Lungawi Thusimnak ih Huham Cahnak

By San No Thuan

America ah hin, November thla ih a zarh neta biknak tlawngkai nili ni hi rampi a cozah in lungawi thusim ni (thanksgiving day) tiah ni a khiah sak. Hi lungawi thusimnak ni ah zo pawl hnen ah lungawi thu kan sim ding ti hi thusuhnak tampi a um. Thu pahnih in tar langah ka duh. Zo pawl hnen ah lungawi thu kan sim ding? Lungawi thu ziangtin kan sim ding? Lungawi  thusim thiam cu thansonak a si zia pawl a tawi zawng in ngan ka duh.

 1. Zo pawl ih hnenah lungawi thu kan sim ding?

1. A pakhatnak ih lungawi thu kan sim dingmi cu nitin te lam in hruaitu le thluasuah in petu Pathian hnen ah lungawithu kan sim ding. Kan nunnak ah Pathian ih thluasuah in pekmi pawl siar salnak caan a si.
1. Na zalennak
2. Na neihmi sum le saw
3. Na fimnak le thiamnak
4. Na damnak
5. Na inn sungsang tvp….
2. Kan tlun ih thil tha a tuahtu pawl parah lungawi thu sim ding kan si.
1. Na nulepa
2. Na rualpi
3. Na unau, nupi, pasal
4. A lo bawmtu pawl tvp…

2. Lungawi thu ziang tin kan sim ding?

Lungawi thu kan sim daan cu kan mai duhmi hnak in an mai duhmi le tulmi zawng sawn in sim sehla, an lungawi a awi sawn ding. Caan tampi ah, innsaangnu in a duhmi cu innsaang thilri tha le mawi te’n um ding. Siiti le fang khopkham te in um ding. A birthday ah thil thar laksawng pakhat khat leisak ding. “Ka lo duh” tivek men hi an nih ih an ruahmi le theihtheimi duhdawtnak a si lo. Tuluk tong in na sim rero nan, an nih ih theihmi ttong cu Japan ttong lawng a si thei men. Amai theih ding zawn in lungawi thu kan simthiam a tul.

3. Lungawi thusim thiam cu thansonak ih hram a si.  

1. Lungawi thusim na thiam le bawm duhtu tam na nei sin ding. Lungawi thu na sim a si le na thinlung a nuam ding ih, midang khal an thinlung na nom ter sin a si. Thuthimnak ah, September 2008, Dallas khua ah ABC, USA in confernce an tuah ih ka va kai ve. Cu tawk ah thil mawi zet pakhat ka zir ngah. Second World War lai ah, Japan le American pawl an do awk ciamco ih, America ih ummi Japan pawl cu concentration camp ah American a cozah in a khum ih a hrem. Cui a hrem laifang ah mirang pastor hrek khat in an rak tuam hlawm ih an zoh tha zet. Cumi thu cu ABC,USA ih Asian Ministry lam kaitu Rev. Florence Li in mipi hmai ah lungawi thu a sim ih, a rak bawm dahtu mirang pawl kha laksawng peknak le sunloih upatnak a pek. Cumi lungawi thusimnak in a dang mirang pawl khal kha tulai fang ih a ra reromi refugee pawl bawm ding ah an thinlung a thangphawk ter a si. Curuangah lungawi thusim na thiam le na thangso sin ding.

2. Lungawi thusim na thiam le khui tik hman ah na vaivuan lo ding. Kawltong in auhchi luat, “sinak hngilh aw” tiah kan timi khi lungawi thusim thiam lo tu pawl an si. Lungawi thu sim kan thiam lo tikah, a tui’ kan dinhmun cu kan mah te ih ding thei le si thei vek ah kan ruat aw ih, kan thinlung cu a hung hngal ih a puarthau. Midang bom khal kan tum nawn lo ih, midang hrangah le Pathian hrangah mi santlai lo ah kan cang dah ta. Cumi si lo ding in, ni tin thlawsuah kan donmi hi Pahtian ta a si ti thei in, Pathian par ah le, Pathian in cui’ thlawsuah pawl pe ding ih a hmanmi minung pawl parah lungawi thu kan sim ringring a tul. Cu tikah, hmailam ah ziangtin ka feh ding timi fiang te in kan thei ih, mi vaivuan ah kan cang lo ding.