si dingah ziang ka tuah ding?” tiah in sut bang sehla, kan leh sal dingmi thu cu, “Jesuh ih duhnak kha hmaisa deuh ah re aw” “Yield your life to him” ti ding a si.

3.1. Absolute surrender - ziangkim ah thuneitu si ter a tul.  

Jesuh khrih ih thuneihnak le duhnak thlun dingah kan thinlung le nunnak kan ret/hlanawk ding lawng hi a thupibikmi a si. Jesuh cu na nunnak ih thuneitubik si dingih na thinlung na pek vetein, Amah in hnatuan a thok ding  asi. Jesuh hnak ih thuneitu hi na nunnak ah ziangmi na nei lai?

Na nunnak ah, “Private - keep out” “Don’t bother me” timi sign te na tarnak hmun a um pang maw? Cumi na pek lai hlan lo, Jesuh cu na Bawi a si lo lawlaw. Na duh caan lawng ih Bawi na retmi cu na Bawi/na lal a si taktak lo. Bawi le siangpahrang taktak cu mipi in an thlun sawn.

Ka nunnak ah Bawi Jesuh ih thu a neih thei lonak hmun le nun in, kan thinlung le taksa thazaang a derdai ter, zianghman ih siar awk lonak a thleng,  lungawinak le hnangamnak pawl a hloh ter theh a si.

Jesuh thuneitu pawl ih neihmi “A” pathum: Anytime, Anywhere, Any cost.

Asinan, kan nunnak ih private khan khal ah Bawipa Jesuh thawn tlangleeng in, kan um ahcun, Pathian ih lungawinak le hnangamnak thawn kan khat a si.

Psalm 16:11    Na umnak ah lungawinak a kim ih,

                        Na ban thacak ah nomnak kumkhua

                        in a um.

  

3.2. Acknowledgement of his ownership - a ta ka si ti kan thei awk ringring a tul

1 Kor 6:19-20

19Nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathian ta nan si. 20Man pek ih leimi nan si. Curuangah nan taksa cu Pathian sunlawinak ah hmang uh.

Man ih lei zomi kan si ruangah, na duhduh ih na thinlung, ruahnak, le nunnak hi hman theinak na nei nawn lo ti hi kan fiang a tul. Pathian ih thlarau thianghlim umnak biakinn a si timi hngilh hlah aw. Na pastor pa Thlarau Thianghlim nitin, khui tawk ih na feh lai caan khal ah a biakinn cu a umpi ringring a si.

3.3. Unreserved Obedience - a thu thluntu si a tul.

Kannih cu Jesuh Khrih thisen ih leimi kan si zo ruangah, Jesuh Khrih cu ziangkim ah thuneitu siseh kan ti ahcun, kan tuanvo thubikmi cu a thuthlun ding hi a si. Thuthlunnak tel lo in, na Bawi a si thei lo. Kan thlun dingmi cu Pathian ih tongkam siar ih, a duhmi kha thlarau ih in sim zirhmi kha thlun ding a si. Cumi kan thlun ngam vek in thlarau lam khal ah kan tha a cak deuhdeuh ding.

Mary le Joseph: Mary in, “Bawipa kei cu na salnu ka si. Na simmi bang in ka parah cang hram seh” (Luke 1:38) a ti tikah, Pathian in a hrangah hnatuan a thok ve.

Luke 6:46 - Jesuh in, “Ziangah so ‘Bawipa, Bawipa,’ tiah in ti ih ka lo sim mi cu nan tuah fawn lo?” tiah a sim.

Mi pakhat in, Dr. Scroggie ih thusim a ngai hnu ah a hnenah ra in, “Jesuh cu ka bawi ah ka cohlang duh tuk. Asinan, ramdang ah missionary in i thlah pang ding ti ka phang; cumi cu ka paih lo” tiah a ra ti. Dr. Scroggie cun, “Ka paih lo Bawipa timi cu na Bawipa kha tihzah upat lo thawn a bang aw.” Cahnah pakhat le khedaan pakhat a pek ih hitin a sim. “Curuangah, thu pahnih lawng hril ding na nei. ‘Ka paih lo’ timi na hlon ding maw, ‘ka Bawipa’ timi na hlon ding cumi pahnih lawng a um a ti. Cu nu cun a ruat sal ih, mitthli thawn, “ka paih lo” timi ka hlon ding tiah a sim ih, cuih ni in, Jesuh cu ka Bawipa na si tiah a au!

Thunetnak

1.     Jesuh ih sinak: sualnak sal ihsin in runsuaktu lawng a si lo. Jesuh cu luubik si ringring dingah Pathian in a retmi a si. Luu bik ih re lo tu cu caw hmai ah cawleeng a retu pawl kan si.

2.     Jesuh cu ka Bawipa a si tiah kan ti tikah a sullam cu midang ih hmuhmi ka nunnak le keimah lawng ih theihmi nunnak ah Jesuh ih thuthu in ka nung ding tinak a si. Amaih thu ih uk theilonak hmun le caan a neih ahcun, na Bawi a si lo lawlaw tinak a si.

3.     Jesuh hi kan Bawi taktak si dingah kan tuah dingmi cu:

a.     Ziangkim ah thuneitu si ter ding. Anytime, Anywhere, Any Cost. Maih duh caan lawng ih amaih hruai dingmi ap awmi si lo ding.

b.     Ka nunnak Thlarau Thianghlim umnak biakin ka si ti theih ringring ding. Riahsiat ter hlah uh si.

c.     A thu thluntu si ding. Mary bang in, “Kei cu na sal ka si” ti ding.