Pathian Lung a Awitertu Nun Daan

Thuhmai hruai:

Tui sunah, kei ka nun mansan hi ziang a si? Pathian in ziang ruangah in sersiam si pei ti a thei lo ih a vak vaimi kan tam zet. New York feh ding a si nan, Washington lam ih a pan ciamco kan tam tuk lai. Bible ca in kan nun mansan cu ziang a si ti ziang tin in zirh?

Pathian lungawi  ter dingah ah sersiammi kan si.

·      Saam 14:2 - Minung lakah fimnak a neitu le Pathian a hawl ih a biatu an um maw? ti theih duh ah, Bawipa in minung pawl cu,Vancung ihsin a run zoh.

·      Efe. 5:10 - Bawipa ih lungawinak kha hawl uh.

Pathian hi ziang kan tuah le a lungawi, hnisuamso mithmai thawn a um? Noah ih nunnak in Pathian a lungawi tertu nun cu ziang a si ti kan zir thei.

1. A mah kan duhdawt bik tikah Pathian a lungawi.

·      Seem 6:8 Sikhalsehla Noah parah cun Bawipa cu a lung a awi.

·      Seem 6:9-10 Noah ih faale pawl cu hi pawl hi an si: fapa pathum a nei ih Shem, Ham le Jafet an si. Noah cu mi ṭhazet a si ih acuih san ahcun amah pakhat lawnglawng Pathian ih lungkimmi a si. Pathian thawn a umtlangmi a si.

Pathian in Noah par ih a lungawinak cu Pathian thawn pawlkom (fellowship/walk with God) aw ringringtu, feh tlaangtu a si a ti. Thu maksak zet a simi cu a saangbik Pathian in kan mah thawn pawlkomawk tlaang a duh timi hi a si. Jesuh in curuangah in zirhmi cu Pathian kha duhdawt ve ding hi a thupi bik tiah in sim.

·      Matt. 22:37 Jesuh in, “Bawipa na Pathian cu na thinlung zate, na nunnak zate le na ruahnak zate in na duhdawt pei.”

Kan nun man san cu Pathian hi midang le thil dang hnak in duh bik ding in fial. Pathian kan duhdawt timi cu thil dang le midang hnak in amah thawn pawlkom awtu le nung tlaangtu kan sinak khi a si.

2. Amah kan rinsan tikah Pathian a lung a awi.

·      Heb. 11:7 Noah kha hmailam thu-ah Pathian in ralrinnak a pekmi a theih theinak cu a zumnak ruangah a si. Pathian thu a ngai ih long a tuah ih cuih long sungah amah le a innsaang himte in an luat. Curuangah leilung cu hnonnak a tong ih Noah cu a zumnak ruangah dingnak Pathian hnen ihsin a co.

·      Seem. 7:2 Saram thiang ei ṭha phunkim in phunkhat ah khuah sarih ciar keng aw; a sinain a thiang lo ramsa cu phunkhat ah a nu le a pa khuah khat ciar lawng la aw.

·      Seem. 7:5 Cule Bawipa ih thupekmi vek cekci in Noah cun a tuah ṭheh. Noah cu tipi thuanthum thawn peng zaza in a hlatnak ah a um. Asinan, Pathian lawng sak aw a ti tikah, Pathian a rinsan ih, a sak mei.

2.1. Pathian rinsan timi cu?

Pathian cu ka hrangah thil thabik remruat tu a si ti zum khi a si. Ziangah tile a ruahnak cu kan ruahnak hnak in a sang sawn. 

·      Is. 55:9       Van tla khi leilung hnakih a saang bangtuk in Ka ruahnak le ka lamzin cu nan ruahnak le nan lamzin hnakin a sang sawn a si.

Midang ih mithmai hnak in Pathian ih mithmai zoh ih Amai thu lawng ngai khi a si.

·      John 14:15 Jesuh in, “Keimah in duhdawt ahcun ka thukham pawl nan thlun ding.

·      John 15:12 Ka thukham cu hihi a si: Keimah ih ka lo duhdawt vek hin nannih khal pakhat le pakhat duhdaw aw ve uh!

Pahtian kan rinsan timi cu ziangkim Pathian in ka hrangah a tha bik a remruat ti ring in, Amai mithmai lawng zoh in a duhmi lawng tuah khi a si.

3. Lungawi thusim kan thiam tikah Pathian a lungawi.

Seem. 8:20  Cule Noah cun Bawipa ih hrangah biakṭheng a don ih a thiangmi ramsa le vate tla phunkhat in pakhat ciar a lak ih meisa biakṭheng parah Pathian hrangah mei-ur thawinak a pek.

·      Noah cun Moriah tlaang par ah a lawng a taan tikah, a leng ah a suak ih Pathian a thangthat a si.

·      Pathian cu lungawi thiammi kan si ding hi a duh bik.

·      Miphar pahra pawl lak ah pakhat lawng a ra kir sal tikah, Jesuh in a dang pakua pawl teh tiah a rak sut (Luke 17:12f).

4. Ziang ruangah lungawi thusim thiamtu si ter in duh si pei?

·      Na thinharnak pawl a lo dam ter ding. Kan riahsiatnak cu lungawi thusim kan thiam lo ruangah, a siatnak lawnglawng kan zoh ih buainak a suak. Pathian ih thlawsuah siar aw la, na tonmi harsatnak cu sim tlak lo te a si ding.

·      Na zumnak a lo fek ter sin ding. Ziangah tile Pathian in lam a lo hruai daan a lo cing mang ter ding.

Thunetnak

Pathian in kan nunnak hi leitlun ih a sersaimnak san cu Pathian lungawi tertu si ding ah a si. Himi na theih a si ahcun, “ziangtin ka nunnak ah nomnak ka ngah thei pei?” timi ihsin, “ziangtin ka nunnak ihsin Pathian in lungawinak a ngah thei pei?” timi hi na sut aw sawn ding. Paul cun, kan tumtahmi cu Bawipa lungawi ter ding hi a si a ti.

·      2Cor. 5:9 - Ziangkhal sisehla leilung kan inn ih kan um ah siseh, khitawk kan inn ih kan um ah siseh, ziang hmuahhmuah hnakin amah kan lungawiter ding kha a thupi bik a si.

Ziang vek nun ah Pathian a lungawi?

1.        Pathian kan duhdawtbik tikah a lungawi. Duhdawtbik timi sullam cu Pathian thawn kan pawlkom aw ih kan fehtlaang ringring ih, a lungawinak kan hawl khi a si.

2.        Pathian kan rinsanbik tikah a lungawi. Pathian rinsanbik timi cu ka hrangah Pathian in a tha bik khua a khaang ringring ti thei ih, a mithmai lawng zoh khi a si.

3.        Lungawi thusim kan thiam tikah a lungawi. Lungawi thusim thiam ding ziang ah in duh sak? Lungawi thusim thiammi lungput cu:

a.     Asiatnak hnak in a thatnak zoh in lungawi thu kan sim tikah, kan lungawi a awi. Thinhennak cu a sia lam lawnglawng kan zoh theu ruangah a si.

b.     Pathian ih rinsan ngam sinnak in neih ter.

Reference: Rick Warren, “What Makes God Smile?” in The Purpose Driven Life (Grand Rapid: Zondervan, 2002), 69-76.