Love, Listen, and Lead

Pathian Sunlawinak Hrangah Ziangtin Kan Hruai aw Ding?

San No Thuan

Thuhmaihruai

Zokhal hruaitu kan si theh. Midang kan hruai lo hman ah, kanmah le mah tal cu kan hruai aw a si. A sia lam ah maw, a tha lam ah na hruai aw timi cu thuhran si sehla, khui lam khal si sehla na hruai aw a si. A hlei in, innsang ah, pawlkom ah, Kawhhran ah ti in kan hung pawlkomawk tikah, ziangtin kan kaihruai aw ding timi cu a thupi zet. Himi cahram te sungah khui tawk hmun khal ah hman theimi kaihhruaitu thinlung, ruahnak, cangvaih daan ding tawi zawng te in ngan ka duh. Zokhal Pathian sunlawinak hrangah tuan cu kan duh zet nan, ziangtin kan tuan ding, kan hruai aw ding timi kan thei theu lo. Himi catial sungah Pathian sunlawinak hrangah a tuan daan le hruaiawk daan phunthum, Mirang in “Three L” timi thu lo hlawm ka duh.

1. Love (Duhdawtnak) (Jn 13:34)

            Pathian ih in duhdawtnak vek ih duhdawt aw in hruai aw ding kan si. Pathian ih in duhdawt daan cu mi pakhat kha duhdawt ding a tlak lo zet lai ah a ttulnak kha va tuah sak le va pek khi a si. Cucu Pathian in kan par ih in tuah sak daan a si. Kan tlingtlak lo zet lai ah Pathian cun, kan ttulmi kha in pe ringring a si. Nun sim ttul khal le in sim, thluasuah pek a ttul khal le in pek. Sual ngaithiam kan ttul tik khal ah ngaithiam kan tlak lo zet cing khal in in ngaithiam. Asinan, Pathian in kan duhmi hnak in kan ttulmi in pe ringring sawn timi hi kan theih ringring a ttul.

A caan ahcun, duhdawtnak taktak cun, kan tuar dingmi a si khal le, a ttul ahcun, ral tha zet in a ttulmi cu sim awk a tul. Jesuh khal duhdawtnak thawn a khat ko nan, Jerusalem biakinn sung cu pumsum leilawnnak ah an hman tikah, Pathian duh lo mi a si ti a hmuh cun, ral tha zet in an thil zuarmi pawl thawn a dawi hlo theh mei a si kha! Asinan, Jesuh cuti ih a tuah duh tikah, midang siatsuah duhnak, mi dang va uk duhnak le mi nahsuah duhnak thinlung ruangih a tuahmi a si lo. Pathian thu sawn ih an mipi an feh theinak dingah duhdawtnak thawn raltha zet ih a tuahmi sawn a si.  

2. Listen (Ngai aw) (Phil 2:3,4)

            Midang ih tulnak le thupi ti ih an ruahmi kha ziang a si timi ngai ringring aw. Mi pakhat in minung cu kaa pakhat lawng a nei dingih hna pahnih a nei ding a ti. A sim duhmi cu mal deuh in tong in tam deuh in ngai ding timi hi a sim duhmi a si.

            Phil 2:4 sungah, “Nanmah duhnak lawng si loin midang in an hrangah a thupi bikih an ruahmi kha a hmuhzia thiam ve uh.” Midang ih thupi ti ih an ruahmi kha a hmuhzia thiam hi Bible ca ih in zirhmi a si. Midang ih thupi timi ngai sakkhi midang kha ttihzah upatnak pek cu a si. Lei tlun ih kan nun sungah pakhat le pakhat upat awk thiamnak hi a thupi ngaingaimi a si. Upatawknak a um ruangah, pawlkom timi hi a um ih, rampi khal hi a ding. Upat awknak a umlonak hmun ahcun, buainak, thu-elawknak le daan nei lo ih kekarnak a tam. Curuangah, upatawk a thiammi miphun cu miphun pi khal an cang ih, an tha khal a cak.

            Upat-awknak ti tik ah, kan ttong daan ah le kan umtu daan khal in, midang kha cawisan thiam, hmun kian (osa) thiam, a thil tha tuahmi kha hmuhsak thiam, thupi ti ih an ruahmi kha hmuh sak thiam ih thupi ih ruahsak ve khi a si. A hlei in, Jesuh Khrih sung ah Pathian in kan sinak in hmuh daan in, Pathian ih fanu/pa ti ih, upat thiamawk khi a si.

3. Lead (Hruai aw) (Mk 10:45, Phil 2:5)

            Kaihhruaiawknak timi cu tumtahmi cang suak ding ih hruaiawk khi a si. Minung phunthum an um. Phun khatnak, kawhhran ah ziang a cang timi thei lotu; phun hnihnak pawl cu, mi in ziang an tuah timi zoh mentu; phun thumnak, tumtahmi cang suak dingah ziang ka tuah ding timi a ruat ih, Pathian a duhdawt ruangih a tuantu pawl an si. Himi a pathumnak pawl hi kan miphun dam tertu le mi kaihruaitu pawl cu an si.

            Asinan, cuti ih kan kaihhruaiawk tikah, Jesuh khal in mi fapa hman mi ih renmi (Bawi; midang thu fial vohvoh mentu) si ding ah a ra lo, midang riantu (servant) dingah a ra a si tiah a sim (Mark 10:45). Curuangah, duhdawtnak sung ih feh timi cun, midang pawl an nun famkim theinak ding hrangah, mi va ttanpi le kaihruai khi a si. Kan suh awk ringring dingmi cu kei hi midang ih tulnak bawmtu maw ka si, dawnkhamtu sawn ka si timi hi a si.

            Ka tuanvo a si lo ti in daite in tuan tulmi zoh men hlah. Ding awla, tuah aw. Pathian in nangmah kha hi tuu rual pawl kha ruahsannak le daihnak pe dingah, Amah aiawhtu dingah lo hman a duhmi na si.

Tlaangkawmnak         

Pathian sunlawinak hrangah kan innsang, kan rualpi, le kan Kawhhran mipi pawl ziantin kan hruai aw ding?  

1.     Love: Duhdawt tlak lomi va duhdawttu sinak in

2.     Listen: Midang ih thupi timi hmuhsaktu sinak in

3.     Lead: Pathian ih duhmi famkimnak hrangah midang hngaktu si lo in, ziang ka tuah theimi a um ti ruat in, mah rori tuantu sinak in